Kāṇḍa 2

2.1.1

arasaṃ prācyaṃ viṣam arasaṃ yad udīcyam | athedam adharācyaṃ karambheṇa vi kalpate ||

2.1.2

karambhaṃ kṛtvā tiryaṃ pīvasphākam udārathim | kṣudhā kila tvā duṣṭano jakṣivāṃsaṃ na rūrupaḥ ||

2.1.3

vi te madaṃ madavati śarum iva pātayāmasi | pra tvā carum iva yeṣantaṃ vacasā sthāpayāmasi ||

2.1.4

pari grāmam ivācitaṃ pari tvā sthāpayāmasi | tiṣṭhā vṛkṣa iva sthāmann abhrikhāte na rūrupaḥ ||

2.1.5

pavastais tvā pary akrīṇan dūrśebhir ajinair uta | prakrīr asi tvam oṣadhe 'bhrikhāte na rūrupaḥ ||

2.2.1

āvidya dyāvāpṛthivī āvidya bhagam aśvinā | āvidya brahmaṇaspatiṃ kṛṇomy arasaṃ viṣam ||

2.2.2

arasaṃ hed idaṃ viṣaṃ yathainad aham āśiṣam | utainad adyāt puruṣo bhavād id agadaḥ punaḥ ||

2.2.3

mā bibher na mariṣyasi pari tvā pāmi viśvataḥ | rasaṃ viṣasya nāvidam udnaḥ phenam adann iva ||

2.2.4

apāvocad apavaktā prathamo daivyo bhiṣak | samakṣam indra gā iva yā vāco viṣadūṣaṇīḥ ||

2.2.5

yac ca piṣṭaṃ yac cāpiṣṭaṃ yad digdhaṃ yac ca dehyam | devāḥ sarvasya vidvāṃso 'rasaṃ kṛṇutā viṣam ||

2.3.1

kṣetriyāt tvā nirṛtyā jāmiśaṃsād druho muñcāmi varuṇasya pāśāt | anāgasaṃ brahmaṇā tvā kṛṇomi śive te dyāvāpṛthivī abhūtām ||

2.3.2

śaṃ te agniḥ sahādbhir astu śaṃ gāvaḥ sahauṣadhībhiḥ | śam antarikṣaṃ sahavātam astu te śaṃ te bhavantu pradiśaś catasraḥ ||

2.3.3

yā devīḥ pradiśaś catasro vātapatnīr abhi sūryo vicaṣṭe | tāsv etaṃ jarasa ā dadhāmi pra yakṣma etu nirṛtiḥ parācaiḥ ||

2.3.4

sūryam ṛtaṃ tamaso grāhyā yathā devā muñcanto asṛjan nir enasaḥ | evā tvā kṣetriyān nirṛtyā jāmiśaṃsād druho muñcāmi varuṇasya pāśāt ||

2.3.5

amoci yakṣmād duritād avadyād druhaḥ pāśād grāhyāś cod amoci | jahad avartim avidat syonām apy abhūd bhadre sukṛtasya loke ||

2.4.1

niḥsālāṃ dhṛṣṇuṃ dhiṣaṇam ekāvādyāṃ jighatsvam | sarvāś caṇḍasya naptyo nāśayāmaḥ sadānvāḥ ||

2.4.2

yadi vā gha kṣetriyād yadi vā puruṣeṣitāḥ | yadi stha dasyubhyo jātā naśyatetaḥ sadānvāḥ ||

2.4.3

pari dhāmāny āsām āśur gāṣṭhām ivāsaram | ajaiṣaṃ sarvām̐ ājīn vo naśyatetaḥ sadānvāḥ ||

2.4.4

nir vo goṣṭhād ajāmasi nir yoner nir upānasāt | nir vo magundyā duhitaro gṛhebhyaś cātayāmasi ||

2.4.5

amuṣminn adhare gṛhe sarvāḥ santv arāyyaḥ | tatra pāpmā ny ucyatu sarvāś ca yātudhānyaḥ ||

2.5.1

dyāvāpṛthivī urv antarikṣaṃ kṣetrasya patny urugāyo adbhutaḥ | utāntarikṣam uru vātagopaṃ te gha tapyantāṃ mayi tapyamāne ||

2.5.2

idam indra śṛṇuhi somapa yat tvā hṛdā śocatā johavīmi | vṛścāmi taṃ kuliśeneva vṛkṣaṃ yo asmākaṃ mana idaṃ hinasti ||

2.5.3

idaṃ devāḥ śṛṇuta ye ca yajñiyā stha bharadvājo mahyam ukthāni śaṃsatu | pāśe sa baddho durite ni yujyatāṃ yo asmākaṃ mana idaṃ hinasti ||

2.5.4

aśītibhis tisṛbhiḥ sāmagebhir ādityebhir vasubhir aṅgirobhiḥ | iṣṭāpūrtam avatu naḥ pitṝṇām āmuṃ dade harasā daivyena ||

2.5.5

dyāvāpṛthivī anu mā dīdhīthāṃ viśve devāso anu mā rabhadhvam | aṅgirasaḥ pitaraḥ somyāsaḥ pāpam ā rcchatv apakāmasya kartā ||

2.5.6

atīva yo maruto manyate no brahma vā yo nindiṣat kriyamāṇam | tapūṃṣi tasmai vṛjināni santu brahmadviṣam abhi taṃ śocatu dyauḥ ||

2.5.7

ā dadhāmi te padaṃ samiddhe jātavedasi | agniḥ śarīraṃ veveṣṭu yamaṃ gacchatu te asuḥ ||

2.5.8

sapta prāṇān aṣṭau majjñas tāṃs te vṛścāmi brahmaṇā | yamasya gaccha sādanam agnidūto araṃkṛtaḥ ||

2.6.1

venas tat paśyat paramaṃ padaṃ yatra viśvaṃ bhavaty ekanīḍam | idaṃ dhenur aduhaj jāyamānāḥ svarvido abhy anūṣata vrāḥ ||

2.6.2

pra tad voced amṛtaṃ na vidvān gandharvo dhāma paramaṃ guhā yat | trīṇi padā nihitā guhāsya yas tāni veda sa pituṣ pitāsat ||

2.6.3

sa no bandhur janitā sa vidhartā dhāmāni veda bhuvanāni viśvā | yatra devā amṛtam ānaśānāḥ samāne dhāmann adhy airayanta ||

2.6.4

pari viśvā bhuvanāny āyam upātiṣṭhe prathamajā ṛtasya | vācam iva vaktari bhuvaneṣṭhā dhāsyur nv eṣa nanv eṣo agniḥ ||

2.6.5

pari dyāvāpṛthivī sadya āyam ṛtasya tantuṃ vitataṃ dṛśe kam | devo devatvam abhirakṣamāṇaḥ samānaṃ bandhuṃ vy apṛcchad ekaḥ ||

2.7.1

indra juṣasvā yāhi śūra pibā sutasya madhoś cakānaḥ | cārur madāya ||

2.7.2

ā tvā viśantu sutāsa indra pṛṇasva kukṣī viḍḍhi śakra | dhiyehy ā naḥ ||

2.7.3

indra jaṭharaṃ pṛṇasva madhor asya sutasya | upa tvā madeṣu vājo astu ||

2.7.4

indras turāṣāḍ jaghāna vṛtraṃ sāsāha śatrūn samatsu vajrī | made somasya ||

2.7.5

śrudhī havaṃ me giro juṣasva- -indra svayugbhiḥ matsva madāya | mahe raṇāya ||

2.8.1

ud itye akraman trayo vyāghraḥ puruṣo vṛkaḥ | hirug jyotiḥ sūryo hirug devo vanaspatir hiruṅ navantu śatravaḥ ||

2.8.2

parameṇa pathā vṛkaḥ pareṇa steno arṣatu | tato vyāghraḥ paramaḥ ||

2.8.3

akṣyau ca te hanū ca te vyāghra jambhayāmasi | āt sarvān viṃśatiṃ nakhān ||

2.8.4

yat saṃnaśo vi yan naśo yad ?vinaśo na saṃ naśaḥ? | mūrṇā mṛgasya dantā apiśīrṇā u pṛṣṭayaḥ ||

2.8.5

vyāghraṃ datvatāṃ vayaṃ prathamaṃ jambhayāmasi | ād it stenam ahiṃ yātudhānam atho vṛkam ||

2.8.6

neva rapsasai na gṛhaḥ paraś cara | dvipāc catuṣpān no mā hiṃsīr indrajāḥ somajā asi ||

2.9.1

iyaṃ vīrun madhujātā madhune tvā khanāmasi | madhor adhi prajātāsi sā no madhumatas kṛdhi ||

2.9.2

jihvāyā agre me madhu jihvāmūle madhūlakam | yathā māṃ kāminy aso yathā mām anv āyasi ||

2.9.3

pari tvā paritatnunā- -ikṣuṇāgām avidviṣe | yathā na vidviṣāvahai na vibhavāva kadā cana ||

2.9.4

rājñe brūhi varuṇāya- -aśvāya puruṣāya ca | pathā me pathye revati jāyām ā vaha sādhunā ||

2.9.5

jāyāṃ me mitrāvaruṇā jāyāṃ devī sarasvatī | jāyāṃ me aśvinobhā- -ā dhattāṃ puṣkarasrajā ||

2.10.1

daśavṛkṣa muñcemam aṃhaso grāhyāś ca | atho enaṃ vanaspate jīvānāṃ lokam un naya ||

2.10.2

yaś cakāra sa niṣ karat sa eva subhiṣaktamaḥ | sa eva tubhyaṃ bheṣajaṃ cakāra bhiṣajāti ca ||

2.10.3

cītiṃ te devā avidan brahmāṇa uta vīrudhaḥ | cītiṃ te 'dyottamām avidan bhūmyām adhi ||

2.10.4

āgād ud agād ayaṃ jīvānāṃ vrātam apy agāt | abhūd u putrāṇāṃ pitā nṛṇāṃ ca bhagavattamaḥ ||

2.10.5

adhītim adhy agād ayam adhi jīvapurā agāt | śataṃ ca yasya vīrudhaḥ sahasram uta bheṣajā ||

2.11.1

dīrghāyutvāya bṛhate raṇāya- -ariṣyanto dakṣamāṇāḥ sadaiva | maṇiṃ viṣkandhadūṣaṇaṃ jaṅgiḍaṃ bibhṛmo vayam ||

2.11.2

jaṅgiḍo jambhād viśarād viṣkandhād abhiśocanāt | maṇiḥ sahasravīryaḥ pari ṇaḥ pātu viśvataḥ ||

