Kāṇḍa 3

3.1.1

ā tvāgan rāṣṭraṃ saha varcasod ihi prāṅ viśāṃ patir ekarāṭ tvaṃ vi rāja | sarvās tvā rājan pradiśo hvayantu- -upasadyo namasyo bhaveha ||

3.1.2

tvāṃ viśo vṛṇataṃ rājyāya tvām imāḥ pradiśaḥ pañca devīḥ | varṣman rāṣṭrasya kakudi śrayasva- -ato vasūni vi bhajāsy ugraḥ ||

3.1.3

accha tvā yantu havinaḥ sajātā agnir dūto ajiraḥ santurātiḥ | jāyāḥ putrāḥ sumanaso bhavantu bahuṃ baliṃ prati paśyāsā ugraḥ ||

3.1.4

aśvinā tvāgre mitrāvaruṇobhā viśve devā marutas tvā hvayantu | sajātānāṃ madhyameṣṭhā iha syāḥ sve kṣetre saviteva vi rāja ||

3.1.5

ā pra drava paramasyāḥ parāvataḥ śive te dyāvāpṛthivī abhūtām | tad ayaṃ rājā varuṇas tathāha sa tvāyam ahvat sa ihedam ehi ||

3.1.6

indrendraṃ manuṣyaḥ parehi saṃ yajñiyās tvā varuṇena saṃvidānaḥ | sa tvāyam ahvat sve sadhasthe sa devān yakṣat sa u kalpayād viśaḥ ||

3.1.7

pathyā revatīr bahudhā virūpāḥ sarvāḥ saṅgatya varivas te akran | tās tvā sarvāḥ saṃvidānā hvayantu daśamīm ugraḥ sumanā vaśeha ||

3.1.8

yad ajireṇa haviṣā- -ava tvā gamayāmasi | atrāta indraḥ kevalīr viśo balihṛtas karat ||

3.2.1

hariṇasya raghuṣyado 'dhi śīrṣaṇi bheṣajam | sukṣetriyaṃ viṣāṇayād visūcīnam anīnaśat ||

3.2.2

anu tvā hariṇo vṛṣā padbhiś caturbhir akramīt | viṣāṇe vi ṣya guṣpitaṃ yat kiṃ ca kṣetriyaṃ hṛdi ||

3.2.3

ado yad avarocate catuṣpakṣam iva cchadiḥ | tena te sarvaṃ kṣetriyam aṅgebhyo nāśayāmasi ||

3.2.4

ud agātāṃ bhagavatī vicṛtau nāma tārake | vi kṣetriyasya muñcatām adhamaṃ pāśam uttamam ||

3.2.5

yad āsuteḥ kriyamāṇāyāḥ kṣetriyaṃ tvā vyānaśe | vedāhaṃ tasya bheṣajaṃ kṣetriyaṃ nāśayāmi te ||

3.2.6

apavāse nakṣatrāṇām apavāsa utoṣasām | apāsmat sarvam āmayad apa kṣetriyam akramīt ||

3.2.7

āpa id vā u bheṣajīr āpo amīvacātanīḥ | āpo viśvasya bheṣajīs tās tvā muñcantu kṣetriyāt ||

3.3.1

pumān puṃsaḥ parijāto 'śvatthaḥ khadirād adhi | sa hantu śatrūn māmakān yāṃś cāhaṃ dveṣmi ye ca mām ||

3.3.2

tān aśvattha niḥ śṛṇīhi śatrūn vaibādha dodhataḥ | indreṇa vṛtraghnā mehy agninā varuṇena ca ||

3.3.3

yathāśvattha niḥśṛṇāsi pūrvān jātān utāparān | evā pṛtanyatas tvam abhi tiṣṭha sahasva ca ||

3.3.4

yathāśvattha vibhinatsy antar mahaty arṇave | evā me śatroś cittāni viṣvag bhindhi sahasva ca ||

3.3.5

yaḥ sahamānaś carasi sāsahāna iva rṣabhaḥ | tenāśvattha tvayā vayaṃ sapatnān sahiṣīmahi ||

3.3.6

sinātv enān nirṛtir mṛtyoḥ pāśair amokyaiḥ | aśvattha śatrūn māmakān yāṃś cāhaṃ dveṣmi ye ca mām ||

3.3.7

adharāñcaḥ pra plavantāṃ chinnā naur iva bandhanāt | na nir bādha praṇuttānāṃ punar asti nivartanam ||

3.3.8

praiṇān nudāmi manasā pra cittena pra brahmaṇā | praiṇān vṛkṣasya śākhaya- -aśvatthasya nudāmasi ||

3.4.1

yad adaḥ saṃprayatīr ahāvanadatā hate | tasmād ā nadyo nāma stha tā vo nāmāni sindhavaḥ ||

3.4.2

yat preṣitā varuṇena- -āc chībhaṃ samavalgata | tad āpnod indro vo yatīs tasmād āpo anu ṣṭhana ||

3.4.3

apakāmaṃ syandamānā avīvarata vo hikam | indro vaḥ śaktibhir devīs tasmād vār ṇāma vo hikam ||

3.4.4

eko vo deva upātiṣṭhat syandamānā upetya | udāniṣur mahīr iti tasmād udakam ucyadhve ||

3.4.5

āpo devīr ghṛtam id āpa āhur agnīṣomau bibhraty āpa it tāḥ | tīvro raso madhupṛcām araṅgama ā mā prāṇena saha varcasāgan ||

3.4.6

ād it paśyāmy uta vā śṛṇomy ā mā ghoṣo gacchati vāṅ māsām | mene bhejāno amṛtasya tarhi hiraṇyavarṇā atṛpaṃ yadāpaḥ ||

3.5.1

agnir no dūtaḥ praty etu śatrūn pratidahann abhiśastim arātim | sa cittāni mohayatu pareṣāṃ nihastāṃś ca kṛṇavaj jātavedāḥ ||

3.5.2

ayam agnir amūmuhad yāni cittāni vo hṛdi | vi vo dhamāty okasaḥ pra vo dhamāti sarvataḥ ||

3.5.3

indra cittāni mohaya- -arvāg ākūtyā adhi | agner vātasya dhrājyā tān viṣūco vi nāśaya ||

3.5.4

vy eṣām ākūtaya ita- -atho cittāni muhyata | atho yad adyaiṣāṃ hṛdi tad eṣāṃ pari nir jahi ||

3.5.5

amīṣāṃ cittāni pratimohayantī gṛhāṇāṅgāny apve parehi | abhi prehi nir daha hṛtsu śokair grāhyāmitrāṃs tamasā vidhya śatrūn ||

3.5.6

asau yā senā marutaḥ pareṣām asmān abhy aity ojasā spardhamānā | tāṃ guhata tamasāpavratena yathaiṣām anyo anyaṃ na jānāt ||

3.6.1

agnir no vidvān praty etu śatrūn pratidahann abhiśastim arātim | sa senāṃ mohayatu pareṣāṃ nihastāṃś ca kṛṇavaj jātavedāḥ ||

