Kāṇḍa 4

4.1.1

hiraṇyagarbhaḥ sam avartatāgre bhūtasya jātaḥ patir eka āsīt | sa dādhāra pṛthivīṃ dyām utāmuṃ tasmai devāya haviṣā vidhema ||

4.1.2

ya ojodā baladā yaś ca viśva upāsate praśiṣaṃ yasya devāḥ | yasya chāyāmṛtaṃ yasya mṛtyus tasmai devāya haviṣā vidhema ||

4.1.3

yaḥ prāṇato nimiṣato vidhartā patir viśvasya jagato babhūva | ya īśe 'sya dvipado yaś catuṣpadas tasmai devāya haviṣā vidhema ||

4.1.4

yena dyaur ugrā pṛthivī ca dṛḍhā yena sva stabhitaṃ yena nākaḥ | yo antarikṣaṃ vimame varīyas tasmai devāya haviṣā vidhema ||

4.1.5

ya ime dyāvāpṛthivī tastabhāna- -adhārayad avasā rejamāne | yasminn adhi vitata eti sūryas tasmai devāya haviṣā vidhema ||

4.1.6

yasya viśve himavanto mahitvā samudraṃ yasya rasayā sahāhuḥ | diśo yasya pradiśaḥ pañca devīs tasmai devāya haviṣā vidhema ||

4.1.7

āpo ha yasya viśvam āyur dadhānā garbhaṃ janayanta mātaraḥ | tatra devānām adhi deva āsta ekasthūṇe vimite dṛḍha ugre ||

4.1.8

āpo garbhaṃ janayantīr vatsam agre sam airayan | tasyota jāyamānasya- -ulba āsīd dhiraṇyayaḥ ||

4.1.9

hiraṇya ulba āsīd yo 'gre vatso ajāyata | taṃ yonyor vidravantyoḥ pary apaśyad ditir mahī ||

4.2.1

bhūto bhūteṣu paya ā dadhāti sa bhūtānām adhipatir babhūva | sa te mṛtyuś carati rājasūyaṃ sa rājā rājyam anu manyatām idam ||

4.2.2

abhi prehi vīrayasva- -ugraś cettā sapatnahā | ā tiṣṭha mitravardhana tubhyaṃ devā adhi bruvan ||

4.2.3

ātiṣṭhantaṃ pari viśve abhūṣañ chriyaṃ vasānaś carati svarociḥ | mahat tad vṛṣṇo asurasya nāma- -ā viśvarūpo amṛtāni tasthau ||

4.2.4

enā vyāghraṃ pariṣasvajānāḥ siṃhaṃ hinvanti mahate saubhagāya | mahiṣaṃ na subhuvas tasthivāṃsaṃ marmṛjyante dvīpinam apsv antaḥ ||

4.2.5

vyāghro adhi vaiyāghre vi kramasva diśo mahīḥ | viśas tvā sarvā ā yantv āpo divyāḥ payasvatīḥ ||

4.2.6

yā āpo divyāḥ payasā madanti yā antarikṣa uta pārthivā yāḥ | tāsāṃ tvā sarvāsām apām abhi ṣiñcāmi varcasā ||

4.2.7

abhi tvā varcasāsicaṃ divyena payasā saha | yathāso mitravardhanas tathā tvā savitā karat ||

4.3.1

yat te candraṃ kaśyapa rocanāvad yat saṃhitaṃ puṣkalaṃ citrabhānu | yasmin sūryā ārpitāḥ sapta sākaṃ tasmin rājānam adhi vi śrayemam ||

4.3.2

yebhiḥ śilpaiḥ paprathānām adṛṃho yebhir divam abhyapiṃśaḥ pravidvān | yebhir vācaṃ puṣkalair avyayas tena māgne varcasā saṃ sṛjeha ||

4.3.3

yebhiḥ sūrya ātapati pra ketubhir yebhir agnir dadṛśe citrabhānuḥ | yebhir āpaś candravarṇā ajinvan tena māgne varcasā saṃ sṛjeha ||

4.3.4

āyaṃ bhātu pradiśaḥ pañca devīr indra iva jyeṣṭho bhavatu prajānām | asmin dhehi puṣkalaṃ citrabhānv ayaṃ pṛṇātu rajasor upastham ||

4.3.5

anu tvendro 'vatv anu bṛhaspatir anu tvā somo anv agnir āvīt | anu tvā viśve avantu devāḥ sapta rājāno ya udābhiṣiktāḥ ||

4.3.6

anu tvā mitrāvaruṇehāvatām anu dyāvāpṛthivī oṣadhībhiḥ | sūryo 'hobhir anu tvāvatu candramā nakṣatrair anu tvedam āvīt ||

4.3.7

dyauś ca tvā pṛthivī ca pracetasau śukro bṛhan dakṣiṇā tvā pipartu | anu svadhā cikitāṃ somo agniḥ pūṣā tvāvatu savitā savena ||

4.4.1

stuvānam agna ā naya yātudhānaṃ kimīdinam | tvaṃ hi devāntito hantā dasyor babhūvitha ||

4.4.2

ājyasya parameṣṭhiñ jātavedas tanūvaśin | agne taulasya prāśāna yātudhānān vi lāpaya ||

4.4.3

vi lapantu yātudhānā atriṇo ye kimīdinaḥ | athedam agne no havir indraś ca prati haryatam ||

4.4.4

agniḥ purastād ā yacchatu prendro nudatu bāhumān | bravītu sarvo yātumān ayam asmīty etya ||

4.4.5

paśyāmi te vīryā jātavedaḥ pra ṇo brūhi yātudhānān nṛcakṣaḥ | tvayā sarve paritaptāḥ purastād ā yantu prabruvāṇā upedam ||

4.4.6

ā rabhasva jātavedo hṛdaḥ kāmāya randhaya | dūto no agna ut tiṣṭha yātudhānān ihā naya ||

4.4.7

tvam agne yātudhānān upabaddhān ihā naya | athaiṣām indro vajreṇa- -api śīrṣāṇi vṛścatu ||

4.4.8

idaṃ havir yātudhānān nadī phenam ivā vahāt | yadīdaṃ strī pumān akar iha sa stuvatāṃ janaḥ ||

4.4.9

yātudhānasya somapa jahi prajāṃ nayasva ca | ni ṣṭuvānasya pātaya param akṣy utāvaram ||

4.4.10

ayaṃ stuvāna āgamat taṃ smota prati haryata | bṛhaspate vaśe kṛthā agnīṣomā vi vidhyatam ||

4.5.1

yāṃ tvā gandharvo akhanad varuṇāya mṛtabhraje | tāṃ tvā vayaṃ khanāmasy oṣadhiṃ śepaharṣaṇīm ||

4.5.2

vṛṣaṇas te khanitāro vṛṣā tvam asy oṣadhe | vṛṣāsi vṛṣṇyāvatī vṛṣaṇe tvā khanāmasi ||

4.5.3

ud uṣā ud u sūrya uc chuṣmā oṣadhīnām | ud ejati prajāpatir vṛṣā śuṣmeṇa vājinā ||

4.5.4

ūrdhvaśrāṇam idaṃ kṛdhi yathā sma te virohato abhitaptam ivānati | tatas te śuṣmavattaram iyaṃ kṛṇotv oṣadhiḥ ||

4.5.5

apāṃ rasa oṣadhīnām atho vanaspatīnām | atho somasya bhrātāsy ārśyam asi vṛṣṇyam ||

