Kāṇḍa 5

5.1.1

namaḥ piśaṅgabāhvai sindhau jātāyā ugrāyai | yo asyai nama it karad aped asya gṛhād ayat ||

5.1.2

apehi no gṛhebhyo apehi vatsatantyāḥ | ātmānam atra rotsyasy ava roha mahānasāt ||

5.1.3

hā amba suhūtale atho hai sāmanantame | putro yas te pṛśnibāhus tam u tvaṃ sāmanaṃ kṛdhi | atho duhitaraṃ naptrīm atho tvaṃ sāmanā bhava ||

5.1.4

bhūtapatir nir ajatv indraś cetaḥ sadānvāḥ | gṛhasya budhna āsīnās tā vajreṇādhi tiṣṭhatu ||

5.1.5

apetetaḥ sadānvā ahiṃsantīr imaṃ gṛham | dhenur vātra ya sthāsyaty anaḍvān verayā saha ||

5.1.6

yā sahamānā carasi sāsahāna iva rṣabhaḥ | sadānvāghnīṃ tvā vayaṃ jaitrāyācchā vadāmasi ||

5.1.7

sahasva no abhimātiṃ sahasva pṛtanāyataḥ | sahasva sarvā rakṣāṃsi sahamānāsy oṣadhe ||

5.1.8

tvaṃ vyāghrān sahase tvaṃ siṃhām̐ ubhayādataḥ | makṣāś cit kṛṇvānā madhu tvaṃ sahasa oṣadhe ||

5.2.1

iyaṃ pitre rāṣṭry ety agre prathamāya januṣe bhūmaniṣṭhāḥ | tasmā etaṃ surucaṃ hvāram ahyaṃ gharmaṃ śrīṇanti prathamasya dhāsyoḥ ||

5.2.2

brahma jajñānaṃ prathamaṃ purastād vi sīmataḥ suruco vena āvaḥ | sa budhnyā upamā asya viṣṭhāḥ sataś ca yonim asataś ca vi vaḥ ||

5.2.3

pra yo jajñe vidvām̐ asya bandhuṃ viśvāni devo janimā vivakti | brahma brahmaṇa uj jabhāra madhyān nīcād uccā svadhā abhi pra tasthau ||

5.2.4

mahān mahī askabhāyad vi jāto dyāṃ dvitaḥ pārthivaṃ ca rajaḥ | sa budhnād āṣṭra januṣābhy agraṃ bṛhaspatir devatā tasya samrāṭ ||

5.2.5

nūnaṃ tad asya gavyaṃ hinoti maho devasya pūrvasya mahi | eṣa jajñe bahubhiḥ sākam itthā pūrvād ardhād avithuraś ca san nu ||

5.2.6

sa hi divaḥ sa pṛthivyā ṛteṣṭhā mahi kṣāman rajasī vi ṣkabhāyati | ahar yac chukraṃ jyotiṣo janiṣṭa- -adhā dyumanto vi vasantv ariprāḥ ||

5.2.7

evātharvā pitaraṃ viśvadevaṃ bṛhaspatir namasāvocad accha | tvaṃ viśvasya janitā dhāsy agre kavir devān na dabhāya svadhāvaḥ ||

5.2.8

mūrdhnā yo agram abhyarty ojasā bṛhaspatim ā vivāsanti devāḥ | bhinad valaṃ vi mṛdho dardarīti kanikradad gāḥ svar apo jigāya ||

5.3.1

ud apaptad asau sūryaḥ purudṛṣṭo adṛṣṭahā | udāyan raśmibhir hantu- -udāyann arasām̐ akaḥ ||

5.3.2

ny amrucad asau sūryo viśvadṛṣṭo adṛṣṭahā | nimrocan raśmibhir hantu nimrocann arasām̐ akaḥ ||

5.3.3

ye ca dṛṣṭā ye cādṛṣṭā ubhayehāviṣyavaḥ | teṣāṃ vo agrabhaṃ nāma sarve sākaṃ ni jasyata ||

5.3.4

adṛṣṭahananī vīrud amitaujā viṣāsahi | cukākaṇi tvaṃ jajñiṣe sādṛṣṭāñ jātaśo jahi ||

5.3.5

jahi jyeṣṭham adṛṣṭānāṃ sarpāṇāṃ moghacāriṇām | krimīṇāṃ sarvā jātāni ?pauñjaṣṭa iva yavaṃ mṛṇa ||

5.3.6

yaś ca todo yaś ca sarpa ekādaśaś ca yo vṛṣā | cukākaṇi tvaṃ tān vṛśca vṛkṣaṃ paraśumān iva ||

5.3.7

saṃ vṛścaināṃś cukākaṇi vṛkṣaṃ paraśumān iva | krimīṇāṃ sarvā jātāni saṃ dahāgnir ivolapam ||

5.3.8

methiṣṭhā agnir aghalas tviṣīmān krimīṇāṃ jātāni pra dunotu sarvā | bṛhaspater medine jātavedā adṛṣṭān hantu dṛṣadeva māṣān ||

5.4.1

mamāgne varco vihaveṣv astu vayaṃ tvendhānās tanvaṃ puṣema | mahyaṃ namantāṃ pradiśaś catasras tvayādhyakṣeṇa pṛtanā jayema ||

5.4.2

agne manyuṃ pratinudan pareṣāṃ tvaṃ no gopāḥ pari pāhi viśvataḥ | apāñco yantu prabudhā durasyavo 'maiṣāṃ cittaṃ bahudhā vi naśyatu ||

5.4.3

mama devā vihave santu sarva indravanto maruto viṣṇur agniḥ | mamāntarikṣam urulokam astu mahyaṃ vātaḥ pavatāṃ kāme asmin ||

5.4.4

mahyaṃ yajantāṃ mama yānīṣṭā- -ākūtiḥ satyā manaso me astu | eno mā ni gāṃ katamac canāhaṃ viśve devā abhi rakṣantu mām iha ||

5.4.5

mahyaṃ devā draviṇam ā yajantāṃ mamāśīr astu mama devahūtiḥ | daivā hotāraḥ saniṣan na etad ariṣṭāḥ syāma tanvā suvīrāḥ ||

5.4.6

devīḥ ṣaḍ urvīr uru ṇas karātha viśve devāsa iha mādayadhvam | mā hāsmahi prajayā mā dhanena mā radhāma dviṣate soma rājan ||

5.4.7

uruvyacā no mahiṣaḥ śarma yacchād asmin vāje puruhūtaḥ purukṣuḥ | sa naḥ prajāyai haryaśva mṛḍa- -indra mā no rīriṣo mā parā dāḥ ||

5.4.8

dhātā vidhartā bhuvanasya yas patiḥ savitā devo abhimātiṣāhaḥ | bṛhaspatir indrāgnī aśvinobhā devāḥ pāntu yajamānaṃ nirṛthāt ||

5.4.9

ihārvāñcam ati hvaya indraṃ jaitrāya jetave | asmākam astu kevala itaḥ kṛṇotu vīryam ||

5.4.10

arvāñcam indram amuto havāmahe yo gojid dhanajid aśvajid yaḥ | imaṃ no yajñaṃ vihave juṣasva- -asmākaṃ kṛṇmo harivo medinaṃ tvā ||

5.4.11

trātāram indram avitāram indraṃ havehave suhavaṃ śūram indram | huvema śakraṃ puruhūtam indraṃ svasti no maghavān pātv indraḥ ||

5.4.12

tisro devīr mahi me śarma yacchan prajāyai me tanve yac ca puṣṭam | māṃ viśaḥ saṃmanaso juṣantāṃ pitryaṃ kṣetraṃ prati jānātv asmān ||

5.4.13

yo naḥ śakrābhimanyunā- -indrāmitro jighāṃsati | tvaṃ taṃ vṛtrahañ jahi vasv asmabhyam ā bhara ||

5.4.14

ye naḥ śapanty apa te bhavantv indrāgnibhyām apa bādhāmahe tān | ādityā rudrā uparispṛśo mām ugraṃ cettāram adhirājam akran ||

5.5.1

pṛthivī vaśā sāgniṃ garbhaṃ dadhe semaṃ pāhi tasyai te vidheyaṃ tasyai te namas tasmai te svāhā ||

5.5.2

antarikṣaṃ vaśā sā vāyuṃ garbhaṃ (…) ||

5.5.3

dyaur vaśā sā sūryaṃ garbhaṃ (…) ||

5.5.4

ṛg vaśā sā sāma garbhaṃ (…) ||

5.5.5

dakṣiṇā vaśā sā yajñaṃ garbhaṃ (…) ||

5.5.6

viḍ vaśā sā kṣatriyaṃ garbhaṃ (…) ||

5.5.7

vāg vaśā sā parameṣṭhiṇaṃ garbhaṃ (…) ||

5.5.8

vaśā vaśā sā rājanyaṃ garbhaṃ (…) ||

5.5.9

samā vaśā sā saṃvatsaraṃ garbhaṃ dadhe semeṃ pāhi tasyai te vidheyaṃ tasyai te namas tasmai te svāhā ||

