Kāṇḍa 6

6.1.1

tad id āsa bhuvaneṣu jyeṣṭhaṃ yato jajña ugras tveṣanṛmṇaḥ | sadyo jajñāno ni riṇāti śatrūn anu yaṃ viśve madanty ūmāḥ ||

6.1.2

vāvṛdhānaḥ śavasā bhūryojāḥ śatrur dāsāya bhiyasaṃ dadhāti | avyanac ca vyanac ca sasni saṃ te navanta prabhṛtā madeṣu ||

6.1.3

tve kratum api pṛñcanti viśve dvir yad ete trir bhavanty ūmāḥ | svādoḥ svādīyaḥ svādunā sṛjā sam adaḥ su madhu madhunābhi yodhīḥ ||

6.1.4

iti cid dhi tvā dhanā jayantaṃ raṇeraṇe anumadanti viprāḥ | ojīyo dhṛṣṇo sthiram ā tanuṣva mā tvā dabhan durevā yātudhānāḥ ||

6.1.5

tvayā vayaṃ śāśadmahe raṇeṣu prapaśyanto yudhenyāni bhūri | codayāmi ta āyudhā vacobhiḥ saṃ te śyāmi brahmaṇā vayāṃsi ||

6.1.6

stuṣeyyaṃ puruvarpasam ṛbhvam inatamam āptyam āptyānām | ā darśate śavasā sapta dānūn pra sākṣate pratimānāni bhūri ||

6.1.7

ni tad dadhiṣe 'varaṃ paraṃ ca yasminn āvithāvasā duroṇe | ā mātarā sthāpayase jigatnū ata inoṣi karvarā purūṇi ||

6.1.8

imā brahma bṛhaddivo vivakti- -indrāya śūṣam agriyaḥ svarṣāḥ | maho gotrasya kṣayati svarājo duraś ca viśvā avṛṇod apa svāḥ ||

6.1.9

evā mahān bṛhaddivo atharvā- -avocat svāṃ tanvam indram eva | svasāro mātaribhvarīr ariprā hinvanti ca śavasā vardhayanti ca ||

6.2.1

ṛdhaṅmandrayoninovibhāvā amṛtāsuḥ sujanmā vardhamānaḥ | adabdhāsur bhrājamāno 'heva trito dādhāra trīṇi ||

6.2.2

ni yo dharmaṇi prathamaḥ sasāda- -ato vapūṃṣi kṛṇute purūṇi | dhāsyur yoniṃ prathama ā viveśa- -ā yo vācam anuditāṃ cikāya ||

6.2.3

yas te śokas tanva ārireca kṣarad dhiraṇyaṃ śucayo 'nu svāḥ | atrā dadhiṣe amṛtāni nāma- -asme vastrāṇīṣa erayanta ||

6.2.4

pra yad ete prataraṃ pūrvyaṃ guḥ sadaḥsada ātiṣṭhanto ajuryam | kaviḥ śuṣasya mātarā rihāṇe jāmirvadhuryuḥpratimānimīta ||

6.2.5

tad ū ṣu te mahā pṛthuryaman namaḥ kaviḥ kāvyenākṛṇot | yat samyañco 'bhiyanto *'dhi kṣām adhā mahī rodhacakrā vavardha ||

6.2.6

sapta maryādāḥ kavayas tatakṣus tāsām id ekām abhy aṃhuro gāt | utāmṛtāsur vṛta eṣi kṛṇvann asura āptaḥ svadhayā samadguḥ ||

6.2.7

utāyur jyeṣṭho ratnā dadhāty ūrjā vā yaṃ sacate kavir dāḥ | putro vā yat pitarā kṣatram īrte jyeṣṭhaṃ maryādam ahvayan svasti ||

6.2.8

darśan nu tān varuṇa ye ta iṣṭāv āvarvṛtataḥ kṛṇavo vapūṃṣi | ardham ardhena śavasā pṛṇakṣy ardhena śuṣmaṃ vardhase *'mūra ||

6.2.9

avīvṛdhāma śagmyaṃ sakhāyaṃ varuṇaṃ putram aditer iṣiram | kaviśastāny asmai vacāṃsy avocāma rodasī satyavācau ||

6.3.1

ko vaḥ paścāt prāvicchāyat kaḥ puraḥ prākhanat pathaḥ | yadaita tvaramāṇā varuṇaprasūtā āpaḥ ||

6.3.2

prajāpatir asṛjata sa puraḥ prākhanat pathaḥ | sa u no anv avāsṛjat tena sṛṣṭāḥ kṣarāmasi ||

6.3.3

punānā āpo bahudhā sravanti- -imāṃś ca lokān pradiśaś ca sarvāḥ | punantv asmān duritād avadyān muñcantu mṛtyor nirṛter upasthāt ||

6.3.4

āpo asmān mātaraḥ sūdayantu ghṛtena no ghṛtapuvaḥ punantu | viśvaṃ hi ripraṃ pravahanti devīr ud id ābhyaḥ śucir ā pūta emi ||

6.3.5

āpo devīr mātaraḥ sūdayiṣṇavo ghṛtaścuto madhunā saṃ papṛcre | tā asmabhyaṃ sūrayo viśvam āyuḥ kṣapa usrā varivasyantu śubhrāḥ ||