4.5.6

aśvasya ṛśyasya bastasya puruṣasya ca | ya ṛṣabhasya vājas tam asmai dhehy oṣadhe ||

4.5.7

saṃ vājā ṛṣabhāṇāṃ saṃ śuṣmā oṣadhīnām | saṃ puṃsām indra vṛṣṇyam asmai dhehi tanūbalam ||

4.5.8

adyāgne adya savitar adya devi sarasvati | adyā me brahmaṇaspate dhanur ivā tānayā pasaḥ ||

4.5.9

ūrdhvās tiṣṭhanti giraya ūrdhvā vātā ud īrate | ūrdhvo 'yaṃ māmako mayūkha ivādhi bhūmyām ||

4.5.10

ut tiṣṭhogra vi dhūnuṣva vi te śvayantu nāḍyaḥ | atandro aśvapā iva nāva glāyo 'dhi muṣkayoḥ ||

4.6.1

hiraṇyaśṛṅgo vṛṣabho yaḥ samudrād udācarat | tenā sahasyenā vayaṃ ni janānt svāpayāmasi ||

4.6.2

na bhūmiṃ vāto 'ti vāti nāti tapati sūryaḥ | janāṃś ca sarvān svāpaya śunaś cendrasakhā caran ||

4.6.3

vahyeśayāḥ proṣṭheśayā nārīr yās talpaśīvarīḥ | striyo yāḥ puṇyagandhās tāḥ sarvāḥ svāpayāmasi ||

4.6.4

ejadejad ajagrabhaṃ cakṣuḥ prāṇam ajagrabham | aṅgāny agrabhaṃ sarvā rātrīṇām atiśarvare ||

4.6.5

ya āste yaś ca carati yaś ca tiṣṭhan vipaśyati | teṣāṃ saṃ dadhmo akṣāṇi yathedaṃ harmyaṃ tathā ||

4.6.6

svaptu mātā svaptu pitā svaptu śvā svaptu viśpatiḥ | svapantu sarve jñātayaḥ sarvaṃ ni ṣvāpayā janam ||

4.6.7

svapna svapnābhikaraṇena sarvaṃ ni ṣvāpayā janam | otsūryam anyān svāpaya- -āvyuṣaṃ caratād aham indra ivāriṣṭo akṣitaḥ ||

4.7.1

akṣībhyāṃ te nāsikābhyāṃ karṇābhyām āsyād uta | yakṣmaṃ śīrṣaṇyaṃ mastiṣkāl lalāṭād vi vṛhāmasi ||

4.7.2

grīvābhyas ta uṣṇihābhyaḥ kīkasābhyo anūkyāt | yakṣmaṃ doṣaṇyam aṃsābhyām urasto vi vṛhāmasi ||

4.7.3

klomnas te hṛdayyābhyo halīkṣṇāt pārśvābhyām | yakṣmaṃ matasnābhyāṃ plīhno yaknas te vi vṛhāmasi ||

4.7.4

āntrebhyas te gudābhyo vaniṣṭhor udarād uta | yakṣmaṃ pāṇyor aṅgulibhyo nakhebhyo vi vṛhāmasi ||

4.7.5

asthibhyas te māṃsebhyaḥ snāvabhyo dhamanibhyaḥ | yakṣmaṃ pṛṣṭibhyo majjabhyo nābhyā vi vṛhāmasi ||

4.7.6

ūrubhyāṃ te aṣṭhīvadbhyāṃ pārṣṇibhyāṃ prapadābhyām | yakṣmaṃ bhasadyaṃ śroṇibhyāṃ bhaṃsaso vi vṛhāmasi ||

4.7.7

aṅgādaṅgāl lomnolomno baddhaṃ parvaṇiparvaṇi | yakṣmaṃ tvacasyaṃ te vayaṃ viṣvañcaṃ vi vṛhāmasi ||

4.7.8

aṅgādāṅgād ahaṃ tava paruṣaḥparuṣas pari | kaśyapasya vivṛheṇa yakṣmaṃ te vi vṛhāmasi ||

4.8.1

agnī rakṣohā tigmas tigmaśṛṅga ṛṣir ārṣeyaḥ kaviḥ kavitamaḥ | apāghāśaṃsaṃ nudatāṃ sahatām arātiṃ pratyak pratiharaṇena- -aghāyate 'ghaṃ prati harāmaḥ ||

4.8.2

indro rakṣohā (…) ||

4.8.3

somo rakṣohā (…) ||

4.8.4

varuṇo rakṣohā (…) ||

4.8.5

vāyū rakṣohā (…) ||

4.8.6

tvaṣṭā rakṣohā (…) ||

4.8.7

dhātā rakṣohā (…) ||

4.8.8

savitā rakṣohā (…) ||

4.8.9

sūryo rakṣohā (…) ||

4.8.10

candramā rakṣohā (…) ||

4.8.11

bṛhaspatī rakṣohā (…) ||

4.8.12

prajāpatī rakṣohā (…) ||

4.8.13

parameṣṭhī rakṣohā tigmas tigmaśṛṅga ṛṣir ārṣeyaḥ kaviḥ kavitamaḥ | apāghāśaṃsaṃ nudatāṃ sahatām arātiṃ pratyak pratiharaṇena- -aghāyate 'ghaṃ prati harāmaḥ ||

4.9.1

saṃvasava iti vo nāmadheyam ugraṃpaśyā rāṣṭrabhṛto hy akṣāḥ | tasmai ta indo haviṣā vidhema vayaṃ syāma patayo rayīṇām ||

4.9.2

idam ugrāya babhrave yo 'kṣeṣu tanūvaśī | ghṛtena kaliṃ śikṣāṇi sa no mṛḍātīdṛśe ||

4.9.3

ghṛtam agne apsarābhyo vaha tvaṃ pāṃsūn akṣebhyaḥ sikatā apaś ca | yathābhagaṃ havyadātiṃ juṣāṇā madantu devā ubhayāni havyā ||

4.9.4

yo no devo dhanam idaṃ dideśa yo akṣāṇāṃ grahaṇaṃ śeṣaṇaṃ ca | sa no 'vatu havir idaṃ juṣāṇo gandharvaiḥ sadhamādaṃ madema ||

4.9.5

yā apsarasaḥ sadhamādaṃ madanty antarā havirdhānaṃ sūryaṃ ca | tā no hastau kṛtena saṃ sṛjantu sapatnaṃ naḥ kitavaṃ randhayantu ||

4.9.6

yad devān nāthito huve brahmacaryaṃ yad ūṣima | akṣān yad babhrūn ālabhe te no mṛḍantv īdṛśe ||

4.9.7

ādinavam ity ekā ||

4.10.1

bhagas tveto nayatu hastagṛhya bṛhaspatiḥ puraetā te astu | devas tvā savitā satyadharmā- -upasadyāṃ namasyāṃ kṛṇotu ||

4.10.2

yām aśvinā madhukaśāṃ devā agre ajanayan | tayā tvā patyāṃ otāṃ kṛṇmo madhumatīṃ vayam ||

4.10.3

uttarā śvaśruvā bhava nanāndur upaśikṣayā | yaśas tvā patyāṃ kṛṇmo bhavā devṛṣu priyā ||

4.10.4

adbhir ātmānaṃ tanvaṃ śumbhamānā gṛhān prehi mahiṣī bhavāsi | tatra tvādur gārhapatyāya devāḥ prajāvatī jaradaṣṭir yathāsaḥ ||