2.11.3

ayaṃ viṣkandhaṃ sahate ayaṃ rakṣo 'pa bādhate | ayaṃ no viśvabheṣajo jaṅgiḍaḥ pātv aṃhasaḥ ||

2.11.4

devair dattena maṇinā jaṅgiḍena mayobhuvā | viṣkandhaṃ sarvā rakṣāṃsi vyāyāme sahāmahe ||

2.11.5

śaṇaś ca tvā jaṅgiḍaś ca viṣkandhād adhi muñcatām | araṇyād anya ābhṛtaḥ kṛṣyā anyo rasebhyaḥ ||

2.12.1

eha yantu paśavo ye pareyur vāyur yeṣāṃ sahacāraṃ jujoṣa | tvaṣṭā yeṣāṃ rūpadheyāni veda- -asmin tān goṣṭhe savitā ni yacchāt ||

2.12.2

imaṃ goṣṭhaṃ paśavaḥ saṃ sravantu bṛhaspatir ā nayatu prajānan | sinīvālī nayatv āgram eṣām ājagmuṣo anumatir ni yacchāt ||

2.12.3

saṃ saṃ sravantu paśavaḥ sam aśvā uta pūruṣāḥ | saṃ dhānyasya yā sphātiḥ saṃsrāvyeṇa haviṣā juhomi ||

2.12.4

saṃ siñcāmi gavāṃ kṣīraṃ sam ājyena balaṃ rasam | saṃsiktā asmākaṃ vīrā mayi gāvaś ca gopatau ||

2.12.5

ā harāmi gavāṃ kṣīram āhārṣaṃ dhānyaṃ rasam | āhārṣam asmākaṃ vīrān ā patnīm edam astakam ||

2.13.1

saṃ vaḥ sṛjatv aryamā saṃ pūṣā saṃ bṛhaspatiḥ | sam indro yo dhanaṃjaya iha puṣyata yad vasu ||

2.13.2

ihaiva gāva etana- -iho śakā iva puṣyata | ihaivota pra jāyadhvaṃ mayi saṃjñānam astu vaḥ ||

2.13.3

mayā gāvo gopatyā sacadhvam ayaṃ vo goṣṭha iha poṣayāti | rāyaspoṣeṇa bahulā bhavantīr jīvā jīvantīr upa vaḥ sadema ||

2.13.4

saṃ vo goṣṭhena suṣadā saṃ rayyā saṃ supuṣṭyā | aharjātasya yan nāma tena vaḥ saṃ sṛjāmasi ||

2.13.5

saṃjānānā avihrutā asmin goṣṭhe karīṣiṇīḥ | bibhratīḥ somyaṃ haviḥ svāveśāsa etana ||

2.14.1

udyann ādityaḥ krimīn hantu sūryo nimrocan raśmibhir hantu | ye antaḥ krimayo gavi ||

2.14.2

yo viśvarūpaś caturakṣaḥ krimiḥ sāraṅgo arjunaḥ | hato hatabhrātā krimir hatamātā hatasvasā ||

2.14.3

hato rājā krimīṇām utaiṣāṃ sthapatir hataḥ | hatāso asya veśaso hatāsaḥ pariveśasaḥ ||

2.14.4

pra te śṛṇāmi śṛṅge yābhyāṃ tvaṃ vitudāyasi | atho bhinadmi taṃ kumbhaṃ yasmin te nihitaṃ viṣam ||

2.14.5

atrivat tvā krime hanmi kaṇvavaj jamadagnivat | agastyasya brahmaṇā sarve te krimayo hatāḥ ||

2.15.1

indrasya yā mahī dṛṣat krimer viśvasya tarhaṇī | tayā pinaṣmi saṃ krimīn dṛṣadā khalvām̐ iva ||

2.15.2

dṛṣṭam adṛṣṭam atṛham atho kurūrum atṛham | algaṇḍūn sarvāñ chalūlān krimīn vacasā jambhayāmasi ||

2.15.3

algaṇḍūn hanmi mahatā vadhena dūnā adūnā arasā abhūvan | śiṣṭān aśiṣṭān ni tirāmi vācā yathā krimīṇāṃ nakir ucchiṣātai ||

2.15.4

anvāntriyaṃ śīrṣaṇyam atho pārṣṭeyaṃ krimim | avaskavaṃ vyadvaraṃ krimīn vacasā jambhayāmasi ||

2.15.5

ye krimayaḥ parvateṣu ye vaneṣu ya oṣadhīṣu paśuṣv apsv antaḥ | ye asmākaṃ tanvaṃ sthāma cakrira indras tān hantu mahatā vadhena ||

2.16.1

yā śatrūn prāśaṃjayā sahamānābhibhūr asi | sāmūn pratiprāśo jahy arasān kṛṇv oṣadhe ||

2.16.2

suparṇas tvānv avindat sūkaras tvākhanan nasā | indras tvā cakre bāhvor asurebhya starītave ||

2.16.3

pāṭām indro vy āśnād dhantavā asurebhyaḥ | tayāhaṃ śatrūn sākṣīya- -indraḥ śālāvṛkān iva ||

2.16.4

rudra jalāṣabheṣaja nīlaśikhaṇḍa karmakṛt | praśnaṃ durasyato jahi yo asmām̐ abhidāsati ||

2.16.5

tasya praśnaṃ tvaṃ jahi yo na indrābhidāsati | adhi no brūhi śaktibhiḥ prāśi mām uttaraṃ kṛdhi ||

2.17.1

yathedaṃ bhūmyā adhi vātas tṛṇaṃ mathāyati | evā mathnāmi te mano yathā māṃ kāminy aso yathā mām anv āyasi ||

2.17.2

eyam agan patikāmā janikāmo 'ham āgamam | aśvaḥ kanikradad yathā bhagenāhaṃ sahāgamam ||

2.17.3

saṃ cen nayātho aśvinā kāminā saṃ ca neṣathaḥ | saṃ vāṃ manāṃsy agmata saṃ cakṣūṃṣi sam u vratā ||

2.17.4

yad antaraṃ tad bāhyaṃ yad bāhyaṃ tad antaram | kanyānāṃ viśvarūpāṇāṃ mano gṛbhāyauṣadhe ||

2.17.5

?yāsuparṇāpakṣaṇavā- -ānapakṣaṇavā? | atrā ta ārpitaṃ manaḥ śalya iva kurmalaṃ yathā ||

2.18.1

siṃhe vyāghra uta yā pṛdākau tviṣir agnau brāhmaṇe sūrye yā | indraṃ yā devī subhagā vavardha sā na aitu varcasā saṃvidānā ||

2.18.2

(yā) hastini dvīpini yā hiraṇye tviṣir aśveṣu puruṣeṣu goṣu | (…) ||

2.18.3

(yā) rājanye dundubhāv āyatāyāṃ tviṣiḥ senāyāṃ stanayitnau ghoṣe yā | (…) ||

2.18.4

rathe akṣeṣv ṛṣabhasya vāje parjanye vāte varuṇasya śuṣme | indraṃ yā devī subhagā vavardha (…) ||

2.18.5

yā rudreṣu yā vasuṣv ādityeṣu marutsu yā | tviṣir yā viśveṣu deveṣu sā na aitu varcasā saṃvidānā ||

2.19.1

yadi gādhānāṃ yadi nāvyānāṃ nadīnāṃ pāre nṛpatiḥ sakhā naḥ | viśve devāso abhi rakṣatainaṃ yathā jīvo vidatham āvadāsi ||

2.19.2

yady avāre yadi vā gha pāre yadi dhanvani nṛpatiḥ sakhā naḥ | (…) ||

2.19.3

yadi yatsu yadi dhṛtyāṃ yadi samityāṃ nṛpatiḥ sakhā naḥ | (…) ||

2.19.4

adhas padyantām adhare bhavantu ye naḥ sūriṃ maghavānaṃ pṛtanyān | viśve devāso abhi rakṣatainaṃ yathā jīvo vidatham āvadāsi ||

2.19.5

yama mṛtyo mainaṃ hiṃsīr yam ahaṃ hṛdā manasā jugopa | yo māṃ piparti yam ahaṃ piparmi sa prajāvān maghavān sūrir astu ||

2.20.1

imāṃ nāvam ā rohata- -acchidrāṃ pārayiṣṇvam | narāśaṃsasya yā gṛhe śatāritrā bhagasya ca ||

2.20.2

upa dhuva gulgulunā- -ayakṣmāḥ santv aghnyāḥ | rudrasyeṣvā yātudhānān atho rājño bhavasya ca ||

2.20.3

rudrāv īśāte dvipadāṃ catuṣpadāṃ tayor vayam adhivāke syāma | pakvair vitthaiḥ pratibhūṣanta enau vayaṃ devānāṃ sumatau syāma ||

2.20.4

pratīcī nāma te mātā śatavāro gha te pitā | tato ha jajñiṣe tvam ariṣyanty arundhati ||

2.20.5

mātā nāmāsi mātṛto amṛtasyeva vā asi | arundhati tvaṃ sarvam abhi jīvam adhā idam ||

2.21.1

ā no agne sumatiṃ sambhalo ged imāṃ kumārīṃ saha no bhagena | juṣṭā vareṣu samaneṣu valgur oṣaṃ patyā bhavatu saṃbhageyam ||

2.21.2

iyam agne nārī patiṃ videṣṭa somo hi rājā subhagāṃ kṛṇotu | suvānā putrān mahiṣī bhavāti gatvā patiṃ subhagā vi rājāt ||

2.21.3

somajuṣṭo brahmajuṣṭo aryamṇā saṃbhṛto bhagaḥ | dhātur devasya satyena kṛṇomi pativedanam ||

2.21.4

yathākharo maghavaṃś cārur eṣa priyo mṛgāṇāṃ suṣadā babhūva | eveyaṃ juṣṭā bhagasyāstu saṃpriyā patyāvirādhayantī ||

2.21.5

bhagasya nāvam ā roha pūrṇām anupadasvatīm | tayopa pra yāhi taṃ yaḥ patiḥ pratikāmyaḥ ||

2.21.6

idaṃ hiraṇyaṃ gulgulv ayam aukṣo atho bhagaḥ | ete patibhyas tvām aduḥ pratikāmāya vettave ||

2.22.1

yunakta sīrā vi yugā tanota kṛte kṣetre vapateha bījam | virājaḥ śnuṣṭiḥ sabharā asan no nedīya it sṛṇyaḥ pakvam ā yavam ||

