Resolution of doubts on the manifold conduct of the bodhisattva and the arising and awakening of dharma, by the method of the Sarvabuddhasamāyoga (Chapter Nine)

CMP 9.1

phalena hetumāmudrya phalamāmudrya hetunā / vibhāvyamanyathāsiddhiṃ kalpakoṭirna jāyate // iti /

CMP 9.2

vajrasattvo mahārājaścodanīyo muhurmuhuḥ // iti /

CMP 9.3

pādaprasārikaṃ muktvā tyaktvā saṃsārapeṭakam / sādhayed vajrasattvāgraṃ nityamudyuktamānasaḥ //

CMP 9.4

kaukṛtyastyānamiddhādīn parityajya prayatnataḥ / anyathā naiva siddhiḥ syāt kalpakoṭiśatairapi // iti /

CMP 9.5

bhikṣubhāve sthitā ye 'tra ye tu tarkaratā narāḥ / vṛddhabhāve sthitā ye tu teṣāṃ tattvaṃ na deśayet // iti /

CMP 9.6

upāyarahitaṃ jñānaṃ śikṣā cāpi hi deśitā / śrāvakāṇāṃ mahāvīra avatā(dhā)raya teṣu vai //

CMP 9.7

mūlasūtre 'pyāha- daśakuśalān karmapathānicchanti jñānavarjitāḥ // iti /

CMP 9.8

śrāvakayānamaśikṣatha bhikṣo bodhicariyata tatra carīye / bodhicarīṃ cara buddhaguṇeṣu eṣa nidānabhaviṣya svayaṃbhūḥ // iti /

CMP 9.9

duṣkarairniyamaistīrvrairmūrtiḥ śuṣyati duḥkhitā / duḥkhād vikṣipyate cittaṃ vikṣepāt siddhiranyathā // iti /

CMP 9.10

mūlasūtre 'pyāha- duṣkarairniyamaistīvraiḥ sevyamāno na siddhyati / sarvakāmopabhogaistu sevayaṃścāśu siddhyati // iti /

CMP 9.11

rāgo dveṣaśca mohaśca traya ete viṣaṅgatāḥ / viṣatvamupayāntyeva viṣameṇa tu sevitā //

CMP 9.12

amṛtatvaṃ punaryānti, amṛtena tu sevitāḥ // iti /

CMP 9.13

badhyati yena jaḍaḥ parimucyati tena budhaḥ / bodhivibhāvanayā viparītamidaṃ sakalam //

CMP 9.14

yena mūḍhāḥ prabadhyante śīryante rauravāntike / taireva hi vimucyante sukhaṃ prajñābalena tu // iti /

CMP 9.15

athātaḥ saṃpravakṣyāmi sarvato viśvamuttamam / sarvabuddhasamāyogaḍākinījālasaṃvaram //

CMP 9.16

rahasye parame ramye sarvātmani sadā sthitaḥ / sarvabuddhamayaḥ śrīmān vajrasattvodayaḥ sukhaḥ //

CMP 9.17

tathāgatamahādivyaratnajālādyalaṅkṛtam / tato ghaṇṭāvasaṃsaktavitānavitatojjvale //

CMP 9.18

vajragītiṃ ca pūjāṃ ca gītavādyairvikurvitam / puṣpadhūpādiyogena dīpagandhādibhistathā //

CMP 9.19

prasādhayanti bhavane sodyānādiṣu vā punaḥ / sarvabuddhasamāyogaḍākinījālasaṃvaram //

CMP 9.20

tatrāsanaṃ niveśyādau mṛdusaṃsparśajaṃ sukham / viśvapadmapaṭacchannaṃ sarvaśuddhāsanaṃ hi tat //

CMP 9.21

sarvabuddhasamāyogaṃ yogeśvaravikurvitam / śrīvajrasattvarūpāstu vikurvanti hi yatra(tattu) vai //

CMP 9.22

sarvadhātumayī(yo) vāpi jīvamūlamayastathā / svādhidaivatpratimukhaiḥ siddhimudrāpravartanam //

CMP 9.23

niṣiktāṃ ghaṭitāṃ vāpi(bhi)saṃskṛtāṃ vā sucitritām / vicitrapratibimbāṃ ca cinhamudrāṃ prakalpayet //

CMP 9.24

tadāsaneṣu prāṇasarvān yathāsthānaṃ hi vinyaset / caturasraṃ caturdvāraṃ catustoraṇamaṇḍitam / vajraratnapadmādi tu dvārapālena yojayet //

CMP 9.25

svādhidaivatpratimukhaiḥ suprasādhitayoṣitam / svamudrācinhasubhagāṃ kalpayed gaṇamaṇḍalam //

CMP 9.26

caturasraṃ caturdvāraṃ catustoraṇamaṇḍitam / catuḥsūtrasamāyuktamaṣṭastambhopaśobhitam //

CMP 9.27

hārārddhahāraracitaṃ paṭṭasragdāmabhūṣitam / ghaṇṭāpatākasaṃśobhaṃ cāmarādivibhūṣitam //

CMP 9.28

candrārddhavajrakoṇaṃ ca dvāraniryūhasandhiṣu / patvi(kṣi)ṇīkramaśīrṣādivicitra paṭamaṇḍitam //

CMP 9.29

sarvadevyupabhogaistu sevyamānairyathāsukham / svādhidaivatayogena svamātmānaṃ prapūjayet //

CMP 9.30

pūjyate 'nuyogena sarvayogasukhena tu / samāsvādayamānastvatiyogena siddhyati //

CMP 9.31

anena sarvabuddhātmā rasāyanasukhena tu / siddhyet śrīvajrasattvāyuryauvanārogyasatsukham //

CMP 9.32

sarvabuddhamahākāyaḥ sarvabuddhasarasvatī / sarvabuddhamahācittaḥ sarvabuddhamahāmahaḥ //

CMP 9.33

sarvabuddhamahārājā sarvavajradharādhipaḥ / sarvalokeśvarapatiḥ sarvaratnādhipeśvaraḥ //

CMP 9.34

tābhiḥ saṃramyamāṇastu yātyutpattiṃ tu gacchataḥ / sarvadevīmahāsidhya(ddha)ścakravartī prasidhyati // iti /

CMP 9.35

pratyahaṃ pratimāsaṃ vā pratisaṃvatsaraṃ tathā / yathādhiṣṭhānato vāpi nāṭayed buddhasaṃvaram // iti /

CMP 9.36

utthito vā niṣaṇṇo vā caṃkraman vā yathāsthitaḥ / praharṣan vā jalpan vā yatra tatra yathā tathā //

CMP 9.37

yadyadindriyamārgatvaṃ yāyāttattatsvabhāvataḥ / asamāhitayogena sarvabuddhamayaṃ vahet //

CMP 9.38

khasamaṃ khasamākāramaparyantasāgaropamam / rāgadharmanayo dveṣo vilāsaḥ krīḍāvistaraḥ //

CMP 9.39

gṛhītaṃ vastumātraṃ ca śiṣyabodhanakāraṇāt / kati janmāntaraṃ vaktuṃ sahyate rāgadeśanā //

CMP 9.colophon

śrīsarvabuddhasamāyogaḍākinījālasaṃvaranyāyena bodhisattvacaritadharmodayābhisaṃbodhiprapañcatāmelāvaṇa-saṃśayaparicchedo navamaḥ // 9 //