5.6.1

sapta sūryā divam anupraviṣṭās tān pathā vā anv eti dakṣiṇāvān | te 'smai sarve ghṛtam ā tapanty ūrjaṃ duhānā anapasphurantaḥ ||

5.6.2

ātapan kṣayati nīcā dāsavyādhī niṣṭapan | adhāyatpatraḥ sūrya ud eti bṛhatīr anu ||

5.6.3

ātaptā pitṝn vidma dasyūn niṣṭaptā vayam | guhā ye 'nye sūryāḥ svadhām anu caranti te ||

5.6.4

dyauḥ sacate 'parāñ janāsaḥ pañcānye paro diva ā kṣiyanti | tāṃ brahma divaṃ bṛhad ā viveśa yas tān praveda prataram atīryata ||

5.6.5

yo dadāti yo dadate yo vā nidhīn śraddadhāno nidhatte | yamo vaivasvatān rājā sarvān rakṣatu śevadhīn ||

5.6.6

mā vidan paryāyiṇo ye dakṣiṇāḥ parimuṣṇanti dattam | sugena tān pathā sarvān yamo rājāti neṣati ||

5.6.7

yena pathā vaivasvato yamo rājeto yayau | agnir nas tena nayatu prajānan vaiśvānaraḥ pathikṛd viśvagṛṣṭiḥ ||

5.6.8

mahi jyotir nihitaṃ martyeṣu yena devāso atarann arātīn | tenemaṃ setum ati geṣma sarve vaiśvānaraṃ jyotir amīva devāḥ ||

5.6.9

ud vayaṃ tamasas pari jyotiṣ paśyanta uttaram | devaṃ devatrā sūryam aganma jyotir uttamam ||

5.6.10

āroko bhrājaḥ paṭaraḥ pataṅgaḥ svarṇaro jyotiṣīmān vibhāsaḥ | te 'smai sarve ghṛtam ā tapanty ūrjaṃ duhānā anapasphurantaḥ ||

5.7.1

samutpatantu pradiśo nabhasvatīḥ sam abhrāṇi vātajūtāni yantu | maharṣabhasya nadato nabhasvato vāśrā āpaḥ pṛthivīṃ tarpayantu ||

5.7.2

sam īkṣayati viṣvagvāto nabhāṃsy apāṃ vegāsaḥ pṛthag ut patantu | varṣasya sargā mahayantu bhūmiṃ pṛthag jāyantām oṣadhayo viśvarūpāḥ ||

5.7.3

abhi kranda stanayārdayodadhiṃ bhūmiṃ parjanya payasā sam aṅdhi | tvayā varṣaṃ bahulam etu sṛṣṭam āśāraiṣī kṛśagur etv astam ||

5.7.4

ud īrayata marutaḥ samudratas tveṣā arkā nabha ut pātayantu | pra varṣayanti taviṣāḥ sudānavo 'pāṃ rasair oṣadhayaḥ sacantām ||

5.7.5

gaṇās tvopa gāyantu mārutāḥ parjanya ghoṣiṇaḥ pṛthak | sargā varṣasya varṣataḥ sṛjantu pṛthivīm abhi ||

5.7.6

sam avantu sudānava utsā ajagarā uta | vātā varṣasya varṣataḥ pra vāntu pṛthivīm anu ||

5.7.7

vāto vidyud abhraṃ varṣaṃ sam avantu sudānavaḥ | pra pyāyasva pra pinvasva saṃ bhūmiṃ payasā sṛja ||

5.7.8

apām agnis tanūbhiḥ saṃvidāno ya oṣadhīnām adhipā babhūva | sa no varṣaṃ vanutāṃ jātavedāḥ prāṇaṃ prajābhyo amṛtaṃ divas pari ||

5.7.9

āśām-āśāṃ vi dyotatāṃ vātā vāntu diśo-diśaḥ | marudbhiḥ pracyutā meghā varṣantu pṛthivīm abhi ||

5.7.10

prajāpatiḥ salilād ā samudrād āpa īrayann udadhim ardayāti | pra pyāyatāṃ vṛṣṇo aśvasya reto 'rvāṅ etena stanayitnunehy apo niṣiñcann asuraḥ pitā naḥ ||

5.7.11

śvasantu gargarā apām ava nīcīr apaḥ sṛja | vadantu pṛśnibāhavo maṇḍūkā īriṇānu ||

5.7.12

saṃvatsaraṃ śaśayānā brāhmaṇā vratacāriṇaḥ | vācaṃ parjanyajinvatāṃ pra maṇḍūkā avādiṣuḥ ||

5.7.13

upapravada maṇḍūki varṣam ā vada tāduri | madhye hradasya plavasva vigṛhya caturaḥ padaḥ ||

5.7.14

mahāntaṃ kośam ud acābhi ṣiñca savidyutaṃ bhavatu vātu vātaḥ | tanvatāṃ yajñaṃ bahudhā visṛṣṭam ānandinīr oṣadhayo bhavantu ||

5.8.1

yāvatī dyāvāpṛthivī varimṇā yāvad vā sapta sindhavo vitaṣṭhuḥ | vācaṃ viṣasya dūṣaṇīṃ tām ito nir avādiṣam ||

5.8.2

suparṇas tvā garutmān viṣa prathamam āvayat | nāropayo nāmādaya utāsmā abhavat pituḥ ||

5.8.3

yāṃ tvāsthat pañcāṅgulir vakrāc cid adhi dhanvanaḥ | apaskambhasya bāhvor nir avocam ahaṃ viṣam ||

5.8.4

śalyād viṣaṃ nir avocam añjanāt parṇadher uta | apāṣṭhāc chṛṅgāt kurmalān nir avocam ahaṃ viṣam ||

5.8.5

arasas ta iṣo śalyo 'tho te 'rasaṃ viṣam | utārasasya vṛkṣasya dhanuṣ ṭe arasārasam ||

5.8.6

ye +'pīṣan ye 'dihan ya āsyan ye 'vāsṛjan | sarve te vadhrayaḥ santu vadhrir viṣagiriṣ kṛtaḥ ||

5.8.7

vadhrayas te khanitāro vadhris tvam asy oṣadhe | vadhriḥ sa parvato girir yato jātam idaṃ viṣam ||

5.8.8

vār idaṃ vārayātai varuṇāvata ābhṛtam | tatrāmṛtasyāsiktaṃ tac cakārārasaṃ viṣam ||

5.9.1

khādireṇa śalilena- -atho kaṅkatadantyā | atho viṣasya yad viṣaṃ tena pāpīr anīnaśam ||

5.9.2

kityā śataparvaṇā sahasrākṣeṇa carmaṇā | tīkṣṇābhir abhribhir vayaṃ nir ajāmaḥ sadānvāḥ ||

5.9.3

sahaḥ sahasvaty asi- -itaḥ kaṇvāḥ paro 'nudaḥ | imā yā adhunāgatā yāś ceha grahaṇīḥ purā ||

5.9.4

na tā itthā na tā ihāva māsatā ukheva śṛṅgavac chiraḥ | sadānvā brahmaṇaspate tīkṣṇaśṛṅgodṛṣann ihi ||

5.9.5

vi te nu manthāḥ śaśrire bibhide te gadohanī | dadau te adya gauḥ kaṇve parehy avaraṃ mṛṇe ||

5.9.6

yās tarke tiṣṭhanti yā valīke yāḥ preṅkhe preṅkhayanta uta yā nu ghorāḥ | yā garbhān pramṛśanti sarvāḥ pāpīr anīnaśam ||

5.9.7

yāś celaṃ vasata uta yā nu dūrśaṃ nīlaṃ piśaṅgam uta lohitaṃ yāḥ | yā garbhān pramṛśanti sarvāḥ pāpīr anīnaśam ||

5.9.8

ākhidantīr vikhidantīḥ prāṇam asyāpi nahyata | durṇāmnīḥ sarvāḥ saṃgatya māmuṣyoc chiṣṭa kiṃ cana ||

5.10.1

iyaṃ yā musalāhatā dṛṣatpiṣṭā viṣāsutā | tapur agnis tapur dyaus tapus tvaṃ sure bhava ||

5.10.2

viṣaṃ te tokma rohayanto 'bruvan viṣaṃ kumbhe 'va srava | viṣaṃ ta āmanaṃ sure viṣaṃ tvaṃ hasta āhitā viṣaṃ pratihitā bhava ||

5.10.3

siṃhas te astu taṇḍulo vyāghraḥ paryodanam | pṛdākūr astu nagnahur vṛkasya hṛdi saṃ srava ||

5.10.4

iyaṃ yā pātra āsūtā śaṣpasrakvā vighasvarī | varāhamanyur ajany uttānapādam ardaya ||

5.10.5

udardanī pracyavanī pāṃsupiṅgā vighasvarī | utkhātamanyur ajani yat paścāt tat puras kṛdhi ||

