Kāṇḍa 15

15.1.1

samyan digbhyaḥ pavate saṃ svarvin madhor ato mādhavaḥ pātv asmān | agnir devo duṣṭarītur adābhya idaṃ kṣatraṃ rakṣatu pātv asmān ||

15.1.2

rathantaraṃ sāmabhiḥ pātv asmān gāyatreṇa cchandasā viśvarūpam | dvādaśā iṣṭayā stomo ahnāṃ samudro vāca idam ojaḥ pipartu ||

15.1.3

ugrā diśām abhibhūtir vayodhāḥ śuciḥ śukre ahany ojasye | indrādhipatiḥ pipṛtād ato no mayi kṣatraṃ viśvato dhārayedam ||

15.1.4

bṛhad rāṣṭraṃ kṣatrabṛd vṛddhavṛṣṇyaṃ triṣṭubhaujaḥ śubhitam ugravīram | indra stomaiḥ pañcadaśena varca idaṃ vātena sagareṇa rakṣatu ||

15.1.5

prācī diśāṃ sahayaśā yaśasvatī viśve devāḥ prāvṛṣāhnāṃ svarvatī | idaṃ kṣatraṃ duṣṭaram astv ojo anādhṛṣṭaṃ sahasvaṃ sahasvat ||

15.1.6

vairūpe sāmany aha tac chakeyaṃ jagatyainad vikṣv ā veśayāmi | viśve devāḥ saptadaśena vadyam idaṃ kṣatraṃ salilāvatam ugram ||

15.1.7

dhatrī diśāṃ kṣatram idaṃ dādhartu- -upasthāśānāṃ mitravad astv ojaḥ | mitrāvaruṇā śaradāhnā cikitnū asmai kṣatrāya mahi śarma yacchatam ||

15.1.8

vairāje sāmany adhi me manīṣā- -anuṣṭubhā saṃbhṛtaṃ vīryaṃ sahaḥ | idaṃ kṣatraṃ mitravad ārdradānv ojā mitrāvaruṇā rakṣatam ādhipatye ||

15.1.9

samrāḍ diśāṃ sahasāmnī sahasvaty ṛtur hemanto viṣṭhayā naḥ pipartu | oṣajātāṃ bṛhatī ca śakvarī- -imaṃ yajñam avatāṃ no ghṛtācī ||

15.1.10

svarvatī sudughā naḥ payasvatī diśāṃ devy avatu no ghṛtācī | tvaṃ gopāḥ puraetota paścād bṛhaspate yāmyāṃ yuṅdhi vācam ||

15.2.1

stomaikaviṃśe bhuvanasya patni vivasvagvāte abhi no gṛṇīhi | ghṛtavatī savitar ādhipatye payasvatī rantir āśā no astu ||

15.2.2

ūrdhvā diśāṃ rantir āśauṣadhīnāṃ saṃvatsareṇa savitā no ahnā | revat sāmnāṃ paṅktiś chandasām ajātaśatruḥ syonā no astu ||

15.2.3

viṣṭambho divo dharuṇaḥ pṛthivyā asyeśānā jagato viṣṇupatnī | viśvavyacā iṣayantī suhutiḥ syonā no astv aditer upasthe ||

15.2.4

dhruvā diśāṃ viṣṇupatny aghorā- -asyeśānā sahaso yā manotā | bṛhaspatir mātariśvota vāyuḥ saṃdhānā vātā abhi no gṛṇantu ||

15.2.5

yo naḥ pitā janitā yo vidhartā yo naḥ sato abhy ā saj jajāna | sa āśiṣā draviṇam icchamānaḥ prathamacchado vara ā viveśa ||

15.2.6

abhy ā vartasva pṛthivī yajñena payasā saha | apānto agnir iṣito 'va rohatu ||

15.2.7

yad agne candraṃ yat pūtaṃ yac chukraṃ yac ca yajñiyam | tad devebhyo bharāmasi ||

15.2.8

iṣam ūrjam aham ata ādi yajñasya yonau mahiṣasya dhāman | ā no goṣu viśastv ā prajāyāṃ jahāmi sedim anirām amīvām ||

15.3.1

āyuṣo 'si prataraṇaṃ vipraṃ bheṣajam ucyase | tad āñjana tvaṃ śantāte 'si māyobhavaṃ kṛtam ||

15.3.2

yo harimā jāyānyo aṅgabhedo visalpakaḥ | sarvaṃ te yakṣmam aṅgebhyo bahir nir hantv āñjanam ||

15.3.3

āñjanaṃ pṛthivyāṃ jātaṃ bhadraṃ puruṣajīvanam | kṛṇotv atpramāyakaṃ rathajūtim anāgasam ||

15.3.4

prāṇa prāṇaṃ trāyasvāso asave mṛḍa | nirṛte nirṛtyā naḥ pāśebhyo muñca ||

15.3.5

sindhor garbho 'si vidyutāṃ puṣpam | vātaḥ prāṇaḥ sūryaś cakṣur divas payaḥ ||

15.3.6

devāñjanaṃ traikakudaṃ pari mā pāhi viśvataḥ | na tvā taranty oṣadhayo bāhyāḥ parvatīyā uta ||

15.3.7

vīdaṃ madhyam avāsṛjad rakṣohāmīvacātanaḥ | amīvāḥ sarvāś cātayan nāśayad abhibhā itaḥ ||

15.3.8

bahv idaṃ rājan varuṇa- -anṛtam āha puruṣaḥ | tasmāt sahasravīrya muñca naḥ pary aṃhasaḥ ||

