Brahmabindūpaniṣad

1

oṃ mano hi dvividhaṃ proktaṃ śuddhaṃ cāśuddham eva ca / aśuddhaṃ kāmasaṃkalpaṃ śuddhaṃ kāmavivarjitam

2

mana eva manuṣyāṇāṃ kāraṇaṃ bandhamokṣayoḥ / bandhāya viṣayāsaktaṃ muktyai nirviṣayaṃ smṛtam

3

yato nirviṣayasyāsya manaso muktir iṣyate / tasmān nirviṣayaṃ nityaṃ manaḥ kāryaṃ mumukṣuṇā

4

nirastaviṣayāsaṅgaṃ saṃniruddhaṃ mano hṛdi / yadā yāty unmanībhāvaṃ tadā tat paramaṃ padam

5

tāvad eva niroddhavyaṃ yāvaddhṛdi gataṃ kṣayam / etaj jñānaṃ ca mokṣaṃ ca ato 'nyo granthavistaraḥ

6

naiva cintyaṃ na cācintyam acintyaṃ cintyam eva ca / pakṣapātavinirmuktaṃ brahma sampadyate tadā

7

svareṇa saṃdhayed yogam asvaraṃ bhāvayet param / asvareṇa hi bhāvena bhāvo nābhāva iṣyate

8

tad eva niṣkalaṃ brahma nirvikalpaṃ nirañjanam / tad brahmāham iti jñātvā brahma sampadyate dhruvam

9

nirvikalpam anantaṃ ca hetudṛṣṭāntavarjitam / aprameyam anādyaṃ ca jñātvā ca paramaṃ śivam

10

na nirodho na cotpattir na vandyo na ca śāsanam / na mumukṣā na muktiś ca ity eṣā paramārthatā

11

eka evātmā mantavyo jāgratsvapnasuṣuptiṣu / sthānatrayād vyatītasya punarjanma na vidyate

12

eka eva hi bhūtātmā bhūte bhūte vyavasthitaḥ / ekadhā bahudhā caiva dṛśyate jalacandravat

13

ghaṭasaṃbhṛtam ākāśaṃ līyamāne ghaṭe yathā / ghaṭo līyeta nākāśaṃ tadvaj jīvo ghaṭopamaḥ

14

ghaṭavad vividhākāraṃ bhidyamānaṃ punaḥ punaḥ / tadbhagnaṃ na ca jānāti sa jānāti ca nityaśaḥ

15

śabdamāyāvṛto yāvat tāvat tiṣṭhati puṣkare / bhinne tamasi caikatvam ekam evānupaśyati

16

śabdākṣaraṃ paraṃ brahma yasmin kṣīṇe yad akṣaram / tad vidvān akṣaraṃ dhyāyed yadīcchecchāntim ātmanaḥ

17

dve vidye veditavye tu śabdabrahma paraṃ ca yat / śabdabrahmaṇi niṣṇātaḥ paraṃ brahmādhigacchati

18

grantham abhyasya medhāvī jñānavijñānatattvataḥ / palālam iva dhānyārthī tyajed grantham aśeṣataḥ

19

gavām anekavarṇānāṃ kṣīrasyāpy ekavarṇatā / kṣīravat paśyate jñānaṃ liṅginas tu gavāṃ yathā

20

ghṛtam iva payasi nigūḍhaṃ bhūte bhūte ca vasati vijñānam / satataṃ manthayitavyaṃ manasā manthānabhūtena

21

jñānanetraṃ samādāya cared vahnim ataḥ param / niṣkalaṃ nirmalaṃ śāntaṃ tad brahmāham iti smṛtam

22

sarvabhūtādhivāsaṃ ca yad bhūteṣu vasaty adhi / sarvānugrāhakatvena tad asmy ahaṃ vāsudeva