4.10.5

ud uttaram ārohantī vyasyantī pṛtanyataḥ | abhy aṣṭhāḥ śatror mūrdhānaṃ sahaputrā virāḍ bhava ||

4.10.6

śvaśrūṇāṃ śvaśurāṇāṃ gṛhāṇāṃ ca bhagasya ca | vi rāja patyāṃ devṛṣu sajātānāṃ virāḍ bhava ||

4.10.7

yad giriṣu parvateṣu goṣv aśveṣu yan madhu | yenākṣā abhyaṣicyanta tenāham asyā mūrdhānam abhi ṣiñcāmi nāryāḥ ||

4.10.8

yad varco gavi kalyāṇe yad vā sūyavase tṛṇe | abhyañjanasya yad varcas tena mānajmi varcasā ||

4.11.1

yenācarad uśanā kāvyo 'gre vidvān kratūnām uta devatānām | sahṛdayena haviṣā juhomi sadhrīcīnaṃ vo mano 'stūgram ||

4.11.2

mahat satyaṃ mahad dhavir uśanā kāvyo mahān | devānām ugrāṇāṃ satāṃ hṛdayāni sahākaram ||

4.11.3

ahaṃ satyena sayujā carāmy ahaṃ devīm anumatiṃ pra veda | indro devānāṃ hṛdayaṃ vo astu sadhrīcīnaṃ vo mano 'stūgram ||

4.11.4

tvaṣṭā vāyuḥ kaśyapa indram agnir manasānv āyan haviṣas padena | avindañ chakraṃ rajasi praviṣṭaṃ sadhrīcīnaṃ vo mano 'stūgram ||

4.11.5

yeneme dyāvāpṛthivī vicaṣkabhur yenābhavad antarikṣaṃ svar yat | manasā vidvān haviṣā juhomi sadhrīcīnaṃ vo mano 'stūgram ||

4.11.6

dyāvāpṛthivī hṛdayaṃ sasūvatur yenedaṃ tvaṣṭā vikṛṇoti dhīraḥ | tasyośanā kratubhiḥ saṃvidānaś cittaṃ viveda manasi praviṣṭam ||

4.11.7

cittaṃ caitad ākūtiś ca yena devā viṣehire | etat satyasya śraddhayā- -arṣayaḥ sapta juhvati ||

4.12.1

tvayā manyo saratham ārujanto harṣamāṇāso hṛṣitā marutvan | tīkṣṇeṣava āyudhā saṃśiśānā upa pra yantu naro agnirūpāḥ ||

4.12.2

agnir iva manyo tarasā sahasva senānīr naḥ sahure hūta edhi | jitvāya śatrūn vi bhajāsi veda ojo mimāno vi mṛdho nudasva ||

4.12.3

sahasva manyo abhimātim asme rujan mṛṇan pramṛṇann ehi śatrūn | ugraṃ te śardho nanv ā rurudhre vaśī vaśaṃ nayāsā ekaja tvam ||

4.12.4

eko bahūnām asi manyav īḍitā paśūnpaśūn yuddhāya saṃ śiśādhi | akṛttaruk tvayā yujā vayaṃ dyumantaṃ ghoṣaṃ vijayāya kṛṇmahe ||

4.12.5

vijeṣakṛd indra ivānavabravo 'smākaṃ manyo adhipā bhaveha | priyaṃ te nāma sahure gṛṇīmasi vidmā tam utsaṃ yata ābabhūvitha ||

4.12.6

ābhūtyā sahasā vajra sāyaka saho bibharṣy abhibhūta uttaram | kratvā no manyo saha medy edhi mahādhanasya puruhūta saṃsṛji ||

4.12.7

saṃsṛṣṭaṃ dhanam ubhayaṃ samākṛtam asmabhyaṃ dattaṃ varuṇaś ca manyo | bhiyo dadhānā hṛdayeṣu śatravaḥ parājitā yantu paramāṃ parāvatam ||

4.13.1

śaṃ no devī pṛśniparṇy aśaṃ nirṛtaye karat | ugrā hi kaṇvajambhanī tāṃ tvāhārṣaṃ sahasvatīm ||

4.13.2

sadānvāghnī prathamā pṛśniparṇy ajāyata | tayā kaṇvasyāhaṃ śiraś chinadmi śakuner iva ||

4.13.3

ūrjabhṛtaṃ prāṇabhṛtaṃ prajānām uta tarpaṇīm | sarvās tāḥ pṛśniparṇī- -itaḥ kaṇvā mā nīnaśat ||

4.13.4

samākṛtyainā nir aja tīkṣṇaśṛṅga iva ṛṣabhaḥ | arāyaṃ kaṇvaṃ pāpmānaṃ pṛśniparṇi sahasvati ||

4.13.5

tvam ugre pṛśniparṇy agnir iva pradahann ihi kaṇvā jīvitayopanīḥ | girim enā ā veśaya tamāṃsi yatra gacchāṃs tat pāpīr api pādaya ||

4.13.6

arāyam asṛkpāvānaṃ yaś ca sphātiṃ jihīrṣati | garbhādaṃ kaṇvaṃ nāśaya pṛśniparṇi sahasvati ||

4.13.7

yā no gā yā no gṛhān yā na sphātim upāharān | tā ugre pṛśniparṇi tvaṃ kaṇvā mā nīnaśa itaḥ ||

4.14.1

yasminn āśīḥ pratihita idaṃ tac chalyo veṇur veṣṭanaṃ tejanaṃ ca | sūnur janitrīṃ janayehi śṛṇvann ayaṃ ta ātmeta it prahitaḥ ||

4.14.2

asthi bhittvā yadi majjñaḥ papātha yadi vāsi rataḥ puruṣantikāme | urvīṃ gavyūtim abhy ehy arvāṅ paścā raśmīn udyataḥ sūryasya ||

4.14.3

mātariśvā pavamānas tvāyan sūrya ābhrājan tanvā dṛśe kaḥ | asno gandhāt puvasaḥ pra cyavasva vi mucyasva yonyā yā te atra ||

4.14.4

pra cyavasvāto abhy ehy arvāṅ arthāṃs te vidma bahudhā bahir ye | imāḥ svasāro ayam it pitā ta iyaṃ te mātemam ehi bandhum ||

4.14.5

amitrair astā yadi vāsi mitrair devair vā devi prahitāvasṛṣṭā- -āviddhā śṛṅgaṃ puruṣe jahātha | bāṇaḥ śṛṅgaṃ śikharaḥ saṃ satām itaḥ ||

4.14.6

śikhāsu sakto yadi vāsy agre yadi vāsi saktaḥ puruṣasya māṃse | dadhṛṅ na pāśām̐ apavṛjya muktvā- -akṣiśalyaḥ kṛṇutām āyanāya ||

4.14.7

hastād dhastaṃ sam ayo bhriyamāṇo bahiṣ ṭvā paśyān vīrudhāṃ balena | adbhiḥ praṇiktaḥ śayāsā abhyaktaḥ kośe jāmīnāṃ nihito ahiṃsaḥ ||

4.14.8

ṣaṣṭirātre ṣaṣṭikasya śalyasya paridhiṣ kṛtaḥ | itas tam adya te vayam āsthānāc cyāvayāmasi ||