15.3.9

yad āpo aghnyā iti varuṇeti yad ūcima | tasmāt sahasravīrya muñca naḥ pary aṃhasaḥ ||

15.3.10

mitraś ca tvā varuṇaś ca- -anu preyatur āñjana | tau tvānugatya dūraṃ bhogāya puna rohatu ||

15.4.1

ṛṇād ṛṇam iva saṃ naya kṛtyāṃ kṛtyākṛto gṛham | cakṣurmantrasya durhārdaḥ pṛṣṭīr api śṛṇāñjana ||

15.4.2

yad asmāsu duṣvapnyaṃ yad goṣu yac ca no gṛhe | amāmagatyasta durhārdaḥ priya prati muñcatām ||

15.4.3

apām ūrja ojaso vāvṛdhānam agner jātam adhi jātavedasaḥ | caturvīraṃ parvatīyaṃ yad āñjanaṃ diśaḥ pradiśaḥ karad ic chivās te ||

15.4.4

caturvīraṃ badhyata āñjanaṃ te sarvā diśo abhayās te bhavantu | dhruvas tiṣṭhādhi saviteva vārya imā viśo abhi harantu te balim ||

15.4.5

āṅkṣvaikaṃ maṇim ekaṃ kṛṇuṣva snāhy ekena pibaikam eṣām | caturvīraṃ nairṛtebhyaś caturbhyo grāhyā bandhebhyaḥ pari pātv asmān ||

15.4.6

agnir māghnyenāvatu prāṇāyāpānāyāyuṣe | varcasa ojase tejase svastaye subhūtaye svāhā ||

15.4.7

indro mendryeṇāvatu prāṇāyāpānāyāyuṣe | varcasa ojase tejase svastaye subhūtaye svāhā ||

15.4.8

somo mā somyenāvatu prāṇāyāpānāyāyuṣe | varcasa ojase tejase svastaye subhūtaye svāhā ||

15.4.9

bhago mā bhagenāvatu prāṇāyāpānāyāyuṣe | varcasa ojase tejase svastaye subhūtaye svāhā ||

15.4.10

maruto mā gaṇair avantu prāṇāyāpānāyāyuṣe | varcasa ojase tejase svastaye subhūtaye svāhā ||

15.5.1

āyurdā deva jarasaṃ pṛṇāno ghṛtapratīko ghṛtapṛṣṭho agne | ghṛtaṃ pibann amṛtaṃ cāru gavyaṃ piteva putraṃ jarase nayemam ||

15.5.2

āyur asmai dhehi jātavedaḥ prajāṃ tvaṣṭar adhi ni dhehy onaḥ | rāyaspoṣaṃ savitar ā suvāsmai śataṃ jīvāti śaradas tavāyam ||

15.5.3

imam agna āyuṣe varcase dhāḥ priyaṃ reto varuṇa mitra rājan | mātevāsmā adite śarma yaccha viśve devā jaradaṣṭir jathāsat ||

15.5.4

agniṣ ṭa āyuḥ prataraṃ kṛṇotu somas te puṣṭiṃ prataraṃ dadhātu | indro marutvān adhi te bravītv ādityais te aditiḥ śarma yacchatu ||

15.5.5

revatīs tvā vyakṣaṇaṃ kṛttikāś cakṛtus tvā | apasas tvām atanvata dhiyo 'vayann avāgnāyīr apṛñcan ||

15.5.6

sahasram antām̐ abhito 'dadantā- -aśītir madhyam abhayaṃ vi nārīḥ | devīr devāya paridhe savitre mahat tad āsāmaghavan mahitvam ||

15.5.7

imam aśmānam ā tiṣṭha- -aśmeva tvaṃ sthiro bhava | pra mṛṇīhi durasyataḥ sahasva pṛtaṇāyataḥ ||

15.5.8

yena devaṃ savitāraṃ pari devā adhārayan | tenemaṃ brahmaṇaspate pari rāṣṭrāya dhattana ||

15.5.9

parīmam indram āyuṣe mahe kṣatrāya dhattana | yathainaṃ jarase nayāñ jyok kṣatre adhi jāgarat ||

15.5.10

parīmaṃ somam āyuṣe mahe śrotrāya dhattana | yathainaṃ jarase nayāṃ jyok śrotre adhi jāgarat ||

15.6.1

pari dhatta dhatta varcasemaṃ jarāmṛtyuṃ kṛṇuta dīrgham āyuḥ | bṛhaspatiḥ prāyacchad vāsa etat somāya rājñe paridhātavā u ||

15.6.2

jarāṃ su gaccha pari dhatsva vāso bhavā gṛṣṭīnām abhiśastivā u | śataṃ ca jīva śaradaḥ suvarcā rāyaspoṣam upa saṃ vyayasva ||

15.6.3

parīdaṃ vāso api dhāḥ svastaye 'bhūr vāpīnām abhiśastipā u | śataṃ ca jīva śaradaḥ purūcīr vasūni cārur vibhajāsi jīvan ||

15.6.4

yoge yoge tapastaraṃ vāje vāje havāmahe | sakhāya indram ūtaye ||

15.6.5

hiraṇyavarṇo ajaraḥ suvīro jarāmṛtyuḥ prajayā saṃ viśasva | tad agnir āha tad u soma āha bṛhaspatiḥ savitā tad indraḥ ||

15.6.6

yadottamat tantu badhāya nāvadvāsaḥ pūrvayāvat pururūpapeśaḥ | bhadrātīkā samajaraṃ suvīraṃ tena devāḥ pra tirantv āyuḥ ||