6.3.6

udakasyodakatamā revattamā revatīnām | śundhantām āpaḥ śundhantv asmān ||

6.3.7

yūyam āpo vīraśriyo yūyaṃ sūdayathā śucīn | yuṣmākam id diśo mahīr īyante pradiśaḥ pṛthak ||

6.3.8

yūyaṃ mitrasya varuṇasya yonir yūyaṃ somasya dhenavo madhiṣṭhāḥ | yuṣmān devīr deva ā kṣiyatīndur yūyaṃ jinvata brahmakṣatram āpaḥ ||

6.3.9

śaśvad ābhiḥ śāśadānāḥ śamanānvayāmasi | āpo viśvasya sūdanīr yā devā manave dadhuḥ ||

6.3.10

yad dhāvanti punate tad āpo yat tiṣṭhanti śuddhā it tad bhavanti | nāsām avadyam avidaṃ na ripraṃ sanād eva madhunā saṃ papṛcre ||

6.3.11

hiraṇyavarṇāḥ śucayaḥ pāvakāḥ pra cakramur hitvāvadyam āpaḥ | śataṃ ca vaḥ prasravaṇeṣu devīḥ sahasraṃ ca pavitāraḥ punanti ||

6.3.12

tās tādṛśīr brahmāṇaṃ sūdayanty aṅgoṣṭhyā stotryā jīvadhanyāḥ | yā viśvasya śucikṛto ayātor gāva iva payasā sthā sujātāḥ ||

6.3.13

viśvād riprān muñcata sindhavo no yāny enāṃsi cakṛmā tanūbhiḥ | indrapraśiṣṭā varuṇaprasūtā ā siñcatāpo madhv ā samudre ||

6.4.1

rātrī mātā nabhaḥ pitā- -aryamā te pitāmahaḥ | śilācī nāma vā asi sā devānām asi svasā ||

6.4.2

yas tvā pibati jīvati trāyase puruṣaṃ tvam | dhartrī ca śaśvatām asi śaśvatāṃ ca nyañcanī ||

6.4.3

yad daṇḍena yad iṣvā yad arur harasā kṛtam | tasya tvam asi bheṣajī niṣkṛtir nāma vā asi ||

6.4.4

bhadrā plakṣe ni tiṣṭhasy aśvatthe khadire dhave | bhadrā nyagrodhe parṇe sā na ehy arundhati ||

6.4.5

vṛkṣaṃvṛkṣam ā rohasi vṛṣaṇyantīva kanyalā | jayantī pratyātiṣṭhantī saṃjayā nāma vā asi ||

6.4.6

hiraṇyavarṇe yuvate śuṣme lomaśavakṣaṇe | apām asi svasā lākṣe vāto hātmā babhūva te ||

6.4.7

hiraṇyabāho subhage sūryavarṇe vapuṣṭame | rutaṃ gacchati niṣkṛtiḥ semaṃ niṣkṛdhi pūruṣam ||

6.4.8

ghṛtācī nāma kānīno 'jababhru pitā tava | aśvo yamasya yaḥ śyāvas tasya hāsnāsy ukṣitā ||

6.4.9

aśvasyāsnaḥ saṃpatitā sā parṇam abhi ṣiṣyadaḥ | sarā patatriṇy asi sā na ehy arundhati ||

6.4.10

ghṛtācike vātarathe vidyutparṇe arundhati | āturaṃ gamiṣṭhāsi tvam aṅga niṣkarīyasī ||

6.4.11

yat te jagdhaṃ piśācais tat ta ā pyāyatāṃ punaḥ | lākṣā tvā viśvabheṣajī devebhis trāyatāṃ saha ||

6.5.1

yathā dyauś ca pṛthivī ca na bibhīto na riṣyataḥ | evā me prāṇa mā bibher evā me 'pāna mā riṣaḥ ||

6.5.2

yathā vāyuś cāntarikṣaṃ ca (…) ||

6.5.3

yathā sūryaś ca candramāś ca (…) ||

6.5.4

yathāhaś ca rātrī ca (…) ||

6.5.5

yathā dhenuś cānaḍvāṃś ca (…) ||

6.5.6

yathā mitraś ca varuṇaś ca (…) ||

6.5.7

yathā brahma ca kṣatraṃ ca (…) ||

6.5.8

yathendraś cendriyaṃ ca (…) ||

6.5.9

yathā vīraś ca vīryaṃ ca (…) ||

6.5.10

yathā prāṇaś cāpānaś ca (…) ||

6.5.11

yathā mṛtyuś cāmṛtaṃ ca (…) ||

6.5.12

yathā satyaṃ cānṛtaṃ ca (…) ||

6.5.13

yathā bhūtaṃ ca bhavyaṃ ca na bibhīto na riṣyataḥ | evā me prāṇa mā bibher evā me 'pāna mā riṣaḥ ||

6.6.1

madhuman me nikramaṇaṃ madhuman me parāyaṇam | vācā madhumad udyāsam akṣyau me madhusaṃdṛśī ||