2.22.2

sīrā yuñjanti kavayo yugā vi tanvate pṛthag dhīrā deveṣu sumnayau | anaḍvāhaḥ puruṣā ye kṛṣanti lāṅgalaṃ phālaṃ sam anajmi sphātyā ||

2.22.3

śunaṃ kīnāśo anv etu vāhāñ chunaṃ phālo vinudann etu bhūmim | śunāsīrā haviṣā yo yajātai supippalā oṣadhayaḥ santu tasmai ||

2.22.4

śunaṃ naro lāṅgalenānaḍudbhir bhagaḥ phālaiḥ kṣetrapatir marudbhiḥ | parjanyo bījam irayedaṃ hinotu śunāsīrā kṛṇutaṃ dhānyeha ||

2.22.5

indraḥ sītāṃ ni gṛhṇātu tāṃ pūṣābhi rakṣatu | sā naḥ payasvatī duhām uttarāmuttarāṃ samām ||

2.22.6

ud asthād rathajid gojid aśvajid dhiraṇyajit sūnṛtayā parīvṛtaḥ | ekacakreṇa savitā rathena- -ūrjo bhāgaiḥ pṛthivīm ety āpṛṇan ||

2.23.1

gavāṃ gṛhāṇāṃ rasam oṣadhīnām anujyeṣṭhaṃ varca āyur vikalpya | sa mā hiṃsīḥ pitarau vardhamāno bhadrāc chreyāṃsam abhi lokam ehi ||

2.23.2

yadīdaṃ bhaktaṃ yadi vā vibhaktaṃ kṣetraṃ devānāṃ yadi vā pitṝṇām | yadi sūrya udite yadi vā manuṣyavac chivā no astu pṛthivī uta dyauḥ ||

2.23.3

ūrjo vāṃ bhāgo vara ā pṛthivyā devī dvārau brahmaṇā vāṃ dhārayāmi | śivaṃ śagmam avasānaṃ no astu rātaṃ devebhiḥ pitṛbhir manuṣyaiḥ ||

2.23.4

viśvāvasos tvā sadanaṃ kulāyaṃ gandharvāso vedhaso mahyam ūcuḥ | sa mā hiṃsīḥ śevadhiṃ yaṃ ta etaṃ śataṃ himāḥ pari dadmo manuṣyam ||

2.23.5

rudrā utse sadam akṣīyamāṇe devā madanti pitaro manuṣyāḥ | ayaṃ bhāgo bhāgapatiś ca devā urvīr astaryāḥ śaradas tarema ||

2.24.1

yo asmin yakṣmaḥ puruṣe praviṣṭa iṣitaṃ daivyaṃ sahaḥ | agniṣ ṭaṃ ghṛtabodhano apa skandayatv adhi dūram asmat so anyena sam ṛcchatāṃ tam asmai pra suvāmasi ||

2.24.2

yas tvā yakṣmo deveṣita iṣitaḥ pitṛbhiś ca yaḥ | tasmāt tvā viśve devā muñcantu pary aṃhasaḥ | te te yakṣmam apa skandayantv adhi (…) | (…) ||

2.24.3

yat tvam eno anyakṛtaṃ yad ātmakṛtam āritha | tasmāt tvā viśvā bhūtāni muñcantu pary aṃhasaḥ | tāni te yakṣmam apa skandayantv adhi (…) (…) ||

2.24.4

yat tvā sva ādṛśā yad vā cakāra niṣṭyaḥ | tasmāt tvā pṛthivī mātā muñcatu pary aṃhasaḥ | sā te yakṣmam apa skandayatv adhi (…) (…) ||

2.24.5

apaskandena haviṣā yakṣmaṃ te nāśayāmasi | tad agnir āha tad u soma āha bṛhaspatiḥ savitā tad indraḥ | te te yakṣmam apa skandayantv adhi dūram asmat so anyena sam ṛcchatāṃ tam asmai pra suvāmasi ||

2.25.1

agnyagrā indrabalā ādityā ye yudho viduḥ | yudho adhi pratiṣṭhitā hotrā jaitrāya juhvati ||

2.25.2

abhiyuktasya pradhane 'nu yoddhāram icchatām | havīṃṣy agre yudhyatāṃ prati gṛhṇīta juhvatām ||

2.25.3

jetrā rājñā varuṇena jetrā rudreṇa keśinā | bhavena jiṣṇunā jayati parjanyena sahīyasā ||

2.25.4

astrā tāmreṇa bṛhatā- -astrā śarveṇa yudhyatā | gandharveṇa tviṣīmatā rathenāsamayodhinā ||

2.25.5

sinīvāly anumatir vāhāśvā niṣaṅgiṇaḥ | jayanto 'bhi pretāmitrān sākam indreṇa medinā ||

2.26.1

yat svapne nijagantha yad vā śepiṣe 'nṛtam | agniṣ ṭvā tasmād enaso brahmā muñcatv aṃhasaḥ ||

2.26.2

yad akṣeṣu dudrohitha yad vā mitrebhyas tvam | somas tvā tasmād enaso brahmā muñcatv aṃhasaḥ ||

2.26.3

yat kumāraḥ kumāreṣu yad vā jyāyastareṣu ca | nīviṃ yat kṛtvā śepiṣe tat kṛṇmo agadaṃ śivam ||

2.26.4

pratīcīnaphalo hi tvam apāmārga babhūvitha | sarvān mac chapathām̐ adhi varīyo yāvayā tvam ||

2.26.5

apāmārga oṣadhīnāṃ viśvāsām eka it patiḥ | tena te mṛjma āsthitam atha tvam agadaś cara ||

2.27.1

śatavāro anīnaśad yakṣmān rakṣāṃsi tejasā | ārohan varcasā saha maṇir durṇāmacātanaḥ ||

2.27.2

śṛṅgābhyāṃ rakṣo nudate mūlena yātudhānyaḥ | madhyena yakṣmaṃ bādhate nainaṃ pāpmāti ?tatrati ||

2.27.3

ye yakṣmāso arbhakā mahānto ye ca śabdinaḥ | sarvān durṇāmahā maṇiḥ śatavāro anīnaśat ||

2.27.4

śataṃ vīrān ajanayac chataṃ yakṣmān apāvapat | durṇāmnaḥ sarvān hatvā- -apa rakṣāṃsi dhūnute ||

2.27.5

hiraṇyaśṛṅga ṛṣabhaḥ śātavāro ayaṃ maṇiḥ | durṇāmnaḥ sarvān tṛḍhvā- -ava rakṣāṃsy akramīt ||

2.27.6

śatam ahaṃ durṇāmnīnāṃ gandharvāpsarasāṃ śatam | śataṃ śvanvatīnāṃ śatavāreṇa vāraye ||

2.28.1

viśvaṃ vivyajmi pṛthivīva puṣṭam āyadāyat prati gṛhṇāmy annam | vaiśvānarasya mahato mahimnā- -agniṣ ṭad viśvād agadaṃ kṛṇotu ||

2.28.2

yad annam admi bahudhā virūpaṃ hiraṇyam aśvam uta gām ajām avim | vaiśvānarasya (…) ||

2.28.3

yad annam admy anṛtena devā dāsyann adāsyann uta vā kariṣyan | vaiśvānarasya (…) ||

2.28.4

yan mā hutaṃ yad ahutam ājagāma yasmād annān manasodrārajīmi | vaiśvānarasya mahato mahimnā- -agniṣ ṭad viśvād agadaṃ kṛṇotu ||

2.28.5

jamadagniḥ kaśyapaḥ svādv etad bharadvājo madhv annaṃ kṛṇotu | pratigrahītre gotamo vasiṣṭho viśvāmitro naḥ pra tirāty āyuḥ ||

2.29.1

agne yajñasya cakṣo | idaṃ vedāma yathedaṃ bhaviṣyati svāhā ||

2.29.2

agne yajñasya śrotra | idaṃ vedāma yathedaṃ bhaviṣyati svāhā ||

2.29.3

agne yajñasya prāṇa | idaṃ vedāma yathedaṃ bhaviṣyati svāhā ||

2.29.4

agne yajñasyāpāna | idaṃ vedāma yathedaṃ bhaviṣyati svāhā ||

2.29.5

agne yajñasyātman | idaṃ vedāma yathedaṃ bhaviṣyati svāhā ||

2.29.6

agne yajñasya sarva | idaṃ vedāma yathedaṃ bhaviṣyati svāhā ||

2.30.1

devānāṃ bhadrā sumatir ṛjūyatāṃ devānāṃ rātir abhi no ni vartatām | devānāṃ sakhyam upa sedimā vayaṃ devā na āyuḥ pra tirantu jīvase ||

2.30.2

tān pūrvayā nividā hūmahe vayaṃ bhagaṃ mitram aditiṃ dakṣam asridham | aryamaṇaṃ varuṇaṃ somam aśvinā sarasvatī naḥ subhagā mayas karat ||

2.30.3

idaṃ pitṛbhyo namo astv adya ye pūrvāso ye 'parāsaḥ pareyuḥ | ye pārthive rajasy ā niṣattā ye vā nūnaṃ suvṛjanāsu vikṣu ||

2.30.4

pratyañco agne śaravaḥ patantu kṛtyākṛte ripave martyāya | kravyāde atriṇe mā mīmṛḍaḥ kraviṣṇum ā dhehi nirṛter upasthe ||

2.30.5

jyāyasaḥ śaṃsād uta vā kanīyasaḥ sajātaśaṃsād uta jāmiśaṃsāt | anādiṣṭam anyakṛtaṃ yad enas tvaṃ nas tasmāj jātavedo mumugdhi ||

2.31.1

imau pādau pra harāmy ā gṛhebhyaḥ svastaye | indraḥ paścād indraḥ purastād indro naḥ pātu madhyataḥ ||

2.31.2

indro bhayaṃ vy asyatu śūdrāc ca na āryāc ca | indraḥ pathibhir adravad asamṛddhā aghāyavaḥ ||

2.31.3

indro haniṣyatāṃ vadhaṃ vi naḥ pāśām̐ ivācṛtat ||

2.31.4

emaṃ panthām arukṣāma sugaṃ svastivāhanam | yena viśvāḥ pari dviṣo vṛṇakti vindate vasv āstam ety anāhataḥ ||

2.31.5

parā vrajatu kṛntaty avakāṃ vikṣaṇann iva | viṣvañco yantv ?asyapālā viṣvañcaḥ paripanthinaḥ | viṣvak punarbhuvā mano asamṛddhā aghāyavaḥ ||

