Eleven topics for the full realisation of all aspects (AA chapter 4)

II.B.intro

2. Catuḥprayogopalakṣakāḥ ṣaṭtriṃśad dharmāḥ / tatra sarvākārābhisambodhopalakṣakā ekādaśa dharmāḥ, mūrdhābhisamayopalakṣakā aṣṭau dharmāḥ, ānupūrvikābhisamayopakṣakāstrayodaśa dharmāḥ, ekakṣaṇābhisambodhopalakṣakāścatvāra iti ṣaṭtriṃśad bhavanti /

II.B.i.intro

(a) sarvākārābhisambodhopalakṣakā ekādaśa dharmāḥ / 1. ākārāḥ, 2. prayogāḥ, 3. guṇāḥ, 4. doṣāḥ, 5. lakṣaṇāni, 6. mokṣabhāgīyam, 7. nirvedhabhāgīyam, 8. avaivartiko gaṇaḥ, 9. bhavaśāntyoḥ samatā, 10. anuttarā kṣetraśuddhiḥ, 11. upāyakauśalamityekādaśa dharmāḥ sarvākārābhisambodhamupalakṣayantīti abhisamayālaṅkāre dvābhyāṃ kārikābhyāmupadarśitam / tathā hi - || ākārāḥ saprayogāśca guṇā doṣāḥ salakṣaṇāḥ / mokṣanirvedhabhāgīye śaikṣo 'vaivartiko gaṇaḥ // samatā bhavaśāntyośca kṣetraśuddhiranuttarā / sarvākārābhisambodha eṣa sopāyakauśalaḥ // (ka) lakṣaṇam: trisarvajñatāsambaddhānāṃ trisaptatyuttaraikaśatākārāṇāṃ bhāvanāmayyā prajñayopāttatvena vyavasthāpitaḥ satvayogaḥ sarvākārābhisambodha iti lakṣaṇam / (kha) paryāyāḥ: bodhisattvamārgaḥ, pāramitāmārgaḥ, sattvayogaḥ, ākārajñatāprayogaḥ, mārgajñatāprayogaḥ, sannāhapratipattirityanarthāntaram / (ga) bhedaḥ: ākāradṛṣṭyā trisaptatyuttaraśatam, prayogadṛṣṭyā viṃśatiḥ bhedā bhavanti / (gha) avadhiḥ: mahāyānasambhāramārgamārabhya antimakṣaṇasthabodhisattvāvasthāparyantamasya sīmā bhavati /

II.B.i.1

1. ākārāḥ / ākārāṇāṃ lakṣaṇādikaṃ sarvam abhisamayālaṅkāre pañcabhiḥ kārikābhiḥ savistaraṃ samyagupavarṇitam / (ka) lakṣaṇam: sarvākāramārgavastujñānasaṃgraheṇa trisarvajñatākārāṇāṃ bhāvanāmayaṃ prayogavaiśiṣṭyam ākārāṇāṃ lakṣaṇamiti / (kha) bhedaḥ: trisaptatyuttaraśatamākārāṇāṃ bhedā bhavanti / tathā hi - sarvajñatāyāḥ saptaviṃśatiḥ, mārgajñatāyāḥ ṣaṭtriṃśat, sarvākārajñatāyā daśottaraśatamiti trisaptatyuttaraśataṃ bhedāḥ / caturāryasatyeṣu prathamataḥ trayāṇāṃ satyānāṃ pratyekaṃ catvāra iti dvādaśa, mārgasatyasya caturthasya pañcadaśa ceti sarvajñatāyāḥ (vastujñatāyāḥ) saptaviṃśatirākārāḥ / tathā coktam abhisamayālaṅkāre - || asadākāramārabhya yāvanniścalatākṛtiḥ / catvāraḥ pratisatyaṃ te mārge pañcadaśa smṛtāḥ // samudayasatyasya aṣṭau, mārgasatyasya sapta, duḥkhasatyasya pañca, nirodhasatyasya ṣoḍaśa ceti mārgajñatāyāḥ ṣaṭtriṃśad ākārā bhavanti / tathā coktam abhisamayālaṅkāre - || hetau mārge ca duḥkhe ca nirodhe ca yathākramam / aṣṭau te sapta pañceti ṣoḍaśeti ca kīrtitāḥ // śaikṣaśrāvakāṇāṃ saptatriṃśad bodhipakṣyā vastujñatāyā ākārāḥ, bodhisattvānāṃ mārgajñatāyāḥ catustriṃśat, buddhānāṃ sarvākārajñatāyā asādhāraṇā ekonacatvāriṃśacceti sarvākārajñatāyā daśottaraśatam ākārā bhavanti / tathā coktam abhisamayālaṅkāre - || smṛtyupasthānamārabhya buddhatvākārapaścimāḥ / śiṣyāṇāṃ bodhisattvānāṃ buddhānāṃ ca yathākramam // saptatriṃśaccatustriṃśattriśannava ca te matāḥ / trisarvajñatvabhedena mārgasatyānurodhataḥ // jñānākārebhyaḥ pūrvam arthākārāḥ parijñātavyā iti prathamataḥ trisaptatyuttaraśatam arthākārā upadarśitāḥ /