6.6.2

mām anu prasārayan mama patto nipedivān | atho me punar āyato akṣyau kāmena śuṣyatām ||

6.6.3

vaśā madhugha te mātā- -ukṣā bhrātarṣabhaḥ pitā | dhenvā adhi prajāto 'si rājā san madhumattamaḥ ||

6.6.4

vṛṣāṇaṃ vṛṣṇyāvantaṃ somapṛṣṭhaṃ divi śritam | indrāṇy agra ābharan madhughaṃ bhagāya kam ||

6.6.5

pitubhojano madhughaḥ śauṣkāsyo hṛdayāya kam | sa mā madhunānaktu yathāhaṃ kāmaye tathā ||

6.6.6

sindhuprajāno madhugho aśva iva nīyate janām̐ anu | sa mā (…) ||

6.6.7

madhumatī sinīvālī madhunā mā sam ukṣatu | sā mā madhunānaktu yathāhaṃ kāmaye tathā ||

6.6.8

yathā madhu madhukṛto nyañjanti madhāv adhi | evā ny anajmi te mano adhy asyāṃ māmakī tanū ||

6.6.9

yat te manaḥ parāgataṃ yad baddham iha veha vā | tat ta ā vartayāmasi mayi badhnāmi te manaḥ ||

6.7.1

kaśyapaś ca suparṇaś ca yan marīcyām atiṣṭhatām | suparṇaḥ pary avāpaśyat samudre bhūmim āvṛtām ||

6.7.2

yāṃ suparṇaḥ paryapaśyad antar mahaty arṇave | tāṃ sūkara tvaṃ māyayā triḥ samudrād ud ābharaḥ ||

6.7.3

yaṃ samudrād udabharo bhūmiṃ sūkara māyayā | saiṣā viṣasya dūṣaṇy asmai bhavatu bheṣajī ||

6.7.4

acyutā hiraṇyena yā satye adhitiṣṭhati | tasyās te viśvadhāyaso viṣadūṣaṇam ud bhare ||

6.7.5

yasyāḥ kulāyam ity ekā ||

6.7.6

yasyā bhūmyā upajīkā gṛhaṃ kṛṇvata ātmane | tasyās te viśvadhāyaso viṣadūṣaṇam ud bhare ||

6.7.7

yas tvā bhūme 'nvavindad yas tvā bhūma udābharat | tayoḥ sahasradhāmann ahaṃ nāmāni jagrabha ||

6.7.8

yāni ta indro akṛṇod bhūme nāmāni vṛtrahā | tāni te babhroḥ saṃ vidma sehaidhi viṣadūṣaṇī ||

6.7.9

yāni te marutaś cakrur yāni saptarṣayo viduḥ | viśva ādityā yāṃ viduḥ sā bhūmir viṣadūṣaṇī ||

6.8.1

sahasva yātudhānān sahasva yātudhānyaḥ | sahasva sarvā rakṣāṃsi sahamānāsy oṣadhe ||

6.8.2

sahamāne sahasvati sahanty ahamuttare | utāham asmi sāsahiḥ sāsahe vaḥ sadānvāḥ ||

6.8.3

yā sahamānā carasi sāsahāna ivarṣabhaḥ | sadānvāghnī rakṣoghnī sā tvam ugrāsy oṣadhe ||

6.8.4

khele hai lambanastani naśyetaḥ prāmutaḥ pata | na tvām avivyacad iha- -ukṣeva śṛṅgavac chiraḥ ||

6.8.5

asuvāne bahuputre anantarve mahodari | pathāsmat satvare tvaṃ śarkarā bapsatī cara ||

6.8.6

ye 'rāyāś caratha pākasyecchanta āsutim | tān agne kṛṣṇavartane tīkṣṇaśṛṅgodṛṣann ihi ||

6.8.7

ado yad dāru plavate sindhor madhye apūruṣam | tad ā rabhasva durhaṇo tena yāhi parastaram ||

6.8.8

yasyā janitram iṣṭargā adṛṣṭāḥ krimayaḥ pluṣayaḥ | tasyai balāsapatnyai namas kṛṇomi kuṣṭhyai ||

6.8.9

śarvaputre bhavapatni yātubhrātri sadānve | tasyāddhi putrān bhrātṝṃś ca yatra tvā vinayāmasi ||

6.9.1

vṛṣāyam aṃśur vṛṣabhāya gṛhyate vṛṣāyam ugro nṛcakṣase | divyo naryo 'cikradan mahan nāmarṣabhasya yat kakut ||

6.9.2

viṣuvān viṣṇo bhava tvaṃ yo nṛpatir mama | atho indra iva devebhyo vi bravītu janebhyaḥ ||

6.9.3

manuṣyebhyo vi bravītu sajūr indreṇa medinā | agniś ca tubhyaṃ sāhantyo rāṣṭraṃ vaiśvānaro dadhat ||

6.9.4

yasyāyaṃ bhāga ṛṣabha indrāya pariṇīyate | sa hantu śatrūn āyato atho hantu parāyataḥ ||

6.9.5

sa hantā śatror bhavatu hantā bhavatu dodhatām | viśām aha praṇīr ayad agram udbhindatām asat ||