3.6.2

yūyam ugrā maruta īdṛśe stha- -abhi preta mṛḍata sahadhvam | amīmṛḍan vasavo nāthitebhyo +'gnir hy eṣāṃ vidvān praty etu śatrūn ||

3.6.3

amitrasenāṃ maghavann asmāñ chatrūyatām abhi | yuvaṃ tān indra vṛtrahann agniś ca dahataṃ prati ||

3.6.4

prasūta indraḥ pravatā haribhyāṃ pra te vajraḥ pra mṛṇann etu śatrūn | jahi pratīco anūcaḥ parāco viśvaṃ hi riṣṭaṃ kṛṇuhi satyam eṣām ||

3.6.5

senāmohanaṃ kṛṇv indrāmitrebhyas tvam | agner vātasya dhrājyā tān viṣūco vi nāśaya ||

3.6.6

indraḥ senāṃ mohayatu maruto ghnantv ojasā | cakṣūṃṣy agnir ā dattāṃ punar etu parājitām ||

3.7.1

ekaśataṃ viṣkandhāni viṣṭhitā pṛthivīm anu | teṣāṃ tu sarveṣām idam astu viṣkandhadūṣaṇam ||

3.7.2

karṣaphasya viśaphasya dyauṣpitā pṛthivī mātā | yathābhicakra devās tathāpi kṛṇutā punaḥ ||

3.7.3

aśleṣmāṇo adhārayan tathā tan manunā kṛtam | kṛṇomi vadhri viṣkandhaṃ muṣkābarho gavām iva ||

3.7.4

sūtre piśaṅge khṛgalaṃ yad ābadhnanti vedhasaḥ | śravasyaṃ śuṣmaṃ kābavaṃ vadhriṃ kṛṇvantu bandhurā ||

3.7.5

yenā śravasyo caratha devā ivāsuramāyayā | śunāṃ kapir iva dūṣaṇo bandhurā kābavasya ca ||

3.7.6

duṣṭyai hi tvā bhantsyāmi dūṣayitvā kābavam | ud āśavo rathā iva śapathebhiḥ sariṣyatha ||

3.8.1

yamasya lokād adhy ā babhūvitha pramadā martān pra yunakṣudhīraḥ | ekākinā sarathaṃ yāsi vidvān svapna mimāno asurasya yonau ||

3.8.2

bambas tvāgre viśvavayāpaśyat purā rātryā janitor eke ahni | tataḥ svapnedam adhy ā babhūvitha viṣvaṅvarūpam apagūhamānaḥ ||

3.8.3

bṛhan grāvāsurebhyo 'dhi devān upāvavarta mahimānam icchan | tasmai svapnāya dadhur ādhipatyaṃ trayastriṃśāsaḥ svar ānaśānāḥ ||

3.8.4

naitāṃ viduḥ pitaro nota devā yaiṣā jalpiś caraty antaredam | trite svapnam adadhur āptye nara ādityāso varuṇenānuśiṣṭāḥ ||

3.8.5

vy asya krūram abhi yantu duṣkṛto 'svapnena sukṛtaḥ puṇyam āyuḥ | svar madasi parameṇa bandhunā tapyamānasya manaso 'dhi jajñiṣe ||

3.8.6

vidma te sarvāḥ parijāḥ purastād vidma svapna yo adhipā iho te | yaśasvino no yaśaseha pāhy ārād dviṣebhir apa yāhi dūram ||

3.9.1

ambāḥ sumukhāḥ sṛjata padvat sṛjata satyajñeyam | sṛjāmy ahaṃ dūtān asmai viṣāya hantave | vār ugram arasaṃ viṣam āheyam arasaṃ viṣaṃ nirviṣam ||

3.9.2

indram aham iha huve somapām ubhayāvinam asmai viṣāya hantave | vār ugram arasaṃ viṣam āheyam arasaṃ viṣaṃ nirviṣam ||

3.9.3

varuṇam aham iha huva ugraṃ rājanyaiḥ saha- -asmai viṣāya hantave | vār ugram arasaṃ viṣam āheyam arasaṃ viṣaṃ nirviṣam ||

3.9.4

aditim aham iha huve sūraputrāṃ kanīnikām asmai viṣāya hantave | vār ugram arasaṃ viṣam āheyam arasaṃ viṣaṃ nirviṣam ||

3.9.5

bṛhaspatim aham iha huve yo devānāṃ purohito 'smai viṣāya hantave | vār ugram arasaṃ viṣam āheyam arasaṃ viṣaṃ nirviṣam ||

3.9.6

āṇāścāṇāś caṇḍāmarkā asmai viṣāya hantave | vār ugram arasaṃ viṣam āheyam arasaṃ viṣaṃ nirviṣam ||

3.9.7

navānāṃ navatīnāṃ viṣasya ropuṣīṇām | sarvāsām agrabhaṃ nāma vītāpetārasaṃ viṣam ||

3.10.1

mṛtyur eko yama ekaḥ śarva ekaḥ śarur bhavaḥ | te naḥ kṛṇvantu bheṣajaṃ devasenābhyas pari ||

3.10.2

punar no yamaḥ pitṛbhir dadātu punar mitrāvaruṇā vāto agniḥ | aghamāro aghaśaṃsaḥ punar dāt punar no devī nirṛtir dadātu ||

3.10.3

yā devaiḥ prahiteṣuḥ patāt tapase vā mahase vāvasṛṣṭā | somas tvām asmad yāvayatu vidvān pitaro vā devahutā nṛcakṣasaḥ ||

3.10.4

sahasrākṣo amartyaḥ pururūpa ihāvatu | sakhye ta ugra mā riṣaṃ sahaguḥ sahapūruṣaḥ ||

3.10.5

yas te manyuḥ sahasrākṣa viṣeṇa pariṣicyate | tena tvam asmabhyaṃ mṛḍa śivo naḥ śambhur ā cara ||

3.10.6

mā te mayau sahasrākṣa bhāme bhūn māmakaṃ jagat | yo no dveṣṭi taṃ gaccha yaṃ dviṣmas taṃ jahi ||

3.11.1

ye sthāsyāṃ prācyāṃ diśi hetayo nāma devās teṣāṃ vo agnir iṣavaḥ | te no mṛḍata te no 'dhi brūta tebhyo namas tebhyaḥ svāhā ||

3.11.2

ye sthāsyāṃ dakṣiṇāyāṃ diśy aviṣyavo nāma devās teṣaṃ va āpa iṣavaḥ | te no mṛḍata te no 'dhi brūta tebhyo namas tebhyaḥ svāhā ||

3.11.3

ye sthāsyāṃ pratīcyāṃ diśi virājo nāma devās teṣaṃ vaḥ kāma iṣavaḥ | te no mṛḍata te no 'dhi brūta tebhyo namas tebhyaḥ svāhā ||

3.11.4

ye sthāsyām udīcyāṃ diśi pravidhyanto nāma devās teṣaṃ vo vāta iṣavaḥ | te no mṛḍata te no 'dhi brūta tebhyo namas tebhyaḥ svāhā ||