15.6.7

yasya brāhmaṇaḥ sicam ārabhante śrathnanto nīvaṃ pratiranta āyuḥ | tasya devā devahūtiṃ juṣantāṃ sa viśvahā sacatāṃ svasti ||

15.6.8

anyad ā dhatsva pari dhatsva vāsa imam ulbam apa lumpāmi yas te | jarase tvām ṛṣayaḥ saṃ vyayantu sūryo bhagas te pra tirantv āyuḥ ||

15.6.9

yasya devāsaḥ prathamavāsyaṃ harāmi taṃ tvā viśve avantu devāḥ | taṃ tvā bhrātaraḥ suvṛdhā vardhamānam anu jāyantāṃ bahavaḥ sujātam ||

15.6.10

ahatenāhato bhava sthira sthireṇa saṃ bhava | pra mṛṇīhi durasyataḥ sahasva pṛtanāyataḥ ||

15.7.1

mitraḥ pṛthivyā adhyakṣaḥ | sa māvatv asmin brahmaṇy asmin karmaṇy asyāṃ purodhāyām asyāṃ dehahūtyām asyām ākūtyām asyām āśiṣi svāhā ||

15.7.2

varuṇo 'pām adhyakṣaḥ | sa māvatv asmin brahmaṇy asmin karmaṇy asyāṃ purodhāyām asyāṃ dehahūtyām asyām ākūtyām asyām āśiṣi svāhā ||

15.7.3

vāyur antarikṣasyādhyakṣaḥ | sa māvatv asmin brahmaṇy asmin karmaṇy asyāṃ purodhāyām asyāṃ dehahūtyām asyām ākūtyām asyām āśiṣi svāhā ||

15.7.4

sūryo divo 'dhyakṣaḥ | sa māvatv asmin brahmaṇy asmin karmaṇy asyāṃ purodhāyām asyāṃ dehahūtyām asyām ākūtyām asyām āśiṣi svāhā ||

15.7.5

candramā nakṣatrāṇām adhyakṣaḥ | sa māvatv asmin brahmaṇy asmin karmaṇy asyāṃ purodhāyām asyāṃ dehahūtyām asyām ākūtyām asyām āśiṣi svāhā ||

15.7.6

vasuḥ saṃvatsarāṇām adhyakṣaḥ | sa māvatv asmin brahmaṇy asmin karmaṇy asyāṃ purodhāyām asyāṃ dehahūtyām asyām ākūtyām asyām āśiṣi svāhā ||

15.7.7

saṃvatsara ṛtunām adhyakṣaḥ | sa māvatv asmin brahmaṇy asmin karmaṇy asyāṃ purodhāyām asyāṃ dehahūtyām asyām ākūtyām asyām āśiṣi svāhā ||

15.7.8

agnir vanaspatīnām adhyakṣaḥ | sa māvatv asmin brahmaṇy asmin karmaṇy asyāṃ purodhāyām asyāṃ dehahūtyām asyām ākūtyām asyām āśiṣi svāhā ||

15.7.9

indraḥ karmaṇām adhyakṣaḥ | sa māvatv asmin brahmaṇy asmin karmaṇy asyāṃ purodhāyām asyāṃ dehahūtyām asyām ākūtyām asyām āśiṣi svāhā ||

15.7.10

savitā prasavānām adhyakṣaḥ | sa māvatv asmin brahmaṇy asmin karmaṇy asyāṃ purodhāyām asyāṃ dehahūtyām asyām ākūtyām asyām āśiṣi svāhā ||

15.8.1

viṣṇuḥ parvatānām adhyakṣaḥ | sa māvatv asmin brahmaṇy asmin karmaṇy asyāṃ purodhāyām asyāṃ dehahūtyām asyām ākūtyām asyām āśiṣi svāhā ||

15.8.2

tvaṣṭā rūpāṇām adhyakṣaḥ | sa māvatv asmin brahmaṇy asmin karmaṇy asyāṃ purodhāyām asyāṃ dehahūtyām asyām ākūtyām asyām āśiṣi svāhā ||

15.8.3

rudraḥ paśūnām adhyakṣaḥ | sa māvatv asmin brahmaṇy asmin karmaṇy asyāṃ purodhāyām asyāṃ dehahūtyām asyām ākūtyām asyām āśiṣi svāhā ||

15.8.4

somaḥ payasām adhyakṣaḥ | sa māvatv asmin brahmaṇy asmin karmaṇy asyāṃ purodhāyām asyāṃ dehahūtyām asyām ākūtyām asyām āśiṣi svāhā ||

15.8.5

parjanya oṣadhīnām adhyakṣaḥ | sa māvatv asmin brahmaṇy asmin karmaṇy asyāṃ purodhāyām asyāṃ dehahūtyām asyām ākūtyām asyām āśiṣi svāhā ||

15.8.6

samudro nadīnām adhyakṣaḥ | sa māvatv asmin brahmaṇy asmin karmaṇy asyāṃ purodhāyām asyāṃ dehahūtyām asyām ākūtyām asyām āśiṣi svāhā ||

15.8.7

hiṃkāraḥ sāmnām adhyakṣaḥ | sa māvatv asmin brahmaṇy asmin karmaṇy asyāṃ purodhāyām asyāṃ dehahūtyām asyām ākūtyām asyām āśiṣi svāhā ||

15.8.8

sarasvatī vācām adhyakṣā | sā māvatv asmin brahmaṇy asmin karmaṇy asyāṃ purodhāyām asyāṃ dehahūtyām asyām ākūtyām asyām āśiṣi svāhā ||