6.9.6

āyuṣmantaṃ varcasvantam atho adhipatiṃ viśām | asyāḥ pṛthivyāś cettāram imam indrarṣabhaṃ kṛṇu ||

6.9.7

yaḥ suśṛṅgaḥ sukakudaḥ kalyāṇo barhir āsadat | kārṣīvaṇaprajānena ṛṣabheṇa yajāmahe ||

6.9.8

ṛṣabheṇa yajamānā akrūreṇeva sarpiṣā | mṛdhaś ca sarvā indreṇa pṛtanāś ca sahāmahe ||

6.9.9

yaṃ tubhyaṃ bhāgam ṛṣabhaṃ devāḥ kevalyaṃ daduḥ | tena vṛtrāṇi jaṅghanaḥ śatrūṃś ca jahy āhave ||

6.9.10

jahi śatrūn vi mṛdho nudasva kṛṣyāḥ saṃbhūto asi vīryāvān | indrāya bhāgaṃ pari tvā nayāma urur no loko apṛtanyo astu ||

6.9.11

ghṛtavṛddha ghṛtāhuta sahasraśṛṅga suṣṭuta | ghṛtāhavana dīdihi ||

6.9.12

yo ghṛtenābhighārita ugro jaitrāya tiṣṭhasi | sa naḥ saṅkāsu pāraya pṛtanāsāhyeṣu ca ||

6.10.1

karkī subhāga ṛṣabhasya patnī prajākāmā vaśinī vāśitā gauḥ | tāṃ sahasram ekamukhā dadāti garbhaṃ dadhānām ṛtunā carantīm ||

6.10.2

garbhaṃ dadhānā paya id duhānā agnihotraṃ vaiśvadevī duhānā | gaur ṇo mā hiṃsīd varuṇasya patnī ||

6.10.3

karkyā yoniṃ saṃmanaso 'bhi gāvaḥ prajāṃ dhitsanto vṛṣaṇaś caranti | sā na aitv aditir viśvarūpā- -abhi krandanti bhuvanāny enām ||

6.10.4

prajāpatineṣitām ṛtviyāvatīm aināṃ prajāyā ṛṣabhāḥ śrayante | vṛṣaṇyantīṃ vṛṣaṇaḥ saptanāmnīṃ hiṃkṛṇvanto abhi nudantu vāśitām ||

6.10.5

sā praty adarśy uṣasā suvarṇā śukrāṃ vasānā varuṇasya nirṇijam | vaiśvadevī svadhām ābharantī prajāṃ dātā puṣyatu gopatiṣ ṭe ||

6.10.6

svayaṃsthāvary ṛṣabhāya tiṣṭhasi pratīcī somaṃ prati sūryam agnim | ahiṃsantī vāśite mām upehi paśūn dātā puṣyatu gopatiṣ ṭe ||

6.10.7

vaśī dātā bhavatu vāśitāyā agner bhāgam usriyāṃ yo dadāti | priyaṃ dhāma hṛdayaṃ somyaṃ madhu vājinīṃ tvā vājino vājayantu ||

6.10.8

yo vāśitāyāṃ gavy antar agnir yad asyāṃ nṛmṇaṃ mahimā babhūva | namas tasmai pratigṛhṇan kṛṇomi syonā me astu tanve suśevā ||

6.10.9

eyam agan vāśitā tāṃ pratīmaḥ puṃsāṃ vrātena saha puṣṭyā gauḥ | ūrjaṃ dadhānā ghṛtam id duhānā sahasrapoṣāya me astu dātre ||

6.11.2

anāptā ye vaḥ prathamā yāni karmāṇi cakrire | vīrān no atra mā dabhan tad va etat puro dadhe ||

6.11.3

pratnān mānāt pari ye saṃbabhūvuḥ ślokavantaḥ saumanasasya vantavaḥ | apānakṣāso badhirā ahāsata- -ṛtasya panthāṃ na taranti duṣkṛtaḥ ||

6.11.4

sahasradhāram abhi te sam asvaran divo nāke madhujihvā asaścataḥ | tasya spaśo na ni miṣanti bhūrṇayaḥ padepade pāśinaḥ santu setave ||

6.11.5

pary ū ṣu pra dhanvā vājasātaye pari vṛtrāṇi sakṣaṇiḥ | divas tad arṇavām̐ anv īyase sanisraso nāmāsi trayodaśo māsaḥ ||

6.11.6

indrasya gṛho 'sīndrasya śarmāsīndrasya varmāsīndrasya varūtham asi | vy etenāvaitenāpaitenārātsīr asau svāhā ||

6.11.7

tigmāyudhau tigmahetī suśevāv agnīṣomāv iha su mṛḍataṃ naḥ | mumuktam asmān gṛbhītān avadyāj juṣethāṃ yajñam amṛtam asmāsu dhattaṃ svāhā ||

6.11.8

cakṣuṣo hete manaso hete brahmaṇo hete menyāmenir asi | amenayas te santu ye 'smān abhyaghāyanti svāhā ||

6.11.9

yo 'smāñ cakṣuṣā manasā yaś ca vācākūtyā cittyā brahmaṇāghāyur abhidāsāt | tam agne tvaṃ menyāmeniṃ kṛṇu svāhā ||