5.10.6

viṣaṃ te pavane sure rudhiraṃ sthāle astu te | mathnantv anyo anyasmā iṣudhīṃs tvad dhanus tvat ||

5.10.7

viṣapāvāno rudhirāś caranti pātāro martās tavase sura ime | hatāso anye yodhayanty anyāṃs tam ic chaṃsa mahimānaṃ surāyāḥ ||

5.10.8

tān vīrudho visravo balena- -ut pātaya mādaya yodhanāyai | bhinnāratnīr bhinnaśīrṣṇā sam ṛcchatām ārtacelo visravan te surāpaḥ ||

5.10.9

viṣāsutāṃ pibata jarhṛṣāṇā asnā saṃsṛṣṭaṃ rudhireṇa miśrām | chinnahastaś carati grāme antar vairahatyāni bahudhā paṇāyan ||

5.10.10

asimatīm iṣumatīm un nayāmi satād adhi | mādayābhi mādaya- -ahir ivainān pra ropaya- -anyo 'nyasya moc chiṣan ||

5.11.1

anu te manyatām agnir varuṇas te 'nu manyatām | tatas te putro jāyatāṃ sa varmī goṣu yudhyatām ||

5.11.2

idaṃ vāyo 'nu jānīhi- -idam indra bṛhaspate | āñjanaṃ putravedanaṃ kṛṇmaḥ puṃsavanaṃ vayam ||

5.11.3

yenaitat pariṣṭabhitaṃ yasmāt putraṃ na vindase | indrāgnī tasmāt tvainasaḥ pari pātām ahardivi ||

5.11.4

atharvāṇo aṅgiraso viśve devā ṛtāvṛdhaḥ | śṛṇvantv adya me havam asyai putrāya vettave ||

5.11.5

indrāṇī varuṇānī sinīvāly utāditiḥ | varutry ugrā patnīnāṃ putram adya dideṣṭu te ||

5.11.6

putraṃ te mitrāvaruṇā putraṃ devī sarasvatī | putraṃ te aśvinobhā- -ā dhattāṃ puṣkarasrajā ||

5.11.7

yeṣāṃ ca nāma jagrabha yeṣāṃ ca nopasasmara | devās te sarve saṃgatya putraṃ jaivātṛkaṃ dadan ||

5.11.8

ātmana enaṃ nir mimīṣva sa tvat pari jāyatām | tvaṃ bījam urvareva tvaṃ bibhṛhi yonyām ||

5.11.9

pṛthivī saha yajñair nakṣatraiḥ saha sūryaḥ | vātaḥ patatribhiḥ saha putram adya dideṣṭu te ||

5.12.1

vṛṣā jajñe madhavāno 'yaṃ madhumatībhyaḥ | sa u te yonim ā śayāṃ baḍ dakṣaḥ puruṣo bhavan ||

5.12.2

yoniṃ gaccha madhavāna yonyāṃ puruṣo bhava | tataḥ punar nir āyasi śīrṣṇā śroṇī vinonudat ||

5.12.3

bāṇavām̐ iṣudher iva kṛṇvan pitror yathā priyam | śroṇī ahiṃsann antarā daśame māsy āyasi ||

5.12.4

sa pratyaṅ pratyāvarttā- -ite saṃvatsare punaḥ | yathā jīvāsi bhadrayā bibharat tvā mahābhave ||

5.12.5

saṃ te yonim acīkl̥paṃ suprajāstvāya bhadrayā | tatrā siñcasva vṛṣṇyaṃ daśamāsyam avihrutam ||

5.12.6

garbhas te yonim ā śayāṃ garbho jarāyv ā śayām | kumāra ulbam ā śayāṃ tvaṣṭrā kl̥pto yathāparu ||

5.12.7

yathā rājan madhavāna tvaṃ bījaṃ virohasi | evā tvam asyā nir bhindhi kumāraṃ yonyā adhi ||

5.12.8

garbham adhān madhavāno garbhaṃ devo bṛhaspatiḥ | garbhaṃ ta indraś cāgniś ca garbhaṃ dhātā dadhātu te ||

5.13.1

śivaḥ śivābhir vayasvan saṃ gacchasva tanvā jātavedaḥ | ratnaṃ dadhānaḥ sumanāḥ purastād gṛhebhyas tvā varcase nir vapāmi ||

5.13.2

pṛthivyāṃ gharma stabhito 'ntarikṣe divi śritaḥ | dyaur enaṃ sarvataḥ pātu yas tvā pacaty odana ||

5.13.3

ye samudram airayan ye ca sindhuṃ ye 'ntarikṣaṃ pṛthivīm uta dyām | ye vātena sarathaṃ yānti devās tān āpnoty odanapāko atra ||

5.13.4

ṛcā kumbhy adhihitā sāmnā pacyata odanaḥ | aṃśuṃ somasyaitaṃ manye vaiśvadevam idaṃ haviḥ ||

5.13.5

ulūkhale musale ye ca śūrpe bhūmyām ukhāyāṃ yad ivāsasañja | yā vipruṣo yāni nirṇejanāni sarvaṃ tat te brahmaṇā pūrayāmi ||

5.13.6

ūrdhvaḥ prehi mā saṃ vikthā vy asya rajo antaram | rakṣāṃsi sarvā tīrtvā- -athā roha divaṃ tvam ||

5.13.7

turo no aturo bhava saṃ dhībhir dhīyatām ayam | saṃ pṛthivyā sam agninā saṃ sūryasya raśmibhiḥ saṃ devānām apasyayā ||

5.13.8

ājaddviṣaḥ sukṛtasya loke tṛtīye nāke adhi rocane divaḥ | mṛtyoḥ padaṃ yopayanto nv eta paścā nikṛtya mṛtyuṃ padayopanena ||

5.14.1

bhūtyā mukham asi satyasya raśmir uccaiḥśloko divaṃ gaccha | uc chrayethāṃ haviṣkṛtau sādhu devān saparyatam ṛjīṣam apa lumpatam ||

5.14.2

āpo devīr yajñakṛtaś citrā devīr haviṣkṛtaḥ | ekapātra odano 'gniṣṭomena saṃmitaḥ ||

5.14.3

gāyatrī havyavāḍ asi devatāgniḥ sam idhyase | sahasradhāraṃ sukṛtasya loke ghṛtapṛṣṭham amartyau ||

5.14.4

tapaś ca satyaṃ caudanaṃ prāśnītāṃ parameṣṭhinau | tābhyāṃ vai svar ābhṛtaṃ tenādhipatir ucyase ||

5.14.5

urugāyo *'si vāyoḥ prāṇena saṃmitaḥ | apa mṛdhrāṇi maj jahi mukṣīya duritād aham ||

5.14.6

apa rakṣāṃsi tejasā devebhyo havyam arca tam | vyacasvān saprathā asi ||

5.14.7

uccaiḥ suparṇo divam ut patāmuṃ priyaṃ devebhyo mā kṛṇv ṛṣibhyaḥ pari dehi mām | śukraṃ śukreṇa bhakṣayā pibantu sukṛto madhu ||

5.14.8

dvayā devā upa no yajñam āgur yān odano juṣate yaiś ca pṛṣṭaḥ | ādityā aṅgirasaḥ svargam imaṃ prāśnantv ṛtubhir niṣadya ||

5.15.1

pīyūṣasya kṣīrasya sarpiṣo 'nnasyāgraṃ saṃ bharāma etat | etaṃ bhāgam ahutādbhyaḥ pra hiṇmas tan no haviḥ prati gṛhantu devā daivāḥ ||

5.15.2

hutādo 'nye 'hutādo 'nye vaiśvadevaṃ havir ubhaye saṃ caranti | te samyañca iha mādayantām iṣam ūrjaṃ yajamānāya matsva ||

5.15.3

memā bhavo mā śarvo vadhīd gā mā vatsān klomaśvayo vidan naḥ | ye jātā ye ca garbheṣv antar ariṣṭā agne stanam ā rabhantām ||

5.15.4

imā gāvo vijāvatīḥ prajāvatī strīṣu saṃmanaso bhavantu | āsu bhūmāny api pṛñcantu devā āsāṃ vatsān āyuṣā medasā saṃ sṛjāmi ||

5.15.5

pra vīyantāṃ striyo gāvo viṣṇur yonim anu kalpayāti | pratigṛhṇatīr ṛṣabhasya reta ukṣānaḍvāṃś carati vāsitām anu ||

5.15.6

prayatam agraṃ na hinasti kiṃ cana yathākāmaṃ kṛṇuta somyaṃ madhu | sādhu yajñam ahutādo nayantu rāyaspoṣā yajamānāṃ sacantām ||

5.15.7

ni te padāṃ pṛthivī yantu sindhava ud oṣadhayo jihatāṃ preratām irāḥ | parjanyasya maruta udadhiṃ sānv ā hata bhadraṃ sasyaṃ pacyatāṃ modatāṃ jagat ||