2.31.6

svasty anv acākaśaṃ svasti praty acākaśam | svasti pathiṣu dhanvasu svasty apsv antaḥ | parivrajan svarita svastyayanam asi | bhāradvājaṃ svasti punarāyaṇam ||

2.32.1

ya uttarād ājāyate madhugho madhughād adhi | vedāhaṃ tasmin bheṣajaṃ jihvā madhumatī mama ||

2.32.2

madhumat te parṇam āsa madhuśṛṅgota puṣpakam | madhumān parvatāsitha yato jāyasa oṣadhe ||

2.32.3

garbho asy oṣadhīnām apāṃ garbha utāsitha | atho somasya bhrātāsi madhugha prāva me vacaḥ ||

2.32.4

śunam ahaṃ madhughasya pitur nāmeva jagrabha | yo mā hiraṇyavarcasaṃ kṛṇavat pūruṣapriyam ||

2.32.5

priyaṃ mā kṛṇu deveṣu priyaṃ rājasu mā kṛṇu | priyaṃ sarvasya paśyata uta śūdra utārye ||

2.33.1

ūdhnā vana hṛdā vana mukhena jihvayā vana | prapīnā payasā vana ||

2.33.2

vāñcha pado vāñcha tvacaṃ vāñchākṣyau vāñcha sakthyau | vatsam anu pra te mano nimnaṃ vār iva dhāvatu ||

2.33.3

ūrdhvāni te lomāni tiṣṭhantv akṣyau kāmena śuṣyatām | sam id vatsena gaur iva mudrā sureva pṛcyatām ||

2.33.4

imā gāvaḥ sabandhavaḥ samānaṃ vatsam akrata | hiṅṅ iti karikratīr āddhārāniramavaśvasā ||

2.33.5

śṛṅgaupaśā galabhūṣā aghnyāś carmavāsinīḥ | gāvo ghṛtasya mātaras tā vatsevā nayāmasi ||

2.34.1

yac ca varcaḥ kanyāsu yac ca hastiṣv āhitam | hiraṇye goṣu yad varcas tasya bhakṣīya varcasaḥ ||

2.34.2

yac ca varco rājarathe yac ca rājasv āhitam | niṣke rukme ca yad varcas tasya bhakṣīya varcasaḥ ||

2.34.3

yad apsu yad vanaspatau yad agnau yac ca sūrye | yajñe dakṣiṇāyāṃ varcas tasya bhakṣīya varcasaḥ ||

2.34.4

varcasvan me mukham astu varcasvad uta me śiraḥ | varcasvān viśvataḥ pratyaṅ varcasvān varṇo astu me ||

2.34.5

subhāgaṃ me mukham astu subhāgam uta me śiraḥ | subhāgo viśvataḥ pratyaṅ subhāgo varṇo astu me ||

2.35.1

ud asau sūryo agāt saha vahatunā mama | ahaṃ te madhumatī madhughān madhumattarā ||

2.35.2

yad giriṣu parvateṣu goṣv aśveṣu yan madhu | surāyāṃ sicyamānāyāṃ kīlāle madhu tan mayi ||

2.35.3

yathā surā yathā madhu yathākṣā adhidevane | yathā ha gavyato mana evā mām abhi te manaḥ ||

2.35.4

ā te padaṃ padenādiṣy ā te manasā manaḥ | pratyañcam agrabhaṃ tvā- -aśvam ivāśvābhidhānyā ||

2.35.5

mahyaṃ tvā dyāvāpṛthivī mahyaṃ devī sarasvatī | mahyaṃ tvā madhyaṃ bhūmyā ubhāv antau sam asyatām ||

2.36.1

yā vaiśvadevīr iṣavo yā vasūnāṃ yā rudrasya somasya yā bhagasya | viśve devā iṣavo yāvatīr vas tā vo agninā śarmaṇā śamayāmi ||

2.36.2

yā ādityānām iṣavo yā vasūnāṃ yā rudrasyāśvinor yāvatīs tāḥ | viśve devā iṣavo yāvatīr vas tā vo devaḥ savitā śamayāti ||

2.36.3

yās te agna iṣavo vāta yās te apām adityām uta yā marutsu | indraś ca sāmnā varuṇaś ca rājā tā vaḥ sūryo bṛhatā śamayāti ||

2.36.4

mā vṛkṣmahy ādityebhyo mā vasubhyo mā rudrāyāgnaye pārthivāya | indrasya śuco varuṇasya yāḥ śucas tā vo devy aditiḥ śamayāti ||

2.36.5

yāś ca vāte viṣvagvāte yāś ca rudrasya dhanvani | agniṣ ṭā vasor īśānaḥ sarvās tā bheṣajā karat ||

2.37.1

cittiṃ yajāmi manasā cittiṃ devām̐ ṛtāvṛdhaḥ | jātavedaḥ pra ṇas tira- -agne viśvābhir ūtibhiḥ ||

2.37.2

yāvayāsmad dveṣāṃsi yavamayena haviṣā | yas te trita duṣvapnyasya bhāgaḥ sa ta eṣa taṃ ta etaṃ pra hiṇmaḥ ||

2.37.3

yathā kalāṃ yathā śaphaṃ yatharṇaṃ saṃnayanti | evā duṣvapnyaṃ sarvam apriye saṃ nayāmasi ||

2.37.4

araro hai śatam adya gavāṃ bhakṣīya śatam ajānāṃ śatam avīnāṃ śatam aśvānāṃ śataṃ puruṣāṇām | tatrāpi bhakṣīyāmum āmuṣyāyaṇam amuṣyāḥ putram ||

2.37.5

tam ahaṃ nirṛtaye pra yacchāmi taṃ mṛtyoḥ pāśe badhnāmi | sa baddho hato astu sa tato mā moci ||

2.38.1

ye naḥ śapanty apa te bhavantu vṛkṣān iva vṛkṇām̐ ati tām̐ ayāma | drāghīya āyuḥ prataraṃ dadhānā vayaṃ devānāṃ sumatau syāma ||

2.38.2

kṛtyākṛtaṃ praty avasānadarśanam agne prati sma budhyasva | prati sma deva taṃ daha ||

2.38.3

yas tvā kṛtye prajighāya vidvām̐ aviduṣo gṛham | punas tvā tasmā ā dadhmo yathā kṛtyākṛtaṃ hanaḥ ||

2.38.4

punaḥ kṛtyāṃ kṛtyākṛte hastagṛhya parā ṇaya | uto tam attu sā punas tarda iva sadanaṃ svam ||

2.38.5

kṛtyā yantu kṛtyākṛtaṃ vṛka ivāvimato gṛham | tokaṃ pākasya vardhatāṃ suvṛṣṭa oṣadhīr iva ||

2.39.1

yat te grāvā bāhucyuto acucyon naro yad vā te hastayor adhukṣan | tat ta ā pyāyatāṃ tat te ni ṣṭyāyatāṃ soma rājan ||

2.39.2

yat te grāvṇā cicchiduḥ soma rājan priyāṇy aṅgā sukṛtā purūṇi | tat saṃ dhatsvājyenota vardhayasva- -anāgaso yathā sadam it saṃkṣiyema ||

2.39.3

yāṃ te tvacaṃ bibhidur yāṃ ca yoniṃ yad vāsthānāt pracyuto yadi vā suto 'si | tvayā soma kl̥ptam asmākam etad upa no rājan sukṛte hvayasva ||

2.39.4

saṃ prāṇāpānābhyāṃ sam u cakṣuṣā saṃ śrotreṇa gacchasva soma rājan | yat te viriṣṭaṃ sam u tat ta etaj jānītān naḥ saṃgamane pathīnām ||

2.39.5

ahāḥ śarīraṃ payasā sam ety anyoanyo bhavati varṇo asya | tasmai ta indo haviṣā vidhema vayaṃ syāma patayo rayīṇām ||

2.39.6

abhi kṣaranti juhvo ghṛtena- -aṅgā parūṃṣi tava vardhayantīḥ | tasmai te soma nama id vaṣaṭ ca- -upa no rājan sukṛte hvayasva ||

2.40.1

iheta devīr ayam astu panthā ayaṃ vo lokaḥ śaraṇāya sādhuḥ | idaṃ havir juṣamāṇā udeta kṣiprā rājñā varuṇena prasūtāḥ ||

2.40.2

ihaitu rājā varuṇo 'jirābhir devo devībhir haviṣo juṣāṇaḥ | kṛṇuṣva panthām udayānam ūrmibhir anena babhro mahatā pṛthivyāḥ ||

2.40.3

priye dhriyadhvam udayānam undatīr oka aughānām iha rāraṇītu | anena vegān asṛjat prajāpatir iha dhriyadhvaṃ śaraṇaṃ sarasvatīḥ ||

2.40.4

iha vo jūtir dhriyatāṃ samāny apām agnīnāṃ varuṇasya soma | anena vegān asṛjat tviṣīmato 'hiṃsrāñ chambhūn ajirām̐ atṛṣṇajaḥ ||

2.40.5

ye pārato madhyato ye te antayor apsuṣado nihitās tīre agnayaḥ | te devajā iha no mṛḍayantv āpaś ca janmann ubhaye sabandhavaḥ ||

2.40.6

idaṃ va āpo hṛdayam ayaṃ vatsa ṛtāvarīḥ | ihettham eta śakvarīr yatremam̐ veśayāmasi ||

2.41.1

ud asau sūryo agād ud ayaṃ māmako bhagaḥ | tenāhaṃ vidvalā patim abhy asākṣi viṣāsahiḥ ||

2.41.2

ahaṃ ketur ahaṃ mūrdhā- -aham ugrā vivācanī | mamed api kratuṃ patiḥ sehānāyā upā carāt ||

2.41.3

mama putrāḥ śatruhaṇo 'tho me duhitā virāṭ | utāham asmi saṃjayā patyāṃ me śloka uttamaḥ ||

2.41.4

yena devā asurebhyo 'bhavan dyumnavattarāḥ | idaṃ tad akri devā asapatnā kilābhuvam ||

2.41.5

asapatnā sapatnaghnī jayanty abhibhūvarī | muṣṇāmy anyāsāṃ bhagaṃ vāso astheyasām iva ||

2.42.1

śerabhaka śerabha | punar vo yantu yātavaḥ punar jūtiḥ kimīdinaḥ | yasya stha tam atta yo vaḥ prāhait tam atta svā māṃsāny atta ||