6.11.10

ud āyur ut kṛtam ud balam un manīṣod indriyaṃ nṛmṇam asmāsu dhehi svāhā ||

6.12.1

āyuṣkṛtāyuṣmatī svadhāvantau gopā me stho gopāyataṃ mā | ātmasadau me staṃ tanve suśevau mā mā hiṃsiṣṭaṃ svāhā ||

6.12.2

indrasya gṛho 'sīndrasya śarmāsīndrasya varmāsīndrasya varūtham asi | taṃ tvā pra viśāmi sarvāṅgaḥ sarvātmā sarvaguḥ sarvapūruṣaḥ saha yan me 'sti tena ||

6.12.3

astṛto nāmāham ayam asmi sa ātmānaṃ pari dadhe dyāvāpṛthivībhyām | gopīthāya pra hūyase ||

6.12.4

astṛto nāma prājāpatyo devo māsas trayodaśaḥ | sarvaguḥ sarvapūruṣaḥ prāgāṃ devapurā aham ||

6.12.5

antaḥ prāgāṃ devapurāḥ sahagrāmaḥ svastaye | saṃvatsarasya madhyataḥ sarvaiḥ sodaryaiḥ saha ||

6.12.6

prāham agāṃ devapurā ya evāsmi sa eva san | yo mā kaś cābhidāsati sa prajāpatim ṛcchatu ||

6.12.7

aśmāsi pratispaśaḥ pāhi riṣaḥ pāhi dviṣaḥ | pāhi daivyābhiśastyāḥ sa ma iha tanvaṃ pāhi ||

6.12.8

yo 'smān prācyā diśo 'ghāyur abhidāsāt | etat sa ṛcchād aśmavarma no 'stu ||

6.12.9

(…) asmān dakṣiṇāyā diśaḥ (…) ||

6.12.10

(…) asmān pratīcyā diśaḥ (…) ||

6.13.3

yo 'smān ūrdhvāyā diśo 'ghāyur abhidāsāt | etat sa ṛcchād aśmavarma no 'stu ||

6.13.4

prācyai diśe svāhā ||

6.13.5

dakṣiṇāyai diśe svāhā ||

6.13.6

pratīcyai diśe svāhā ||

6.13.7

udīcyai diśe svāhā ||

6.13.8

dhruvāyai diśe svāhā ||

6.13.9

ūrdhvāyai diśe svāhā ||

6.13.10

dive svāhā ||

6.13.11

antarikṣāya svāhā ||

6.13.12

pṛthivyai svāhā ||

6.13.13

pṛthivyai svāhā ||

6.13.14

antarikṣāya svāhā ||

6.13.15

dive svāhā ||

6.14.1

mahākaṇṭhaṃ karīṣajam ūbadhyādam anāhutim | oṣṭhaḥ kokamukhaś ca yas tān ito nāśayāmasi ||

6.14.2

rāmadantam avadalaṃ prahālam ahināsikam | upavartaṃ balāhakaṃ khelaṃ gardabhanādinaṃ gṛdhraṃ hastyāyanaṃ tān (…) ||

6.14.3

pramṛśyādinam abhyamaṃ bhīmahastaṃ marīmṛśam | trastākṣaṃ mṛdvaṅguliṃ nakhograṃ dantavīryaṃ tān (…) ||

6.14.4

paryanyam abhipāpadaṃ jigīṣamāṇaṃ rūpakam | atho śalalyaṃ śevalaṃ tān (…) ||

6.14.5

taṇḍam agretuṇḍikam aliṃśam uta vatsapam | dāmagranthiṃ sanisrasam araṇyeyaṃ cārmyeyaṃ tān (…) ||

6.14.6

idaṃ yaj jānukeśavaṃ rakṣaś caraty āsuraṃ bahiḥ prayutam icchati | aṃsūn pāṃsyūṃś ca keśyān arāyāñ chvakiṣkiṇas tān ito nāśayāmasi ||

6.14.7

yaḥ kumārāñ janasyātti taruṇān dāsa āsuraḥ | arāyaḥ keśy aghalo yo janān hanty atti ca tam ito nāśayāmasi ||

6.14.8

hirākṣo nāma gehyo 'rāyo nāma sūrtahā | tam ito nāśayāmasi ||

6.14.9

vitūlaṃ bhasvam ākhidaṃ vanakrośaṃ ca roruham | āmādaṃ prayutaiṣaṇaṃ paryundānaṃ paridravaṃ vṛkasya nyañcaṃ gaṅgaṇaṃ tān ito nāśayāmasi ||

6.15.1

yaś ca bhūmā yā ca sphātir yorjā yo rasaś ca te | harāmi śakra tām̐ ahaṃ tvayā prattāṃ śacīpate ||

6.15.2

kṣetrātkṣetrād ā harāmi sphātiṃ sarvāṃ śacīpate | tvayāhaṃ vṛtrahan prattam ā harāmi gṛhām̐ upa ||

6.15.3

yas te sītābhagaḥ kṣetre yā rāddhir yac ca śīyate | atho yā niṣṭhā te kṣetre tāṃ ta ādiṣi brahmaṇā ||

