Resolution of doubts on the realm of non-abiding nirvāṇa (Chapter Eight)

CMP 8.1

sthūlaṃ śabdamayaṃ prāhuḥ sūkṣmaṃ cittāmayantathā / cittayā rahitaṃ yat tad yogināṃ paramaṃ padam // iti /

CMP 8.2

svasaṃvedyaṃ tu tattattvaṃ vaktuṃ nānyasya pāryate / bhaktibhāvanayā gamyaṃ na gamyaṃ cānyathā nu tat //

CMP 8.3

jñātvā tattvaṃ tataḥ kṛtvā bhaktibhāvamaharniśam / tasmin paramanirvāṇe pade śānte hyanuttare //

CMP 8.4

tatastadbhaktisāmarthyād bhāvanābalanirmitam / tasminnutpadyate rūpaṃ kimapyānandajaṃ param //

CMP 8.5

dhagityākārasaṃbhūtaṃ sphuratsaṃhārākārakam / bhūrbhuvaḥsvaridaṃ sarvaṃ dyotayat sacarācaram //

CMP 8.6

bhāvanābalasāmarthyāt prajñopāyātmakaṃ śivam / sarvakleśavinirmuktaṃ sarvalakṣaṇabhūṣitam //

CMP 8.7

śūnyatājñānasaṃbhūtaṃ nirdvandvaṃ paramaṃ śivam / sarvākāravaropetaṃ grāhyagrāhakavarjitam //

CMP 8.8

jñānaṃ māyopamaṃ śuddhaṃ svacchaṃ prakṛtinirmalam / śabdagandharasātītaṃ tathā sparśavivarjitam //

CMP 8.9

dṛśyate paramekena samādhau jñānacakṣuṣā / chāyāmāyopamaṃ divyaṃ divyasaṃsthānasayutam //

CMP 8.10

sphurajjñānormimālābhirvividhānekavigraham / indrāyudhanibhaṃ kāyaṃ labhante tattvabhāvakāḥ //

CMP 8.11

bhāvanāyogasāmarthyāt samayānāṃ ca pālanāt / īdṛśaṃ prāpyate rūpaṃ na vācyaṃ yajjinairapi //

CMP 8.12

yatra kāyo na vākcittaṃ sthānaṃ yatsarvagaṃ param / saṃpradāyavaśāt tatra svasya rūpaṃ vibhāvyate //

CMP 8.13

aho suvismayakaramaho śāntamatīndriyam / aho paramagambhīraṃ buddhatvaṃ padamuttamam // iti /

CMP 8.14

aho vajra aho vajra aho vajrasya deśanā / yatra na kāyavākcittaṃ tatra rūpaṃ vibhāvyate // iti /

CMP 8.15

bhaṭṭārakapādenāpyuktam- śauśīryaṃ nāsti te kāye māṃsāsthirudhiraṃ na ca / indrāyudhamivākāśe kāyaṃ darśitavānasi //

CMP 8.16

nāmayo nāśuciḥ kāye kṣuttṛṣṇāsaṃbhavau na ca / tvayā lokānuvṛttyarthaṃ darśitā laukikī kriyā // iti /

CMP 8.17

sarvakalpasamuccaye 'pyāha-

CMP 8.18

gṛhītvā hṛdayaṃ śuddhaṃ vajradehavibhāvanā / dṛḍhaṃ sāramasauśīryaṃ vajrakāyaṃ sa labdhavān // iti /

CMP 8.19

khasamā virajā vararūpadharā aśarīra alakṣaṇa prajñasutā / sugambhīraguṇodadhi kāruṇikā dada mūrdhni pāṇi mama apratimā // iti /

CMP 8.colophon

apratiṣṭhitanirvāṇadhātumelāvaṇasaṃśayaparicchedo 'ṣṭamaḥ // 8 //