Liberation-in-life: the destruction of karman and the nature of release

PS_51

itthaṃ dvaitavikalpe galite pravilaṅghya mohinīṃ māyām | salile salilaṃ kṣīre kṣīram iva brahmaṇi layī syāt

PS_52

itthaṃ tattvasamūhe bhāvanayā śivamayatvam abhiyāte | kaḥ śokaḥ ko mohaḥ sarvaṃ brahmāvalokayataḥ

PS_53

karmaphalaṃ śubham aśubhaṃ mithyājñānena saṃgamād eva | viṣamo hi saṅgadoṣas taskarayogo 'py ataskarasyeva

PS_54

lokavyavahārakṛtāṃ ya ihāvidyām upāsate mūḍhāḥ | te yānti janmamṛtyū dharmādharmārgalābaddhāḥ

PS_55

ajñānakālanicitaṃ dharmādharmātmakaṃ tu karmāpi | cirasaṃcitam iva tūlaṃ naśyati vijñānadīptivaśāt

PS_56

jñānaprāptau kṛtam api na phalāya tato 'sya janma katham | gatajanmabandhayogo bhāti śivārkaḥ svadīdhitibhiḥ

PS_57

tuṣakambukakiṃśārukamuktaṃ bījaṃ yathāṅkuraṃ kurute | naiva tathāṇavamāyākarmavimukto bhavāṅkuraṃ hy ātmā

PS_58

ātmajño na kutaścana bibheti sarvaṃ hi tasya nijarūpam | naiva ca śocati yasmāt paramārthe nāśitā nāsti

PS_59

atigūḍhahṛdayagañjaprarūḍhaparamārtharatnasaṃcayataḥ | aham eveti maheśvarabhāve kā durgatiḥ kasya

PS_60

mokṣasya naiva kiṃcid dhāmāsti na cāpi gamanam anyatra | ajñānagranthibhidā svaśaktyabhivyaktatā mokṣaḥ

PS_61

bhinnājñānagranthir gatasaṃdehaḥ parākṛtabhrāntiḥ | prakṣīṇapuṇyapāpo vigrahayoge 'py asau muktaḥ

PS_62

agnyabhidagdhaṃ bījaṃ yathā prarohāsamarthatām eti | jñānāgnidagdham evaṃ karma na janmapradaṃ bhavati

PS_63

parimitabuddhitvena hi karmocitabhāvidehabhāvanayā | saṅkucitā citir etaddehadhvaṃse tathā bhāti

PS_64

yadi punar amalaṃ bodhaṃ sarvasamuttīrnaboddhṛkartṛmayam | vitatam anastamitoditabhārūpam satyasaṃkalpam

PS_65

dikkālakalanavikalaṃ dhruvam avyayam īśvaraṃ suparipūrṇam | bahutaraśaktivrātapralayodayaviracanaikakartāram

PS_66

sṛṣṭyādividhisuvedhasam ātmānaṃ śivamayaṃ vibudhyeta | katham iva saṃsārī syād vitatasya kutaḥ kva vā saraṇam

PS_67

iti yuktibhir api siddhaṃ yatkarma jñānino na saphalaṃ tat | na mamedam api tu tasyeti dārḍhyato na hi phalaṃ loke