6.15.4

yat khale yan mayāre yad goṣṭhe yac ca śevadhau | atho yat kumbhyāṃ śaye tasya te rasam ā dade ||

6.15.5

ūrjā yā te niruptasya- -ūrjā yāvahatasya te | ūrjāṃ te piṣyamāṇasya- -ūrjāṃ piṣṭāt ta ā dade ||

6.15.6

(…) te niruptasya- -ūrjā yāvahatasya te | ūrjāṃ te pacyamānasya- -ūrjāṃ pakvāt te (…) ||

6.15.7

ūrjā yā te praṇaddhasya- -ūrjā yā mathitasya te | ūrjāṃ te duhyamānasya- -ūrjāṃ dugdhāt ta ā dade ||

6.15.8

ā te dade gavām ūrjām ūrjām avibhya ā dade | ajābhya ūrjām ādāya- -ā ta ekaśaphād dade ||

6.15.9

ūrjā yā te puruṣeṣu- -ūrjā vitte ca vedye | ūrjāṃ te sarveṣām ahaṃ gṛhāṇāṃ brahmaṇā dade ||

6.16.1

pituṃ nu stoṣaṃ maho dharmāṇaṃ taviṣīm | yasya trito vy ojasā vṛtraṃ viparvam ardayat ||

6.16.2

svādo pito madho pito vayaṃ tvā vavṛmahe | asmākam avitā bhava ||

6.16.3

upa naḥ pitav ā gahi śivaḥ śivābhir ūtibhiḥ | mayobhūr adviṣeṇyaḥ sakhā suśeva edhi naḥ ||

6.16.4

tava tye pito rasā rajāṃsy anu viṣṭhitāḥ | divi vātā iva śritāḥ ||

6.16.5

tava tye pito dadatas tava svādiṣṭha te pito | pra svādmāno rasānāṃ tuvigrīvā iverate ||

6.16.6

tve pito mahānāṃ devānāṃ mano hitam | akāri cāru ketunā tavāhim avasāvadhīt ||

6.16.7

yad adaḥ pito ajagan vivasva parvatānām | atrā cin no madho pito 'raṃ bhakṣāya gamyāḥ ||

6.16.8

yat te soma gavāśiro yavāśiro bhajāmahe | vātāpe pīva id bhava ||

6.16.9

yad apām oṣadhīnāṃ pariṃśam āriśāmahe (…) ||

6.16.10

karambha oṣadhe bhava pīvo vṛkka udārathiḥ | vātāpe pīva id bhava ||

6.16.11

taṃ tvā vayaṃ pito vacobhir gāvo na havyā suṣūdima | asmabhyaṃ tvā sadhamādaṃ devebhyas tvā sadhamādam ||

6.17.1

prati tyaṃ cārum adhvaraṃ gopīthāya pra hūyase | marudbhir agna ā gahi ||

6.17.2

nahi devo na martyo mahas tava kratuṃ paraḥ (…) ||

6.17.3

ye maho rajaso vidur viśve devāso adruhaḥ (…) ||

6.17.4

ye śubhrā ghoravarpasaḥ sukṣatrāso riśādasaḥ (…) ||

6.17.5

ya ugrā arkam ānṛcur anādhṛṣṭāsa ojasā (…) ||

6.17.6

ye nākasyādhi rocane divi devāsa āsate (…) ||

6.17.7

ya īṅkhayanti parvatān tiraḥ samudram ojasā (…) ||

6.17.8

ā ye tanvanti raśmibhis tiraḥ samudram arṇavam (…) ||

6.17.9

abhi tvā pūrvapītaye sṛjāmi somyaṃ madhu (…) ||

6.17.10

ā yantu maruto gaṇai stutā dadhatu no rayim (…) ||

6.17.11

ā tvā kaṇvā ahūṣata gṛṇanti vipra te dhiyaḥ | marudbhir agna ā gahi ||

6.18.1

saṃ mā siñcantu marutaḥ saṃ pūṣā saṃ bṛhaspatiḥ | saṃ māyam agniḥ siñcatu prajayā ca dhanena ca dīrgham āyuṣ kṛṇotu me ||

6.18.2

(…) siñcantv ādityāḥ saṃ mā siñcantv agnayaḥ | indraḥ sam asmān siñcatu (…) ||

6.18.3

(…) siñcantv aruṣāḥ sam arkā ṛṣayaś ca ye | pūṣā sam (…) ||

6.18.4

(…) siñcantu gandharvāpsarasaḥ saṃ mā siñcantu devatāḥ | bhagaḥ sam (…) ||

6.18.5

(…) siñcantu pṛthivīḥ saṃ mā siñcantu yā divaḥ | antarikṣaṃ sam (…) ||

6.18.6

(…) siñcantu pradiśaḥ saṃ mā siñcantu yā diśaḥ | āśā sam (…) ||

6.18.7

(…) siñcantu nadyaḥ saṃ mā siñcantu sindhavaḥ | samudraḥ sam (…) ||

6.18.8

(…) siñcantu kṛṣayaḥ saṃ mā siñcantv oṣadhīḥ | somaḥ sam (…) ||

6.18.9

saṃ mā siñcantu yā āpaḥ saṃ mā siñcantu vṛṣṭayaḥ | sarasvatī sam asmān siñcatu prajayā ca dhanena ca dīrgham āyuṣ kṛṇotu me ||