5.15.8

sapta ṛṣayaḥ sapta sadāṃsy eṣāṃ daśa kṣipo aśvinoḥ pañca vājāḥ | prāṇo vyāno mana ākūtir vāg devī devebhyo havyaṃ vahatu prajānatī ||

5.15.9

ye ca dṛṣṭā ye cādṛṣṭāḥ krimayaḥ kikṛśāś ca ye | teṣāṃ śirāṃsy asinā chinadmy athāsāṃ vatsān āyuṣā medasā saṃ sṛjāmi ||

5.16.1

dyauś cemaṃ yajñaṃ pṛthivī ca saṃ duhātāṃ mātariśvā pavamānaḥ purastāt | tvaṣṭā vāyuḥ saha somena vāta imaṃ saṃ duhrām anapasphurantaḥ ||

5.16.2

gharmaṃ tapāmy amṛtasya dhārayā devebhyo havyaṃ paride savitre | śukraṃ devāḥ śṛtam adantu havyam āsañ juhvānam amṛtasya yonau ||

5.16.3

ud vāsayāgneḥ śṛtam akarma havyam ā roha pṛṣṭham amṛtasya dhāma | vanaspataya upa barhi stṛṇīta madhvā samantaṃ ghṛtavat karātha ||

5.16.4

yo 'psu yakṣmaḥ śamayāmi taṃ va ūrjā gavyūtiṃ sam anajmy etām | stanyaṃ kṣīram aviṣaṃ vaḥ kṛṇomy asuṃ dhayanto 'pi yūtham eta ||

5.16.5

iḍānāṃ putrā uta mitriyāṇāṃ payo dhayantv ahṛṇīyamānāḥ | ṛtubhiḥ sasyam uta kl̥ptam astv iryo gopā rakṣatu vāyur enāḥ ||

5.16.6

pibata ghṛtaṃ yatidhā va etad guhā hitaṃ nihitaṃ mānaveṣu | viśve devā vaiśvadevaś cāgnau yathābhāgaṃ haviṣo mādayadhvam ||

5.16.7

yo devānām asi śreṣṭho rudras tanticaro vṛṣā | ariṣṭā asmākaṃ vīrā etad astu hutaṃ tava ||

5.16.8

pūrṇam ahaṃ karīṣiṇaṃ śatavantaṃ sahasriṇam | viśvebhir agne devair imaṃ goṣṭhaṃ sahāruham ||

5.17.1

devainasād unmaditaṃ kṣetriyāc chapathād uta | muñcantu tasmāt tvā devā unmattaṃ rakṣasas pari ||

5.17.2

muniṃ bhavantaṃ pari yāni vāvṛtū rakṣāṃsy agna ululā karikratu | atas tvaṃ no adhi pāhi vājinn indreṇa medī bṛhate raṇāya ||

5.17.3

yathāgne devā ṛbhavo manīṣiṇo munim unmattam asṛjan nir enasaḥ | evā te śakro abhayaṃ kṛṇotu mucyasvainaso vi nayāmi rakṣaḥ ||

5.17.4

yathā gāvaś ca bhūmyāṃ puruṣāś ca nyokasaḥ | evonmattasya te mune gṛhṇātu pṛthivī manaḥ ||

5.17.5

muniṃ dādhāra pṛthivī muniṃ dyaur abhi rakṣati | muniṃ hi viśvā bhūtāni munim indro adīdharat parā rakṣaḥ suvāmi te ||

5.17.6

imaṃ me agne puruṣaṃ mumugdhi ya āvitto grāhyā lālapīti | ato *'dhi te kṛṇavad bhāgadheyam anunmadito agado yathāsat ||

5.17.7

agniṣ ṭe ni śamayatu yat ta etan mana uhyate | juhomi vidvāṃs te havir yathānunmadito bhuvaḥ ||

5.17.8

punas tvā dur apsarasaḥ punar vātaḥ punar diśaḥ | punar yamaḥ punar yamasya dūtās te tvā muñcantv aṃhasaḥ | jivātave na martave 'tho ariṣṭatātaye ||

5.18.1

uta devā avahitaṃ devā ud dharatā punaḥ | uto mariṣyantaṃ devā daivāḥ kṛṇutha jīvase ||

5.18.2

ā tvāgamaṃ śaṃtātibhir atho ariṣṭatātibhiḥ | dakṣaṃ te bhadram āhārṣaṃ parā suvāmy āmayat ||

5.18.3

dvāv imau vātau vāta ā sindhor ā parāvataḥ | dakṣaṃ te anya ā vātu parānyo vātu yad rapaḥ ||

5.18.4

ā vāta vāhi bheṣajaṃ vi vāta vāhi yad rapaḥ | tvaṃ hi viśvabheṣajo devānāṃ dūta īyase ||

5.18.5

trāyantām imaṃ devās trāyantāṃ maruto gaṇaiḥ | trāyantāṃ viśvā bhūtāni yathāyam agado 'sati ||

5.18.6

ghṛtena dyāvāpṛthivī ghṛtenāpaḥ sam ukṣata | ghṛtena mucyasvainaso yad ātmakṛtam āritha ||

5.18.7

ayaṃ me hasto bhagavān ayaṃ me bhagavattaraḥ | ayaṃ me viśvabheṣajo 'yaṃ śivābhimarśanaḥ ||

5.18.8

hastābhyāṃ daśaśākhābhyāṃ jihvā vācaḥ purogavī | anāmayitnubhyāṃ śaṃbhubhyāṃ tābhyāṃ tvābhi mṛśāmasi ||

5.18.9

āpa id vā u bheṣajīr āpo amīvacātanīḥ | āpo viśvasya bheṣajīs tās te kṛṇvantu bheṣajam ||

5.19.1

sahṛdayaṃ sāṃmanasyam avidveṣaṃ kṛṇomi vaḥ | anyo anyam abhi haryata vatsaṃ jātam ivāghnyā ||

5.19.2

anuvrataḥ pituḥ putro mātrā bhavatu savrataḥ | jāyā patye madhumatīṃ vācaṃ vadatu śantivām ||

5.19.3

mā bhrātā bhrātaraṃ dvikṣan mā svasāram uta svasā | samyañcaḥ savratā bhūtvā vācaṃ vadata bhadrayā ||

5.19.4

yena devā na viyanti no ca vidviṣate mithaḥ | tat kṛṇmo brahma vo gṛhe saṃjñānaṃ puruṣebhyaḥ ||

5.19.5

jyāyasvantaś cittino mā vi yauṣṭa saṃrādhayantaḥ sadhurāś carantaḥ | anyo anyasmai valgu vadanta eta samagrā stha sadhrīcīnāḥ ||

5.19.6

samānī prapā saha vo 'nnabhāgaḥ samāne yoktre saha vo yunajmi | samyañco 'gniṃ saparyata- -arā nābhim ivābhitaḥ ||

5.19.7

yena devā haviṣā yajatrā apa pāpmānam aghnata | krodhaṃ manyum anṛtaṃ bhāmaṃ duruktam abhiśocanam āre yakṣmaṃ ni dadhmasi ||

5.19.8

sadhrīcīnān vaḥ saṃmanasaḥ kṛṇomy ekaśnuṣṭīn saṃvananena saṃhṛdaḥ | devā ived amṛtaṃ rakṣamāṇāḥ sāyaṃprātaḥ susamitir vo astu ||

5.20.1

paro 'pehi paraś cara paras tarda parastaram | agner vātasya dhrājyā apa bādhe ahaṃ tvām ||

5.20.2

udakasyedam ayanaṃ vātasyedaṃ nibhañjanam | agner dhūmasyāyaṃ panthā neha tardāyanaṃ tava ||

5.20.3

pari tvā kṛṣṇavartanir agnir dhūmenārciṣā | sa tvaṃ tarda paraś cara- -anyat tarddhi tṛṇaṃ yavāt ||

5.20.4

ye tardā asureṣitā devebhir iṣitāś ca ye | sarvāṃs tān brahmaṇā vayaṃ śalabhāñ jambhayāmasi ||

5.20.5

śalabhasya śalabhyās tardasyo patatriṇaḥ | agner vātasya dhrājyā- -api nahyāma āsyam ||

5.20.6

idaṃ yad gavi bheṣajaṃ viśvād rūpāt samābhṛtam | ākhor ghuṇasya tardasya teṣāṃ snāvnāpi nahyata ||

5.20.7

dṛṣṭā tvam asi gandhena- -oṣadhir ghuṇajambhanī | ākhor ghuṇasya jātāni tāni jambhaya tejasā ||

5.20.8

tūlaṃ tardas tṛṇasyāttu mūlam ākhur dhiyeṣitaḥ | atho vṛkṣasya phalgu yad ghuṇā adantu mā yavam ||

5.21.1

dyauś ca naḥ pitā pṛthivī ca mātā- -agniś ca nṛcakṣā jātavedāḥ | te takmānam adharāñcaṃ nyañcaṃ daśāhnam asyantv adhi dūram asmat ||

