Kāṇḍa 14

14.1.1

endro bāhubhyām abharac cikitvān apo devīr varuṇāya prajānan | tam ādityā abhy aṣiñcanta sarve rājānam ugraṃ bṛhate raṇāya tā na āpo rājasūyā avantu ||

14.1.2

hiraṇyavarṇā iti catasraḥ ||

14.1.6

apo devīr madhumatīr agṛhṇata- -ūrjasvatī rājasūyā mayobhuvaḥ | yābhir mitrāvaruṇāv abhyasiñcan tāḥ (…) ||

14.1.7

varuṇena preṣitā yanti śubhrā utsaṃ devīr dadhate yā hiraṇyayam | yā brahmaṇā punate saṃvidānās tāḥ (…) ||

14.1.8

apaḥ samudrād divam ud vahanti divas pṛthivīm abhi yāḥ sṛjanti | yābhir īśānā marutaś caranti tāḥ (…) ||

14.1.9

yā amṛtaṃ bibhrati yā madhu priyaṃ yā agṛbhṇan ṛṣayo devasakhye | yābhir indram aty anayann arātīs tāḥ (…) ||

14.1.10

yā jīvadhanyā dhanam utpṛṇanti devāyate dāśuṣe martyāya | yāsāṃ payo akṣitam akṣitānāṃ tāḥ (…) ||

14.2.1

hiraṇyaupaśā dhvajanīḥ punānā yāḥ samudram abhyarcanti dhenavaḥ | yāḥ parjanyo vahaty antarikṣe tāḥ (…) ||

14.2.2

rathantare bṛhati gīyamāne kṣatraṃ jinvanti pra tiranty āyuḥ | yābhis trayān vājino vājayanti tāḥ (…) ||

14.2.3

yābhiḥ saha vṛtrahā somam indro vasor īśāno apibat sutasya | yāḥ sapta ṛṣayaḥ kavayaḥ punanti tāḥ (…) ||

14.2.4

sapta ṛṣayo bharatam abhy aṣiñcann āsmin rāṣṭram adadhur dakṣiṇāvat | prajāyai manum asumavanta devās tāḥ (…) ||

14.2.5

yābhir yajñaṃ prāñcam ukṣayanti dhīrā yābhiḥ somaṃ madhupṛcaṃ punanti | yābhir idaṃ jīvati viśvam ejat tāḥ (…) ||

14.2.6

yāsāṃ stokā madhumayā babhūvur ghṛtaṃ saṃjñānaṃ madhu pinvate yāḥ | yāḥ soma āpaḥ praṇayanti brahmaṇā tāḥ (…) ||

14.2.7

yāsāṃ pador ājyaṃ vājinaṃ tu somasya prasavam anu yāḥ pavante | antarvatīs taruṇavatsā ghṛtācīs tā na āpo rājasūyā avantu ||

14.2.8

ajījananta matayaḥ svarvida ā brahmaṇā sūktadheyāny aguḥ | asūṣuta rājasūyāḥ payāṃsi prāsāvīd devaḥ savitā bhuvanāni viśvā ||

14.2.9

somo rājā bhavo rājā paśupatiḥ paśūnāṃ varuṇo dhṛtavrataḥ | ye rājasūye asūyanta devās te te kṣatraṃ dadhatv āyur ojaḥ ||

14.2.10

āsthād ud asthād ajaniṣṭa vipro mṛdho vy āsthad aśasīta bāhū | āre avādhiṣṭa nirṛtiṃ parācaiḥ samapṛkta raśmibhiḥ sūryaś ca ||

14.3.1

apaśyaṃ tvāvarohantaṃ divataḥ pṛthivīm iva | apaśyam asyantaṃ rudraṃ nīlagrīvaṃ śikhaṇḍinam ||

14.3.2

diva ugro 'vārukṣat praty aṣṭhād bhūmyām adhi | janāsaḥ paśyatemaṃ nīlagrīvaṃ vilohitam ||

14.3.3

eṣa aity avīrahā rudro jalāṣabheṣajī | vi te kṣepam anīnaśad vātīkāro vy etu te ||