6.19.1

saṃ bhago varcasā māgne saṃ viṣṇuḥ puṣṭyā sicat | kṣatraṃ sam asmān siñcatu prajayā ca dhanena ca- -āyuṣmantaṃ kṛṇotu mā ||

6.19.2

saṃ virāḍ varcasā māgne saṃ deṣṭrī puṣṭyā sicat | iḍā sam asmān siñcatu prajayā ca dhanena ca- -āyuṣmantaṃ kṛṇotu mā ||

6.19.3

saṃ dhātā varcasā māgne saṃ siktiḥ puṣṭyā sicat | saṃ devo asmān aryamā prajayā ca dhanena ca- -āyuṣmantaṃ kṛṇotu mā ||

6.19.4

sam aṃśo varcasā māgne saṃ vāyuḥ puṣṭyā sicat | vātaḥ sam asmān siñcatu prajayā ca dhanena ca- -āyuṣmantaṃ kṛṇotu mā ||

6.19.5

saṃ sabhā varcasā māgne saṃ surā puṣṭyā sicat | sūryā sam asmān siñcatu prajayā ca dhanena ca- -āyuṣmantaṃ kṛṇotu mā ||

6.19.6

saṃ savitā varcasā māgne saṃ sūryaḥ puṣṭyā sicat | candraḥ sam asmān siñcatu prajayā ca dhanena ca- -āyuṣmantaṃ kṛṇotu mā ||

6.19.7

saṃ paśavo varcasā māgne saṃ yajñaḥ puṣṭyā sicat | dakṣiṇā sam asmān siñcatu prajayā ca dhanena ca- -āyuṣmantaṃ kṛṇotu mā ||

6.19.8

saṃ mā siñcatu draviṇaṃ saṃ mā siñcatv indriyam | tejaḥ sam asmān siñcatu prajayā ca dhanena ca- -āyuṣmantaṃ kṛṇotu mā ||

6.19.9

saṃ mā siñcantu varcāṃsi saṃ mā siñcantu bhūtayaḥ | satyaṃ sam asmān siñcatu prajayā ca dhanena ca- -āyuṣmantaṃ kṛṇotu mā ||

6.20.1

ā rātri pārthivaṃ rajaḥ pitur aprāyi dhāmabhiḥ | divaḥ sadāṃsi bṛhatī vi tiṣṭhasa ā tveṣaṃ vartate tamaḥ ||

6.20.2

na yasyāḥ pāraṃ dadṛśe na yoyuvad viśvam asyāṃ ni viśate yad ejati | ariṣṭāsas ta urvi tamasvati rātri pāram aśīmahi bhadre pāram aśīmahi ||

6.20.3

ye te rātri nṛcakṣaso draṣṭāro navatir nava | aśītiḥ santy aṣṭā uto te sapta saptatiḥ ||

6.20.4

ṣaṣṭiś ca ṣaṭ ca revati pañcāśat pañca sumnayi | catvāraś catvāriṃśac ca trayas triṃśac ca vājini ||

6.20.5

dvā ca viṃśatiś ca te rātry ekādaśāvamāḥ | tebhir no 'dya pāyubhir ni pāhi duhitar divaḥ ||

6.20.6

rakṣā mākir ṇo aghaśaṃsa īśata mā no duḥśaṃsa īśata ||

6.20.7

mā no adya gavāṃ steno māvīnāṃ vṛka īśata | māśvānāṃ bhadre taskaro mā nṛṇāṃ yātudhānyaḥ ||

6.20.8

paramebhiḥ pathibhi steno dhāvatu taskaraḥ | pareṇa datvatī rajjuḥ pareṇāghāyur arṣatu ||

6.20.9

andhaṃ rātri tiṣṭhadhūmam aśīrṣāṇam ahiṃ kṛṇu | hanū vṛkasya jambhaya- -ā stenaṃ drupade jahi ||

6.20.10

tvayi rātri vasāmasi svapiṣyāmasi jāgṛhi | gobhyo naḥ śarma yaccha- -aśvebhyaḥ puruṣebhyaḥ ||

6.21.1

atho yāni ca vasmahe yāni cāntaḥ parīṇahi | tāni te pari dadmasi ||

6.21.2

rātri mātar uṣase naḥ pari dehi | uṣā no ahne pari dadātv ahas tubhyaṃ vibhāvari ||

6.21.3

yat kiṃ cedaṃ patayati yat kiṃ cedaṃ sarīsṛpam | yat kiṃ ca padvad āsanvat tasmāt tvaṃ rātri pāhi naḥ ||

6.21.4

sā paścāt pāhi sā puraḥ sottarād adharād uta | gopāya no vibhāvari stotāras ta iha smasi ||

6.21.5

ye rātrim anutiṣṭhanti ye ca bhūteṣu jāgrati | paśūn ye sarvān rakṣanti te na ātmasu jāgratu te naḥ paśuṣu jāgratu ||