II.B.i.2

2. prayogāḥ / prayogāṇāṃ lakṣaṇādikam abhisamayālaṅkāre catasṛbhiḥ kārikābhiḥ savistaraṃ suspaṣṭamupavarṇitam / (ka) lakṣaṇam: jñātṛjñeyayoḥ vastumārgākārāṇāṃ ca śamathavipaśyanāyuganaddhabhāvanāsvarūpaṃ niḥsvabhāvatāniṣprapañcātmakaṃ jñānamevātra sākṣānnirdiṣṭasya prayogasya lakṣaṇamiti / athavā - trisarvajñatānāṃ yāvadākārāṇāṃ śamathavipaśyanāyuganaddhabhāvanāmayyā prajñayopāttaḥ sattvayoga evātra nirdiṣṭaprayogasya lakṣaṇam / (kha) bhedaḥ: viṃśatiḥ prayogāṇāṃ bhedā bhavanti / tatra svarūpataḥ pañca, pudgalāśrayadṛṣṭyā aṣṭau, prajñāpāramitābhāvanāpāripūryupāyadṛṣṭyā catvāraḥ, prayogaphaladṛṣṭyā dvau, kṣiprabhāvanādṛṣṭyā eka iti viṃśatiḥ / svarūpataḥ pañca: anavasthānaprayogaḥ, ayogaprayogaḥ, gambhīraprayogaḥ, duravagāhaprayogaḥ, apramāṇaprayogaḥ / pudgalāśrayadṛṣṭyā aṣṭau: kṛcchracirābhisambodhaprayogaḥ, vyākaraṇalābhaprayogaḥ, avinivartanīyaprayogaḥ, niryāṇaprayogaḥ, nirantaraprayogaḥ, āsannābhisambodhaprayogaḥ, kṣiprābhisambodhaprayogaḥ, parārthaprayogaḥ / upāyadṛṣṭyā catvāraḥ: avṛddhyaparihāṇiprayogaḥ, dharmādharmādyanupalambhaprayogaḥ, acintyaprayogaḥ, avikalpaprayogaḥ / phaladṛṣṭyā dvau: phalaratnadānaprayogaḥ, viśuddhiprayogaḥ / kṣiprabhāvanādṛṣṭyā ekaḥ: avadhiprayogaḥ /