14.3.4

namas te bhava bhāmāya namas te bhava manyave | namas te astu bāhūbhyām uto ta iṣave namaḥ ||

14.3.5

yām iṣaṃ giriśanta haste bibharṣy astave | śivāṃ giriśa tāṃ kṛṇu mā hiṃsīḥ puruṣān mama ||

14.3.6

śivena vacasā tvā giriśācchā vadāmasi | yathā naḥ sarvam ij jagad ayakṣmaṃ sumano asat ||

14.3.7

yā ta iṣuḥ śivatamā śivaṃ babhūva te dhanuḥ | śivā śaravyā yā tava tayā no mṛḍa jīvase ||

14.3.8

yā te rudra śivā tanūr aghorāpāpakāśinī | tayā nas tanvā śantamayā giriśantābhi cākaśa ||

14.3.9

asau yas tāmro aruṇa uta babhrur vilohitaḥ | ye ceme abhito rudrā dikṣu śritāḥ sahasraśo 'vaiṣāṃ heḍa īmahe ||

14.3.10

adṛśaṃ tvāvarohantaṃ nīlagrīvaṃ vilohitam | uta tvā gopā adṛśann uta tvodāhāryaḥ | uto tvā viśvā bhūtāni tasmai dṛṣṭāya te namaḥ ||

14.4.1

namo 'stu nīlaśikhaṇḍāya sahasrākṣāya vājine | atho ye asya satvānas tebhyo 'ham akaraṃ namaḥ ||

14.4.2

namāṃsi ta āyudhāya- -anātatāya dhṛṣṇave | ubhābhyām akaraṃ namo bāhubhyāṃ tava dhanvane ||

14.4.3

pra muñca dhanvanas pary ubhayor ātnyor jyām | yāś ca te hasta iṣavaḥ parā tā bhagavo vapa ||

14.4.4

avatatya dhanus tvaṃ sahasrākṣa śateṣudhe | niśīrya śalyānāṃ mukhā śivo naḥ śambhur ā cara ||

14.4.5

vijyaṃ dhanuḥ śikhaṇḍino viśalyo bāṇavām̐ uta | aneśann asyeṣavaḥ śivo asya niṣaṅgatiḥ ||

14.4.6

pari te dhanvano hetir asmān vṛṇaktu viśvataḥ | atho ya iṣudhis tava- -āre asmin ni dhehi tam ||

14.4.7

yā te hetir mīḍhuṣṭama haste babhūva te dhanuḥ | tayā tvaṃ viśvato asmān ayakṣmayā pari bhuja ||

14.5.1

supārśvā kāmadughā na āgañ chataudanā payasā pinvamānā | ūrjaṃ duhānā anapasphurantī yajamānasya pra tiranty āyuḥ ||

14.5.2

gṛbhṇāmi medhyām uśatīṃ svastaya ūrjasvatīm anamīvāṃ svādhyām | viśvo loko mama deveṣv astu śataudanāṃ śraddadhānaḥ pacāmi ||

14.5.3

badhāna devīm abhi dhehi muñjatīṃ śataudanāṃ kāmadughā hy eṣā | maināṃ hiṃsīr aśmanā jahṛṣāṇo 'py etu devām̐ ati gacchati dviṣaḥ ||

14.5.4

ā rabhasva brahmaṇā vaiśvadevīṃ śataudanāṃ śatapāpmāno asyāḥ | samarpayann aśmanā parvatena svargaṃ lokam adhi rohayainam ||

14.5.5

dhṛṣṇu hy enāṃ vikṛtā vikṛntann apaghnaṃś carmerayā saṃ sṛjainām | virājo duhiterayā samaktā kāmaṃ kāmaṃ yajamānāya duhām ||

14.5.6

yathāparu viśasannāti maṃsthāḥ kṛṇuṣvā me nāvadheyāni pṛthak | agan devān mānuṣī yā purābhūc chataudanā pururūpā suvarṇā ||

14.5.7

dvipād dvihastaḥ puruṣo mahādamo vanaspatiṃ bibharti sāyakāgram | tena parūṃṣi pravidvān aghnyāyāḥ śataudanāṃ devīṃ śatadhā vy asya ||