3.11.5

ye sthāsyāṃ dhruvāyāṃ diśi vilimpā nāma devās teṣaṃ vo 'nnam iṣavaḥ | te no mṛḍata te no 'dhi brūta tebhyo namas tebhyaḥ svāhā ||

3.11.6

ye sthāsyām ūrdhvāyāṃ diśy aviṣyanto nāma devās teṣaṃ vo varṣam iṣavaḥ | te no mṛḍata te no 'dhi brūta tebhyo namas tebhyaḥ svāhā ||

3.12.1

yo apsv antar yo vṛtre antar yaḥ puruṣe yo aśmani | ya āviveśauṣadhīr yo vanaspatīṃs tebhyo agnibhyo hutam astv etat ||

3.12.2

yaḥ some antar ya u goṣv antar ya āviṣṭo vayasi yo mṛgeṣu | ya āviveśa dvipado yaś catuṣpadas tebhyo agnibhyo hutam astv etat ||

3.12.3

ya indreṇa sarathaṃ saṃbabhūva vaiśvānara uta viśvadāvyaḥ | yaṃ johavīmi pṛtanāsuṣāsahiṃ tebhyo agnibhyo hutam astv etat ||

3.12.4

yo devo viśvād yam u kāmam āhur yaṃ dātāraṃ pratigṛhṇantam āhuḥ | yo dhīraḥ śakraḥ paribhūr adābhyas tebhyo agnibhyo hutam astv etat ||

3.12.5

yaṃ tvā hotāraṃ manasābhisaṃvidus trayodaśa bhauvanāḥ pañca mānavāḥ | varcodhase yaśase sūnṛtāvate tebhyo agnibhyo hutam astv etat ||

3.12.6

ukṣānnāya vaśānnāya somapṛṣṭhāya vedhase | vaiśvānarasya jyeṣṭhebhyas tebhyo agnibhyo hutam astv etat ||

3.12.7

divaṃ pṛthivīm antarikṣaṃ ye vidyutam anusaṃcaranti | ye dikṣv antar ya u vāte antas tebhyo agnibhyo hutam astv etat ||

3.12.8

bṛhaspatiṃ varuṇaṃ mitram agniṃ hiraṇyapāṇiṃ savitāram indram | viśvān devān aṅgiraso havāmaha imaṃ kravyādaṃ śamayantv agnim ||

3.12.9

śānto agniḥ kravyād atho puruṣareṣaṇaḥ | atho yo viśvadāvyas taṃ kravyādam aśīśamam ||

3.13.1

āyam agan parṇamaṇir balī balena pramṛṇan sapatnān | ojo devānāṃ paya oṣadhīnāṃ mayi rāṣṭraṃ jinvatv aprayucchan ||

3.13.2

mayi rāṣṭraṃ parṇamaṇe mayi dhārayā śriyam | ahaṃ rāṣṭrasyābhīvarge yujā bhūyāsam uttaraḥ ||

3.13.3

yaṃ nidadhur vanaspatau vājaṃ devāḥ priyaṃ nidhim | taṃ ma indraḥ sahāyuṣā maṇiṃ dadhātu bhartave ||

3.13.4

somasya parṇaḥ saha ugram āgann indreṇa datto varuṇena sakhyā | tam ahaṃ bibharmi bahu rocamāno dīrghāyutvāya śataśāradāya ||

3.13.5

ā mā rukṣat parṇamaṇir mahyā ariṣṭatātaye | yathāham uttaro 'sāni mānuṣyā adhi sampadaḥ ||

3.13.6

punar maitv indriyaṃ punar ātmā draviṇaṃ brāhmaṇaṃ ca | punar agnayo dhiṣṇyāso yathāsthāma kalpayantām ihaiva ||

3.13.7

ye takṣāṇo rathakārāḥ karmārā ye manīṣiṇaḥ | sarvāṃs tān parṇa randhaya- -upastiṃ kṛṇu me janam ||

3.13.8

upastir astu vaiśya uta śūdra utāryaḥ | sarvāṃs tān parṇa randhaya- -upastiṃ kṛṇu me janam ||

3.14.1

yena vehad babhūvitha nāśayāmasi tad vayam | idaṃ tad anyatra tvad apa dūre ni dadhmasi ||

3.14.2

ā te garbho yonim etu pumān vāṇa iveṣudhim | ā vīro 'tra jāyatāṃ putras te daśamāsyaḥ ||

3.14.3

pumāṃsaṃ putraṃ janaya taṃ pumān anu jāyatām | bhavāsi putrāṇāṃ mātā jātānāṃ janayāsi ca ||

3.14.4

yāni bhadrāṇi bījāny ṛṣabhā janayanti | tais tvaṃ putraṃ vindasva sā prasūr dhenukā bhava ||

3.14.5

kṛṇomi te prajāpatyam ā garbho yonim etu te | vindasva putraṃ nāri yas tubhyaṃ śam asac cham u tasmai tvaṃ bhava ||

3.14.6

yāsāṃ pitā parjanyo bhūmir mātā babhūva | tās tvā putravidyāya devīḥ prāvantv oṣadhīḥ ||

3.14.7

yas te yonim udiṅgayād ṛṣabho retasā saha | sa ta ā siñcatu prajāṃ dīrghāyuṃ śataśāradām ||

3.15.1

yāṃ tvā vātovarayad ārdranābhā maharṣabhaḥ | tasyās te viśvadhāyaso viṣadūṣaṇam ud bhare ||

3.15.2

yāṃ tvā varāho akhanad ekasminn adhi puṣkare | tasyās te viśvadhāyaso viṣadūṣaṇam ud bhare ||

3.15.3

yāṃ tvāditir avapad bījavāpam adhi puṣkare | tasyās te viśvadhāyaso viṣadūṣaṇam ud bhare ||

3.15.4

yasyāḥ kulāyaṃ salile antar mahaty arṇave | tasyās te viśvadhāyaso viṣadūṣaṇam ud bhare ||

3.15.5

ut te bhara uttamāyā adhamāyās ta ud bhare | un madhyamān madhyame tad viṣadūṣaṇam ud bhare ||

3.15.6

agrabhaṃ sam agrabham ubhāvantau sam agrabham | divaś ca pṛthivyāś ca viṣadūṣaṇam ud bhare ||

3.16.4

nābhūd ahir bhrūṇam ārad ahir adrim arasāvadhīt | viṣasya brahmaṇāmāsīt tato jīvan na mokṣase ||

3.16.5

uṣṭo 'hiḥ samuṣṭo *'hir nirdhīto arasaḥ kṛtaḥ | viṣasya brahmaṇāmāsīt tato jīvan na mokṣase ||

3.16.6

punar dadāmi te viṣaṃ pūrvapadyam id āritha | māṃ dadaśvān manyase mayā daṣṭo na mokṣase ||

3.17.1

ekaśataṃ bheṣajāni teṣāṃ mātāsy oṣadhe | samudram ava gacchasi pṛthivyām adhi niṣṭhitā ||