2.42.2

śevṛdhaka śevṛdha | (…) ||

2.42.3

sarpānusarpa | (…) ||

2.42.4

mrokānumroka | (…) ||

2.42.5

jūrṇa bharūjy arjuny upabdo | punar vo yantu yātavaḥ punar jūtiḥ kimīdinaḥ | yasya stha tam atta yo vaḥ prāhait tam atta svā māṃsāny atta ||

2.46.1

piśācakṣayaṇam asi piśācajambhanam asi svāhā ||

2.46.2

yātudhānakṣayaṇam asi yātudhānajambhanam asi svāhā ||

2.46.3

sadānvākṣayaṇam asi sadānvājambhanam asi svāhā ||

2.46.4

sapatnakṣayaṇam asi sapatnajambhanam asi svāhā ||

2.46.5

bhrātṛvyakṣayaṇam asi bhrātṛvyajambhanam asi svāhā ||

2.48.1

agne yat te tapas tena taṃ prati tapa yo 'smān dveṣṭi yaṃ vayaṃ dviṣmaḥ ||

2.48.2

(…) te haras tena taṃ prati hara yo (…) ||

2.48.3

(…) te śocis tena taṃ prati śoca yo (…) ||

2.48.4

(…) te 'rcis tena taṃ praty arca yo (…) ||

2.48.5

agne yat te jyotis tena taṃ prati daha yo 'smān dveṣṭi yaṃ vayaṃ dviṣmaḥ ||

2.49.1

prācī dig gāyatraṃ devatā | yad deveṣu pitṛṣu manuṣyeṣv enaś cakārāyaṃ tvaṃ tasyāvayajanam asi | muñcemam asmād yakṣmād asmād āmayataḥ svāhā ||

2.49.2

dakṣiṇā dig rathantaraṃ devatā | (…) ||

2.49.3

pratīcī dig vāmadevyaṃ devatā | (…) ||

2.49.4

udīcī dig yajñāyajñiyaṃ devatā | (…) ||

2.49.5

ūrdhvā dig bṛhad devatā | yad deveṣu pitṛṣu manuṣyeṣv enaś cakārāyaṃ tvaṃ tasyāvayajanam asi | muñcemam asmād yakṣmād asmād āmayataḥ svāhā ||

2.50.1

agniṃ vayaṃ trātāraṃ havāmahe ya imaṃ trāyātā asmād yakṣmād asmād āmayataḥ | juṣāṇo agnir ājyasya trātā trāyatāṃ svāhā ||

2.50.2

mitrāvaruṇau vayaṃ trātārau havāmahe yāv imaṃ trāyaite asmād yakṣmād asmād āmayataḥ | juṣāṇau mitrāvaruṇāv ājyasya trātārau trāyetāṃ svāhā ||

2.50.3

maruto vayaṃ trātṝn havāmahe ya imaṃ trāyāntā asmād yakṣmād asmād āmayataḥ | juṣāṇā maruta ājyasya trātāras trāyantāṃ svāhā ||

2.50.4

pitṝn vayaṃ trātṝn havāmahe ya imaṃ trāyāntā asmād yakṣmād asmād āmayataḥ | juṣāṇāḥ pitara ājyasya trātāras trāyantāṃ svāhā ||

2.50.5

bṛhaspatiṃ vayaṃ trātāraṃ havāmahe ya imaṃ trāyātā asmād yakṣmād asmād āmayataḥ | juṣāṇo bṛhaspatir ājyasya trātā trāyatāṃ svāhā ||

2.51.1

agniṃ vayaṃ trātāraṃ yajāmahe menihanaṃ valagahanam | juṣāṇo agnir ājyasya menihā valagahā trātā trāyatāṃ svāhā ||

2.51.2

indraṃ vayaṃ trātāraṃ yajāmahe menihanaṃ valagahanam | juṣāṇa indra ājyasya menihā valagahā trātā trāyatāṃ svāhā ||

2.51.3

somaṃ vayaṃ trātāraṃ yajāmahe menihanaṃ valagahanam | juṣāṇaḥ soma ājyasya menihā valagahā trātā trāyatāṃ svāhā ||

2.51.4

viśvān vayaṃ devāṃs trātṝn yajāmahe menighno valagaghnaḥ | juṣāṇā viśve devā ājyasya menihano valagahanas trātāras trāyantāṃ svāhā ||

2.51.5

bṛhaspatiṃ vayaṃ trātāraṃ yajāmahe menihanaṃ valagahanam | juṣāṇo bṛhaspatir ājyasya menihā valagahā trātā trāyatāṃ svāhā ||

2.52.1

ye keśinaḥ prathamāḥ sattram āsata yebhir ābhṛtaṃ yad idaṃ virocate | tebhyo juhomi haviṣā ghṛtena- -aśvavān gomān ayam astu vīraḥ ||

2.52.2

na rte dānāt tamaso mucyate pari dvināmnīṃ dīkṣāṃ vaśinīṃ ya āyat | prāsya keśāḥ suvate kāṇḍino bhavanti teṣāṃ brahmeśe vapanasya nānyaḥ ||

2.52.3

yenāvapat savitā śīrṣṇo agre kṣureṇa rājño varuṇasya keśān | tena brahmāṇo vapatedam asya- -āsrāmo dīrghāyur ayam astu vīraḥ ||

2.52.4

mā te keśām̐ anu gād varca etat tathā dhātā dadhātu te | tubhyam indro varuṇo bṛhaspatiḥ savitā varca ā dadhan ||

2.52.5

ā roha proṣṭhaṃ vi ṣahasva śatrūn avāsrāg dīkṣāṃ vaśinī hy ugrā | dehi dakṣiṇāṃ brāhmaṇebhyo atho mucyasva varuṇasya pāśāt ||

2.53.1

ye devāḥ puraḥsado 'gninetrā rakṣohaṇaḥ | te naḥ pāntu te no 'vantu tebhyo namas tebhyaḥ svāhā ||

2.53.2

ye devā dakṣiṇāsado yamanetrā rakṣohaṇaḥ | te naḥ pāntu te no 'vantu tebhyo namas tebhyaḥ svāhā ||

2.53.3

ye devāḥ paścātsado marunnetrā rakṣohaṇaḥ | te naḥ pāntu te no 'vantu tebhyo namas tebhyaḥ svāhā ||

2.53.4

ye devā uttarāsadaḥ somanetrā rakṣohaṇaḥ | te naḥ pāntu te no 'vantu tebhyo namas tebhyaḥ svāhā ||

2.53.5

ye devā antarikṣasado bṛhaspatinetrā rakṣohaṇaḥ | te naḥ pāntu te no 'vantu tebhyo namas tebhyaḥ svāhā ||

2.55.1

divo jāto divas putro yasmāj jātaṃ mahat sahaḥ | aśvattham agre jaitrāya- -acchā devaṃ vadāmasi ||

2.55.2

taṃ tvāśvā yathā ratham upa tiṣṭhantu rājānaḥ | samitibhyo vivaktave ||

2.55.3

tvayā vayaṃ devajāta sarvāḥ prāśo jayāmasi | uta satyā utānṛtāḥ ||

2.55.4

yo aśvatthena mitreṇa samitīr avagacchati | jayāt sa sarvāḥ pṛtanā yāś ca satyā utānṛtāḥ ||

2.55.5

adharāñco nir dravantu samityā ululākṛtāḥ | aśvatthamitraṃ puruṣaṃ ye vācā pṛtanyān ||

2.56.1

ugrā nāma stha teṣāṃ vaḥ puro gṛhāḥ prācī dik teṣāṃ vo agnir iṣavaḥ | te no mṛḍata dvipade catuṣpade teṣāṃ vo yāny āyudhāni yā iṣavas tebhyo namas tebhyaḥ svāhā ||

2.56.2

kravyā nāma stha teṣāṃ vo dakṣiṇā gṛhā dakṣiṇā dik teṣāṃ va āpa iṣavaḥ | (…) ||

2.56.3

virājo nāma stha teṣāṃ vaḥ paścād gṛhāḥ pratīcī dik teṣāṃ vaḥ kāma iṣavaḥ | (…) ||

2.56.4

avasthā nāma stha teṣāṃ va uttarād gṛhā udīcī dik teṣāṃ vo vāta iṣavaḥ | (…) ||

2.56.5

uttare nāma stha teṣāṃ va upari gṛhā ūrdhvā dik teṣāṃ vo varṣam iṣavaḥ | te no mṛḍata dvipade catuṣpade teṣāṃ vo yāny āyudhāni yā iṣavas tebhyo namas tebhyaḥ svāhā ||

2.57.1

yadīdaṃ devo diva ājagāma yady antarikṣād yadi pārthivo yaḥ | yadi yajño yajñapateḥ svargas tebhyaḥ sarvebhyo namasā vidhema ||

2.57.2

yam indram āhur varuṇaṃ yam āhur yaṃ mitram āhur yam u somam āhuḥ | yam agnim āhur yam u sūryam āhus tebhyaḥ sarvebhyo namasā vidhema ||

2.57.3

ye śmaśānāni manasā nayanti sūryasya raśmīn anusaṃcaranti | ye devānām ṛtvijo yajñiyānāṃ tebhyaḥ sarvebhyo namasā vidhema ||

2.57.4

ye tandriyā jalpyā prorṇuvanti svapnaṃ durbhūtam abhi ye kiranti | ye devānāṃ dharmadhṛto babhūvus tebhyaḥ sarvebhyo namasā vidhema ||

2.57.5

svabhyasair abhi ye bhāyante ye bhāḥ kṛṇvanti ya u rodayanti | ye vā strīṇāṃ pratirūpā babhūvus tebhyaḥ sarvebhyo namasā vidhema ||

2.58.1

vyāvṛttau patho gāvau vyasyau yugyā uta | vidveṣaṇaṃ kilāsitha yathainau vy adidviṣaḥ ||

2.58.2

vi kilaināv adidviṣaḥ śaśvatībhyaḥ samābhyaḥ | atholmukam iva khādiram agnir vām astv antarā ||

2.58.3

siṃhas te astu cakṣuṣe vyāghraḥ pariṣvañjane | agnir vām astv antarā yathā vāṃ na sahāsati ||

2.58.4

vy adyaud vy atatanad vy āsthat kapaṭv iva | yā oṣadhe prasarpasi vy agnir iva tau daha ||

2.58.5

vi vāṃ yantu hṛdayāni vi cittāni manāṃsi ca | atho yat tanvoḥ saṃgataṃ tad vām astu vidūrakam ||