4.15.1

saṃ majjā majjñā bhavatu sam u te paruṣā paruḥ | saṃ te rāṣṭrasya visrastaṃ saṃ snāva sam u parva te ||

4.15.2

majjā majjñā saṃ dhīyatām asthnāsthy api rohatu | snāva te saṃ dadhmaḥ snāvnā carmaṇā carma rohatu ||

4.15.3

loma lomnā saṃ dhīyatāṃ tvacā saṃ kalpayāt tvacam | asṛk te asnā rohatu māṃsaṃ māṃsena rohatu ||

4.15.4

rohiṇī saṃrohiṇy asthnaḥ śīrṇasya rohiṇī | rohiṇyām ahni jātāsi rohiṇy asy oṣadhe ||

4.15.5

yadi śīrṇaṃ yadi dyuttam asthi peṣṭraṃ ta ātmanaḥ | dhātā tat sarvaṃ kalpayāt saṃ dadhat paruṣā paruḥ ||

4.15.6

yadi vajro visṛṣṭas tvāra kāṭaṃ patitvā yadi vā viriṣṭam | vṛkṣād vā yad avasad daśaśīrṣa ṛbhū rathasyeva saṃ dadhāmi te paruḥ ||

4.15.7

ut tiṣṭha prehi sam adhāyi te paruḥ saṃ te dhātā dadhātu tanvo viriṣṭam | rathaḥ sucakraḥ supavir yathaiti sukhaḥ sunābhiḥ prati tiṣṭha evam ||

4.16.1

udyann ādityo ghuṇān hantu sūryo nimrocan raśmibhir hantu | tāvan no abhisaṃhitam ||

4.16.2

apsarā mūlam akhanad gandharvaḥ pary abravīt | tena vo vṛtrahā sūryo ni jambhyām̐ amṛtad ghuṇāḥ ||

4.16.3

ghuṇān hantv āyatī ghuṇān hantu parāyatī | ghuṇān avaghnatī hantu ghuṇān pinaṣṭu piṃṣatī ||

4.16.4

ghuṇā na kiṃ caneha vaḥ pratibuddhā abhūtana | pradoṣaṃ taskarā iva ||

4.16.5

ghuṇānāṃ madhyato jyeṣṭhaḥ kaniṣṭha uta madhyamaḥ | hatā vaḥ sarve jñātayo hatā mātā hataḥ pitā ||

4.16.6

yathā phena udakena dadṛśāno nijasyati | evā vayaṃ ghuṇān sarvān sākaṃ vācā ni jāsayāmasi ||

4.16.7

ni gāvo goṣṭhe asadan ni mṛgāso avikṣata | ni tvam āditya raśmibhir ghuṇān sarvām̐ ajījasaḥ ||

4.16.8

udyan raśmīn ā tanuṣva bāṇavadbhiḥ sam arpaya | ghuṇāṃs tvaṃ sarvān āditya ghorayā tanvā tapa ||

4.17.1

ya ānataḥ parāṇato dāror ivāpatakṣaṇam | śarkoṭo nāma vā asi kutas tvaṃ viṣavān asaḥ ||

4.17.2

ya ubhayena praharasi pucchena cāsyena ca | āsye cana te viṣaṃ kutas te pucchadhāv asat ||

4.17.3

vidutsurasya dānavasya tasya tvaṃ napād asi | tasyāgre 'rasaṃ viṣaṃ tatas tavārasaṃ viṣam ||

4.17.4

arasārasaṃ tvākaraṃ vadhre vadhriṃ tvākaram | vadhriṃ tvā cakrur devā amṛtāsa āsuram ||

4.17.5

iyattakaḥ kuṣumbhakas takaṃ bhinadmi śamyayā | tato viṣaṃ parāsicam apācīm anu saṃvatam ||

4.17.6

imāḥ paścā mayūryaḥ sapta svasāro agruvaḥ | tās te viṣaṃ vi jahrira udakaṃ kumbhinīr iva kūpāt kulijinīr iva ||

4.17.7

navānāṃ navatīnām ity eka ||

4.18.1

vrātam aham apakṣṇānāṃ vrātaṃ muṇḍīyasām uta | vrātaṃ muṇḍivlānām ahaṃ pra dhvāṅkṣām̐ iva cātaye ||

4.18.2

pravaktā pramādayitā nidrā tandrīs tṛtīyakaḥ | tāñ jaṅgiḍasyāgninā sarvān prati dahāmasi||

4.18.3

aśuddhān naḥ pari pāhi rakṣobhya uta jaṅgiḍa | yātudhānāt kimīdinas tasmān naḥ pāhi jaṅgiḍa ||

4.18.4

apsarābhyo gandharvebhyo devebhyo asurebhyaḥ | atho sarvasmāt pāpmanas tasmān naḥ pāhi jaṅgiḍa ||

4.18.5

ni te śatrūn dahati devo agnir nir arātim amatiṃ yātudhānān | ā yāhi śatrūn duritāpaghnañ chatān no yakṣmebhyaḥ pari pāhi jaṅgiḍa ||

4.18.6

akarmāgnim adhipām asya devam anvārapsva sahasā daivyena | sahasvān naḥ sahasā pātu jaṅgiḍo yathā jayema pṛtanājyeṣu ||

4.18.7

satyo agniḥ satyā āpaḥ satye me dyāvāpṛthivī viśvaśaṃbhuvau | satyam idaṃ brahmāsmākaṃ kṛtam astu yam abadhnād uśanendrāya taṃ te badhnāmi jaṅgiḍam ||

4.19.1

iyattikā śakuntikā sakā jaghāsa te viṣam | māhaṃ mṛṣi mo asau puruṣo mṛta | sa ca na marati mā vayaṃ marāma | āre asya yojanaṃ hariṣṭhā madhu tvā madhulā karat ||

4.19.2

sūrye viṣam ā sṛjāmi dṛtiṃ surāvato gṛhe | (…) ||

4.19.3

triṣaptā visphuliṅgakā viṣasya puṣpakam akṣan | (…) ||

4.19.4

ālvantaruṭaṃ viṣaṃ vidārī karambho arasaṃ viṣam | (…) ||

4.19.5

vār ugram arasaṃ viṣam agniś ca viśvacarṣaṇiḥ | (…) ||

4.19.6

śakuntikā me abravīd viṣapuṣpaṃ dhayantikā | (…) ||

4.19.7

na ropayati na mādayati na viṣaṃ hanti pūruṣam | māhaṃ mṛṣi mo asau puruṣo mṛta | sa ca na marati mā vayaṃ marāma | āre asya yojanaṃ hariṣṭhā madhu tvā madhulā karat ||

4.19.8

navānāṃ navatīnām ity ekā ||

4.20.1

madhumatī patye asmi jārāya madhumattarā | atho madhavyaṃ me bhaṃso madhu nipadane aham ||

4.20.2

madhunā mā saṃ sṛjāmi māsareṇa surām iva | vāṅ ma iyaṃ madhunā saṃsṛṣṭā- -akṣyau me madhusaṃdṛśī ||

4.20.3

madhu dyaur madhu pṛthivī madhv indro madhu sūryaḥ | striyo yā jajñire madhu tābhyo 'haṃ madhumattarā ||

4.20.4

madhumatīr oṣadhaya āpo madhumatīr uta | gāvo yā jajñire madhu tābhyo 'haṃ madhumattarā ||

4.20.5

madhor jāto madhugho vīrudhāṃ balavattamaḥ | tenāhaṃ sarvasmai puṃse kṛṇve nikaraṇaṃ hṛdi ||