II.B.i.3

3. guṇāḥ / guṇānāṃ lakṣaṇādikaṃ sarvam abhisamayālaṅkāre kārikārdhenopadarśitam / tathā hi - || mārāṇāṃ śaktihānyādiścaturdaśavidho guṇaḥ / (ka) lakṣaṇam: prayogāṇāṃ bhāvanābalena adhigataprāśastyaṃ guṇānāṃ lakṣaṇam / (kha) bhedaḥ: guṇānāṃ caturdaśa bhedā bhavanti / tathā hi - māraśaktivyāghātaguṇaḥ, buddhasamanvāhārajñātatvaguṇaḥ, buddhapratyakṣīkaraṇaguṇaḥ, samyaksambodhyāsannībhāvaguṇaḥ, mahārthatādiguṇaḥ, deśanirūpaṇaguṇaḥ, sarvānāsravadharmaparipūriguṇaḥ, kathāpuruṣatāguṇaḥ, abhedyatāguṇaḥ, asādhāraṇakuśalamūlotpattiguṇaḥ, pratijñāyāthārthyasampādanaguṇaḥ, udāraphalaparigrahaṇaguṇaḥ, sattvārthapratipattiguṇaḥ, niyatilābhaguṇaśceti caturdaśa guṇāḥ /

II.B.i.4

4. doṣāḥ / prayogāṇāṃ doṣā abhisamayālaṅkāre kārikārdhena upadarśitāḥ / tathā hi - || doṣāśca ṣaḍ viboddhavyāścaturbhirdaśakaiḥ saha // (ka) lakṣaṇam: prayogotpattisthitiprakarṣagatīnāmantarāyakarā vighnā eva doṣā iti lakṣaṇam / (kha) bhedaḥ: ṣaṭcatvāriṃśad doṣāṇāṃ bhedā bhavanti / prathamaṃ daśakam: kṛcchraprāptiḥ (cireṇa mātari pratibhānam), atyāśupratibhānatā, kāyadauṣṭhulyam, cittadauṣṭhulyam, ayogavihitasvādhyāyāditā, vaimukhyanimittagrāhitā, hetubhraṃśaḥ, praṇītāsvādabhraṃśaḥ, uttamayānabhraṃśaḥ, uddeśabhraṃśaśceti daśa / dvitīya daśakam: hetuphalasambandhabhraṃśaḥ, niruttarasthānabhraśaḥ, bahuvidhaviṣayavikalpapratibhānotpādaḥ, akṣaralikhanābhiniveśaḥ, abhāvābhiniveśaḥ, akṣarābhiniveśaḥ, anakṣarābhiniveśaḥ, janapadādimanaskāraḥ, lābhasatkāraślokāsvādanam, amārgopāyakauśalamārgaṇañceti daśa / amī viśatiḥ doṣāḥ pāramitāyāṃ pravṛttasya yogino 'ntarāyakarāḥ pratipāditāḥ / samprati punaḥ pravṛttipūrvikā visāmagrī nirucyate / tṛtīyaṃ daśakam: chandakilāsavaidhuryam, chandaviṣayabhedavaidhuryam, alpecchatānalpecchatāvaidhuryam, dhūtaguṇayogāyogau, kalyāṇākalyāṇadharmatvam, tyāgamātsaryam, dānāgrahaṇam, uddhaṭitajñavipañcitajñatvam, sūtrādidharmābhijñānabhijñatvam, ṣaṭpāramitāsamanvāgamāsamanvāgamāviti daśa / caturthaṃ daśakam: upāyakauśalānupāyakauśale, dhāraṇīpratilambhāpratilambhau, likhitukāmatā 'likhitukāmate, vigatāvigatakāmādichandattve ceti catvāri; upāyagativaimukhyam, sugatigamanasaumanasyamiti dve; śrotāvaktroḥ kasyacid ekākiparṣadabhiratiḥ, anubandhakāmānavakāśadānatvam, āmiṣakiñcitkābhilāṣatadadātukāmatā, jīvitāntarāyānantarāyadiggamanamiti catvāri ceti daśa / avaśiṣṭadoṣaṣaṭkam: durbhikṣadiggamanāgamanam, caurādyākulitadiggamanāgamanam, kulāvalokanadaurmanasyamiti trīṇi, mārabhedaprayogaḥ, prativarṇikopasaṃhāraḥ (kṛtrimapratipādanam), ayathāviṣayaspṛhotpādanamityaparāṇi trīṇi ceti ṣaṭ / ityevaṃ ṣaṭcatvāriṃśad doṣā bhavanti /