Conduct of the liberated: indifference to merit, demerit, rite and worship

PS_68

itthaṃ sakalavikalpān pratibuddho bhāvanāsamīraṇataḥ | ātmajyotiṣi dīpte juhvaj jyotirmayo bhavati

PS_69

aśnan yad vā tad vā saṃvīto yena kenacic chāntaḥ | yatra kvacana nivāsī vimucyate sarvabhūtātmā

PS_70

hayamedhaśatasahasrāṇy api kurute brahmaghātalakṣāṇi | paramārthavin na puṇyair na ca pāpaiḥ spṛśyate vimalaḥ

PS_71

madaharṣakopamanmathaviṣādabhayalobhamohaparivarjī | niḥstotravaṣaṭkāro jaḍa iva vicared avādamatiḥ

PS_72

madaharṣaprabhṛtir ayaṃ vargaḥ prabhavati vibhedasaṃmohāt | advaitātmavibodhas tena kathaṃ spṛśyatāṃ nāma

PS_73

stutyaṃ vā hotavyaṃ nāsti vyatiriktam asya kiṃcana ca | stotrādinā sa tuṣyen muktas tan nirnamaskṛtivaṣaṭkaḥ

PS_74

ṣaṭtriṃśattattvabhṛtaṃ vigraharacanāgavākṣaparipūrṇam | nijam anyad atha śarīraṃ ghaṭādi vā tasya devagṛham

PS_75

tatra ca paramātmamahābhairavaśivadevatāṃ svaśaktiyutām | ātmāmarśanavimaladravyaiḥ paripūjayann āste

PS_76

bahirantaraparikalpanabhedamahābījanicayam arpayataḥ | tasyātidīptasaṃvijjvalane yatnād vinā bhavati homaḥ

PS_77

dhyānam anastamitaṃ punar eṣa hi bhagavān vicitrarūpāṇi | sṛjati tad eva dhyānaṃ saṃkalpālikhitasatyarūpatvam

PS_78

bhuvanāvalīṃ samastāṃ tattvakramakalpanām athākṣagaṇam | antarbodhe parivartayati ca yat so 'sya japa uditaḥ

PS_79

sarvaṃ samayā dṛṣṭyā yat paśyati yac ca saṃvidaṃ manute | viśvaśmaśānaniratāṃ vigrahakhaṭvāṅgakalpanākalitām

PS_80

viśvarasāsavapūrṇaṃ nijakaragaṃ vedyakhaṇḍakakapālam | rasayati ca yat tad etad vratam asya sudurlabhaṃ ca sulabhaṃ ca

PS_81

iti janmanāśahīnaṃ paramārthamaheśvarākhyam upalabhya | upalabdhṛtāprakāśāt kṛtakṛtyas tiṣṭhati yatheṣṭam

PS_82

vyāpinam abhihitam itthaṃ sarvātmānaṃ vidhūtanānātvam | nirupamaparamānandaṃ yo vetti sa tanmayo bhavati

PS_83

tīrthe śvapacagṛhe vā naṣṭasmṛtir api parityajan deham | jñānasamakālamuktaḥ kaivalyaṃ yāti hataśokaḥ

PS_84

puṇyāya tīrthasevā nirayāya śvapacasadananidhanagatiḥ | puṇyāpuṇyakalaṅkasparśābhāve tu kiṃ tena

PS_85

tuṣakambukasupṛthakkṛtataṇḍulakaṇatuṣadalāntarakṣepaḥ | taṇḍulakaṇasya kurute na punas tadrūpatādātmyam

PS_86

tadvat kañcukapaṭalīpṛthakkṛtā saṃvid atra saṃskārāt | tiṣṭhanty api muktātmā tatsparśavivarjitā bhavati

PS_87

kuśalatamaśilpikalpitavimalībhāvaḥ samudgakopādheḥ | malino 'pi maṇir upādher vicchede svacchaparamārthaḥ

PS_88

evaṃ sadguruśāsanavimalasthiti vedanaṃ tanūpādheḥ | muktam apy upādhyantaraśūnyam ivābhāti śivarūpam

PS_89

śāstrādiprāmāṇyād avicalitaśraddhayāpi tanmayatām | prāptaḥ sa eva pūrvaṃ svargaṃ narakaṃ manuṣyatvam

PS_90

antyaḥ kṣaṇas tu tasmin puṇyāṃ pāpāṃ ca vā sthitiṃ puṣyan | mūḍhānāṃ sahakārībhāvaṃ gacchati gatau tu na sa hetuḥ