4.20.6

yathāśvo bandhaneṣṭho vaḍavām abhidhāvati | evā tvam ugra oṣadhe 'muṃ kanikradatam ā naya ||

4.20.7

aṅgo nu mod iva śvaso aṅgo nu mod iva stanaḥ | anyā vivitsamāno anyāḥ parājighāṃsan | mām anu pra te manaś chāyā yantam ivānv ayat ||

4.21.1

khananti tvā taimātāṃ dāsā arasabāhavaḥ | dāsy asi prakrīr asy utkhātam arasaṃ viṣam ||

4.21.2

adanti tvā kakkaṭāsaḥ kuruṅgā adhi sānuṣu | pāpī jagdhaprasūr asy abhrikhāte na rūrupaḥ ||

4.21.3

ava jyām iva dhanvanaḥ śuṣmaṃ tirāmi te viṣa | pra ropīr asya pātaya sūryaḥ pūrvā ivoṣasaḥ ||

4.21.4

sindhuḥ paścāt parihitaḥ sūryasyodayanaṃ puraḥ | tato yad antarā vanaṃ tat sarvaṃ viṣadūṣaṇam ||

4.21.5

madhu tvā madhukṛt kṛṇotu pituṃ tvā pitukṛt kṛṇotu | uto niṣadya pātave atho ūrdhvāya tiṣṭhate ||

4.21.6

jaghāsa tvā lomakarṇas tan ny āsa paruṣṇiyām | tad bhaimīś cakrire srajaḥ sarvaṃ mahiṣado viṣam ||

4.21.7

urvyā urukṣitas turāyā āturasya ca | bhūmyā hi jagrabha nāma viṣaṃ vārayatām iti | viṣaṃ dūṣayatād iti ||

4.22.1

ahaṃ vā indramātaram indraojām indrabhrātaram | indrādhivaktrāṃ vīrudham āhārṣaṃ viṣadūṣaṇīm ||

4.22.2

yat kiṃ ca padvac chaphavad yat kāṇḍi yac ca puṣpavat | yad ejati prajāpatiḥ sarvaṃ tad viṣadūṣaṇam ||

4.22.3

sindhuḥ paścād dharuṇaḥ sūryasyodayanaṃ puraḥ | tato yad antarā viṣaṃ tad vācā dūṣayāmasi ||

4.22.4

yāvat sūryo vitapati yāvac cābhi vipaśyati | tāvad viṣasya dūṣaṇaṃ vaco nir mantrayāmahe ||

4.22.5

jihvā me madhusaṃsrāvā jihvā me madhuvādinī | jihve varcasvatī bhava māyaṃ me puruṣo riṣat ||

4.22.6

hā hai kalyāṇi subhage pṛśniparṇy anāture | imaṃ me adya pūruṣaṃ dīrghāyutvāyon naya ||

4.22.7

yābhyo varṣanti vṛṣṭayo yābhir jīvanty aghnyāḥ | tā me viṣasya dūṣaṇīḥ savitā vy akāśayat ||

4.23.1

prajāpatiṣ ṭvā badhnāt prathamam astṛtaṃ vīryāya kam | taṃ te badhnāmy āyuṣe varcasa ojase ca balāya ca- -astṛtas tvābhi rakṣatu ||

4.23.2

ūrdhvas tiṣṭha rakṣann apramādam astṛtemaṃ mā tvā dabhan paṇayo yātudhānāḥ | indra iva dasyūn ava dhūnuṣva pṛtanyataḥ sarvāñ chatrūn vi ṣahasva- -astṛtas tvābhi rakṣatu ||

4.23.3

śataṃ cana praharanto 'bhighnanto na tastrire | tasminn indraḥ pary adatta cakṣuḥ prāṇam atho balam astṛtas tvābhi rakṣatu ||

4.23.4

indrasya tvā varmaṇā pari dhāpayāmo yo devānām adhirājo babhūva | puras tvā devāḥ pra ṇayantu sarve 'stṛtas tvābhi rakṣatu ||

4.23.5

asmin maṇāv ekaśataṃ vīryāṇi sahasraṃ prāṇā asminn astṛte | vyāghraḥ śatrūn adhi tiṣṭha sarvān yas tvā pṛtanyād adharaḥ so 'stv astṛtas tvābhi rakṣatu ||

4.23.6

ghṛtād ullupto madhumān payasvān sahasraprāṇaḥ śatayonir vayodhāḥ | śambhūś ca mayobhūś ca- -ūrjasvāṃś ca payasvāṃś ca- -astṛtas tvābhi rakṣatu ||

4.23.7

yathā tvam uttaro aso asapatnaḥ sapatnahā | sajātānām aso vaśī tathā tvā savitā karad astṛtas tvābhi rakṣatu ||

4.24.1

apaś ca rapaś ca- -ūṣmā ca bāṣpaś ca | śokaś cābhiśokaś ca tṛtīyekaś ca pareparaś ca takmāna ito naśyata ||

4.24.2

veda vai te takman nāma- -agniṣ ṭvaṃ nāmāsi | taṃ tveto vi nayāmaḥ śani takmā ||

4.24.3

vṛtrasya haro 'si nabhaso napāt | dyauś cāsmat pṛthivī ca takmānaṃ nāśayatām itaḥ ||

4.24.4

pañcapsinir nāma te mātā sa u ekapsinir ucyase | tasyāhaṃ veda te nāma sa takman nir ato drava ||

4.24.5

audumbaraś ca nāmāsi priyātithiś ca | taṃ tveto nāśayāmasi brahmaṇā vīryāvatā ||

4.24.6

yo 'si jalpaṃś ca lapaṃś ca- -āvāṃ ca tapaṃś ca | tṛtīyekaś ca mauñjigalaś ca te takmāna ito naśyata ||

4.24.7

vikilīda vilohita vikāśakraṃdarajjana | giriṃ gaccha dhūmaketo hṛṣe namāṃsi santu te ||

4.24.8

bṛhat tvam agne rakṣo adhamaṃ jahi madhyamaṃ ny uttamaṃ śṛṇīhi | śaṃ no agnir jyotiranīko astu śaṃ dyāvāpṛthivī anehasā ||

4.24.9

māteva pitevābhi rakṣatainaṃ muñcatainaṃ pary aṃhasaḥ ||

4.25.1

vātāj jāto antarikṣād vidyuto jyotiṣas pari | sa no hiraṇyajāḥ śaṅkhaḥ kṛśanaḥ pātv aṃhasaḥ ||

4.25.2

hiraṇyānām eko 'si somād adhi jajñiṣe | rathe 'si dārśata iṣudhau rocanas tvam ||

4.25.3

yo agrato rocanāvān samudrād adhi jajñiṣe | śaṅkhena hatvā rakṣāṃsy atriṇo vi ṣahāmahe ||

4.25.4

ye atriṇo yātudhānā rakṣaso ye kimīdinaḥ | sarvāñ chaṅkha tvayā vayaṃ viṣūco vi ṣahāmahe ||

4.25.5

śaṅkhenāmīvām amatiṃ śaṅkhenota sadānvāḥ | śaṅkho no viśvabheṣajaḥ kṛśanaḥ pātv aṃhasaḥ ||

4.25.6

divi jātaḥ samudrataḥ sindhutas pary ābhṛtaḥ | sa no hiraṇyajāḥ śaṅkha āyuṣprataraṇo maṇiḥ ||