5.21.2

takman yaṃ te kṣetrabhāgam apābhajaṃ pṛthivyāḥ pūrve ardhe | atihāya tam atha no hinassi grāhiḥ kila tvā grahīṣyati kilāsaśīrṣaḥ ||

5.21.3

takman parvatā ime himavantaḥ somapṛṣṭhāḥ | vātaṃ dūtaṃ bhiṣajaṃ no akran naśyeto maraṭām̐ abhi ||

5.21.4

na tvā striyaḥ kāmayante na pumāṃsaḥ katame cana | neha takmakāmyā- -alpo roditi no mahān ||

5.21.5

mā no hiṃsīr mahato mā hiṃsīr mahyas tvam | kumārān babhro mā hiṃsīr mā no hiṃsīḥ kumāryaḥ ||

5.21.6

yaḥ sākam utpātayasi balāsaṃ kāsam udrajam | bhīmās te takman hetayas tābhi ṣma pari vṛṅdhi naḥ ||

5.21.7

anyakṣetre na ramate sahasrākṣo 'martyaḥ | abhūd u prārthas takmā sa u no mṛḍayiṣyati ||

5.21.8

takman na ta ihāśvā na gāvo neha te gṛhāḥ | śakambharasya muṣṭihā punar gaccha mahāvṛṣān ||

5.22.1

yau hemantaṃ svāpayatho balena- -arvāg devebhya uta yau paro divaḥ | bhavārudrayoḥ sumatiṃ vṛṇīmahe 'nyatrāsmad aghaviṣā vy etu ||

5.22.2

yo dyām ātanoti yo 'ntarikṣaṃ stabhnāty ojaso jāyamānaḥ | tasmai rudrāya haviṣā vidhema- -anyatrāsmad aghaviṣā vy etu ||

5.22.3

yayor vadhān nāpapadyate kiṃ cana- -antar deveṣūta mānuṣeṣu | tābhyāṃ rudrābhyāṃ haviṣā vidhema- -anyatrāsmad aghaviṣā vy etu ||

5.22.4

yāv īśāte paśūnāṃ pārthivānāṃ catuṣpadām uta vā ye dvipādaḥ | tābhyāṃ rudrābhyāṃ haviṣā vidhema- -anyatrāsmad aghaviṣā vy etu ||

5.22.5

yasya pratihitāyāḥ saṃ viśanta āraṇyāḥ paśava uta grāmyāsaḥ | tasmai rudrāya haviṣā vidhema- -anyatrāsmad aghaviṣā vy etu ||

5.22.6

yasmād oṣadhayo barbhriyamāṇā yanti yasmād vṛkṣāso na viyanti viśve | vayāṃsi yasmāt pracaranti bhīṣā tasmai rudrāya haviṣā vidhema- -anyatrāsmad aghaviṣā vy etu ||

5.22.7

yaḥ parvatān vidadhe 'ti vidvān yo bhūtāni kalpayati prajānan | tasmai rudrāya haviṣā vidhema- -anyatrāsmad aghaviṣā vy etu ||

5.22.8

yāv īśānau carato dvipado 'sya catuṣpadaḥ | yā ugrau kṣipradhanvānau tābhyāṃ rudrābhyāṃ haviṣā vidhema- -anyatrāsmad aghaviṣā vy etu ||

5.22.9

punaś cakṣuḥ punaḥ prāṇaṃ punar āyur dhehi no jātavedaḥ | rudra jalāṣabheṣaja vidvāṃsas ta enā haviṣā vidhema- -anyatrāsmad aghaviṣā vy etu ||

5.23.1

īśānaṃ tvā bheṣajānāṃ vijeṣāya vṛṇīmahe | cakre sahasravīryaṃ sarasvān oṣadhe tvā ||

5.23.2

satyajitaṃ śapathayāvanīṃ sahamānāṃ punaḥsarām | sarvāḥ sam ahvy oṣadhīr ito mā pārayān iti ||

5.23.3

yā śaśāpa śapanena yā vā gha mūram ādadhe | yā vā rasasya prāśāya- -ārebhe tokam attu sā ||

5.23.4

pratīcīnaphalo hi tvam apāmārga babhūvitha | sarvān mac chapathām̐ adhi varīyo yāvayā tvam ||

5.23.5

yac ca bhrātṛvyaḥ śapati yac ca jāmiḥ śapāti naḥ | brahmā yan manyutaḥ śapāt sarvaṃ tan no adhaspadam ||

5.23.6

yāṃ te cakrur āme pātre yāṃ sūtre nīlalohite | āme māṃse kṛtyāṃ yāṃ cakrus tayā kṛtyākṛto jahi ||

5.23.7

duṣvapnyaṃ durjīvitaṃ rakṣo abhvam arāyyaḥ | durvācaḥ sarvaṃ durbhūtaṃ tad ito nāśayāmasi ||

5.23.8

kṣudhāmāraṃ tṛṣṇāmāram agotām anapatyatām | apāmārga tvayā vayaṃ sarvaṃ tad apa mṛjmahe ||

5.24.1

samā bhūmiḥ sūryeṇa- -ahnā rātrī samāvatī | kṛṇomi satyam ūtaye arasāḥ santu kṛtvarīḥ ||

5.24.2

yo devāḥ kṛtyāṃ kṛtvā harād aviduṣo gṛham | vatso dhārur iva mātaraṃ taṃ pratyag upa padyatām ||

5.24.3

amā kṛtvā pāpmānaṃ yas tayānyaṃ jighāṃsati | aśmānas tasyāṃ dagdhāyāṃ bahulāḥ phaṭ karikratu ||

5.24.4

sahasradhāman viśikhān vigrīvāñ chāyayā tvam | prati sma cakruṣe kṛtyāṃ priyāṃ priyāvate hara ||

5.24.5

yā cakāra na śaśāka śaśre pādam aṅgulim | cakāra bhadram asmabhyam abhagā bhagavadbhyaḥ ||

5.24.6

anayāham oṣadhyā sarvāḥ kṛtyā adūṣayam | yāṃ kṣetre cakrur yāṃ gobhyo yāṃ vā te puruṣebhyaḥ ||

5.24.7

apāmārgo 'pa mārṣṭu kṣetriyaṃ śapathāṃś ca mat | apāha yātudhānyo 'pa sarvā arāyyaḥ ||

5.24.8

apamṛjya yātudhānān apa sarvā arāyyaḥ | apāmārga prajayā tvaṃ rayyā sacasva naḥ ||

5.25.1

utevāsy abandhukṛd utāsy anujāmikaḥ | uto kṛtyākṛtaṃ prajāṃ naḍam ivā chindhi vārṣikam ||

5.25.2

brāhmaṇena paryukto 'si kaṇvena nārṣadena | senevaiṣi tviṣīmatī na tatra bhayam asti yatra prāpnoṣy oṣadhe ||

5.25.3

agre 'sy oṣadhīnāṃ jyotiṣevābhidīpayan | uta pākasya trātāsy uta hantāsi rakṣasaḥ ||

5.25.4

yad ado devā asurāṃs tvayāgre nirakṛṇvata | tasmād adhi tvam oṣadhe apāmārgo ajāyathāḥ ||

5.25.5

vibhindatī śataśākhā vibhindan nāma te pitā | pratyag vi bhindhi taṃ tvaṃ yo asmām̐ abhidāsati ||

5.25.6

asad bhūmyāḥ sam abhavat tad dyām eti bṛhad vacaḥ | tad it tato vidhūmayat pratyak kartāram ṛcchatu ||

5.25.7

pratyaṅ hi saṃbabhūvitha pratīcīnaphalas tvam | pratīcīḥ kṛtyā ākṛtya- -amuṃ kṛtyākṛtaṃ jahi ||

5.25.8

śatena mā pari pāhi sahasreṇābhi rakṣa mā | indras te vīrudhāṃ pata ugra ojmānam ā dadhau ||

5.26.1

arātyā dyāvāpṛthivī chintaṃ mūlam atho śiraḥ | vicchidya madhyataḥ pṛṣṭīs tāṃ kṛṇvāthām adhaspadam ||

5.26.2

idaṃ śṛṇu jātavedo yad amuṣyā vaco mama | arātyāḥ sarvam ic chiraḥ praśnaṃ vṛhatam aśvinā ||

5.26.3

yā svapnayā carati gaur bhūtvā janām̐ anu | arātim indra tvaṃ jahi tām agnir ivasā dahāt ||

5.26.4

śreṣṭho me rājā varuṇo havaṃ satyena gacchatu | arātiṃ hatvā santokām ugro devo 'bhi dāsatu ||

5.26.5

deṣṭrī ca yā sinīvālī sapta ca śrotyā yāḥ | arātiṃ viśvā bhūtāni ghnantu dāsīm ivāgasi ||

5.26.6

somo rājauṣadhībhiḥ sūryācandramasā ubhā | arātiṃ sarve gandharvā ghnantv apsarasaś ca yāḥ ||