2.58.6

asti vai vāṃ vidvikam ubhau śayane antarā | viṣvañcau pary ā vartethāṃ yathā vāṃ na sahāsati ||

2.59.1

trayaḥ poṣās trivṛtaḥ śrayantām anaktu pūṣā payasā ghṛtena | annasya bhūmā puruṣasya bhūmā bhūmā paśūnāṃ ta iha śrayantām ||

2.59.2

imam ādityā vasunā sam ukṣata- -imam agne vardhaya vāvṛdhānaḥ | asmin trivṛc chrayatāṃ poṣayiṣṇur imam indra saṃ sṛja vīryeṇa ||

2.59.3

bhūmiṣ ṭvā pātu haritena viśvabhṛd agniḥ pipartv ayasā sajoṣāḥ | vīrudbhis te arjunaṃ saṃvidānaṃ varco dadhātu sumanasyamānam ||

2.59.4

tredhā jātaṃ janmanedaṃ hiraṇyam agner ekaṃ priyatamaṃ babhūva | somasyaikaṃ hiṃsitasya parāpatad apām ekaṃ vedhaso reta āhus tat te hiraṇyaṃ trivṛd astv āyuṣe ||

2.59.5

tryāyuṣaṃ jamadagneḥ kaśyapasya tryāyuṣam | tredhāmṛtasya cakṣaṇaṃ trīṇy āyūṃṣi nas kṛdhi ||

2.59.6

trayaḥ suparṇās trivṛtā yad āyann ekākṣaram abhisaṃbhūya śakrāḥ | praty auhan mṛtyum amṛtena sākam antardadhānā bhuvanāni viśvā ||

2.59.7

divas tvā pātu haritaṃ madhyāt tvā pātv arjunam | bhūmyā ayasmayaṃ pātu prāgād devapurā ayam ||

2.59.8

imās tisro devapurās tās tvā rakṣantu sarvataḥ | tās tvaṃ bibhrad āyuṣmān varcasvān uttaro dviṣato bhava ||

2.59.9

puraṃ devānām amṛtaṃ hiraṇyaṃ ya ābedhe prathamo devo agre | tasmai namo daśa prācīḥ kṛṇomy anu manyatāṃ trivṛtā vadhena ||

2.59.10

nava prāṇān navabhiḥ saṃ mimīte dīrghāyutvāya śataśāradāya | harite trīṇi rajate trīṇy ayasi trīṇi tapasāviṣṭitāni ||

2.59.11

ā te cṛtatv aryamā- -ā pūṣā bṛhaspatiḥ | aharjātasya yan nāma tena te 'ti cṛtāmasi ||

2.59.12

ṛtubhiṣ ṭvārtavair ity ekā ||

2.60.1

yajñaṃ yantaṃ tapasā bṛhantam anv ā rohāmi manasā sayoniḥ | upahūtā agne jarasaḥ parastāt tṛtīye nāke sadhamādaṃ madema ||

2.60.2

taṃ prajānan prati gṛhṇātu vidvān prajāpatiḥ prathamajā ṛtasya | asmābhir dattaṃ jarasaḥ parastād acchinnaṃ tantum anu saṃ carema ||

2.60.3

śyenaḥ suparṇo divyo nṛcakṣāḥ sahasrapāc chatayonir vayodhāḥ | sa no ni yaṃsad vasu yat parābhṛtam asmākam astu pitṛṣu svadhāvat ||

2.60.4

etaṃ sadhasthāḥ pari vo dadāmi yam āvahāc chevadhiṃ jātavedāḥ | anvāgantā yajamānaḥ svasti taṃ sma jānīta parame vyoman ||

2.60.5

jānīta smainaṃ parame vyoman devāḥ sadhasthā vida lokam etam | iṣṭāpūrtam anu saṃ krāma vidvān yatra te dattaṃ bahudhā vibandhuṣu ||

2.61.1

yebhiḥ pāśair abhidadhāsi druhvaṇaḥ samāmino anṛtaṃ ye samāmire | tāṃs te vi ṣyāmy āyuṣe balāya- -anamīvaṃ pitum addhi prasūtaḥ ||

2.61.2

anāgā babhro ayam astu vīro druhaḥ pāśebhyaḥ pari pāhy enam | rājan pravidvān pra mumugdhi pāśān yasmai carāmi haviṣā ghṛtena ||

2.61.3

kaśyapa indrāya haviṣā cacāra haritvatīṣu maghavā maghone | paspāra viśvā bhuvanasya gopā antarikṣasya mahato vimāne ||

2.61.4

apūpaṃ nābhilaṃ te ghṛtaścutaṃ nadīnāṃ pade suśrutaṃ juhomi | pravidvān rājan pra mumugdhi pāśān anyasya patnī vidhavā yathāsat ||

2.61.5

anātureṇa varuṇaḥ pathemaṃ svastibhir ati durgāṇi neṣat | tam aśvinā pratigṛhyā svastaye doṣā enam uṣase saṃ pra yacchāt ||

2.62.1

ye piśācā imāṃ vittim ākūtiṃ mohayanti naḥ | teṣāṃ tvam agne nāśaya varcaś cittam atho prajām ||

2.62.2

nāśayāgne piśācānāṃ varcaś cittam atho prajām | athāśāṃ mahyaṃ rādhaya yathāhaṃ kāmaye tathā ||

2.62.3

āśāṃ mahyaṃ rādhayitvā- -indriyeṇa yathāmṛtām | tvam agne kravyādaḥ sarvān piśācām̐ arciṣā daha ||

2.62.4

prati daha yātudhānān mūradevān vicarṣaṇe | ye no durasyā dveṣeṇa- -athāśāṃ mohayanti naḥ ||

2.62.5

ye naḥ paśuṣu dipsanty āśāyāṃ puruṣeṣu ca | tāṃs tvaṃ sahasrākṣeśānaḥ piśācām̐ arciṣā daha ||

2.63.1

sahasvedaṃ sahamāne atho devi sarasvati | athedam aśvinā lakṣma rohitaṃ kṛṇutaṃ yuvam ||

2.63.2

āsurasya mukhasyāgne lakṣmamukhaṃ nāmāsi | meto jyāyo bhūr ita it kanīyo 'so naśyetaḥ paro mā tvā hiṃsiṣam ||

2.63.3

yāsāṃ pitā parjanyo bhūmir mātā babhūva | hvayāmi sarvā oṣadhīr gojātāḥ somajinvatāḥ ||

2.63.4

idaṃ saptaprakhe tvaṃ kilāsaṃ nāśayā tvacaḥ | niṣkṛtir nāma vā asi sedaṃ niṣ kṛdhi bhadrayā ||

2.63.5

niṣkṛtir nāma te mātā niṣkṛtir nāma te pitā | uto tvam asi niṣkṛtiḥ sedaṃ niṣ kṛdhi bhadrayā ||

2.64.1

aurdhvanabhasaḥ prathamaḥ sūryacetā uśadbhyaḥ | cakāra kṛtyām āsuraḥ sā no bhavatu bhadrayā ||

2.64.2

ya imāṃ kṛtyām upajahrur ye vā cakamire ?kṣitam | devānāṃ sarveṣāṃ svasā tān devī nirṛtir hanat ||

2.64.3

kaśyapasya pratisaro dyauṣ pitā pṛthivī mātā | yathābhicakra devās tathāpi kṛṇutā punaḥ ||

2.64.4

yāḥ kṛtyā nīlavatīr yāḥ kṛtyāḥ pāśyāvatīḥ | kṛtyā yāś cakrur lohinīs tā ito nāśayāmasi ||

2.64.5

yadi vā idam ājahrur ime bhadrā asann iti | kṛtyāsi kalyāṇy asi sāmuṃ kartāram anv ihi ||

2.65.1

bṛhat te varcaḥ prathatām upa dyāṃ mitrebhya edhi surabhiḥ suvarcāḥ | adhi te rājā varuṇo bravītu tasmā u tvaṃ haviṣā bhāgadhā asaḥ | śataṃ hemantān damayā sapatnān viśas tvā sarvā anu guṅgavo bhavantu ||

2.65.2

yas tvotpipānaṃ pratyutpipāti yas tvā sajāto viriphāty antitaḥ | indras taṃ yoktre adhame yunaktu tasmai (…) ||

2.65.3

yas tvā yacchantaṃ pratiyaṃyamīti yas tvā jigīṣāt pṛtanāḥ samarye | bṛhaspatis tam ava jaṅghanītu tasmai (…) ||

2.65.4

ye te śulkam āharān ya u te baliṃ somaḥ sajātān upa saṃ namāti te | agniḥ sayugvān adhi te bravītu tasmai (…) ||

2.65.5

variṣṭhaidhi puruḥ prajayā suvīro abhi pra yuṅkṣva damayā sapatnān | indro marutvān adhi te bravītu tasmā u tvaṃ haviṣā bhāgadhā asaḥ | śataṃ hemantān damayā sapatnān viśas tvā sarvā anu guṅgavo bhavantu ||

2.66.1

bhagāya rājñe prathamaṃ juhomi viśve devā uttare mādayantām | uśan patnībhya uśatībhya ābhyaḥ patim agna ā vaha rātahavyaḥ ||

2.66.2

patiṃ vṛṇīṣva haviṣā gṛṇānā tam ā vahāt savitā taṃ te agniḥ | tasmai namasva śataśāradāya bhagabhaktā bhagavatī suvīrā ||

2.66.3

yam aryaman patim asyai dideśitha jane cit santaṃ tam ihā vahāsi | sumaṅgaly apatighnī suśevā rāyaspoṣeṇa tam iṣā sacasva ||

2.66.4

yaṃ te patim aryamā jāyamānāyai dhātā cakalpa tam ihā vahāsi | abhivareṇa haviṣā juhomi prajānann aitu sumanasyamānaḥ ||

2.66.5

patiṃ te dyāvāpṛthivī adhātāṃ patiṃ mitrāvaruṇā vāto agniḥ | sapta rṣayo 'ditiḥ soma indras te tvā devāḥ pativatnīṃ kṛṇvantu ||

2.67.1

yas tvārāyaḥ praviveśa- -ajānir janivām̐ uta | atho yas tanvaṃ pasparśa tam ito nir ṇayāmasi ||

2.67.2

niṣ ṭvārāya nayāmasi ya imāṃ praviveśitha | ātmānam asyā mā hiṃsīr anyatra cara meha bhūḥ ||

2.67.3

yad arāyemām upāyasi dhehy asyai rayipoṣaṇam | prajāṃ cid asyā mā hiṃsīr anyatra cara meha bhūḥ ||