15.8.9

pūṣā pathīnām adhyakṣaḥ | sa māvatv asmin brahmaṇy asmin karmaṇy asyāṃ purodhāyām asyāṃ dehahūtyām asyām ākūtyām asyām āśiṣi svāhā ||

15.8.10

gāyatrī chandasām adhyakṣā | sā māvatv asmin brahmaṇy asmin karmaṇy asyāṃ purodhāyām asyāṃ dehahūtyām asyām ākūtyām asyām āśiṣi svāhā ||

15.9.1

bṛhaspatir devānām adhyakṣaḥ | sa māvatv asmin brahmaṇy asmin karmaṇy asyāṃ purodhāyām asyāṃ dehahūtyām asyām ākūtyām asyām āśiṣi svāhā ||

15.9.2

prajāpatiḥ prajānām adhyakṣaḥ | sa māvatv asmin brahmaṇy asmin karmaṇy asyāṃ purodhāyām asyāṃ dehahūtyām asyām ākūtyām asyām āśiṣi svāhā ||

15.9.3

yamaḥ pitṝṇām adhyakṣaḥ | sa māvatv asmin brahmaṇy asmin karmaṇy asyāṃ purodhāyām asyāṃ dehahūtyām asyām ākūtyām asyām āśiṣi svāhā ||

15.9.4

pitaraḥ pare 'varas tatas tatāmahaḥ | te māvantv asmin brahmaṇy asmin karmaṇy asyāṃ purodhāyām asyāṃ devahūtyām asyām akūtyām asyām āśiṣi svāhā ||

15.9.5

devānāṃ devā devā deveṣv adhidevāḥ parā kramadhvam | prathamā dvitīyeṣu dvitīyās tṛtīyeṣu ||

15.9.6

trir ekādaśā viśve vaiśvānarā mahi mahānto na mārabhadhvam | idaṃ śakeyaṃ yad idaṃ kṛṇomi svāhā ||

15.10.1

jīmūtasyeva bhavati pratīkaṃ yad varmī yāti samadām upasthe | anāviddhayā tanvā jaya tvaṃ sa tvā varmaṇo mahimā pipartu ||

15.10.2

dhanvanā gā dhanvanājiṃ jayema dhanvanā tīvrāḥ samado jayema | dhanuḥ śatror apakāmaṃ kṛṇotu dhanvanā sarvāḥ pṛtanā jayema ||

15.10.3

vakṣyantīved ā ganīganti karṇaṃ priyaṃ sakhāyaṃ pariṣasvajānā | yoṣeva śiṅkte vitatādhi dhanvañ jyā iyaṃ samiti pārayantī ||

15.10.4

te ācarantī samaneva yoṣā māteva putraṃ pipṛtām upasthe | apa śatrūn vidhyatāṃ saṃvidāne ārtnī ime visphurantī amitrān ||

15.10.5

bahvīnāṃ pitā bahur asya putro vyacaḥ kṛṇoti samado 'vagatya | iṣudhiḥ saṅkāḥ pṛtanāś ca sarvāḥ pṛṣṭhe ninaddho jayati prasūtaḥ ||

15.10.6

rathe tiṣṭhan nayati vājinaḥ puro yatrayatra kāmayate suṣārathiḥ | abhīśūnāṃ mahimānaṃ panāyata manaḥ paścād anu yacchanti raśmayaḥ ||

15.10.7

tīvrān ghoṣān kṛṇvatāṃ vṛṣapāṇayo 'śvā rathebhiḥ saha vājayantaḥ | apakrāmantaḥ prapadair amitrān kṣiṇanti śatrūṃr anapavyayantaḥ ||

15.10.8

rathavāhanaṃ havir asya nāma yatrāyudhaṃ nihitam asya varma | tatrā ratham upa śagmaṃ sadema viśvāhā vayaṃ sumanasyamānāḥ ||

15.10.9

svāduṣaṃsadaḥ pitaro vayodhāḥ kṛcchreśritaḥ śaktīvanto gabhīrāḥ | citrasenā iṣubalā amṛdhrāḥ satovīrā uravo vrātasāhāḥ ||

15.10.10

brahmaṇāsaḥ pitaraḥ somyāsaḥ śive no dyāvāpṛthivī anehasā | pūṣā naḥ pātu dūritād ṛtāvṛdho rakṣā mākir ṇo aghaśaṃsa īśata ||

15.11.1

bṛhaspatir naḥ pari pātu paścād utottarasmād adharād aghāyoḥ | indraḥ purastād uta madhyato naḥ sakhā sakhibhyo varivaḥ kṛṇotu ||

15.11.2

suparṇaṃ vaste mṛgo asyā danto gobhiḥ saṃnaddhā patati prasūtā | yatrā naraḥ saṃ ca vi ca dravanti tad asmabhyam iṣavaḥ śarma yacchān ||

15.11.3

suparṇo vāso yad u sarpir āsā mano hiraṇyam iṣavaḥ patatrī | māsmāṅ arann amuta āpatantīr itaḥ prahitāḥ savitar jayantu ||

15.11.4

ahir iva bhogair pary eti bāhuṃ jyāyā hetim apabādhamānaḥ | hastaghno viśvā vayunāni vidvān pumān pumāṃsaṃ pari pātu mṛtyoḥ ||

15.11.5

ā jaṅghanti sānv eṣāṃ jaghanām̐ upa jighnate | aśvājani tra pracodaya- -aśvān samatsu pādaya ||