3.17.2

tasyāṃ vedādhi bheṣajaṃ daśaśīrṣo daśajihvaḥ | yas te prathama ādade śaṃ śvāvanta oṣadhe yam adād vīrayug bhiṣak ||

3.17.3

punaś cakṣuḥ punaḥ prāṇaḥ punar āyur na āgamat | niṣ ṭvākaraṃ niṣkṛtyā niṣ ṭvā niṣkṛtyākaram ||

3.17.4

muñcāmi tvā śapathyād atho varuṇyād uta | atho yamasya paḍvīśād viśvasmād devakilbiṣāt ||

3.17.5

saṃ te śīrṣṇaḥ kapālāni hṛdayasya ca yo viduḥ | udyan sūrya ādityo aṅgadyotam anīnaśat ||

3.17.6

himavataḥ pra sravatha sindhau samaha saṅgamaḥ | tā āpaḥ sarvāḥ saṅgatya cakṣuḥ prāṇaṃ ca dhatta naḥ ||

3.18.1

hastivarcasaṃ prathatāṃ bṛhad yaśo adityā yat tanvaḥ saṃbabhūva | tat sarve savitur mahyam etad viśve devāso aditiḥ sajoṣāḥ ||

3.18.2

mitraś ca varuṇaś ca- -indro rudraś ca vedhatu | devāso viśvadhāyasas tena māñjantu varcasā ||

3.18.3

yat te varco jātavedo bṛhad bhavaty āhute | tena mām adya varcasā agne varcasvinaṃ kṛdhi ||

3.18.4

yena hastī varcasā saṃbabhūva yena rājā manuṣyeṣv antaḥ | yena devā jyotiṣā dyām udāyan tena māgne varcasā saṃ sṛjeha ||

3.18.5

yāvad varcaḥ sūryasya- -asurasya ca hastinaḥ | tāvan me aśvinā varcaḥ kṛṇutaṃ puṣkarasrajā ||

3.18.6

yāvac catasraḥ pradiśaś cakṣur yāvat samaśnute | tāvat sam aitv indriyaṃ mayi tad dhastivarcasam ||

3.19.1

saṃśitaṃ ma idaṃ brahma saṃśitaṃ vīryaṃ mama | saṃśitaṃ kṣatraṃ me jiṣṇu yeṣām asmi purohitaḥ ||

3.19.2

sam aham eṣāṃ rāṣṭraṃ śyāmi sam ojo vīryaṃ balam | vṛścāmi śatrūṇāṃ bāhū saṃ śyāmi svān aham ||

3.19.3

tekṣṇīyāṃsaḥ parśor agnes tīkṣṇatarā uta | indrasya vajrāt tekṣṇiyāṃso yeṣām asmi purohitaḥ ||

3.19.4

adhas padyantām adhare bhavantu ye na indraṃ maghavānaṃ pṛtanyān | kṣaṇāmi brahmaṇāmitrān un nayāmi svān aham ||

3.19.5

eṣām aham āyudhā saṃ śyāmy eṣāṃ rāṣṭraṃ suvīraṃ vardhayāmi | eṣāṃ kṣatram ajaram astu jiṣṇu- -ugram eṣāṃ cittaṃ viśve vantu devāḥ ||

3.19.6

abhi preta jayata prasūtāḥ saṃ vaḥ śyāmi nara āyudhāni | tīkṣṇeṣavo baladhanvano hata- -ugrāyudhā abalān ugrabāhavaḥ ||

3.20.1

ihaiva dhruvāṃ ni minomi śālāṃ kṣeme tiṣṭhāti ghṛtam ukṣamāṇā | tāṃ tvā śāle sarvavīrāḥ suvīrā ariṣṭavīrā abhi saṃ carema ||

3.20.2

ihaiva dhruvā prati tiṣṭha śāle aśvāvatī gomatī sūnṛtāvatī | ūrjasvatī ghṛtavatī payasvatī uc chrayasva mahate saubhagāya ||

3.20.3

dharuṇy asi śāle bṛhacchandāḥ pūtidhānyā | ā tvā vatso mīmayad ā kumāra ā dhenavaḥ sāyam ā syandamānāḥ ||

3.20.4

imāṃ śālāṃ savitā vāyur agnis tvaṣṭā hotā ni minotu prajānan | ukṣantūdhnā maruto ghṛtena bhago no rājā ni kṛṣiṃ tanotu ||

3.20.5

mānasya patnī śaraṇā syonā devī devebhir nimitāsy agre | tṛṇaṃ vasānā sumanā asas tvaṃ rayiṃ no dhehi subhage suvīram ||

3.20.6

ā tvā kumāras taruṇa ā vatso jagatā saha | ā tvā pariśrutaḥ kumbha ā dadhnaḥ kalaśy ayat ||

3.21.1

imam indra vardhaya kṣatriyaṃ ma imaṃ viśām ekavṛṣaṃ kṛṇu tvam | nir amitrān akṣṇuhy asya sarvāṃs tān randhayāsmā ahamuttareṣu ||

3.21.2

ayam astu dhanapatir dhanānām ayaṃ viśāṃ viśpatir astu rājā | asminn indra mahi varcāṃsi dhehy avarcasaṃ kṛṇuhi śatrum asya ||

3.21.3

emaṃ bhaja grāme aśveṣu goṣu niṣṭaṃ bhaja yo 'mitro asya | varṣmat kṣatrāṇām ayam astu rājā- -indra śatrūṃ randhaya sarvam asmai ||

3.21.4

asmai dyāvāpṛthivī bhūri vāmaṃ saṃ duhātāṃ gharmadughe iva dhenavam | ayaṃ rājā priya indrasya bhūyāt priyo gavām oṣadhīnām utāpām ||

3.21.5

yunajmi ta uttarāvantam indraṃ yena jayanti na parājayante | yas tvā karad ekavṛṣaṃ janānām uta rājann uttamaṃ mānavānām ||

3.21.6

uttaras tvam adhare santv anye ye ke ca rājan pratiśatravas te | ekavṛṣa indrasakhā jigīvāṃ chatrūyatām abhi tiṣṭhā mahāṃsi ||

3.22.1

viṣāṇāsyāṅgirasī devajāḥ praticakṣaṇī | divas pṛthivyāḥ saṃbhūtā sahasrākṣīhaidhi naḥ ||

3.22.2

sahasrākṣī yā tu gṛbhā- -ati paśyāsy oṣadhe | sadānvāghnī rakṣoghnī bhaveha praticakṣaṇī ||

3.22.3

ye haranty āsuteyaṃ payasphātiṃ cauṣadhe | tāṃs tvaṃ sahasracakṣo gṛbhāya kṛtavīrye ||

3.22.4

ya āturaṃ randhayante 'rṣmantaṃ ca vihṛtam | tāṃs tvaṃ sahasracakṣo gṛbhāya kṛtavīrye ||

3.22.5

yathāśvā caturakṣo rātriṃ naktātipaśyati | evā sahasracakṣo tvaṃ prati paśyāsy āyataḥ ||

3.22.6

gobhir aśvair vasubhir apakrītāsy oṣadhe | śyāvasyāśvasya cakṣuṣā prati paśya kimīdinaḥ ||

