Resolution of doubts on conduct utterly free of elaboration (Chapter Eleven, concluding)

CMP 11.1

parvateṣu vivikteṣu nadīprasravaṇeṣu ca / śmaśānādiṣvapi kāryamidaṃ dhyānasamuccayam //

CMP 11.2

prayogādīṃśca tattvena varjayet tattvavit sadā / vajrasattvadahaṃkāraṃ muktvā nānyatra kārayet //

CMP 11.3

prayogā api na budhyante śuddhatattve vyavasthite / nairātmyapadayogena yāvattat pratyavekṣyate //

CMP 11.4

niḥsvabhāvapadasthasya divyopāyayutasya ca / siddhyate nirvicāreṇa yatkiñcit kalpacoditam //

CMP 11.5

bhāvanāyogasāmarthyāt svayamevopatiṣṭhate / tatsarvaṃ kṣaṇamātreṇa yatkiñcit siddhilakṣaṇam //

CMP 11.6

rūpādyādhyātmikān dharmān paśyet vipaśyanocyate / akṣobhyādiyathāsaṃkhyaṃ kalpayet śamatho bhavet //

CMP 11.7

anayorniḥsvabhāvatvāt tathatāśāntasaṃjñakam / tathatāmaṇḍale yogī sarvabuddhān praveśayed // iti /

CMP 11.8

nirvāṇāgnimahāgore bhasmaśo 'pi na mucyate / na tatra vidyate tattvaṃ nendriyārthā na dhātavaḥ //

CMP 11.9

nirvikalpo yadā viraḥ sthitiṃ hitvā tu laukikīm / ācaret sarvakāryāṇi buddhāḥ paśyanti tat tadā //

CMP 11.10

bālavadvicaredyuktyā sarvataśchinnasaṃśayaḥ / nirābhogo yadā yogī tadā varṣanti saṃpadaḥ //

CMP 11.11

aśeṣapāpayuktānāṃ mohāvaraṇasusthitāḥ / unmattavratayogena ṣaṇmāsādamoghasiddhayaḥ //

CMP 11.12

sarvabuddhāna svayaṃ paśyet sarvakāmaiḥ prapūryate / na kṣīṇo na ca hānitvaṃ svecchāyurjāyate vapuḥ //

CMP 11.13

anuttarāṃ parāṃ bodhiṃ saṃprāpnotyaprayatnataḥ / vinā yatnena sidhyanti sarvakāmasukhotsukāḥ //

CMP 11.14

gambhīrapadaṃ nityaṃ gacchet tiṣṭhan niṣaṇṇakaḥ / prabhāsvarajñānakauśalyād yogināṃ lakṣaṇaṃ sadā //

CMP 11.15

anena dhyānayogena cittaratnaṃ dṛḍhībhavet / adhiṣṭhānaṃ ca kurvanti buddhā bodhipratiṣṭhitāḥ //

CMP 11.16

evaṃ bhūtvā niviṣṭastu bhāvayed bhāvatatparaḥ / yāvanna khidyate cittaṃ samāhitamanāḥ sudhīḥ //

CMP 11.17

khinnastu paryaṭet paścādyathārucitaceṣṭitaḥ / bhāvayedvipulāṃ bodhimīṣadunmīlitekṣaṇaḥ //

CMP 11.18

hasan jalpan kvacittiṣṭhan kvacitkuryāt pravartanam //

CMP 11.19

bhāvanāsaktacittastu yathā khedo na jāyate //

CMP 11.20

evaṃ samādhiyuktasya nirvikalpasya mantriṇaḥ / kālāvadhiṃ parityajya siddhyate 'nuttaraṃ padam // iti /

CMP 11.21

sūkṣmarūpaṃ laghusparśaṃ vyāptisaṃprāptimeva ca / prakāśaṃ caiva sthairyaṃ ca vaśitvaṃ kāmāvasānikam // iti /

CMP 11.22

bodhijñānāgrasaṃprāptaṃ paśyati buddhasuprabham / buddhasaṃbhogakāyaṃ ca ātmānaṃ laghu paśyati //

CMP 11.23

traidhātukamahāsattvaiḥ pūjyamānaṃ sa paśyati / buddhaiśca bodhisattvaiśca pañcakāmaguṇairdhruvam //

CMP 11.24

pūjitaṃ paśyate nityaṃ mahajñānā grasambhavam / vajrasattvaṃ mahābimbaṃ vajradharmaṃ mahāyaśam //

CMP 11.25

svabimbaṃ paśyate svapne guhyavajramahāyaśāḥ / praṇamanti mahābuddhā bodhisattvāśca vajriṇaḥ //

CMP 11.26

drakṣyanti īdṛśān svapnān kāyavākcittasiddhidān / sarvalaṅkārasampūrṇāṃ surakanyāṃ manoramām //

CMP 11.27

dārakaṃ dārikāṃ paśyan sa siddhimadhigacchati / daśadiksarvabuddhānāṃ kṣetrasthaṃ paśyati dhruvam //

CMP 11.28

dadanti hṛṣṭacittātmā dharmagañjaṃ manoramam / dharmacakragataṃ kāyaṃ sarvasattvaparivṛtam //

CMP 11.29

paśyate yogasamaye dhyānavajrapratiṣṭhitaḥ // iti /

CMP 11.30

nāpaneyamataḥ kiñcit prakṣeptavyaṃ na kiñcan / draṣṭavyaṃ bhūtato bhūtaṃ bhūtadarśī vimucyate // iti /

CMP 11.31

uktaṃ ca suvarṇaprabhāsasūtre- na buddhaḥ parinirvāti na dharmaḥ parihīyate / sattvānāṃ paripākāya parinirvāṇaṃ nidarśayet //

CMP 11.32

laṅkāvatārasūtre 'pyuktam- na hyatrotpadyate kiñcit pratyayairna nirudhyate / utpadyante nirudhyante pratyayā eva kalpitāḥ //

CMP 11.33

ata uktam- yena yena hi bhāvena manaḥ saṃyujyate nṛṇām / tena tanmayatāṃ yāti viśvarūpo maṇiryathā //

CMP 11.34

utpattiryat saṃvṛtisatyametad mṛtyurhi nāma paramārthasatyam / kramadvayasyāsya gurukṛpāto jñātā bhaved yaḥ sa bhaviṣyabuddhaḥ //

CMP 11.35

satyadvayasyādvayavatpraveśo 'nucchedarūpo 'pyaviśeṣa eva / ekatvamevāstyanayordvayoriti vijñāyate yena vimukta eṣaḥ //

CMP 11.36

girīndramūrdhnaḥ prapatet tu kaścid neccheccyutiṃ sa cyavate tathāpi / guruprasādādvihitopadeśād necchedvimuktiṃ sa tathāpi muktaḥ //

CMP 11.37

matvā sattveṣu tattvādhigamakṣamatābhāvamālokya loke uttālābdhitaraṅgabhaṅgavikalāddīpasphuliṅgādiva / kiñcit kiñcidupetya saṃcitavatā grantho mayāyaṃ kṛto ye vai saṃvṛtisatyabhītasubhagāsteṣāmalāto bhavet //

CMP 11.colophon

atyantaniṣprapañcacaryāmelāvaṇasaṃśayapariccheda ekādaśaḥ //

CMP work-colophon

samāpto 'yaṃ caryāmelāvaṇapradīpaḥ // kṛtirīyaṃ mahācārya-āryadevapādānām //