15.11.6

divas pṛthivyāḥ pary oja ābhṛtaṃ vanaspatibhyaḥ pari saṃbhṛtaṃ sahaḥ | apām ojmānaṃ pari gobhir ābhṛtam indrasya vajraṃ haviṣā rathaṃ yaja ||

15.11.7

indrasya vajro marutām anīkaṃ mitrasya garbho varuṇasya nābhiḥ | semāṃ no havyadātiṃ juṣāṇo deva ratha prati havyā gṛbhāya ||

15.11.8

vanaspate vīḍvaṅgo hi bhūyā asmatsakhā prataraṇaḥ suvīraḥ | gobhiḥ saṃnaddho ratha vīḍayasva- -āsthātā te jayatu jetvāni ||

15.11.9

upa śvāsaya pṛthivīm uta dyāṃ purutrā te manutāṃ viṣṭhitaṃ jagat | sa dundubhe sajūr indreṇa devair dūrād davīyo apa sedha śatrūn ||

15.11.10

ā krandaya balam ojo na ā dhā abhi ṣṭana duritā bādhamānaḥ | apa sedha dundubhe ducchunām ita indrasya muṣṭir asi vīḍayasva ||

15.12.1

prāmūñ jayābhīme jayantu ketumad dundubhir vāvadītu | sam aśvaparṇāḥ patayantu no naro 'smākam indra rathino jayantu ||

15.12.2

indro rathāya prapadaṃ kṛṇotu yam adhyaṣṭhān maghavā jayantām | irya iva paśubhir yuyotu gopā ariṣṭo jātaḥ prathamaḥ siṣāsan ||

15.12.3

parjanyasyeva stanayitnur āsor indrāgnyor iva cekhidyate ghoṣo asya | sāhasro vīraḥ śataṃ sasanvān ayutaṃ sasanvān ratha mṛḍeha ||

15.12.4

śyenasya pakṣau hariṇasya bāhū indrasya muṣṭir marutām anīkam | gobhiḥ saṃnaddho asi vīḍayasva ||

15.12.5

ud yaṃyamīti sahiteva bāhū ubhe sicau yajate bhīma ṛñjan | uc chukram atkam ajate śacībhir navā mātṛbhyo vasanā jahāti ||

15.12.6

ugrau te nemī pavī ta ugrā ugrāḥ śaṅkavo bṛhato rathasya | īṣātra veṇavo namatis ta ugrā- -agniś cakṣuḥ pravayaṇaṃ rathasya | tenāmitrān pramṛṇan yāhi śatrūn ||

15.12.7

arā nābhayo balam it te akṣa ugrau te koṣau saha nisyadābhyām | āṇyor vadhrān uta koṣaghorā sthānaṃ bandha uta vandhuraṃ te ||

15.12.8

goṣṭhe balaṃ mṛga ekam aṅgaṃ parā kramadhvaṃ maha ā suvanta | abhīśavo hatānena vṛtram ayaṃ kṣatreṇa prajayāstūgraḥ ||

15.12.9

ā tiṣṭha jiṣṇus tarasā sapatnān sāhasro vīraḥ pramṛṇan yāhi śatrūn | pṛṣṭiyuge kṛṇutaṃ vīryāṇi tad etām etaṃ ratham asya śagme ||

15.12.10

aṣṭau cakṣūṃṣi kavayaḥ saṃ namantv aśvā prākāśā ṛju dhāvayantaḥ | anu tvā skambho dadatāṃ piteva cakramāṇam ainaṃ dhatsvopasthe pra tirāty āyuḥ ||

15.12.11

kavibhiḥ syūtaḥ sa rathe vibaddhaḥ sa dhanvadhir dhanucitte jajāna | anuprāsyemāni pṛthumadhyamāny aśvebhyaḥ śaṃtvāya kavibhiḥ kṛtāni tebhiṣ ṭe śarma yacchantu devāḥ ||

15.13.1

agniṃ brūmo vanaspatīn oṣadhīr uta vīrudhaḥ | indraṃ bṛhaspatiṃ sūryaṃ te no muñcantv aṃhasaḥ ||

15.13.2

brūmo devaṃ savitāraṃ dhātāram uta pūṣaṇam | tvaṣṭāram agryaṃ brūmas te (…) ||

15.13.3

brūmo rājānaṃ varuṇaṃ mitraṃ viṣṇum atho bhagam | aṃśaṃ vivasvantaṃ brūmas te (…) ||

15.13.4

gandharvāpsaraso brūmo aśvinā brahmaṇaspatim | aryamā nāma yo devas te (…) ||

15.13.5

vātaṃ brūmaḥ parjanyam antarikṣam atho diśaḥ | āśāś ca sarvā brūmas te (…) ||

15.13.6

ahorātre idaṃ brūma sūryācandramasā ubhā | ādityān sarvān brūmas te no muñcantv aṃhasaḥ ||

15.13.7

muñcantu mā śapathyād ahorātre atho uṣāḥ | somo mā divyo muñcatu yam āhuś candramā iti ||

15.13.8

pañca rājyāni vīrudhāṃ somaśreṣṭhāni brūmasi | bhaṅgo darbho yavaḥ sahas te no muñcantv aṃhasaḥ ||

15.13.9

ye grāmyāḥ sapta paśava āraṇyā uta ye mṛgāḥ | śakuntān pakṣiṇo brūmas te no muñcantv aṃhasaḥ ||

15.13.10

bhavāśarvāv idaṃ brūma ugraḥ paśupatiś ca yaḥ | iṣūr yā eṣāṃ vidmas te no muñcantv aṃhasaḥ ||