6.21.6

veda vai rātri te nāma ghṛtācī nāma vā asi | tāṃ tvā bharadvājo veda sā no vitte 'dhi jāgṛhi ||

6.22.1

brahmāsya śiro bṛhad asya pṛṣṭhaṃ vāmadevyam udaram odanasya | chandāṃsi pakṣau mukham asya satyaṃ viṣṭārī yajñas tapaso 'dhi jātaḥ ||

6.22.2

anasthāḥ śuddhāḥ pavanena pūtāḥ śucayaḥ śucīn api yanti lokān | viṣṭāriṇam odanaṃ ye pacanti naiṣāṃ śiśnaṃ pra dahati jātavedāḥ ||

6.22.3

naiṣāṃ śiśnaṃ pra dahati jātavedāḥ svarge loke bahu straiṇam eṣām | nainān yamaḥ pari muṣṇāti retaḥ ||

6.22.4

āste yama upa yāti devān saṃ gandharvair madati somyaiḥ | viṣṭāriṇam odanaṃ ye pacanti nainān avartiḥ sacate kutaś cana ||

6.22.5

rathī ha bhūtvā rathayāna īyate pakṣī ha bhūtvāpi divaṃ sam eti | eṣa yajño vitato vahiṣṭho viṣṭārī pakvo divam ā sasāda ||

6.22.6

caturaḥ kumbhāṃś caturdhā dadāti kṣīreṇa pūrṇān udakena dadhnā | etās tvā kulyā upa yantu viśvataḥ svarge loke svadhayā pinvamānāḥ ||

6.22.7

ghṛtahradā madhukūlāḥ surodakāḥ kṣīreṇa pūrṇā udakena dadhnā | etās tvā kulyā upa yantu viśvahā svarge loke svadhayā mādayantīḥ ||

6.22.8

puṇḍarīkaṃ kumudaṃ saṃ tanoti bisaṃ śālūkaṃ śaphako mulālī | svarge loke svadhayā pinvamānā upa mā tiṣṭhantu puṣkariṇīḥ samaktāḥ ||

6.22.9

yam odanaṃ pacāmi śraddadhāno viṣṭāriṇaṃ lokajitaṃ svargam | sa me mā kṣeṣṭa sadam aśyamāno viśvarūpā kāmadughā dhenur astu me ||

6.22.10

vṛṣabhaṃ santaṃ saha sūnṛtayā svarge loke amṛtaṃ duhānam | ye me putrāḥ pitaraś ca santi te tvā viṣṭārinn upa sarve sadeyuḥ ||

6.22.11

ya imān yajñān abhi vitaṣṭāra yasyeme lokāḥ svadhayā samaktāḥ | ye me pautrā uta ye pitāmahās tebhyo viṣṭārinn amṛtāni dhukṣva ||

6.22.12

yadi pṛthivīṃ yady antarikṣaṃ yadi divaṃ devatā vā jagantha | ye me prapautrāḥ prapitāmahāś ca te tvā viṣṭārinn anu pra jñeṣur atra ||

6.22.13

svarge loke apsarasa enāñ jāyā bhūtvopa śerate | viṣṭāriṇam odanaṃ ye pacanty asmiṃl loke dakṣiṇayā pariṣkṛtam ||

6.23.1

nir ṇudaināṃ pra ṇudaināṃ svān nipadanād adhi | vibhraṃśam asyai kṛṇmo vi gṛhair bhraṃśatām asau ||

6.23.2

apāñcaṃ patim ā kurv adharācīṃ striyaṃ naya | atīmān daśa parvatān atīmā nāvyā daśa ||

6.23.3

adharācīm avācīm atho akuśalāṃ diśam | vibhraṃśam asyai kṛṇmas tenaināṃ pra dahāmasi ||

6.23.4

āja nir aja bilaṃ bilād araṇyam ā kurv araṇyād araṇaṃ janam | mṛgām̐ anu pra pātaya vātasyaināṃ śikhāṃ kuru ||

6.23.5

vātāgre asyā hṛdayaṃ mano reṣmaṇi dadhmasi | vibhraṃśam asyai kṛṇmo vidhvaṃśam āsaktaṃ dame ||

6.23.6

sarvam anu pari plavatām antarā dyāvāpṛthivī ubhe | yathānavadhṛtā carād vṛṣatūlam ivopari ||

6.23.7

aśam asyai vāto vātv aśaṃ tapatu sūryaḥ | atho yad annam aśnāti tad asyai viṣavattaram ||

6.23.8

siṃhas te astu cakṣuṣa ity ekā ||

6.23.9

eṣa vām agnir antarā sa viṣvañcau vy asyatu | yathā vāṃ na sahāsaty uttarasmiṃś canāyuṣi ||

6.23.10

ut pātaya śimidāvati pra pātaya śimidāvati | imau vy asya dampatī pakvaṃ māṃsam ivāsinā ||

6.23.11

meyam asmin patau raṃsta mo asmiñ chayane sve | jahātu vasanaṃ svam ahir jīrṇām iva tvacam ||

6.23.12

yathā mṛtāś ca jīvāś ca- -asmiṃl loke vyokasaḥ | evemau dampatī stām asmiṃl loke vyokasau ||