3.23.1

saṃ sacadhvaṃ saṃ pibadhvam annaṃ vo madhumat saha | vrataṃ vaḥ sarvaṃ sadhryak samānaṃ ceto astu vaḥ ||

3.23.2

saṃ jānīdhvam indraś cettā vo 'stv ayaṃ vo 'gnir ni haraḥ śamayāti | yad vairahatyam uta bhīmam āsīd viśve devā apa tat plāvayantu ||

3.23.3

śaṃ vaḥ syāstu bṛhaspatiḥ śaṃ dyāvāpṛthivī ubhe | śam antarikṣam uta vo marutvān śaṃ vaḥ syāstv aditir devaputrā ||

3.23.4

kalpetāṃ dyāvāpṛthivī kalpantām āpa oṣadhīḥ | kalpantām agnayaḥ sarve 'smai śraiṣṭhāya savratāḥ ||

3.23.5

saṃ vaḥ sṛjāmi hṛdayaṃ saṃsṛṣṭaṃ mano astu vaḥ | saṃsṛṣṭā vas tanvaḥ santu saṃsṛṣṭaḥ prāṇo astu vaḥ ||

3.23.6

saṃ vaḥ paśūnāṃ hṛdayaṃ sṛjāmi saṃ putrāṇām uta yā duhitaro vaḥ | saṃ vo jāyānāṃ manasā manāṃsi saṃ patīnām uta cakṣuḥ sṛjāmi ||

3.24.1

prācī dig agnir adhipatir asito rakṣitādityā iṣavaḥ | tebhyo namo 'dhipatibhyo namo rakṣitṛbhyo nama iṣubhyo namo vo 'stu | yo 'smān dveṣṭi yaṃ vayaṃ dviṣmas taṃ vo jambhe dadhmas tam u prāṇo jahātu ||

3.24.2

dakṣiṇā dig indro 'dhipatis tiraścirājī rakṣitā vasava iṣavaḥ | tebhyo namo 'dhipatibhyo namo rakṣitṛbhyo nama iṣubhyo namo vo 'stu | yo 'smān dveṣṭi yaṃ vayaṃ dviṣmas taṃ vo jambhe dadhmas tam u prāṇo jahātu ||

3.24.3

pratīcī dig varuṇo 'dhipatiḥ pṛdākū rakṣitā mitra iṣavaḥ | tebhyo namo 'dhipatibhyo namo rakṣitṛbhyo nama iṣubhyo namo vo 'stu | yo 'smān dveṣṭi yaṃ vayaṃ dviṣmas taṃ vo jambhe dadhmas tam u prāṇo jahātu ||

3.24.4

udīcī dik somo 'dhipatiḥ svajo rakṣitā vāta iṣavaḥ | tebhyo namo 'dhipatibhyo namo rakṣitṛbhyo nama iṣubhyo namo vo 'stu | yo 'smān dveṣṭi yaṃ vayaṃ dviṣmas taṃ vo jambhe dadhmas tam u prāṇo jahātu ||

3.24.5

dhruvā dig viṣṇur adhipatiḥ kalmāṣagrīvo rakṣitā vīrudha iṣavaḥ | tebhyo namo 'dhipatibhyo namo rakṣitṛbhyo nama iṣubhyo namo vo 'stu | yo 'smān dveṣṭi yaṃ vayaṃ dviṣmas taṃ vo jambhe dadhmas tam u prāṇo jahātu ||

3.24.6

ūrdhvā dig bṛhaspatir adhipatiś citro rakṣitāśanir iṣavaḥ | tebhyo namo 'dhipatibhyo namo rakṣitṛbhyo nama iṣubhyo namo vo 'stu | yo 'smān dveṣṭi yaṃ vayaṃ dviṣmas taṃ vo jambhe dadhmas tam u prāṇo jahātu ||

3.25.1

anaḍvān dādhāra pṛthivīṃ dyām utāmūm anaḍvān dādhārorv antarikṣam | anaḍvān dādhāra pradiśaḥ ṣaḍ urvīr anaḍvān idaṃ viśvaṃ bhuvanam ā viveśa ||

3.25.2

anaḍvān duhe sukṛtasya loka ainaṃ pyāyeta pavamānaḥ purastāt | parjanyo dhārā maruta ūdho asya yajñaḥ payo dakṣiṇā doho asya ||

3.25.3

anaḍvān indraḥ sa paśubhyo vi caṣṭe trayāṃ chakropa mimīte adhvanaḥ | sa bhūtaṃ bhaviṣyad bhuvanaṃ duhānaḥ sarvā devānāṃ bibhrac carati vratāni ||

3.25.4

yasya neśe yajñapatir na yajño nāsya dāteśe na pratigrahītā | yo viśvabhṛd viśvakarmā gharmaṃ no brūta yatamaś catuṣpāt ||

3.25.5

indra eṣa manuṣyeṣv antar gharmas taptaś carati śośucānaḥ | suprajā asat sa udāre na sarṣad yo nāśnīyād anaḍuho vijānan ||

3.25.6

yena devāḥ svar āruruhur hitvā śarīram amṛtasya dhāma | tena geṣma sukṛtasya lokaṃ gharmasya vratena yaśasā tapasyayā ||

3.25.7

dvādaśaitā rātrīr vratyā āhuḥ prajāpateḥ | tatrāpi brahmaṇo vrataṃ tatrāpy anaḍuho balam ||

3.25.8

yās ta āhuḥ prajāpater vratyā rātrīr dvādaśa | tatrāpi brahma yo veda tad vā anaḍuho balam ||

3.25.9

duhe vā anaḍvān sāyaṃ duhe prātar duhe divā | dohā ye asya saṃyanti tān vidmānupadasvataḥ ||

3.25.10

yo vedānaḍuho dohān saptān upadasvataḥ | prajāṃ ca lokaṃ cāpnoti tathā sapta rṣayo viduḥ ||

3.25.11

madhyam etad anaḍuho yatraiṣa vaha āhitaḥ | etāvad asya prācīnaṃ yāvān pratyaṅ samāhitaḥ ||

3.25.12

padbhiḥ sedim avakrāmann irāṃ jaṅghābhir utkhidan | śrameṇānaḍvān kīlālaṃ kīnāśaś cābhi gacchataḥ ||

3.25.13

indra eṣa manuṣyeṣv anaḍvān ity ucyate | śaphāso asya mā riṣan sarvā yāś cāsya kuṣṭhikāḥ ||

3.25.14

indro balenāsi parameṣṭhī vratena yena gaus tena vaiśvadevaḥ | yo asmān dveṣṭi yaṃ vayaṃ dviṣmas tasya prāṇān saṃ bṛhat tasya prāṇān vi vṛha ||

3.26.1

gṛhān aimi manasā modamāna ūrjaṃ bibhrad vasumaniḥ sumedhāḥ | aghoreṇa cakṣuṣā mitriyeṇa gṛhāṇāṃ paśyan paya ut tarāmi ||