14.5.8

etaṃ bradhnaṃ carmaṇaḥ kṛnta sādhu tam u pramāya śatadhā vy asya | sam ut sṛjann avadhānāni sarvā rāyaspoṣaṃ yajamānāya dhehi ||

14.5.9

ṛcā kumbhīm adhy agnau śrayāmi bhūmyāṃ tvā bhūmim adhi dhārayāmi | apo māṃsaṃ bibhratī mā vyathiṣṭhā mā tvā vadhiṣur menibhiḥ piśācāḥ ||

14.5.10

ūrdhva prehi mā saṃ vikthā vy asya rajo antaram | rakṣāṃsi sarvā tīrtvā- -athā roha divaṃ tvam ||

14.6.1

divaṃ prehi śataudane sahasrasyāyanaṃ bhava | ayutaṃ prayutaṃ bhava- -akṣitir bhavatāt tvaṃ svargaṃ lokam āruhaḥ ||

14.6.2

śataudanāṃ śatadhā bhakṣayanti śataṃ rohān rohati yo dadāti | vāmadevyaṃ naudhasam asyāḥ pakṣau tṛtīye nāke adhi viṣṭapi śritā ||

14.6.3

śataudanāṃ śatadhā kalpamānā śataṃ rūpāṇi kṛṇute svaryatī | sā no devī suhavā śarma yacchatv atho mṛḍātīdṛśe ||

14.6.4

śataudanā dvādaśāhena saṃmitā śataṃ pṛṣṭhāni sasṛje svaryatī | sarvān yajñān pariyatī parastāt sā dātāraṃ rāyaspoṣe dadhātu ||

14.6.5

abhi prehi śataudana ījānān somasatvanaḥ | yajñāṃs tvaṃ sarvān āptvā kāmaprasyāyanaṃ bhava ||

14.6.6

abhi prehi śataudane yajñenāyajvanas tara | ā devayūn arūruho yatrādas tridivaṃ divaḥ ||

14.6.7

īrāpadī prathamā śataudanā satyaṃ ha madhyam amṛtaṃ śiras tava | ubhe devī rodasī ā pṛṇāsi ||

14.6.8

ṛtaṃ ha śroṇī uta sakthau tanvā- -ojo ha bāhū uta tad balāya kam | anuṣṭhu jaṭharam ād u pārśve sarvām̐l lokāṃ chataudanā samāpa ||

14.6.9

cakṣuṣmatī prathamā śataudanā sūryo ha cakṣur uta candramās tava | viśvair devair ṛtubhiḥ saṃvidānā sā dātāraṃ tṛptyā tarpayāsi ||

14.6.10

śataṃ payāṃsi śatam asyā vatsāḥ śatadhā pakvāṃ vi bhajanty enām | sapta lokā divy ārpitā ye tāṃ jigetha prathamā śataudane ||

14.7.1

sahasreṇa śatamānā yad eṣi lokāṃ jigetha prathamā śataudane | sarvavedasam uta vājapeyaṃ sarvām̐l lokāṃ chataudanā samāpa ||

14.7.2

indraḥ papāta prathamaḥ śataudanāṃ sapta ṛṣibhyaḥ sumanasyamānaḥ | tayāsurāṇāṃ balam oja ā dade tayā ruroha viṣṭapo devalokān ||

14.7.3

viśvāmitro 'yaṃ jamadagnir atrir bharadvājo gotamo 'yaṃ vasiṣṭhaḥ | idaṃ pakvaṃ kaśyapasaptamāḥ prāśnantu prathamāḥ śataudanām ||

14.7.4

jyotiṣmatī prathamā śataudanā trīṇi jyotīṃṣi kṛṇute svar yatī | tāṃ dātāra upa jīvanti yatra tatra devaiḥ sadhamādaṃ madanti ||

14.7.5

chandaḥpakṣā bṛhatī śataudanā trīṇi cchandāṃsi sasṛje svar yatī | ṛtūṇām adhirājaṃ saṃvatsaraṃ patim asyā vindan ||