4.25.7

devānām asthi kṛśanaṃ babhūva tad ātmanvac caraty apsv antaḥ | taṃ te badhnāmy āyuṣe varcasa ojase ca balāya ca kārśanas tvābhi rakṣatu ||

4.26.1

kanyā vār avāyatī somam api srutāvidat | astaṃ bharanty abravīd indrāya sunomi tvā śakrāya sunomi tvā ||

4.26.2

asau ya eṣi vīrako gṛhaṃgṛhaṃ vicākaśat | imaṃ jambhasutaṃ piba dhānāvantaṃ karambhiṇam apūpavantam ukthinam ||

4.26.3

kuvic chakat kuvit karat kuvin no vasyasas karat | kuvit patidviṣo yatīr indreṇa saṃ gamāmahai ||

4.26.4

ā cana tvā cikitsāmo 'dhi cana tvā nemasi | śanair iva śanakair iva- -indrāyendo pari srava ||

4.26.5

imāni trīṇi viṣṭapā tānīndra vi rohaya | śiras tatasyorvarām ād idaṃ ma upodare ||

4.26.6

asau ca yā na urvarā- -ād imāṃ tanvaṃ mama | atho tatasya yac chiraḥ sarvā tā romaśā kṛdhi ||

4.26.7

khe rathasya khe 'nasaḥ khe yugasya śatakrato | apālām indra triṣ pūtvy akṛṇoḥ sūryatvacam ||

4.27.1

divas pṛṣṭhe madhupṛcaḥ suparṇāḥ pañcāśat te bhuvanasya gopāḥ | ānujāvaram anu rakṣanta ugrā yeṣām indraṃ vīryāyairayanta ||

4.27.2

purohitaḥ parameṣṭhī svarājyāya- -abhīvardham asmā akṛṇod bṛhaspatiḥ | tena sapatnān adharān kṛṇuṣva kṣeme paśūn bahulān vardhayitvā jaitrāyod yātu rathavāhanaṃ te ||

4.27.3

gobhājam aṃśaṃ tava ye samānāḥ sarve samagrā dadhṛg ābharanta | abhi vardhasva bhrātṛvyān abhi ye tvā pṛtanyataḥ ||

4.27.4

ni piṇḍhi sarvān dhūrvato 'bhīvardho yathāsasi | abhīvardham abhībhavam abhīṣeṇaṃ mahāgaṇam | viśas tvā sarvā ā yantv āpo divyāḥ payasvatīḥ ||

4.27.5

abhi vardhasva prajayā vāvṛdhāno abhy anīkaiḥ paśubhir bhavāsi | brahmarājanyair viśyair vāvṛdhānaḥ śūdrair atīhi sabhayā pṛtanyataḥ ||

4.27.6

vardhasva kṣetraiḥ prathasva prajayā vardhasva vīraiḥ paśubhir bahur bhava | śriyā śulkair yatamas tvā pṛtanyād āptas tubhyaṃ sa balihṛtyāya tiṣṭhatu ||

4.28.1

indraṃ mitraṃ varuṇam agnim ūtaye mārutaṃ śardho aditiṃ havāmahe | rathaṃ na durgād vasavaḥ sudānavo viśvasmān no aṃhaso niṣ pipartana ||

4.28.2

ta ādityā ā gatā sarvatātaye bhūta devā vṛtratūryeṣu śaṃbhuvaḥ | (…) ||

4.28.3

avantu naḥ pitaraḥ supravācanā uta devī devaputre ṛtāvṛdhā | (…) ||

4.28.4

narāśaṃsaṃ vājinaṃ vājayantaṃ kṣayadvīraṃ pūṣaṇaṃ sumnair īmahe | (…) ||

4.28.5

bṛhaspate sadam in naḥ sugaṃ kṛdhi śaṃ yor yat te manurhitaṃ tad īmahe | (…) ||

4.28.6

indraṃ kutso vṛtrahaṇaṃ śacīpatiṃ kāṭe nibāḍha ṛṣir ahvad ūtaye | rathaṃ na durgād vasavaḥ sudānavo viśvasmān no aṃhaso niṣ pipartana ||

4.28.7

devair no devy aditir ni pātu devas trātā trāyatām aprayucchan | tan no mitro varuṇo māmahantām aditiḥ sindhuḥ pṛthivī uta dyauḥ ||

4.29.1

apa naḥ śośucad agham | agne śuśugdhy ā rayim ||

4.29.2

apa naḥ śośucad agham | sukṣetriyā sugātuyā vasūyā ca yajāmahe ||

4.29.3

apa naḥ śośucad agham | pra yad bhandiṣṭha eṣāṃ prāsmākāsaś ca sūrayaḥ ||

4.29.4

apa naḥ śośucad agham | pra yat te agne sūrayo jāyemahi pra te vayam ||

4.29.5

apa naḥ śośucad agham | pra yad agneḥ sahasvato viśvato yanti bhānavaḥ ||

4.29.6

apa naḥ śośucad agham | tvaṃ hi viśvatomukha viśvataḥ paribhūr asi ||

4.29.7

apa naḥ śośucad agham | dviṣo no viśvatomukha- -ati nāveva pāraya ||

4.30.1

devāḥ śaraṇakṛtaḥ śaraṇā me bhavata prācyā diśo 'gninā rājñādhyakṣeṇa | yaśā bhūyāsaṃ yaśasaṃ mā kṛṇuta cārum annādaṃ parā dviṣantaṃ śṛṇīta ||

4.30.2

(…) bhavata dakṣiṇāyā diśa indreṇa rājñā- (…) ||

4.30.3

(…) bhavata pratīcyā diśo varuṇena rājñā- (…) ||

4.30.4

(…) bhavata- -udīcyā diśaḥ somena rājñā- (…) ||

4.30.5

(…) bhavata dhruvāyā diśo viṣṇuṇā rājñā- (…) ||

4.30.6

(…) bhavata- -ūrdhvāyā diśo bṛhaspatinā rājñā- (…) ||

4.30.7

(…) bhavata- -uttamāyā diśaḥ prajāpatinā rājñā- (…) ||

4.30.8

(…) bhavata paramāyā diśaḥ parameṣṭhinā rājñā- (…) ||

4.30.9

devāḥ śaraṇakṛtaḥ śaraṇā me bhavata sarvābhyo digbhya īśānena rājñādhyakṣeṇa | yaśā bhūyāsaṃ yaśasaṃ mā kṛṇuta cārum annādaṃ parā dviṣantaṃ śṛṇīta ||

4.31.1

prātar agniṃ prātar indraṃ havāmahe prātar mitrāvaruṇā prātar aśvinā | prātar bhagaṃ pūṣaṇaṃ brahmaṇaspatiṃ prātaḥ somam uta rudraṃ huvema ||

4.31.2

prātarjitaṃ bhagam ugraṃ huvema vayaṃ putram aditer yo vidhartā | ādhraś cid yaṃ manyamānas turaś cid rājā cid yaṃ bhagaṃ bhakṣīty āha ||

4.31.3

bhaga praṇetar bhaga satyarādho bhagemāṃ dhiyam ud avā dadan naḥ | bhaga pra ṇo janaya gobhir aśvair bhaga pra nṛbhir nṛvantaḥ syāma ||

4.31.4

utedānīṃ bhagavantaḥ syāma- -uta prapitva uta madhye ahnām | utodite maghavan sūrye vayaṃ devānāṃ sumatau syāma ||