3.26.2

ime gṛhā mayobhuva ūrjasvantaḥ payasvantaḥ | pūrṇā vāmasya tiṣṭhantas te no jānantu jānataḥ ||

3.26.3

sūnṛtāvantaḥ subhagā irāvanto hasāmudāḥ | akṣudhyā atṛṣyāso gṛhā māsmad bibhītana ||

3.26.4

yeṣām adhyeti pravasan yeṣu saumanaso bahuḥ | gṛhān upa hvayāmahe te no jānantv āyataḥ ||

3.26.5

upahūtā iva gāva upahūtā ajāvayaḥ | atho annasya kīlāla upahūto gṛheṣu naḥ ||

3.26.6

upahūtā bhūridhanāḥ sakhāyaḥ svādusaṃmudaḥ | ariṣṭāḥ sarvapūruṣā gṛhā naḥ santu sarvadā ||

3.27.1

hantāyam astv apratighātyaḥ sāsahvām̐ indraḥ pṛtanā abhiṣṭhiḥ | prajāpatir adadhād ojo asmai bṛhad dhavir haviṣā vardhanena ||

3.27.2

prajāpate haviṣā vardhanena hantāram indram akṛṇor aghātyam | tasmai viśo devakṛtā namanta sa hi hantā sa hi havyo babhūva ||

3.27.3

prajāpate abhi no neṣa vasya urvīṃ gavyūtim abhimātiṣāhaḥ | vardhayann indraṃ bṛhate raṇāya devaṃ devena haviṣā vardhanena ||

3.27.4

yathā viśvāḥ pṛtanāḥ saṃjayāsi yathā śatrūn sahamānaḥ sahāsai | yathāsaḥ samrāṭ susamrāḍ evā tvendro 'prativadhaṃ kṛṇotu ||

3.27.5

ayaṃ vīro 'prati hantu śatrūn viśve devā apa sadas karātha | māsya prajāṃ rīriṣan mota vīrān imam indro 'prativadhaṃ kṛṇotu ||

3.27.6

jahi śatrūn prati randhayasva- -agniṣ ṭe gopā adhipā vasiṣṭhaḥ | śarma te rājā varuṇo ni yacchād evā tvendro 'prativadhaṃ kṛṇotu ||

3.28.1

saṃ spṛśethāṃ tanūbhyāṃ saṃ mukhābhyāṃ sam ātmanā | saṃ vāṃ brahmaṇaspatiḥ somaḥ saṃ sparśayāti vām ||

3.28.2

abhy asya nāma vācā dadhāmi nāha mokṣyate | mamed ahainaṃ kāme labhai kṛṣṇam ivākhare ||

3.28.3

yaḥ premā preṇyām āsīd dattaḥ somena babhruṇā | tasmād adhi śrutaṃ mama mayy asya mana āhitam ||

3.28.4

yaṃ pumāṃsaṃ kāmayase yasmin vā bhagam icchase | hṛcchokam asminn ā dadhmo yathā śuṣyāti tvām anu ||

3.28.5

yathāsya hṛdayaṃ śuṣyād apicchinneva śaṃguṇī | cakṣur ākāśyaṃ bhīmaṃ māṃpaśyam abhirorudam ||

3.28.6

priyaṃkaraṇam uttamaṃ madhughena tad ābhṛtam | tvaṃ hāsi varcasyo 'tho hāsi sumaṅgalaḥ | atho sarvāsāṃ vīrudhāṃ priyaṅkaraṇam ucyase ||

3.29.1

pratīcī somam asy oṣadhe pratīcy uta sūryam | pratīcī viśvān devāṃs tathā tvācchā vadāmasi ||

3.29.2

imāṃ khanāmy oṣadhiṃ nitatnīm anutantamām | āyataḥ pratinandanīṃ parāyato nivartanīm ||

3.29.3

amuṣyāhaṃ parāyata āyato mano agrabham | agrabhaṃ hastyaṃ mano 'tho hṛdayyaṃ manaḥ ||

3.29.4

mayi te mana āhitaṃ mayi cittaṃ mayi vratam | mamed api kratāv aso mama citte sacāvahai ||

3.29.5

ahaṃ vadāni mā tvaṃ sabhāyāṃ gha tvaṃ vada | mamed asas tvaṃ kevalo nānyāsāṃ kīrtayāś cana ||

3.29.6

yadi vāsi tiro janaṃ yadi vā nadyas tiraḥ | iyaṃ tvā mahyam oṣadhir baddhveva ny ānayāt ||

3.30.2

saṃ rājāno 'guḥ sam ṛṇāny aguḥ saṃ kuṣṭhā aguḥ saṃ kulā aguḥ | sam asmāsu suṣvapnyaṃ nir dviṣate duṣvapnyaṃ suvāmaḥ ||

3.30.3

devānāṃ patnīnāṃ garbha yamasya karaṇaḥ | yo bhadraḥ svapnaḥ sa mama yaḥ pāpas taṃ dviṣate pra hiṇmaḥ ||

3.30.4

tṛṣṇāmā nāmāsi kṛṣṇaśakuner mukhaṃ nirṛter mukham | taṃ tvā svapna tathā vidma ||

3.30.5

sa tvaṃ svapnāśva ivākāyam aśva iva nīnāham | anāsmākaṃ devapīyuṃ piyāruṃ vapsaḥ ||

3.30.6

yad asmāsu duṣvapnyaṃ yad goṣu yac ca no gṛhe | anāsmākas tad devapīyuḥ piyāruṃ niṣkam iva prati muñcatām ||

3.30.7

navāratnīn avamāya- -asmākaṃ tanvas pari | duṣvapnyaṃ sarvaṃ durbhūtaṃ dviṣate nir diśāmasi ||

3.31.1

devā marutaḥ pṛśnimātaro 'po dattodadhiṃ bhinta | divas pṛthivyā uror antarikṣād asmai kṣatrāyānena brahmaṇābhyaḥ prajābhya ābhya oṣadhībhyaḥ svāhā ||

3.31.2

devā agna indra sūrya- -apaḥ (…) ||

3.31.3

devāḥ sayujo mitra varuṇāryamann apaḥ (…) ||

3.31.4

devāḥ pitaro 'vamā āyavaḥ krāvya- -apaḥ (…) ||

3.31.5

devāpsuṣado 'pāṃ napāt tanūnapān narāśaṃsa- -apo dattodadhiṃ bhinta | (…) ||

3.31.6

deva bṛhaspate 'po dhehy udadhiṃ bhindhi | (…) ||

3.31.7

deva prajāpate 'po dhehy udadhiṃ bhindhi | (…) ||

3.31.8

deva parameṣṭhinn apo dhehy udadhiṃ bhindhi | divas pṛthivyā uror antarikṣād asmai kṣatrāyānena brahmaṇābhyaḥ prajābhya ābhya oṣadhībhyaḥ svāhā ||

3.32.1

prajāpater jāyamānāḥ prajā jātāś ca yā imāḥ | tā asmai prati vedaya cikitvām̐ anu manyatām ||