2.67.4

yad arāyehāyasi hanāma vīrudhā tvā | atho khanitrimais tvā- -ād vṛṣeṇa yathābhagam ||

2.67.5

yad arāyāsūyaṃ straiṣūyam āvatokyam | yat paitṛṣadyaṃ daurbhāgyaṃ tad ito nir ṇayāmasi ||

2.68.6

yat te sūrya divi deveṣu varcas tasya no dhehi tvam asi pracetāḥ | ahaṃ tvad ugras tviṣitas tviṣīmān imāṃ vācaṃ vi sākṣīya ||

2.69.1

vātaḥ purastāt pavase nabhasvān | namas te vidma te nāmadheyaṃ mā no hiṃsīḥ ||

2.69.2

tapojā amūro dakṣiṇataḥ pavase nabhasvān | namas te vidma te nāmadheyaṃ mā no hiṃsīḥ ||

2.69.3

viśvāyur viśvajanīnaḥ pratīcyā diśaḥ pavase nabhasvān | namas te vidma te nāmadheyaṃ mā no hiṃsīḥ ||

2.69.4

śivo vaiśvadeva udīcyā diśaḥ pavase nabhasvān | namas te vidma te nāmadheyaṃ mā no hiṃsīḥ ||

2.69.5

atiṣṭhāvān bārhaspatya ūrdhvāyā diśaḥ pavase nabhasvān | namas te vidma te nāmadheyaṃ mā no hiṃsīḥ ||

2.70.1

apādyaud apātatanad apaskandya vadhed ahim | kalyāṇyā yathā smitaṃ śam u naḥ santu vidyutaḥ ||

2.70.2

yat parjanya stanayati sarvaṃ saṃvijate jagat | patiṃ tad ṛtviyāvatī pṛthivī prati modate ||

2.70.3

eṣa enā abhy akrandīd vṛṣāśvo dhenukā iva | ahīṃs tvaṃ vidyutā jahi māsmākaṃ puruṣān vadhīḥ ||

2.70.4

abhikrandāt stanayitnor avasphūrjād aśanyā uta | devā maruto mṛḍata naḥ pātu no duritād avadyāt ||

2.70.5

ṛjīte pari ṇo nama- -ādityāḥ śarma yacchata | yuyuta parṇinaṃ śaram utāparṇaṃ riśādasaḥ ||

2.71.1

kṛtavyadhani vidhya taṃ yaś cakāra tam ij jahi | na tvām acakruṣe vayaṃ vadhāya saṃ śiśīmahe ||

2.71.2

yathā te devy oṣadhe pratīcīnaṃ phalaṃ kṛtam | evā tvaṃ kṛtvane kṛtyāṃ hastagṛhya parā ṇaya ||

2.71.3

punaḥ kṛtyāṃ kṛtyākṛte godhevāvaṭam anv ayat | saktur iva saktupreṣyaṃ pratīcī prati dadhvasat ||

2.71.4

yāṃ te cakrur vartaneṣu vārtākuṣu vṛtāsu ca | maṇḍūke kṛtyāṃ yāṃ cakrus tayā kṛtyākṛto jahi ||

2.71.5

agnir ivaitu pratikūlam anukūlam ivodakam | sukhe ratha iva vartatāṃ kṛtyā kṛtyākṛtaṃ kṛtā ||

2.72.1

agnir dyumnena sūryo jyotiṣā dyaur mahimnāntarikṣaṃ vyacasā | diśa āśābhiḥ pṛthivī payobhir idaṃ rāṣṭraṃ vardhayantu prajāvat ||

2.72.2

tvaṣṭā rūpeṇa savitā savena- -ahar mitreṇa varuṇena rātrī | pūṣā puṣṭair bhago aṃśena bhaktyā- -idaṃ rāṣṭraṃ vardhayantu prajāvat ||

2.72.3

yāṃ viśvakarmā nijaghāna methim antarā dyāvāpṛthivī ubhe | tasyā āhuḥ kṣatriyaṃ garbham etaṃ pari māva patthā mūrdhani dhārayasva ||

2.72.4

chandāṃsy asyā abhito mayūkhā stomā ātmā yajur asyāḥ purīṣam | tasyā āhuḥ kṣatriyaṃ nirmitaṃ pari māva patthā mūrdhani dhārayasva ||

2.72.5

parā ṇudasva vyathayābhimātim adhaspadaṃ kṛṇuṣva durdharāyataḥ | mā tvā dabhan sapatnā dipsantas tava rāṣṭram uttamaṃ dyumnam astu ||

2.73.1

idaṃ tan mitrāvaruṇā havir vāṃ yenāgre devā amṛtatvam āyan | tenāsmai kṣatram adhi dhārayaujo 'sapatnāḥ pradiśaḥ santv asmai ||

2.73.2

ghṛtasya dhārā mitrāvaruṇā duhāṃ vāṃ dhenur anapasphurantī | devaḥ savitota vāyur agnir bhūtasya patir iha śarma yacchāt ||

2.73.3

śaṃ nas tan mitrāvaruṇā gṛṇītaṃ tṛḍhā amitrā bahudhā vi śerām | jayatu senopa ghoṣa etu pṛthak satvāno bahudhā bharantām ||

2.73.4

hanāma mitrāvaruṇāv amitrān bhavāma bhadre sukṛtasya loke | pārayān naḥ savitā devo agnir jayāmedaṃ haviṣā kaśyapasya ||

2.73.5

vāto yaṃ mitrāvaruṇā tad āha viśvantaraṃ nirmitaṃ kaśyapasya | adhvaryavo maruto yasyāsan tena devebhyo varimāṇi cakruḥ ||

2.74.1

acikradat svapā iha bhavad agne yajasva rodasī urūcī | āmuṃ naya namasā rātahavyo yuñjantu suprajasaṃ pañca janāḥ ||

2.74.2

dūre cit santam aruṣāsa indram ā cyāvayantu sakhyāya vipram | yad gāyatrīṃ bṛhatīm arkam asmai sautrāmaṇyādadhṛṣan ?tu devāḥ ||

2.74.3

adbhyas tvā rājā varuṇo juhāva somas tvāyaṃ hvayatu parvatebhyaḥ | indras tvāyaṃ hvayatu viḍbhya ābhyaḥ śyeno bhūtvā viśa ā patemāḥ ||

2.74.4

śyenaṃ havir nayatv ā parasmād anyakṣetre aparuddhaṃ carantam | aśvinā panthāṃ kṛṇutāṃ sugaṃ te garbhaṃ sajātā abhi saṃ viśadhvam ||

2.74.5

śyenaṃ haviḥ kaśyapasyopa śikṣa- -indraṃ vātaḥ prahito dūta ā vaha | viṣahya śatrūn senāgrair viśo vṛṇāno 'va gaccha kāmī ||

2.74.6

yas te havaṃ paritiṣṭhāt sajāta uta niṣṭiyaḥ | apāca indra tān nītvā- -athemam ava gamaya ||

2.74.7

hvayantu tvā pañca janāḥ patiṃ mitrā avṛṣata | indrāgnī viśve devā viśi kṣemam adīdharan ||

2.75.1

prajāpatir anavartiḥ sa prajābhir anavartiḥ | sa mānavartir anavartiṃ kṛṇotu ||

2.75.2

indro 'navartiḥ sa vīryeṇānavartiḥ | (…) ||

2.75.3

somo 'navartiḥ sa oṣadhībhir anavartiḥ | sa mānavartir anavartiṃ kṛṇotu ||

2.75.4

āpo 'navartayas tāḥ parjanyenānavartayaḥ | tā mānavartayo 'navartiṃ kṛṇvantu ||

2.75.5

devā anavartayas te 'mṛtenānavartayaḥ | te mānavartayo 'navartiṃ kṛṇvantu ||

2.76.1

payo mahyam oṣadhayaḥ payo me vīrudho dadhan | apāṃ payasvad yat payas tan me varṣantu vṛṣṭayaḥ ||

2.76.2

payo mahyaṃ payasvanto hastino me payo dadhan | payaḥ patatriṇo mahyam aiṇeyā me payo dadhan ||

2.76.3

payasvan me kṣetram astu payasvad uta dhānyam | ahaṃ payasvān bhūyāsaṃ gāvo ma uta payasvatīḥ ||

2.76.4

payo mahyam apsaraso gandharvā me payo dadhan | payo me viśvā bhūtāni vāto dadhātu me payaḥ ||

2.76.5

payo mahyaṃ dyāvāpṛthivī antarikṣaṃ payo dadhat | payo ma indraś cāgniś ca dhātā dadhātu me payaḥ ||

2.77.1

ahaṃ bibharmi te mano ahaṃ cittam ahaṃ vratam | mamed api kratāv aso mama citte sacāvahai ||

2.77.2

āmanā asa ihamanā asa iha te ramatāṃ manaḥ | mayi te ramatāṃ manaḥ ||

2.77.3

āñjanasya madhughasya kuṣṭhasya naladasya ca | vīrodekasya mūlena mukhe nimandanaṃ kṛtam ||

2.77.4

madhu me antar āsye mukhe nimandanaṃ kṛtam | tatro tvaṃ vi vartasva narācīva vartasi ||

2.77.5

yathā nemī rathacakraṃ samantaṃ pariṣasvaje | evā pari ṣvajasva mā yathāsan mayi te manaḥ ||

2.78.1

yathedam aśvinā tṛṇaṃ vāto vahati bhūmyāḥ | evā vayaṃ vahāmasi yāṃ vayaṃ kāmayāmahe ||

2.78.2

ut tvā mātā sthāpayatu pra tvā nudatām aśvinā | adhā śiśur iva mātaraṃ mām evānv etu te manaḥ ||

2.78.3

yathā kṣīraṃ ca sarpiś ca manuṣyāṇāṃ hṛdaḥ priyam | evāham asyā nāryā hṛdo bhūyāsam uttaraḥ ||

2.78.4

agneṣ ṭvā tapas tapatu vātasya dhrājiḥ | mā spṛkṣathā niṣadanāya sādhava ut tiṣṭha prehy agnivat te kṛṇomi ||

2.78.5

sūryasya tvā tapas tapatu vātasya dhrājiḥ | mā spṛkṣathā niṣadanāya sādhava ut tiṣṭha prehi sūryavat te kṛṇomi ||

2.79.1

hiraṇyapuṣpī subhagā kūpaś cāyaṃ sumaṅgalaḥ | tāv enāṃ bhadrayā dhattām amṛtāv amṛte bhage ||