15.14.1

yajñaṃ brūmo yajamānam ṛcaḥ sāmāni bheṣajā | yajūṃṣi hotrān brūmas te no muñcantv aṃhasaḥ ||

15.14.2

ṛtūn brūma ṛtupatīn ārtavām̐ uta hāyanān | samāḥ saṃvatsarān māsas te no (…) ||

15.14.3

divaṃ brūmo nakṣatrāṇi bhūmiṃ yakṣāṇi parvatān | samudrā nadyo veśantās te (…) ||

15.14.4

sapta ṛṣīn vā idaṃ brūmo 'po devīḥ prajāpatim | pitṝn yamaśreṣṭhān brūmas te (…) ||

15.14.5

viśvān devān idaṃ brūmaḥ satyasandhān ṛtāvṛdhaḥ | viśvābhiḥ patnībhiḥ sākaṃ te (…) ||

15.14.6

ādityā rudrā vasavo devā daivā atharvaṇaḥ | aṅgiraso manīṣiṇas te (…) ||

15.14.7

ye devā diviṣado 'ntarikṣasadaś ca ye | pṛthivyāṃ śakrā ye śritās te (…) ||

15.14.8

eta devā dakṣiṇataḥ paśvāt prāñca ud etana purastāc chakrā uttarād viśve devāḥ sametya te (…) ||

15.14.9

arāyān brūmo rakṣāṃsi sarpān puṇyajanān uta | mṛtyūn ekaśataṃ brūmas te no muñcantv aṃhasaḥ ||

15.14.10

yā devīḥ pañca pradiśo ye devā dvādaśartavaḥ | saṃvatsarasya ye daṃṣṭrās te naḥ santu sadā śivāḥ ||

15.14.11

bhūtaṃ brūmo bhūtapatiṃ bhūtānām uta yas patiḥ | bhūtāni sarvā brūmas te no muñcantv aṃhasaḥ ||

15.15.1

yāvad dyaur yāvat pṛthivī yāvat paryeti sūryaḥ | tāvat tvam ugra oṣadhe pari pāhy arundhati ||

15.15.2

ariṣṭas tvā khanaty ariṣṭāya khanāmi tvā | dvipāc catuṣpād asmākaṃ sarvam astv anāturam ||

15.15.3

devānām asi svasā marutām asi sañcarī | yaṃ jīvam aśnuṣe tvaṃ na sa riṣyāti pūruṣaḥ ||

15.15.4

arundhatī nāmāsi tṛtīyasyām ito divi | tatrāmṛtasya rohaṇaṃ tena tvācchāvadāmasi ||

15.15.5

śaṃ ta āpo hṛdyāḥ śaṃ te kulijyā uta | śaṃ vātaḥ śaṃ bṛhaspatiḥ śaṃ te tapatu sūryaḥ ||

15.15.6

śaṃ ta indrāgnī bhavatāṃ śaṃ rātrī prati dhīyatām | śaṃ te pṛthivyāṃ vīrudhaḥ śam u te santv oṣadhīḥ ||

15.15.7

bahvīṣu hi tvām avidam oṣadhīṃ vīryavatīm | arundhati tvām āhārṣam ito mā pārayān iti ||

15.15.8

abhiprepseva jīvantam abhi dasyed arundhatī | eṣā daviddya bheṣajī devī vātīkṛtasya ca ||

15.15.9

anu ṣiñca nas tat kurv agado vai bhaviṣyati | vātīkṛtasya bheṣajy āgan devy arundhatī ||

15.15.10

mā bibher na mariṣyasy agado vai bhaviṣyasi | vātīkṛtasya bheṣajy āgan devy arundhatī ||

15.16.1

arundhatyaḥ saṃ vadante gāvaḥ pravrājinīr iva | yam āturam abhigaccha- -amāvataṃ kṛṇu māvatam ||

15.16.2

imaṃ me tvaṃ jarāmṛtyuṃ puruṣaṃ kṛṇv oṣadhe | rājñī hi sarvāsām asy oṣadhīnām arundhatī ||

15.16.3

trāyamāṇā hy asi jīvalā vīryāvatī | arundhati tvām āhārṣam ito mā pārayān iti ||

15.16.4

digdhena ca viddhasya- -aghasyāghaviṣā ca yā | arundhati tvaṃ tasyāsi viṣasya viṣadūṣaṇī ||

15.16.5

āheyena ca daṣṭasya- -aghasya (…) ||

15.16.6

vātīkāreṇa ca kṣiptasya- -aghasya (…) ||

15.16.7

bhavena ca (…) | (…) ||

15.16.8

śarveṇa ca (…) | (…) ||

15.16.9

rudreṇa ca (…) | (…) ||

15.16.10

paśupatinā ca kṣiptasya (…) ||

15.17.1

ugreṇa ca devena ca kṣiptasya (…) ||

15.17.2

mahādevena ca kṣiptasya (…) ||

15.17.3

īśānena ca kṣiptasya- -aghasyāghaviṣā ca yā | arundhati (…) ||

15.17.4

yat pṛthivyāṃ viṣaṃ vīrutsv adhi yad viṣam | (…) ||

15.17.5

yad oṣadhībhyaḥ saṃbharanti brahmāṇo menaye viṣam | (…) ||

15.17.6

yad brāhmaṇāḥ saṃbharanti tṛṣṭamāśīviṣaṃ viṣam | (…) ||

15.17.7

yaḥ kṣipto mṛtyunā yasmair yo daṣṭas tṛṣṭadaṃśmabhiḥ | arundhati tvaṃ tasyāsi viṣasya viṣadūṣaṇī ||