5.26.7

bhavo rājā bhavāśarvāv indro vāyur bṛhaspatiḥ | tvaṣṭā me adhyakṣaḥ pūṣā te 'rātiṃ ghnantu sarvadā ||

5.26.8

ye ca devā bhūmicarā ye cāmī divy āsate | ye antarikṣasyeśate te 'rātiṃ ghnantu savratāḥ ||

5.26.9

yā ceṣitāsurair devebhir iṣitā ca yā | atho yā manyor jāyate 'rātiṃ hanmi brahmaṇā ||

5.27.1

tad in nu me acacchadan mahad yakṣaṃ bṛhad vapuḥ | viśvair yad devair nirṛtis tanā yujā saṃ mṛtyor iha jāyate ||

5.27.2

amamriścitsāprathovadadahim ahirājantam ojasā | āyuṃ cit kutsam atithigvam ardaya vi nikilbindam ojasā ||

5.27.3

yāvatī dyāvāpṛthivī varimṇā yāvad vā sapta sindhavo mahitvā | tāvatī nirṛtir viśvavārā viśvasya yā jāyamānasya veda ||

5.27.4

viśvasya hi jāyamānasya devi puṣṭasya vā puṣṭapatir babhūvitha | namo 'stu te nirṛte mā tv asmān parā bhujo nāparaṃ hātayāsi ||

5.27.5

devīm ahaṃ nirṛtiṃ manyamānaḥ piteva putraṃ na sace vacobhiḥ | viśvasya yā jāyamānasya veda śiraḥśiraḥ prati sūro 'nu tasthe ||

5.27.6

asunvantam ayajamānam iccha stenasyetyāṃ taskarasyānu śikṣa | svapantam iccha sā ta ityā namas tu te nirṛte 'haṃ kṛṇomi ||

5.27.7

asunvakān nirṛtiḥ saṃjighatsur nāsyāḥ pitā vidyate nota mātā | madhyāt svasrām anu jaghāna sarvaṃ na devānām asuryaṃ sam āpa ||

5.27.8

yad asya pāre tamasaḥ śukraṃ jyotir ajāyata | tan naḥ parṣad ati dviṣo 'gne vaiśvānara dyumat ||

5.28.1

pramucyamānaṃ bhuvanasya gopaḥ paśuṃ no atra prati bhāgam etu | agnir yajñaṃ trivṛtaṃ saptatantuṃ devo devebhyo havyaṃ vahatu prajānan ||

5.28.2

yau te daṃṣṭrau sudihau ropayiṣṇū nir hvayete dakṣiṇāḥ saṃ ca paśyataḥ | anāṣṭraṃ naḥ pitaras tat kṛṇotu yūpe baddhaṃ pramumucimā yad annam ||

5.28.3

ahrastas tvam aviduṣṭaḥ parehi- -indrasya goṣṭham api dhāva vidvān | dhīrāsas tvā kavayaḥ saṃ mṛjantv iṣam ūrjaṃ yajamānāya matsva ||

5.28.4

ṛṣibhiṣ ṭvā saptabhir atriṇāhaṃ prati gṛhṇāmi bhuvane syonam | jamadagniḥ kaśyapaḥ svādv etad bharadvājo madhv annaṃ kṛṇotu | pratigrahītre gotamo vasiṣṭho viśvāmitro daduṣe śarma yacchāt ||

5.28.5

yan no agraṃ haviṣa ājagāma- -annasya pātram uta sarpiṣo vā | yad vā dhanaṃ vahator ājagāma- -agniṣ ṭad dhotā suhutaṃ kṛṇotu ||

5.28.6

yad ājyaṃ pratijagrabha yāṃś ca vrīhīn ajaṃ candreṇa saha yaj jaghāsa | bṛhaspatir haviṣo no vidhartā mā no hiṃsīc chāgo aśvo vaśā ca ||

5.28.7

agnir na etat prati gṛhṇātu vidvān bṛhaspatiḥ praty etu prajānan | indro marutvān suhutaṃ kṛṇotv ayakṣmam anamīvaṃ te astu ||

5.28.8

yan no dadur varāham akṣitaṃ vasu yad vā talpam upadhānena naḥ saha | yad vāviyūthaṃ saha vṛṣṇyā no agniṣ ṭad dhotā suhutaṃ kṛṇotu ||

5.28.9

yan naḥ śālāṃ viśvabhogām imāṃ dadur gṛhaṃ vā yoktraṃ saha kṛttyota | yad vā hara upanāhena devā agniṣ ṭad dhotā suhutaṃ kṛṇotu ||

5.29.1

sūrye varca iti yac chuśravāhaṃ yena prajā jyotiragrāś caranti | some varco yad goṣu varco mayi devā rāṣṭrabhṛtas tad akran ||

5.29.2

yajñe varco maruto yad adṛṃhan vāyuḥ paśūn asṛjat saṃ bhagena | gandharvāṇām apsarasāṃ yad apsu mayi (…) ||

5.29.3

yajñe varco yajamāne ca varca udābhiṣikte rājani yac ca varcaḥ | dakṣiṇāyāṃ varco adhi yan (…) ||

5.29.4

rathe varco rathavāhane ca varca iṣudhau varcaḥ kavace ca varcaḥ | aśveṣu varco adhi yan (…) ||

5.29.5

sabhāyāṃ varcaḥ samityāṃ ca varco vadhvāṃ varca uta varco vareṣu | surāyāṃ varco adhi yan (…) ||

5.29.6

siṃhe varca uta varco vyāghre vṛke varco madhuhāre ca varcaḥ | śyene varcaḥ patvanāṃ yad babhūva (…) ||

5.29.7

hiraṇyavarcasam uta hastivarcasaṃ saṃgrāmaṃ yaj jajñuṣāṃ varca āhuḥ | kṛṣyāṃ kṣetra ṛṣayo janyānajur mayi devā rāṣṭrabhṛtas tad akran ||

5.29.8

mayi varco mayi śravo mayi dyumnaṃ mayi tviṣiḥ | adhaspadaṃ pṛtanyavo 'haṃ bhūyāsam uttamaḥ ||

5.30.1

payasvatīr oṣadhayaḥ payasvan māmakaṃ vacaḥ | atho payasvatāṃ paya ā harāmi sahasraśaḥ ||

5.30.2

ahaṃ veda yathā payaś cakāra dhānyaṃ bahu | saṃbhṛtvā nāmā yo devas taṃ vayaṃ yajāmahe sarvasyāyajvano gṛhe ||

5.30.3

yathā dyauś ca pṛthivī ca tasthatur dharuṇāya kam | evā sphātiṃ ni tanomi mayāreṣu khaleṣu ca ||

5.30.4

yathā kūpaḥ śatadhāraḥ sahasradhāro akṣitaḥ | evā me astu dhānyaṃ sahasradhāram akṣitam ||

5.30.5

śatahasta samāhara sahasrahasta saṃ kira | yatheha sphātir āyati kṛtasya kāryasya ca ||

5.30.6

imā yāḥ pañca pradiśo mānavīḥ pañca kṛṣṭayaḥ | sarvāḥ śaṃbhūr mayobhuvo vṛṣṭe śāpaṃ nadīr iva- -iha sphātiṃ samāvahān ||

5.30.7

iha sphātir oṣadhīnāṃ devānām uta saṃgamaḥ | ihaivāśvinor astu dvāparāśvo ruhat ||

5.30.8

tisro mātrā gandharvāṇāṃ catasro gṛhapatnyāḥ | tāsāṃ yā sphātir uttamā tayā tvābhi mṛśāmasi ||

5.30.9

jyeṣṭhasya tvāṅgirasasya hastābhyām ā rabhāmahe | yathāsad bahudhānyam ayakṣmaṃ bahupūruṣam ||

5.31.1

atyāsarat prathamā dhokṣyamāṇā sarvān yajñān bibhratī vaiśvadevī | upa vatsaṃ sṛjata vāśyate gaur vy asṛṣṭa sumanā hiṃ kṛṇoti ||

5.31.2

badhāna vatsam abhi dhehi bhuñjatīṃ ni dya godhug upa sīda dugdhi | iḍām asmā odanaṃ pinvamānā kīlālaṃ ghṛtaṃ madam annabhāgam ||

5.31.3

sā dhāvatu yamarājñaḥ savatsā sukṛtāṃ pathā prathameha dattā | atṛṣṭa dattā prathamedam āgan vatsena gāṃ saṃ sṛja viśvarūpām ||

5.31.4

prathamedam āgan prathamā dattetād yasmim̐l loke sadya u tvā dadāti | sainaṃ dheno prathamā pārayāsi śraddhayā dattā parame vyoman ||

5.31.5

jānīhi sma saṃskṛte dheno gopatiṃ yas tvā dadāti prathamāṃ svadhānām | pūrvā hi tatra sukṛtaḥ parehy athaiṣa aitā jarasaḥ parastāt ||

