Error: ignorance, superimposition, and the rope-snake of transmigration

PS_25

ajñānatimirayogād ekam api svaṃ svabhāvam ātmānam | grāhyagrāhakanānāvaicitryeṇāvabudhyeta

PS_26

rasaphāṇitaśarkarikāguḍakhaṇḍādyā yathekṣurasa eva | tadvad avasthā bhedāḥ sarve paramātmanaḥ śambhoḥ

PS_27

vijñānāntaryāmiprāṇavirāḍdehajātipiṇḍāntāḥ | vyavahāramātram etat paramārthena tu na santy eva

PS_28

rajjvāṃ nāsti bhujaṅgas trāsaṃ kurute ca mṛtyuparyantam | bhrānter mahatī śaktir na vivektuṃ śakyate nāma

PS_29

tadvad dharmādharmasvarnirayotpattimaraṇasukhaduḥkham | varṇāśramādi cātmany asad api vibhramabalād bhavati

PS_30

etat tad andhakāraṃ yad bhāveṣu prakāśamānatayā | ātmānatirikteṣv api bhavaty anātmābhimāno 'yam

PS_31

timirād api timiram idaṃ gaṇḍasyopari mahān ayaṃ sphoṭaḥ | yad anātmany api dehaprāṇadāv ātmamānitvam

PS_32

dehaprāṇavimarśanadhījñānanabhaḥprapañcayogena | ātmānam veṣṭayate citraṃ jālena jālakāra iva

PS_33

svajñānavibhavabhāsanayogenodveṣṭayen nijātmānam | iti bandhamokṣacitrāṃ krīḍāṃ pratanoti paramaśivaḥ