3.32.2

yeṣām īśe paśupatiḥ paśūnāṃ catuṣpadām uta vā ye dvipādaḥ | niṣkrītās te yajñiyā yanti lokaṃ rāyaspoṣāya yajamānaṃ sacantām ||

3.32.3

pramuñcanto bhuvanasya gopā gātuṃ devā yajamānāya dhatta | upākṛtaṃ śaśamānaṃ yad asthāt priyaṃ devānām apy etu pāthaḥ ||

3.32.4

ye badhyamānam anu dīdhyānā anvaikṣanta manasā cakṣuṣā ca | agniṣ ṭān agre pra mumukta devaḥ prajāpatiḥ prajayā saṃvidānaḥ ||

3.32.5

yeṣāṃ prāṇā anvabadhnanta badvaṃ gavāṃ paśūnām uta pūruṣāṇām | indras tān agre pra mumukta devaḥ prajāpatiḥ prajayā saṃvidānaḥ ||

3.32.6

ya āraṇyāḥ paśavo viśvarūpā ye viśvarūpā utaikarūpāḥ | vāyuṣ ṭān agre pra mumukta devaḥ prajāpatiḥ prajayā saṃvidānaḥ ||

3.32.7

prajānantaḥ prati gṛhṇantu devāḥ prāṇam aṅgebhyas paryācarantam | dyāṃ gaccha prati tiṣṭhā śarīraiḥ svargaṃ yāhi pathibhiḥ śivebhiḥ ||

3.33.1

samās tvāgna ṛtavo vardhayantu saṃvatsara ṛṣayo yāni satyā | saṃ dyumnena dīdihi rocanena viśvā ā bhāhi pradiśaś catasraḥ ||

3.33.2

saṃ cedhyasvāgne pra ca bodhayainam uc ca tiṣṭha mahate saubhagāya | mā te riṣann upasattāro atra brāhmaṇās te yaśasaḥ santu mānye ||

3.33.3

tvām agne vṛṇate brāhmaṇā ime śivo agne prataraṇo na edhi | sapatnahāgne abhimātijid bhava sve kṣaye dīdihy aprayucchan ||

3.33.4

ihaivāgne adhi dhārayā rayiṃ mā tvā dabhan pūrvacittā nikāriṇaḥ | kṣatram agne suyamam astu tubhyam upasattā vardhatāṃ te aniṣṭṛtaḥ ||

3.33.5

kṣatreṇāgne svena saṃ rabhasva mitreṇāgne mitradheyaṃ yatasva | sajātānāṃ madhyameṣṭheyam asyā rājñām agne vihavyo dīdihīha ||

3.33.6

ati niho 'ti nirṛtīr aty arātīr ati dviṣaḥ | viśvā hy agne duritā tara tvam athāsmabhyaṃ sahavīraṃ rayiṃ dāḥ ||

3.33.7

anādhṛṣyo jātavedā aniṣṭṛto virāḍ agne kṣatrabhir dīdihīha | vyamīvāḥ pramuñcan mānuṣebhyaḥ śivebhir adya pari pāhi no gayaiḥ ||

3.34.1

ayaṃ te yonir ṛtviyo yato jāto arocathāḥ | taṃ jānann agna ā roha- -athā no vardhayā rayim ||

3.34.2

pradātāraṃ havāmahe agnim ugram ūtaye | śucir yo vṛtrahantamaḥ ||

3.34.3

agne acchā vadeha naḥ pratyaṅ naḥ sumanā bhava | pra ṇo yaccha viśāṃ pate dhanadā asi nas tvam ||

3.34.4

pra ṇo yacchatv aryamā pra bhagaḥ pra bṛhaspatiḥ | pra pūṣā prota sūnṛtā rayiṃ devī dadhātu naḥ ||

3.34.5

aryamaṇaṃ bṛhaspatim indraṃ dānāya codaya | vātaṃ viṣṇuṃ sarasvatīṃ savitāraṃ ca vājinam ||

3.34.6

somaṃ rājānam avase 'gniṃ gīrbhir havāmahe | ādityaṃ viṣṇuṃ sūryaṃ brahmāṇaṃ ca bṛhaspatim ||

3.34.7

indravāyū bṛhaspatiḥ suhaveha havāmahe | yathā naḥ sarvam ij jagat saṅgatyāṃ sumanā asat ||

3.34.8

tvaṃ no agne agnibhir brahma yajñaṃ ca vardhaya | tvaṃ no deva dātave rayiṃ dānāya codaya ||

3.34.9

vājasyedaṃ prasave saṃbabhūva memā ca viśvā bhuvanāny antaḥ | utāditsantaṃ dāpayati prajānan rayiṃ ca naḥ sarvavīraṃ ni yacchāt ||

3.34.10

duhrāṃ me pañca pradiśo duhrām urvīr yathābalam | prāpeyaṃ sarvām ākūtiṃ manasā hṛdayena ca ||

3.34.11

gosaniṃ vācam udeyaṃ varcasā mābhy ūrṇuhi | ā rundhāṃ sarvato vāyus tvaṣṭā poṣāya dhriyatām ||

3.35.1

yata indra bhayāmahe tato no abhayaṃ kṛdhi | maghavañ chagdhi tava tvaṃ na ūtibhir vi dviṣo vi mṛdho jahi ||

3.35.2

indraṃ vayam anūrādhaṃ havāmahe 'nu rādhyāsma dvipadā catuṣpadā | mā naḥ senā araruṣīr upa gur viṣūcīr indra druho vi nāśaya ||

3.35.3

indras trātota vṛtrahā paraspā no vareṇyaḥ | sa rakṣitā caramataḥ sa madhyataḥ sa paścāt sa purastān no astu ||

3.35.4

uruṃ no lokam anu neṣi vidvān svaryaj jyotir abhayaṃ svasti | ugrā ta indra sthavirasya bāhū upa kṣiyema śaraṇā bṛhantā ||

3.35.5

abhayaṃ naḥ karaty antarikṣam abhayaṃ dyāvāpṛthivī ubhe | abhayaṃ paścād abhayaṃ purastād uttarād adharād abhayaṃ no astu ||

3.35.6

abhayaṃ mitrād abhayam amitrād abhayaṃ jñātād abhayaṃ puro naḥ | abhayaṃ naktam abhayaṃ divā naḥ sarvā āśā mama mitraṃ bhavantu ||

3.36.1

jaya prehi māpa krāmaḥ śatrūṇāṃ veda ā khida | indraḥ sapatnahā bhīmaḥ sañjayas te sam ānṛdhat ||

3.36.2

tvaṃ jayāsi na parā jayāsā arbheṣv ājau maghavan mahatsu ca | ugraṃ cit tvām avase saṃ śiśīmahe sa tvaṃ na indra havaneṣu mṛḍa ||

3.36.3

gojitā bāhū asamakratū yudhi karmankarmañ chatamūtī svajaṅkarā | akalpa indro 'pratimānam ojaḥ sa tvaṃ na indra havaneṣu mṛḍa ||