5.31.6

ati dhenur anaḍvāham aty anyad vayo akramīt | ati vatsānāṃ pitaraṃ ṛṣabhaṃ pratimāsarat ||

5.31.7

jyotiṣmatī sukṛto yāhi sūre syonās te dheno patayo bhavantu | sapta tvā sūryā anvātapantu yamaṃ dhāva māti saraḥ parācīḥ ||

5.31.8

dātre *'mutra mahyaṃ duhānā- -ubhau lokau bhuñjatī vi kramasva | iṣam ūrjaṃ dakṣiṇāḥ saṃvasānā bhagasya dhārām avase pratīmaḥ ||

5.31.9

sahasrāṅgā śataṃ jyotīṃṣy asyā yajñasya paprir amṛtā svargā | sā na aitu dakṣiṇā viśvarūpā- -ahiṃsantīṃ prati gṛhṇīma enām ||

5.32.1

ye te pāśā varuṇa sapta saptatīs tredhā tiṣṭhanti viṣitā ruśantaḥ | sinanti sarve anṛtaṃ vadantaṃ yaḥ satyavādy ati taṃ sṛjanti ||

5.32.2

iha spaśaḥ pra carantīme asya sahasrākṣā ati paśyanti bhūmim | yo 'sya vrataṃ pramināti kaś ca na sa mucyate varuṇasya pāśāt ||

5.32.3

uteyam asya pṛthivī samīcy utāsau dyaur bṛhatī dūreantā | uto samudro varuṇasya kukṣā utāsminn alpa udake namuktaḥ ||

5.32.4

yas tiṣṭhati manasā yaś ca vañcati yo nilāyaṃ carati yaḥ pralāyam | dvau yadyad vadataḥ sanniṣadya rājā tad veda varuṇas tṛtīyaḥ ||

5.32.5

sarvaṃ tad rajā varuṇo vi caṣṭe yad antarā rodasī yat parastāt | saṃkhyātā asya nimiṣo janānām akṣān na śvaghnī bhuvanā mimīte ||

5.32.6

tvam eva rājan varuṇa dhartā devānām asi viśvarūpaḥ | duścarmāstv adhamaḥ piśaṅgo yaḥ satyāṃ vācam anṛtena hanti ||

5.32.7

yaḥ samāmyo varuṇo yo vyāmyo yaḥ sandeśyo varuṇo yo videśyaḥ | yo daivyo varuṇo yaś ca mānuṣaḥ sarvāṃs tve tān prati muñcāmy atra ||

5.32.8

śatena pāśair varuṇābhi dhehi mā te mocy anṛtavāṅ nṛcakṣaḥ | āstāṃ jālma udaraṃ śraṃsayitvā kośa ivābandhraḥ parikṛtyamānaḥ ||

5.32.9

uto tvat pra pātayaty uto tvad api nahyati | uto tvad asvakaṃ kṛtvā rājā varuṇa īyate ||

5.32.10

ainaṃ chinatti varuṇo naḍaṃ kaśipune yathā | mūlaṃ tasya vṛścati ya enaṃ pramimīṣati ||

5.33.1

ya imāṃ devo mekhalām ābabandha yaḥ saṃnanāha ya u mā yuyoja | yasya devasya praśiṣā carāmi sa pāram icchāt sa u mā vi muñcāt ||

5.33.2

āhutāsy abhihuta ṛṣīṇām asy āyudham | pūrvā vratasya prāśnatī vīraghnī bhava mekhale ||

5.33.3

mṛtyor ahaṃ brahmacārī yad asmi bhūtān niryācan puruṣaṃ yamāya | tam ahaṃ brahmaṇā tapasā śrameṇa- -anayainaṃ mekhalayā sināmi ||

5.33.4

ayaṃ vajras tarpayatāṃ vratena- -avāsya rāṣṭram abhi hantu jīvam | bhinattu skandhān pra śṛṇātūṣṇihāḥ ||

5.33.5

adharottaram adharottareṇa gūḍhaḥ pṛthivyā mot sṛpat | vajreṇāvahataḥ śayām ||

5.33.6

yo jināti tam anv iccha yo jināti tam ij jahi | jinato vajra sāyaka sīmantam anvañcam anu pātaya ||

5.33.7

yad aśnāmi balaṃ kurve vajram ā dadā iti | skandhān amuṣya śātayan vṛtrasyeva śacīpatiḥ ||

5.33.8

yat pibāmi saṃ pibāmi samudra iva saṃpibaḥ | prāṇān amuṣya saṃpiban saṃ pibāmy ahaṃ pibam ||

5.33.9

yad girāmi saṃ girāmi samudra iva saṃgiraḥ | prāṇān amuṣya saṃgiran saṃ girāmy ahaṃ giram ||

5.33.10

śraddhāyā duhitā tapaso 'dhi jātā svasa rṣīṇāṃ bhūtakṛtāṃ babhūva | sā no mekhale matim ā dhehi medhām atho no dhehi tapa indriyaṃ ca ||

5.33.11

yāṃ tvā pūrve bhūtakṛta ṛṣayaḥ paribedhire | sā tvaṃ pari ṣvajasva mā dīrghāyutvāya mekhale ||

5.34.1

aśaṃ te śvaśrūr vadatu śvaśuras te aśantaram | devā te abhiśocanaṃ brahma vidveṣaṇaṃ kṛtam ||

5.34.2

ā krandayolulā kuru vācam ā dhehy apriyām | śiro lipsasva hastābhyāṃ keśās te abhiśocanam ||

5.34.3

ye keśā yau pratidhī yat kurīraṃ ya opaśaḥ | atho ye te svāḥ santi sarve te te 'bhiśocanam ||

5.34.4

apa trasa paridhānād unmādanaṃ kṛṇomi te | atho yat te svaṃ vāsaḥ sarvaṃ tat te 'bhiśocanam ||

5.34.5

arkam addhi pra patāto municakṣuṃ kṛṇomi te | atho śvabhyo rāyadbhyaṃ prati sma gaṅgaṇaṃ kuru ||

5.34.6

ut tiṣṭhāre palāyasva marīcīnāṃ padaṃ bhava | atho yat kāryaṃ kurv āśāṃ sam ṛṣa muṣkayoḥ ||

5.34.7

upa kṣvedābhi cālaya vātaś tūlam ivaijaya | dadbhiḥ saṃdaśya bāhvor udaddhi muravasthiye ||

5.34.8

abhi gāya śābaleyaṃ śauṇeyaṃ sādhuvāhinam | kālmāṣeyasya carkṛdhy āyataḥ prati cālaya ||

5.34.9

ṛśyapucchaṃ śunaḥpucchaṃ vātaraṃhaṃ manojavam | taṃ te rathaṃ saṃ bharantu devās tenā carāsi patim icchamānā ||

5.35.1

agnaye sam anaman tasmai pṛthivyā sam anaman | yathāgnaye pṛthivyā samanamann evā mahyaṃ saṃnamaḥ saṃ namantu | vittiṃ bhūtiṃ puṣṭiṃ paśūn brahma brāhmaṇavarcasam | saṃnataya stha saṃ me namata svāhā ||

5.35.2

vāyave sam anaman tasmā antarikṣeṇa sam anaman | yathā vāyave antarikṣeṇa samanaman (…) ||

5.35.3

sūryāya sam anaman tasmai divā sam anaman | yathā sūryāya divā samanaman (…) ||

5.35.4

candrāya sam anaman tasmai nakṣatraiḥ sam anaman | yathā candrāya nakṣatraiḥ samanaman (…) ||

5.35.5

somāya sam anaman tasmā oṣadhībhiḥ sam anaman | yathā somāyauṣadhībhiḥ samanaman (…) ||

5.35.6

yajñāya sam anaman tasmai dakṣiṇābhiḥ sam anaman | yathā yajñāya dakṣiṇābhiḥ samanaman (…) ||

5.35.7

samudrāya sam anaman tasmai nadībhiḥ sam anaman | yathā samudrāya nadībhiḥ samanaman (…) ||

5.35.8

brahmaṇe sam anaman tasmai brahmacāribhiḥ sam anaman | yathā brahmaṇe brahmacāribhiḥ samanaman (…) ||

5.35.9

indrāya sam anaman tasmai vīryeṇa sam anaman | yathendrāya vīryeṇa samanaman (…) ||

5.35.10

devebhyaḥ sam anaman tebhyo 'mṛtena sam anaman | yathā devebhyo 'mṛtena samanaman (…) ||

5.35.11

prajāpataye sam anaman tasmai prajābhiḥ sam anaman | yathā prajāpataye prajābhiḥ samanamann evā mahyaṃ saṃnamaḥ saṃ namantu | vittiṃ bhūtiṃ puṣṭiṃ paśūn brahma brāhmaṇavarcasam | saṃnataya stha saṃ me namata svāhā ||

5.35.12

sapta saṃnamo 'ṣṭamī dhītisādhanī | sakāmān adhvanaḥ kṛṇu saṃjñānam astu vo dhane ||