14.7.6

atikramyāgniṣṭomam atirātraṃ śataudane | yajñāṃs tvaṃ sarvān āptvā cityam agniṃ vy aśnuhi ||

14.7.7

aśvamedhyam atikramya dvādaśāhaṃ śataudane | trirātraṃ sāhnam āptvā vājapeyena kalpate ||

14.7.8

ye sahasrair ījānā agnihotrahutaś ca ye | yajñair ye sarvair ījānās tān āpnoti śataudanā ||

14.7.9

śaṃ te parūṃṣi subhage dadhāmi śaṃ te māṃsāny attathā bhavanti | asthi yat te śamitā śaśāra tat te tvaṣṭā vihṛtaṃ niṣ kṛṇotu ||

14.7.10

ye yajñena jitā lokā yā nu cchandāṃsi bhejire | sarvāṃs tām̐l lokān āpnoti yo dadāti śataudanām ||

14.8.1

iṣirā yoṣā yuvatīr damūnā rātrī devasya savitur bhagasya | aśvakṣatā suhavā saṃbhṛtaśrīr ā paprau dyāvāpṛthivī mahitvā ||

14.8.2

ava viśvāny aruhad gabhīrā- -udvarṣiṣṭham aruhad aśramiṣṭhā | uśatī rātry anu sānu bhadrād vi tiṣṭhate mitra iva svadhābhiḥ ||

14.8.3

narye vandye subhage sujāta ā cāgan rātri sumanā iha syām | asmāṃs trāyasva naryāṇi jātā- -aśvyā yāni gavyāni puṣṭā ||

14.8.4

siṃhasya rātry uśatī piśasya vyāghrasya dvīpino varca ā dade | aśvasya bradhnaṃ puruṣasya māyaṃ puru rūpāṇi kṛṇuṣe vibhātī ||

14.8.5

śivāṃ rātrim ahni sūryaṃ ca himasya mātā suhavā no astu | asya stomasya subhage ni bodha yena tvā vande viśvāsu dikṣu ||

14.8.6

stomasya no vibhāvari rātri rājeva joṣasai | asāma sarvavīrā bhavāma sarvavedaso vyucchantīr anūṣasaḥ ||

14.8.7

śamyā ha nāma dadhiṣe mama dipsanti ye dhanā | rātrīha tān asad apa- -atha steno na vidyate atha ripur na vidyate ||

14.8.8

bhadrāsi rātri camaso na piṣṭo viśvaṃ gorūpaṃ yuvatir bibharṣi | cakṣuṣmatī me mṛśatī vapūṃṣi prādityān divyān rukmām̐ amukthāḥ ||

14.8.9

yo adya stena āyaty aghāyur martyo ripuḥ | rātrī tasya pratītya pra grīvā pra śiro hanat ||

14.8.10

pra pādau na yathāyati pra hastau na yathāśiṣat | yo malimlar upāyati sa saṃpiṣṭo apāyati | apāyati sv apāyati śuṣke sthāṇāv apāyata ||

14.9.1

andhaṃ rātri tiṣṭhadhūmam aśīrṣāṇam ahiṃ kṛṇu | akṣau vṛkasya nir jahy ā stenaṃ drupade jahi ||

14.9.2

ye te rātry anaḍvāhas tīkṣṇaśṛṅgāḥ svāśavaḥ | tebhir no adya pāraya- -ati durgāṇi viśvahā ||

14.9.3

rātriṃ rātrim ariṣyantas tarema tanvā vayam | gambhīram aplavā iva na tareyur arātayaḥ ||

14.9.4

yathā śāmyākaḥ prapatan predivān nānu vidyate | evā rātri pra pātaya yo asmām̐ abhy aghāyati ||

14.9.5

apa stenaṃ vāsomathaṃ goajam uta taskaram | atho yo arvataḥ śiro +'bhidhāya ninīṣati ||

14.9.6

yad adya rātri subhage vibhajanty ayovasu | yad ehy asmān bhrājaya- -athed anyān upāyasi ||

14.9.7

uṣase naḥ pari dehi sarvān rātry anāgasaḥ | uṣā no ahna ā bhajād ahas tubhyaṃ vibhāvari ||