15.17.8

saṃ jihīṣvāmukthā yakṣmād ārukṣo lokam uttamam | apā jīvasi pātreṇa- -adhi jīvapurā ihi ||

15.18.1

apsaraso vi vo yakṛd vi vo bhinadmi mehanam | vi caṇḍālaṃ vy arjunaṃ vi vavṛtraṃ bhinadmi vaḥ ||

15.18.2

viśvajanyāḥ pāñcajanyā mahārukmāḥ śikhaṇḍinīḥ | sarvā indrasya vajreṇa hatā budbudayātavaḥ ||

15.18.3

andhācīm asitācīm ulūkhalasya budhnena | avaitaṃ vatsapaṃ jahi ||

15.18.4

dūrād enāḥ praty ā paśyam āpatantīr atho divaḥ | devānāṃ havyamohanīr indro apsaraso hanat ||

15.18.5

ā hatā apa tā itaḥ khalād iva yātudhānyaḥ | amuṃ gacchata pūruṣaṃ samudram apa gacchati ||

15.18.6

divaṃ gacchantu divyāḥ saro gacchantu sārasīḥ | uluṅgulasya yo guhas tad u gacchantv āsurīḥ ||

15.18.7

āskandike viskandike parācīr apa nṛtyantu | sāraṅgeṇa śunā saha ||

15.18.8

yaḥ sāraṅgo hiraṇyadan śvā divyaḥ pariplavaḥ | tasyāhaṃ nāma jagrabha- -asmā ariṣṭatātaye ||

15.18.9

adyāṃ te viraṇī parācīr apa nṛtyata | śṛṇāmi ghorā vaḥ pṛṣṭī brahmaṇā kīkasā uta ||

15.18.10

ekatriṃśad aśvavatīś catasra uta guṅguvaḥ | śivā daśa śṛtā daśa keśinīḥ pañcaviṃśatiḥ | idam uluṅgulukābhyo apsarābhyo 'karaṃ namaḥ ||

15.19.1

yāḥ preṅkhe preṅkhayante santāne mālavā iva | (…) ||

15.19.2

yāḥ purastād ācaranti sākaṃ sūryasya raśmibhiḥ | (…) ||

15.19.3

yā adharād ācaranty anasā chadisā saha | (…) ||

15.19.4

yāḥ paścād ācaranty andhena tamasā saha | (…) ||

15.19.5

yā uttarād ācaranti varṣeṇa vidyutā saha | (…) ||

15.19.6

yā adhastād udvīkṣante sācy akṣi karikratīḥ (…) ||

15.19.7

yā upariṣṭād avekṣante nīle vyaktāni bibhratīḥ | (…) ||

15.19.8

yā antarikṣa īrayanti vātena reṣmaṇā saha | (…) ||

15.19.9

yā nadīr iti catasraḥ ||

15.20.1

tvaj jātā rudra śantamā tvaṃ hi no babhuryā irāya bheṣajebhiḥ | vi yakṣmān yāvayāsmad vy aṃho vy amīvāś cātayāsmad viṣūcīḥ ||

15.20.2

tvaṃ devānām asi rudra śreṣṭhas tavas tavasām ugrabāho | hṛṇīyasā manasā modamāna ā babhūvitha rudrasya sūnoḥ ||

15.20.3

tvaṃ hi no vīrām̐ īraya bheṣajebhir uruṃ no bhavanta maghavo marutvan | karā naḥ pāram aṃhasaḥ svasti viśvā abhītīr apa sedhāsmat ||

15.20.4

tvaṃ hi no vṛṣabha cakṣimeṣṭhā asmai rudrāyogrāya mīḍhuṣe | kṣayadvīrāya pra bharāmahe matiṃ yathā naḥ śam aso dvipade śaṃ catuṣpade ||

15.20.5

kva teṣu rudra hasto mṛḍayāko jalāṣaḥ | apabhartā rapaso daivyasya ||

15.20.6

pra yakṣmaḥ pra nirṛtir etv asmat seneva sṛṣṭā pracatām amīvā | ārādhvaṃ sanā vṛjanā jahīta ||

15.20.7

arhan dhanur hitaṃ bibharṣy arhan niṣkaṃ rajantaṃ viśvarūpam | arhann idaṃ dayase viśvam ejan na te dūraṃ na pariṣṭhāsti te bhava sadyaḥ sarvān pari paśyasi bhūmim ||

15.20.8

namas te astu vidyute namas te stanayitnave | namas te astv aśmane yena pradiśam asyasi ||

15.20.9

mā devānām ugra rājann asmākaṃ puruṣā riṣan | rakṣāṃsy asmad yakṣmāṃś ca nāśayāmasi brahmaṇā ||

15.20.10

brahmaṇeto nāśayāmo yat kiṃ cāṅgeṣv āmayat | śalyān yakṣmasyātho ropīs tā ito vi nayāmasi ||

15.21.1

nayāmi vāṃ paśupatī ghṛtenājyena vardhayan | yaṃ dviṣmo yaś ca no dveṣṭi tasya veśaḥ kariṣyathaḥ ||

15.21.2

adhi brūtaṃ paśupatī dvipade me catuṣpade | prasūtau yatra jaghnatus tato me mātaraṃ riṣat ||

15.21.3

yā vāṃ rudraḥ śivā tanū yā vāṃ santi rogaṇāḥ | yā vām āyuṣmatīs tanūs tābhir no mṛḍataṃ yuvam ||