5.36.1

ye vāruṇā uta nairṛtā vanaspatīnāṃ vīrudhāṃ ca pāśāḥ | ye bhaumā bhūmyā adhi saṃbabhūvus te tvā na hiṃsāñ chivatātir astu te ||

5.36.2

ye antarikṣe divi ye ca pāśā anne vicṛttā bahudhā sinanti | ye paśubhyo adhi saṃbabhūvus te tvā na hiṃsāñ chivatātir astu te ||

5.36.3

yaṃ mānuṣaṃ manuṣyāḥ śapante yāṃ vā hotrāṃ pitryām ārabhante | samāmyo varuṇo ya ājagāma sa tvā na hiṃsāc chivatātir astu te ||

5.36.4

apaḥ pragāhya yadi vā samāmiṣe agnim ārebhiṣe yadi vā samiddham | vidvān avidvān anṛtaṃ yad uvaktha tat tvā na hiṃsāc chivatātir astu te ||

5.36.5

yat pratīcyāṃ dṛṣatpiṣṭām̐ āmapeṣām̐ āmapātre papātha | hīnaḥ satyenānṛtaṃ yad uvaktha tat tvā na hiṃsāc chivatātir astu te ||

5.36.6

yaṃ bāṇavantaṃ sudihaṃ saṃbharanti yaṃ vā hastaṃ brāhmaṇasyārabhante | samāmyo varuṇo yaṃ jaghāna tasya śmaśānād adhi loṣṭa ābhṛtaḥ sa tvā na hiṃsāc chivatātir astu te ||

5.36.7

yaṃ grāvāṇam ārabhante yenāṃśūn abhiṣuṇvanti somam | yad vā dhanaṃ dhanakāmo niremiṣe kṣetraṃ gām aśvaṃ puruṣaṃ vobhayādat tat tvā na hiṃsāc chivatātir astu te ||

5.36.8

apaḥ pragāhya yadi vā vyāmiṣe agnim ārebhiṣe yadi vā samiddham | jāmyā hastaṃ kṛtam ārebhiṣe dhanur vottatam iti cakramitha | manyau vā rājño varuṇasyāsi saktaḥ sa tvā na hiṃsāc chivatātir astu te ||

5.37.1

yā te prajāpihitā parābhūd yonir vā mugdhā nihitā piśācaiḥ | āsnānaṃ vā yad abhitaṣṭhātha ghoraṃ sarvaṃ tat te brahmaṇā sūdayāmi ||

5.37.2

yady asyāḥ prajā varuṇena guṣpitā durṇāmāno vā ṛtviyam asyā rihanti | dveṣāt sāpatnād yadi cakrur asyā ayaṃ tā nāṣṭrā apa hantv agniḥ ||

5.37.3

asyā striyā yadi lakṣmīr aputryā garbho vāsyā yātudhānaiḥ parābhṛtaḥ | duḥsvapnyaṃ vā yat svapatī dadarśa- -indrāgnī tat kṛṇutāṃ bhadrayā punaḥ ||

5.37.4

devainasād yadi putraṃ na vindase manuṣyāṇāṃ vā tvā śapatho rarādha | pitṛbhir vā te yadi sūtaḥ pariṣṭhita idaṃ taṃ niṣ kṛṇmo janayāsi putram ||

5.37.5

vaiśvānaro janmanā jātavedāḥ prajāpatiḥ siñcatu reto asyām | bādhatāṃ dveṣo nirṛtiṃ parācaiḥ putriṇīm imāṃ prasvaṃ kṛṇotu ||

5.37.6

iha prajām agnir asyai dadhātv ādityebhir vasubhiḥ saṃvidānaḥ | viśve devā havam ā yantu ma imaṃ putro asyā jāyatāṃ vīryāvān ||

5.37.7

yena devy aditir garbham ādadhe yena prajā asṛjata prajāpatiḥ | tenāham asyai haviṣā juhomi yathā pumāṃsaṃ janayāti putram ||

5.37.8

vanve te putraṃ pari devatābhyo anu manyantāṃ marutaḥ pṛśnimātaraḥ | garbhas tvā daśamāsyaḥ pra viśatu kumāraṃ jātaṃ pipṛtām upasthe ||

5.38.1

keśy agniṃ keśī viṣaṃ keśī bibharti rodasī | keśī viśvaṃ svar dṛśe keśīdaṃ jyotir ucyate ||

5.38.2

munayo vātaraśanāḥ piśaṅgā vasate malāḥ | vātasyānu dhrājiṃ yanti yad devāso ayukṣata ||

5.38.3

unmaditā mauneyena vātām̐ ā tasthimā vayam | śarīred asmākaṃ yūyaṃ martāso abhi paśyatha ||

5.38.4

antarikṣeṇa patati svar bhūtāvacākaśat | munir devasya-devasya saukṛtyāya sakhā hitaḥ ||

5.38.5

indrasyāśvo vāyoḥ sakhā- -atho deveṣito muniḥ | ubhā samudrāv ā kṣayati sadyaḥ pūrvam utāparam ||

5.38.6

gandharvāṇām apsarasāṃ devānāṃ caraṇe caran | muniḥ ketasya saṃvidvān sakhā svādur madintamaḥ ||

5.38.7

vāyur asmā upāmanthat pinaṣṭi smā kunaṃnamā | munir viṣasya pātreṇa yad rudreṇāpibat saha ||

5.38.8

saṃyukte dyāvāpṛthivī tiṣṭhantī avicartye | keśenaikasya devasya vy aṣṭabhnāc chacīpatiḥ ||

5.39.1

na tam aṃho na duritaṃ devāso aṣṭa martyam | sajoṣaso yam aryamā mitro nayanti varuṇo ati dviṣaḥ ||

5.39.2

tad dhi vayaṃ vṛṇīmahe varuṇa mitrāryaman | yan no nir aṃhaso yūyaṃ pātha nethā ca martyam ati dviṣaḥ ||

5.39.3

te nūnaṃ no yūyam ūtaye varuṇa (…) | nayiṣṭhā no neṣiṇa stha parṣiṣṭāḥ parṣiṇo ati dviṣaḥ ||

5.39.4

śunam asmabhyam ūtaye varuṇa mitrāryaman | śarma yacchātha sapratha ādityāso yad īmahe ati dviṣaḥ ||

5.39.5

ādityāso ati sridho varuṇo mitro aryamā | rudraṃ marudbhir ugraṃ huvema- -indram agniṃ svastaye ati dviṣaḥ ||

5.39.6

netāra ū ṣu ṇas tiro varuṇo mitro aryamā | ati viśvāni duritā rājānaś carṣaṇīnām ati dviṣaḥ ||

5.39.7

yūyaṃ viśvaṃ pari pātha varuṇa mitrāryaman | yuṣmākaṃ śarmaṇi priyā syāma supraṇītayo 'ti dviṣaḥ ||

5.39.8

yathā ha tyad vasavo gauryaṃ cit padi ṣitām amuñcatā yajatrāḥ | evo ṣv asman muñcatā vy aṃhaḥ pra tāry agne prataraṃ na āyuḥ ||

5.40.1

devasya tvā savituḥ prasave 'śvinor bāhubhyāṃ pūṣṇo hastābhyāṃ prasūto brāhmaṇebhyo nir vapāmi | sa me mā kṣeṣṭa sadam aśyamānaḥ pitṝṇāṃ loke ||

5.40.2

anumataṃ pṛthivyemaṃ pacāmy anu me dyaur manyatām anv antarikṣam | anu manyatām aditir devaputrā ime svarge loke astu ||

5.40.3

brahmaṇokhām adhi dadhāmy agnau bhūmyāṃ tvā bhūmim adhi dhārayāmi | agniḥ pacan rakṣatv odanam imaṃ rakṣaḥpiśācān nudatāṃ jātavedāḥ ||

5.40.4

acyutam akṣitaṃ viśvadānīm utsam iva sadam akṣīyamāṇam | pitā pitāmaha uta yas tṛtīyas ta enaṃ bhāgam upa jīvantu atra ||

5.40.5

prapīnam akṣitaṃ viśvadānīṃ somam iva punar āpyāyamānam | putraḥ pautra uta yaḥ prapautras teṣām astu nihito bhāga eṣaḥ ||

5.40.6

mā me jārīn nihito bhāga eṣa mānuṣanmānuṣad gupto astu | vaivasvate ni dadhe śevadhim etaṃ tasmā ut sṛjatu mahyam eva ||

5.40.7

punaḥ pūryatāṃ yad adanty asya- -odano 'yaṃ tiṣṭhatv akṣitaḥ sadā | vaivasvatena gupto astu rājñā mamaitor upa jīvantu me svāḥ ||

5.40.8

śatadhāraṃ sahasradhāram utsam akṣitaṃ vyacyamānaṃ salilasya pṛṣṭhe | ūrjaṃ duhānam anapasphurantam upāsīya sukṛtāṃ yatra lokaḥ ||