4.31.5

bhaga eva bhagavām̐ astu devās tena vayaṃ bhagavantaḥ syāma | taṃ tvā bhaga sarva ij johavīti sa no bhaga puraetā bhaveha ||

4.31.6

sam adhvarāyoṣaso namanta dadhikrāveva śucaye padāya | arvācīnaṃ vasuvidaṃ bhagaṃ no ratham ivāśvā vājina ā vahantu ||

4.31.7

aśvāvatīr gomatīr na uṣāso vīravatīḥ sadam ucchantu bhadrāḥ | ghṛtaṃ duhānā viśvataḥ prapītā yūyaṃ pāta svastibhiḥ sadā naḥ ||

4.32.1

yas te manyo 'vidhad vajra sāyaka saha ojaḥ puṣyati viśvam ānuṣak | sāhyāma dāsam āryaṃ tvayā yujā vayaṃ sahaskṛtena sahasā sahīyasā ||

4.32.2

manyur indro manyur evāsa devo manyur hotā varuṇo jātavedāḥ | manyur viśa īḍate mānuṣīr yāḥ pāhi no manyo tapasā sajoṣāḥ ||

4.32.3

abhīhi manyo tavasas tavīyān tapasā yujā vi jahi śatrūn | amitrahā vṛtrahā dasyuhā ca viśvā vasūny ā bharā tvaṃ naḥ ||

4.32.4

tvaṃ hi manyo abhibhūtyojāḥ svayambhūr bhāmo abhimātiṣāhaḥ | viśvacarṣaṇiḥ sahuriḥ sahīyām̐ asmāsv ojaḥ pṛtanāsu dhehi ||

4.32.5

abhāgaḥ sann apa pareto asmi tava kratvā taviṣasya pracetaḥ | taṃ tvā manyo akratur jihīḍāhaṃ svā tanūr baladāvā na ehi ||

4.32.6

ayaṃ te asmy upa na ehy arvāṅ pratīcīnaḥ sahure viśvadāvan | manyo vajrinn upa na ā vavṛtsva hanāva dasyūṃr uta bodhy āpe ||

4.32.7

abhi prehi dakṣiṇato bhavā no adhā vṛtrāṇi jaṅghanāva bhūri | juhomi te dharuṇo madhvo agram ubhā upāṃśu prathamā pibeva ||

4.33.1

agner manve prathamasya pracetasaḥ pāñcajanyasya bahudhā yam indhate | viśoviśaḥ praviśivāṃsam īmahe sa no muñcatv aṃhasaḥ ||

4.33.2

sujātaṃ jātavedasam agniṃ vaiśvānaraṃ vibhum | havyavāhaṃ havāmahe sa no muñcatv aṃhasaḥ ||

4.33.3

yathā havyaṃ vahasi jātavedo yathā yajñaṃ kalpayasi prajānan | evā devebhyaḥ sumatim ihā vaha sa no muñcatv aṃhasaḥ ||

4.33.4

yāmanyāmann upayuktaṃ vahiṣṭhaṃ karmankarmann ābhagam | agnim īḍe rakṣohaṇaṃ yajñavṛdhaṃ ghṛtāhutaṃ sa no muñcatv aṃhasaḥ ||

4.33.5

yena rṣayo valam adyotayan yujā yenāsurāṇām ayuvanta māyāḥ | yenāgninā paṇīn indro jigāya sa no muñcatv aṃhasaḥ ||

4.33.6

yena devā amṛtam anvavindan yenauṣadhīr madhumatīr akṛṇvan | yenedaṃ svar ābharan sa no muñcatv aṃhasaḥ ||

4.33.7

yasyedaṃ pradiśi yad virocate yaj jātaṃ janitavyaṃ ca kevalam | staumy agniṃ nāthito johavīmi sa no muñcatv aṃhasaḥ ||

4.34.1

vāyoḥ savitur vidathāni manmahe yāv ātmanvad vidatho yau ca rakṣathaḥ | yau viśvasya paribhū babhūvathus tau no muñcatam aṃhasaḥ ||

4.34.2

yayoḥ saṃkhyātā varimāṇi pārthivā yābhyāṃ rajo gupitam antarikṣam | yayoḥ prayāṃ nānu kaś canānaśe tau no muñcatam aṃhasaḥ ||

4.34.3

tava vrate ni viśante janāsas tvayy udite prerate citrabhāno | yuvaṃ vāyo savitā ca bhuvanāni rakṣathas tau no muñcatam aṃhasaḥ ||

4.34.4

pra sumatiṃ savitar vāya ūtaye mahasvantaṃ matsaraṃ mādayethām | arvāg vāmasya pravatā ni yacchathas tau no muñcatam aṃhasaḥ ||

4.34.5

rayiṃ me poṣaṃ savitota vāyus tanū dakṣam ā suvatāṃ suśevam | ayakṣmatāṃ maho asmāsu dhattaṃ tau no muñcatam aṃhasaḥ ||

4.34.6

apeto vāyo savitā ca duṣkṛtaṃ apa yakṣmaṃ śimidāṃ sedhataṃ paraḥ | saṃ hy ūrjā sṛjathaḥ saṃ balena tau no muñcatam aṃhasaḥ ||

4.34.7

upa śreṣṭhā na āśiṣo devayor dhāmann asthiran | staumi devaṃ savitāraṃ ca vāyuṃ tau no muñcatam aṃhasaḥ ||

4.35.1

marutāṃ manve adhi me bruvantu premaṃ vājaṃ vājasātā avantu | āśūn iva suyamān ahva ūtaye te no muñcantv aṃhasaḥ ||

4.35.2

utsam akṣitaṃ vyacanti ye sadā ye vā siñcanti rasam oṣadhīṣu | puro dadhe marutaḥ pṛśnimātṝṃs te no muñcantv aṃhasaḥ ||

4.35.3

payo dhenūnāṃ rasam oṣadhīnāṃ javam arvatāṃ kavayo ya invatha | śagmā bhavantu marutaḥ syonās te no muñcantv aṃhasaḥ ||

4.35.4

apaḥ samudrād divam ud vahanti divas pṛthivīm abhi ye sṛjanti | ye +'dbhir īśānā marutaś caranti te no muñcantv aṃhasaḥ ||

4.35.5

ye kīlālais tarpayanti ye ghṛtena ye vā vayo medasā saṃsṛjanti | ya īśānā maruto varṣayanti te no muñcantv aṃhasaḥ ||

4.35.6

yadīd idaṃ maruto mārutena yadi devā daivyenedṛg āra | yūyam īśidhve vasavas tasya niṣkṛtes te no muñcantv aṃhasaḥ ||

4.35.7

tigmam anīkaṃ viditaṃ sahasvan mārutaṃ śardhaṃ pṛtanāsūgram | staumi maruto nāthito johavīmi te no muñcantv aṃhasaḥ ||

4.36.1

manve vāṃ dyāvāpṛthivī subhojasau ye aprathethām amitā yojanāni | pratiṣṭhe hy abhavataṃ vasūnāṃ te no muñcatam aṃhasaḥ ||

4.36.2

pratiṣṭhe hi babhūvathur vasūnāṃ pravṛddhe devī subhage urūcī | dyāvāpṛthivī bhavataṃ me syone te no muñcatam aṃhasaḥ ||