2.79.2

hiraṇyaṃ pṛḍvad dharitaṃ tat te aṅgeṣu rohatu | tenemām aśvinā nārīṃ bhagenābhi ṣiñcatam ||

2.79.3

yathā kūpam udahṛtas tṛṣyanto yanti kāminaḥ | evā tvā sarve devaraḥ patayo yantu kāminaḥ ||

2.79.4

hiraṇyākṣi madhuvarṇe hiraṇyaparicartane | aṅko hiraṇyayas tava tenāsyai patim ā vaha ||

2.79.5

yadi vāsi tiro janaṃ yadi vā nadyas tiraḥ | iyaṃ tvā mahyam oṣadhir aṅkeneva ny ā nayāt ||

2.80.1

punaḥ prāṇaṃ punar apānam asmai punar vyānam uta soma dhehi | ātmāyaṃ cakṣur ?udate samānas tam ū nu pāhi tam ū nu jinva jāgṛhi ||

2.80.2

tvaṣṭā rūpeṇa savitā savena- -ahar mitreṇa varuṇena rātrī | indro jyaiṣṭhyena brahmaṇāyaṃ bṛhaspatiḥ pūṣāsmai punar asuṃ dadhātu ||

2.80.3

ya ādityā vasavo ye ca rudrā viśve devā aditir yā ca rātrī | yajño bhagaḥ savitā ye ca devā yamo 'smai punar asuṃ dadhātu ||

2.80.4

punas te rājā varuṇo dadātu somo rājāsum it te punar dāt | indro marudbhir aśvinā te bhiṣajyatām agnī rudro 'sum it te punar dāt ||

2.80.5

punar dyaur devī punar antarikṣam agnir vātaḥ pavamāno bhiṣajyatu | grāhyāḥ pāśān nirṛtyāḥ pāśān mṛtyoḥ pāśād vāk tvā devī punar dadātu ||

2.81.1

idaṃ cakṣur ṛtāvarī mā mā hāsīt purāyuṣaḥ | yad vāṃ tamo yad ripiśam apa vāṃ tan ni dadhmasi ||

2.81.2

yad andhiyaṃ yad algaṇaṃ yo 'rmo adhirohati | ayasmayas tad aṅkuśo akṣṇo 'rmam apa lumpatu ||

2.81.3

yam ahyājim ajayan nṛcakṣā yaṃ vā śyenaḥ śakunir yaṃ suparṇaḥ | yad āhuś cakṣur aditer anantaṃ somo nṛcakṣā mayi tad dadhātu ||

2.81.4

yathā cakṣuḥ suparṇasya yathāśvasya yathā śunaḥ | evā me aśvinā cakṣuḥ kṛṇutaṃ puṣkarasrajā ||

2.81.5

yasyāḥ suparṇaḥ prapatañ cakṣuṣā cakṣur ādade | tasyāḥ samudraje tava cakṣuṣā cakṣur ā dade ||

2.84.1

idaṃ te śiro bhinadmi yātudhāna svāhā- -idaṃ te mastiṣkaṃ ni tṛṇadmi bhūmyām ||

2.84.2

idaṃ te hanū bhinadmi yātudhāna svāhā- -idaṃ te jihvāṃ ni tṛṇadmi bhūmyām ||

2.84.3

idaṃ te grīvā bhinadmi yātudhāna svāhā- -idaṃ te skandhān ni tṛṇadmi bhūmyām ||

2.84.4

idaṃ te aṃsau bhinadmi yātudhāna svāhā- -idaṃ te bāhū ni tṛṇadmi bhūmyām ||

2.84.5

idaṃ te hṛdayaṃ bhinadmi yātudhāna svāhā- -idaṃ te klomānaṃ ni tṛṇadmi bhūmyām ||

2.84.6

idaṃ te pṛṣṭīr bhinadmi yātudhāna svāhā- -idaṃ te parśūr ni tṛṇadmi bhūmyām ||

2.84.7

idaṃ te śroṇī bhinadmi yātudhāna svāhā- -idaṃ te vastraṃ ni tṛṇadmi bhūmyām ||

2.84.8

idaṃ ta ūrū bhinadmi yātudhāna svāhā- -idaṃ te jaṅghe ni tṛṇadmi bhūmyām ||

2.84.9

idaṃ te kulphau bhinadmi yātudhāna svāhā- -idaṃ te pādau ni tṛṇadmi bhūmyām ||

2.84.10

idaṃ te tvacaṃ bhinadmi yātudhāna svāhā- -idaṃ te prāṇān ni tṛṇadmi bhūmyām ||

2.84.11

idaṃ te parūṃṣi bhinadmi yātudhāna svāhā- -idaṃ te majjño ni tṛṇadmi bhūmyām ||

2.85.1

nardamodalavuntaka jiṣṇo hāparājitaḥ | amuṃ bhrūṇāny arpaya svayaṃ pāśaṃ ny āyati ||

2.85.2

asur aitu sahakratur ātmā prāṇo atho balam | sa no dadhātu bhadrayā- -agnir viśvād vasumān svastaye ||

2.85.3

dakṣiṇā mā dakṣiṇato dakṣiṇā pātu savyataḥ | paścād anuvyādhāt pātu purastāt pātu dakṣiṇā ||

2.85.4

śatam āpo divyā mitrasya ca dakṣiṇāḥ | dhātā savitād rudras te no muñcantv aṃhasaḥ ||

2.85.5

śataṃ pāśā varuṇasya brahmaṇaspater u śatam | martāt pāśān no vi ṣya śatāt pāśebhyo vayaṃ tvām ||

2.86.1

prācīṃ diśam āsthām agnir māvatv ojase balāya diśāṃ priyo bhūyāsam | anamitrā me diśo bhavantu ghṛtapratīkāḥ ||

2.86.2

dakṣiṇāṃ diśam āsthām indro māvatv ojase balāya (…) ||

2.86.3

pratīcīṃ diśam āsthāṃ varuṇo māvatv ojase balāya (…) ||

2.86.4

udīcīṃ diśam āsthāṃ somo māvatv ojase balāya (…) ||

2.86.5

dhruvāṃ diśam āsthāṃ viṣṇur māvatv ojase balāya (…) ||

2.86.6

ūrdhvāṃ diśam āsthāṃ bṛhaspatir māvatv ojase balāya diśāṃ priyo bhūyāsam | anamitrā me diśo bhavantu ghṛtapratīkāḥ ||

2.87.1

manāyyai tantuṃ prathamaṃ paśced anyā atanvata | tan nārīḥ pra bravīmi vaḥ sādhvīr vaḥ santūrvarīḥ ||

2.87.2

sādhur vas tantur bhavatu sādhur otur atho vṛtā | atho horvarīr yūyaṃ prātar voḍheva dhāvata ||

2.87.3

khargalā iva patvarīr apām ugram ivāyanam | patantu patvarīr iva- -urvarīḥ sādhunā pathā ||

2.87.4

avācyau totudyete todenāśvatarāv iva | pra stomam urvarīṇāṃ śaśayānām astāviṣam ||

2.87.5

nārī pañcamayūkhaṃ sūtravat kṛṇutaṃ vasu | ariṣṭo asya vastā prendra vāsa utau tira ||

2.88.1

śāsa itthā mahām̐ asy amitraghāto adbhutaḥ | na yasya hanyate sakhā na jīyate kadā cana ||

2.88.2

vi rakṣo vi mṛdho jahi vi vṛtrasya hanū ruja | vi manyum indra vṛtrahann amitrasyābhidāsataḥ ||

2.88.3

vi na indra vi mṛdho jahi nīcā yaccha pṛtanyataḥ | adhamaṃ gamayā tamo yo asmām̐ abhidāsati ||

2.88.4

svastidā viśāṃ patir vṛtrahā vimṛdho vaśī | vṛṣendraḥ pura etu naḥ somapā abhayaṃkaraḥ ||

2.88.5

apendra dviṣato mano 'pa jijyāsato vadham | vi mahac charma yaccha varīyo yāvayā vadham ||

2.89.1

ayaṃ yo 'titaro maṇis tenāti tara duśyasaḥ | sapatnān dviṣato maṇe pra ṇudasva pṛtanyataḥ ||

2.89.2

pra ṇudasva pra sahasva sapatnān dviṣato maṇe | tarābhimātiṃ duśyasāṃ varco bhaṅgdhi pṛtanyatām ||

2.89.3

varco jahi manyuṃ jahy ākūtiṃ dviṣatāṃ maṇe | devo yo 'titaro maṇis tenāti tara dhūrvataḥ ||

2.89.4

ye dhūrvanti ye druhyanti ye dviṣanti pṛtanyataḥ | sarvān sapatnāṃs te maṇir ni manyuṃ dviṣatas karat ||

2.89.5

tava citte tava vrate tavaivādhaspadaṃ carān | devo yo 'titaro maṇis tenāti tara duśyasaḥ ||

2.90.1

ā te manaś cakṣuṣyam ā te hṛdayyaṃ dade | padoṣ ṭe padyam ā dade yathā tiṣṭhāsi me vaśe ||

2.90.2

vāñcha me pādau tanvaṃ vāñchākṣyau vāñcha sakthyau | akṣyau vṛṣaṇyantyāḥ keśā oṣṭhau māṃ te kāmena śuṣyatām ||

2.90.3

mayi tvā doṣaṇiśliṣaṃ kṛṇomi hṛdayaśliṣam | yathā mama kratāv aso mamāsaś ced asīd api ||

2.90.4

yāsāṃ nābhir ārehaṇaṃ hṛdi saṃvananaṃ kṛtam | gāvo ghṛtasya mātaro amūṃ saṃ vānayantu me ||

2.90.5

mahyaṃ tvā dyāvāpṛthivī mahyaṃ devī sarasvatī | mahyaṃ tvendraś cāgniś ca- -ahorātre ni yacchatām ||

2.91.1

tūli mūly arjuni punar vo yantu yātavaḥ punar jūtiḥ kimīdinīḥ | yasya stha tam atta yo vaḥ prāhait tam atta svā māṃsāny atta ||

2.91.2

atsyavo jighatsavaḥ (…) ||

2.91.3

aviṣyavas pāsyavaḥ (…) ||

2.91.4

sphātihārī rasahārīḥ (…) ||

2.91.5

vātajūte manojavaḥ punar vo yantu yātavaḥ punar jūtiḥ kimīdinīḥ | yasya stha tam atta yo vaḥ prāhait tam atta svā māṃsāny atta ||