Resolution of doubts on ultimate truth (Chapter Seven)

CMP 7.1

yathā dīpo ghaṭāntaḥstho bāhyo naivāvabhāsate / bhinne tu taddhaṭe paścād dīpajvālābhibhāsate //

CMP 7.2

svakāya eva hi ghaṭo dīpa eva hi tattvakam / guruvaktreṇa saṃbhinne buddhajñānaṃ sphuṭaṃ bhavet //

CMP 7.3

gaganaṃ gaganobhdūtamākāśākāśaṃ sa paśyati / tathaiva hi gurorvaktrātprayogo 'yaṃ pradarśitaḥ // iti /

CMP 7.4

dharmā ime śabdarutena vyākṛtā dharmaśca śabdaśca hi nātra labhyate / na caikatāṃ cāpyavatīrya dharmatāmanuttarāṃ kṣāntivarāṃ spṛśiṣyate // iti /

CMP 7.5

namaste varadavajrāgrya bhūtakoṭe namo 'stu te / namaste śūnyatāgarbha buddhabodhe namo 'stu te //

CMP 7.6

dadasva me mahācārya abhisaṃbodhidarśanam / sarvabuddhamahājñānaṃ sarvaśūnyamanuttaram //

CMP 7.7

dadasva me mahāsattva svānubhāvaikalakṣaṇam / karmajanmavinirmuktamihaiva bodhimavāpnuyām //

CMP 7.8

ta(tva)tpādapaṅkajaṃ muktvā nāstyanyaccharaṇaṃ prabho / tasmātprasīda buddhāgrya jagadvīra mahāmune //

CMP 7.9

evaṃ stutvā tu taṃ divyamadhyeṣaṇavidhiṃ param / śiṣye kāruṇyamutpādya guruḥ śrīmān guṇodadhiḥ //

CMP 7.10

prasannavadano bhūtvā sānukampaḥ praharṣitaḥ / śrāvayetsamayaṃ divyaṃ yogatantrobhdavaṃ param //

CMP 7.11

tataḥ samāhitācāryo bodhicittaṃ niṣpādayet / kalaśe vātha śaṃkhe vā bodhicittaṃ nidhāya ca //

CMP 7.12

tatastaṃ śiṣyamāhūya sarvabuddhairadhiṣṭhitam / arpayetsamayaṃ tasya jinamudrāsamanvitam //

CMP 7.13

abhiṣeko hi dātavyo dvitīyenaiva vajriṇā / māṅgalyovduṣṭaśabdena vāditravividhasvanaiḥ //

CMP 7.14

traidhātukābhiṣekeṇa śiṣyaḥ kṛtanatāñjaliḥ / anujñātaṃ tatastasya dadyāttatrapracoditaḥ //

CMP 7.15

mālāsalilasaṃbuddhavajraghaṇṭātha darpaṇam / nāmācāryamanujñāta abhiṣekakramo hyayam //

CMP 7.16

tataḥ samarpayet tasya bāhyābhisaṃbodhilakṣaṇam / saṃpradāye yadāvāptaṃ guruparvakramāgatam // iti /

CMP 7.17

toye nirmalake nadīsarasi vā binduśca yo līnakaḥ / śuddhaṃ tatkramaśo 'nubhedagaditaṃ yogī smarennityaśaḥ / ādarśe hyanilakṣayaḥ kramagatastadvanna saṃprekṣyate / piṇḍagrāha iti kramo vidhimatāmevaṃ samutprekṣyate //

CMP 7.18

sarvāṅgabhāvanātītaṃ kalpanākalpavarjitam / mātrābindusamātītaṃ etanmaṇḍalamuttamam //

CMP 7.19

viśatī(ti) yaḥ sarvabhāvānāṃ rūpārūpeṣu nirmalam / bodhitaścoditaṃ cittaṃ maṇḍalaṃ maṇḍalākṛtim //

CMP 7.20

astīti nāstīti ubhe 'pi antā śuddhī aśuddhīti ime 'pi antā / tasmādubhe antavivarjayitvā madhye 'pi sthānaṃ na karoti paṇḍitaḥ // iti /

CMP 7.21

ākāśānantamityarthaṃ sarvabhūtamahālayam / vibhūtiḥ śrīvibho rājā sarvāśāparipūrakaḥ //

CMP 7.22

aho buddha aho buddha aho dharmasya deśanā / śuddhatattvārthaśuddhārtha bodhicitta namo 'stu te //

CMP 7.colophon

paramārthasatyamelāvaṇasaṃśayaparicchedaḥ saptamaḥ // 7 //