3.36.4

vedāham aindraṃ priyam asya śevadhiṃ yad asya nāma guhyaṃ samīke | sa ij jayāti maghavā mamāsaty asmākaṃ yudhmo vihave havaṃ gamat ||

3.36.5

vayaṃ jayema tvāyujā bhṛto asmākam aṃśam ud avā bharebhare | asmabhyam indra varivaḥ sugaṃ kṛdhi pra śatrūṇāṃ maghavan vṛṣṇiyā ruja ||

3.36.6

tvāṃ deveṣu prathamaṃ havāmahe tvaṃ babhūvitha pṛtanāsu sāsahiḥ | semaṃ naḥ kārum upamanyum udbhidam indra karāsi prasave rathaṃ puraḥ ||

3.37.1

smara smaro 'si devair datto 'si smara | amuṣya mana ā smara yathāhaṃ kāmaye tathā ||

3.37.2

śocayāsya hṛdayaṃ kāma gaccha- -aṅgajvaro dahatu śocatu tmanā | saṅkalpā asya samarantādhībhir iyam evāsya digamahanyanyāḥ ||

3.37.3

nirānandāḥ pramucchado manomuho nayuvo naṣṭakṛtvā araṇyavaḥ | āveśinīḥ pradrupo ropayiṣṇur eta āstādhyaḥ pra hiṇomi brahmaṇā ||

3.37.4

hṛtkartanī ṛtudā grāmānnāśanīḥ svapnacchida ughnanīghnā manomuhaḥ | āveśinīḥ pradrupo ropayiṣṇur eta āstādhyaḥ pra hiṇomi brahmaṇā ||

3.37.5

indrāgnī mitrāvaruṇā te adya- -ubhe ca dyāvāpṛthivī mātariśvā | aśvinā devaḥ savitā bhagaś ca manas ta u ghnantu na ramāsā atra ||

3.37.6

trayastriṃśat tvā uta ghnantu devā ādhyaś cittam upa te bharantām | bharadvājasya matayas ta īśatāṃ chinneva naur bandhanāt pra plavasva ||

3.37.7

etāḥ patanty ādhyo vārṣikīr iva vidyutaḥ | tāsāṃ pratigraho bhava sāyaṃ goṣṭhe gavām iva ||

3.37.8

ni śīrṣato ni pātita ādhyo veśayāmi te | tās tvā samuttudantīr bodhayantīr upāsatām ||

3.37.9

etās ta ādhyaḥ pra hiṇomi brahmaṇā tṛprā aśrīpurogavāḥ | tās tvā tṛṇam iva śoṣayān atho tvā rodayān bahu ||

3.38.1

ajo hy agner ajaniṣṭa śokāt so 'paśyaj janitāram agre | tena devā devatām agra āyan tena rohān arohann upa medhīyāṃsaḥ ||

3.38.2

kramadhvam agnibhir nākam ukhyāṃ hasteṣu bibhrataḥ | divas pṛṣṭhaṃ svar gatvā miśrā devebhir ādhvam ||

3.38.3

agne prehi prathamo devayatāṃ cakṣur devānām uta martyānām | iyakṣamāṇā bhṛgubhiḥ sajoṣasaḥ svar yantu yajamānāḥ svasti ||

3.38.4

svar yanto nāpekṣanta ā dyāṃ rohantu rādhasaḥ | yajñaṃ ye viśvatodhāraṃ suvidvāṃso vi tenire ||

3.38.5

odanam anajmi śavasā ghṛtena divyaṃ samudraṃ payasaṃ bṛhantam | tena geṣma sukṛtasya lokaṃ saroruhāṇā adhi nākam uttamam ||

3.38.6

yau te pakṣāv ajarau patatriṇau yābhyāṃ rakṣāṃsy apahaṃsy odana | tābhyāṃ patyāsma sukṛtasya lokaṃ yatra rṣayaḥ prathamajāḥ purāṇāḥ ||

3.38.7

yatas tiṣṭho divas pṛṣṭhe vyomann adhy odana | anvāyan satyadharmāṇo brāhmaṇā rādhasā saha ||

3.38.8

pṛṣṭhāt pṛthivyā aham antarikṣam āruham antarikṣād divam āruham | divo nākasya pṛṣṭhāt svar jyotir agām aham ||

3.38.9

ajo 'sy aja svargo 'si tvayā lokam aṅgirasaḥ pra jānan | taṃ lokam anu pra jñeṣma ||

3.38.10

yenā sahasraṃ vahasi yena vā sarvavedasam | tenemaṃ yajñaṃ no vaha svar deveṣu gantave ||

3.38.11

ajaṃ ca pacata pañca caudanān | ajaṃ pañcaudanaṃ paktvā devā lokān sam ānaśuḥ ||

3.39.1

yā te prajāpihitā purābhūd dhruveṇāśvināpa taṃ bharāmi | agniṣ ṭe tāmādyamaḥ punar dād vaiśvānaraḥ paramasmād vyomnaḥ ||

3.39.2

tvaṃ patiḥ śivo 'gne dvitīyo *'syai prajāṃ jaradaṣṭiṃ sṛjasva | muñcaināṃ grāhyā nirṛtir yad bandha- -agne prajāṃ prajākāmāyai dhehi ||

3.39.3

tvām agne vṛṣabhaṃ vāśiteyam ācyā jānu putrakāmā saparyati | tām ā roha sumanasyamānaḥ prajāpateḥ prajayā saṃ sṛjainām ||

3.39.4

tubhyaṃ nārī putrakāmeyam agne śuddhaṃ pūtaṃ ghṛtam ā juhoti | tām adhi skanda vīrayasva retodhā ugraḥ prajayā saṃ sṛjainam ||

3.39.5

parvatād divo yoner gātrādgātrāt samāśṛtam | reto devasyadevasya tsarau parṇam ivādhām ||

3.39.6

indrasya jātasya pra papāta nābhis tām eko devaḥ prati jagrāha kāmī | tvayā vayaṃ brāhmaṇāḥ somapāḥ sūpayāma uta yā na sūte ||

3.40.1

tejanāt tyajanaṃ jātaṃ tejanaṃ jāyate śarāt | na yeṣati na śocati yas tvā bibharti tejana ||

3.40.2

parutnam asi tejana parutnaṃ te prabhañjanam | parutno astu sa kāmo yenāmūṃ kāmayāmahe ||

3.40.3

yāvad oṣaḥ śaro astvo janebhyaḥ kṛṇavad bhayam | tāvad oṣas tvaṃ tejana tyajanaṃ bhavatād iha ||

3.40.4

tyajanaṃ ma āpo dadhan tyajanaṃ maruto dadhan | tyajanaṃ me viśve devās tyajanaṃ pitaro dadhan ||

3.40.5

tenāham anyeṣāṃ striyo atyākṣaṃ vidviṣaḥ purā | purā dviṣo atyākṣaṃ purā madhyandinād uta | purā sāyatvād atyākṣaṃ tejane hi mahad balam ||

3.40.6

asthād dyaur asthāt pṛthivy asthād viśvam idaṃ jagat | asthād avahṛdevāt tiṣṭhāt kāmo ayaṃ tava ||