4.36.3

ye srotyā bibhṛtho ye manuṣyān ye amṛtaṃ bibhṛtho ye havīṃṣi | dyāvāpṛthivī bhavataṃ me syone te no muñcatam aṃhasaḥ ||

4.36.4

ye usriyā bibhṛtho ye vanaspatīn yayor vāṃ viśvā bhuvanāny antaḥ | dyāvāpṛthivī bhavataṃ me syone te no muñcatam aṃhasaḥ ||

4.36.5

ye kīlālais tarpayatho ye ghṛtena yābhyāṃ na rte kiṃ cana śaknuvanti | dyāvāpṛthivī bhavataṃ me syone te no muñcatam aṃhasaḥ ||

4.36.6

asantāpe sutapasā huve vām urvī gabhīre kavibhir namasye | dyāvāpṛthivī bhavataṃ me syone te no muñcatam aṃhasaḥ ||

4.36.7

yan medam abhiśocati yena vā yena vā kṛtaṃ pauruṣeyaṃ na daivyam | staumi dyāvāpṛthivī nāthito johavīmi te no muñcatam aṃhasaḥ ||

4.37.1

bhavāśarvau manve vāṃ tasya vittaṃ yayor vāṃ viśvaṃ yad idaṃ vitiṣṭhate | yāv īśāte asya dvipado yau catuṣpadas tau no muñcatam aṃhasaḥ ||

4.37.2

yayor abhyadhva uta yad dūre cid yau viditāv iṣubhṛtām asiṣṭhau | bhavāśarvau bhavataṃ me syonau tau no muñcatam aṃhasaḥ ||

4.37.3

yayor vadhān nāpapadyate kiṃ cana- -antar deveṣūta mānuṣeṣu | bhavāśarvau bhavataṃ me syonau tau no muñcatam aṃhasaḥ ||

4.37.4

yāv ārebhāte bahu sākam ugrau pra ced asrāṣṭram abhibhāṃ janeṣu | bhavāśarvau bhavataṃ me syonau tau no muñcatam aṃhasaḥ ||

4.37.5

sahasrākṣau vṛtrahaṇā huve vāṃ dūrehetī svannemī ugrau | bhavāśarvau bhavataṃ me syonau tau no muñcatam aṃhasaḥ ||

4.37.6

yaḥ kṛtyākṛd yātudhāno mahālo ni tasmin hatam adhi vajram ugrau | bhavāśarvau bhavataṃ me syonau tau no muñcatam aṃhasaḥ ||

4.37.7

adhi me brūtaṃ pṛtanāsūgrau saṃ vajreṇa sṛjataṃ yaḥ kimīdī | staumi bhavāśarvau nāthito johavīmi tau no muñcatam aṃhasaḥ ||

4.38.1

manve vāṃ mitrāvaruṇāv ṛtāvṛdhau satyaujasau druhvāṇaṃ yau nudethe | yau satyāvānam avatho haveṣu tau no muñcatam aṃhasaḥ ||

4.38.2

satyaujasau druhvāṇaṃ yau nudethe pra satyāvānam avatho haveṣu | yau gacchatho nṛcakṣasā babhruṇā sutaṃ tau no muñcatam aṃhasaḥ ||

4.38.3

yāv aṅgiraso 'vatho yāv agastiṃ mitrāvaruṇā jamadagnim atrim | yau kaśyapam avatho yau vasiṣṭhaṃ tau no muñcatam aṃhasaḥ ||

4.38.4

yau bharadvājam avatho vadhryaśvaṃ viśvāmitraṃ varuṇa mitra kutsam | yau kakṣīvantam avathaḥ prota kaṇvaṃ tau no muñcatam aṃhasaḥ ||

4.38.5

yau śyāvāśyam avatho yau gaviṣṭhiraṃ mitrāvaruṇā purumīḍham atrim | yau vimadam avathaḥ saptavadhriṃ tau no muñcatam aṃhasaḥ ||

4.38.6

yau medhātithim avatho yau triśokaṃ mitrāvaruṇā uśanāṃ kāvyaṃ yau | yau mudgalam avatho gotamaṃ ca tau no muñcatam aṃhasaḥ ||

4.38.7

yayo rathaḥ satyavartma rjuraśmir mithuyā carantam abhiyāti dūṣayan | staumi mitrāvaruṇā nāthito johavīmi tau no muñcatam aṃhasaḥ ||

4.39.1

indrasya manve śaśvad yasya manvire vṛtraghna stomā upa mema āguḥ | yo dāśuṣaḥ sukṛto havam etā sa no muñcatv aṃhasaḥ ||

4.39.2

yaś carṣaṇipro vṛṣabhaḥ svarvid yasya grāvāṇaḥ pravadanti nṛmṇe | yasyādhvaraḥ saptahotā madacyut sa no muñcatv aṃhasaḥ ||

4.39.3

ya ugrāṇām ugrabāhur yajur yo dānavānāṃ balam āsasāda | yena jitāḥ sindhavo yena gāvaḥ sa no muñcatv aṃhasaḥ ||

4.39.4

yasya vaśāsa ṛṣabhāsa ukṣaṇo yasmai mīyante svaravaḥ svarvide | yasmai śukraḥ pavate brahmaśumbhitaḥ sa no muñcatv aṃhasaḥ ||

4.39.5

yasya juṣṭiṃ sominaḥ kāmayante yaṃ havanta iṣuvantaṃ gaviṣṭau | yasminn arkaḥ śiśriye yasminn ojaḥ sa no muñcatv aṃhasaḥ ||

4.39.6

ya uttamaḥ karmakṛtyāya jajñe yasya vīryaṃ prathamasyānubuddham | yenodyato vajro 'bhyāyatāhiṃ sa no muñcatv aṃhasaḥ ||

4.39.7

yaḥ saṃgrāmān nayati saṃ yudhe vaśī yaḥ puṣṭāni saṃsṛjati dvayāni | staumīndraṃ nāthito johavīmi sa no muñcatv aṃhasaḥ ||

4.40.1

śunaṃ vatsān apā karomi śunaṃ badhnāmi tantyām | āgrayaṇaṃ brahmaṇāṃ havis tasmiñ jāgāra kaśyapaḥ ||

4.40.2

bāhuṃ vatsam upanayan pātre gāṃ duhann abravīt | ariṣṭaṃ brahmabhyo haviḥ śivaṃ kṛṇotu kaśyapaḥ ||

4.40.3

trayas tiṣṭhanti sukṛtasya loke trayo 'tīkāśās trīṇi śīrṣāṇy eṣām | trayas tiṣṭhanti parigṛhya kumbhīṃ yathā haviḥ kaśyapa na vyathātai ||

4.40.4

satyāt sambhūto vadati taṇḍulān kṣīra āvapan | ṛṣir brahmabhya āgrayaṇaṃ ni vedayatu kaśyapaḥ ||

4.40.5

ṛtumukhe candrabhāgaḥ pātra odanam ud dharāt | prāśnantu brahmāṇo havir yathā vedena kaśyapaḥ ||

4.40.6

ye bhūtāny asṛjanta ye bhūtāny akalpayan | sarvasya vidvān adhvaryuḥ ṣaṇṇāṃ bhavatu kaśyapaḥ ||

4.40.7

śivā āpo vatsebhyaḥ śivā bhavantv oṣadhīḥ | vāto vatsebhyaḥ kaśyapaḥ śivaḥ śivaṃ tapatu sūryaḥ ||