15.21.4

na pra minanti vratino vratāni satyaṃ jinvanto vidathā vadantaḥ | yasyeme rodasī ubhe saṃyukte manasā hṛdā ||

15.21.5

sa prajānāṃ prajāpatiḥ sādhu rakṣati varṣati | sa veda ratnabheṣajaṃ devebhyas pary ābhṛtaṃ tena no mṛḍataṃ yuvam | jīvātave na martave 'tho ariṣṭatātaye ||

15.21.6

saguṇāsa āsate saṃyuktā balāya kam | teṣāṃ yad indriyaṃ vṛha cati rocati rocanā ||

15.21.7

ye te rocane bṛhatī antarikṣe atho divaḥ | tābhyām upa pra yāhi naḥ sarvavīrām̐ ariṣyataḥ ||

15.21.8

sarvavīrā ariṣyanto rocane adhi tasthima | yathā nas tṛṣṇamad vasu divi kṣipadbhyo apsu yā ||

15.22.1

indrāgnī huve prathamau hvayāmi marutaḥ śivān | hvayāmi viśvān devān imaṃ homam avantu me ||

15.22.2

tvaṃ prathamo amṛtatvam agne devo devatvaṃ prathamo jigetha | tava divi hṛdayaṃ saṃ babhūva sa naḥ śivā āpo jātavedo ni yaccha ||

15.22.3

agnāv agniś carati praviṣṭa ṛṣīṇāṃ putro adhirāja eṣaḥ | tasmai juhomi haviṣā ghṛtena mā devānāṃ yūyavad bhāgadheyam ||

15.22.4

ye devā divi ṣṭha ye pṛthivyāṃ jātavedo ya urāv antarikṣe | ye giriṣu parvateṣv apsv antas te devā aśaniṃ yāvayātha ||

15.22.5

mitraṃ digbhiḥ kṛṇuṣva jātaveda āśābhir mitram adhipā vipaścit | mā no hiṃsīr divyenāgninā sasyāṃ yena yanti maruta spardhamānāḥ ||

15.22.6

vidyotamāna stanayan vṛṣevaiṣi kanikradat | bhīmaḥ parjanya te rathaḥ sa u naḥ śarma yacchatu ||

15.22.7

ye vidyutam aśanim ā tanvanti marutaḥ salilād adhi | kṛṣyai no viśvavārāyā avadhanvā ni tanvatām ||

15.22.8

yo vidyutam aśanim ātaṃty antarikṣād uta vātād divaś ca | tebhyo marudbhyo namo 'stv ojase ||

15.22.9

tā yantu svaraṃkṛtāḥ syonāḥ śivatamāḥ pathā | mā na indra yavaṃ vadhīr mitramenena kṛṇmahe ||

15.22.10

darbho agra oṣadhīnāṃ śatakāṇḍo ajāyata | sa devaiḥ prahito 'yam āgan svastaye vṛṣā marudbhiḥ saha saṃvidānaḥ ||

15.23.1

vṛṣākṣasyāsurasya menir asi tāṃ tvayā tathā veda karṇasya kauvidasyevamāśā | tāṃ mābhy ava gā dvādaśāhnāni vi rakṣe ||

15.23.2

asir me tigmasyāyasa indrāgnibhyāṃ susaṃśitaḥ | tena sedhām id āduniṃ kṛṣiṃ me māva gād iti sasyaṃ me mā vadhīd iti ||

15.23.3

marutaḥ pari vṛṅdhi no divaḥ kṣudrebhir aśmabhiḥ | udumbarasya śākhayā vicakṣuṣā- -aśaniṃ yāvayāmasi ||

15.23.4

maruto mṛḍayāta no divaḥ śukrebhir aśmabhiḥ | udumbarasya śākhayā vicakṣuṣā- -aśaṇiṃ yāvayāmasi ||

15.23.5

vartād vartam ā krāma parvatād adhi parvatam | girau pratiśṛtā satī vṛkṣān bhaṅdhi mā yavam ||

15.23.6

adāmnā tvā sandhyāmi yāvaṇyā paribhūrṇyā | sānau pratiśṛtā satī tṛṇaṃ bhaṅdhi mā yavam ||

15.23.7

uśatī nāmāsi salindā nāma | anyām āsāṃ gaccha yaṃ dviṣmas taṃ gaccha ||

15.23.8

parācīm anu saṃvataṃ parācīm anu saṃvidaṃ parācy anu ni drava | itas tvā nāśayāmasi brahmaṇā vīryāvatā ||

15.23.9

vār bhavodakaṃ bhava- -udakasyodakaṃ bhava | kṣudrāt kṣodīyasī bhūtvā- -athehy adhamaṃ tamaḥ ||

15.23.10

syonā bhava śivā bhava śivāc chivatarā bhava | phenān mṛdīyasī bhūtvā- -idaṃ śasyam upā cara ||

15.23.11

namas te astu vidyute stanayitnave | namas te agne dūre hete kṛṇmo mā no hiṃsīr dvipado mā catuṣpadaḥ ||

15.23.12

prati tvā sahasāsahaḥ sahasā prati rudhmasi | aindram idaṃ saho mahad bhūmyās tavaṃ divi śritam | aphālakṛṣṭam ā krama mā na indra yavaṃ vadhīḥ ||

15.23.13

yāḥ samudrād uccaranty utsebhyo yā nadībhyaḥ | atyantaḥ sarpo vaidyuto 'śaniṃ yāvayād itaḥ ||