Kāṇḍa 7

7.1.1

suparṇas tvānvavindat sūkaras tvākhanan nasā | dipsauṣadhe tvaṃ dipsantaṃ prati kṛtyākṛto daha ||

7.1.2

prati daha yātudhānān prati kṛtyākṛto daha | atho yo asmān dipsati tam u tvaṃ jahy oṣadhe ||

7.1.3

agne pṛtanāṣāṭ pṛtanāḥ sahasva | prati kṛtyāṃ kṛtyākṛte pratiharaṇena harāmasi ||

7.1.4

iṣvā ṛjīyaḥ patatu dyāvāpṛthivī tat sutāt | tat taṃ mṛga iva vidhyatu kṛtyā kṛtyākṛtaṃ kṛtā ||

7.1.5

agham astv aghakṛte śapathāḥ śapathīvne | pratyak prati pra hiṇmasi yaś cakāra tam ṛcchatu ||

7.1.6

yas tvā kṛtya ity ekā ||

7.1.7

punaḥ kṛtyāṃ kṛtyākṛte hastagṛhya parā ṇaya | samakṣam asmā ā dadhmo yathā kṛtyākṛtaṃ hanat ||

7.1.8

putra iva pitaraṃ gaccha svaja ivābhiṣṭhito daśa | tantur ivāvavyayann ihi kṛtye kṛtyākṛtaṃ kṛtā ||

7.1.9

ud eṇīva vāriṇy abhiskandaṃ mṛgīva | kṛtyā kartāram ṛcchatu ||

7.1.10

ṛśyasyeva parīśāsaṃ parimāya pari tvacaḥ | durhārde cakruṣe kṛtyāṃ grīvāsu prati muñcata ||

7.1.11

yā kṛtye devakṛtā yā vā manuṣyajā asi | tāṃ tvā prati pra hiṇmasi pratīcīnena brahmaṇā ||

7.1.12

yadi strī yadi vā pumān kṛtyāṃ cakāra pāpmane | tām u tasmai nayāmasy aśvam ivāśvābhidhānyā ||

7.2.1

okte me dyāvā pṛthivī oktā devī sarasvatī | oktau ma indraś cāgniś ca krimiṃ jambhayatām imam ||

7.2.2

asyendra kumārasya krimiṃ dhanapate jahi | hatā viśvā arātayo 'nena vacasā mama ||

7.2.3

yo +'kṣyau parisarpati yo nāse parisarpati | datāṃ yo madhyaṃ gacchati taṃ krimiṃ jambhayāmasi ||

7.2.4

virūpau dvau sarūpau dvau kṛṣṇau dvau rohitau dvau | babhruś ca babhrukarṇaś ca gṛdhrāḥ kokāś ca te hatāḥ ||

7.2.5

ye krimayaḥ śitikakṣā ye kṛṣṇāḥ śitibāhavaḥ | ye ke ca viśvarūpās tān krimīñ jambhayāmasi ||

7.2.6

yo dviśīrṣā caturakṣaḥ krimiḥ sāraṅgo arjunaḥ | śṛṇāmy asya pṛṣṭīr api vṛścāmi yac chiraḥ ||

7.2.7

ud asau sūryo agād viśvadṛṣṭo adṛṣṭahā | dṛṣṭāṃś ca ghnann adṛṣṭāṃś ca sarvāṃś ca pramṛṇan krimīn ||

7.2.8

yevāṣāsaḥ kaṣkaṣāso dhrūkṣṇāsaḥ śipavitnavaḥ | dṛṣṭaś ca hanyatāṃ krimir adṛṣṭaś cota hanyatām ||

7.2.9

hato yevāṣo hataḥ śipavir hato gaṅgaṇivām̐ uta | hatā viśvā arātaya ugreṇa vacasā mama ||

7.2.10

sarveṣāṃ ca krimīṇāṃ sarvāsāṃ ca krimīṇām | bhinadmy aśmanā śiro dahāmy agninā mukham ||

7.3.1

tigmebhir agne arcibhiḥ śukreṇa deva śociṣā | āmādo ni vaha tvam anyam āsani kṛṇvatām ||

7.3.2

śociṣāgne arciṣā ca nir daheto aghāyataḥ | sakhyam āvaṃ kṛṇvahe tvaṃ ca- -āmāda upa śaṃ bhuvan ||

7.3.3

nir āmādo nayāmasi niṣ kravyādo gṛhebhyaḥ | sasyādo nāma ye deva te agne mā dabhan tvām ||

7.3.4

āmādaś ca kravyādaś ca sasyādaś cobhayān saha | prajāṃ ye cakrire bhāgaṃ tān ito nir ṇayāmasi ||

7.3.5

ya āmeṣv aramanta na pakvam upadādhṛṣuḥ | te yantu sarve saṃbhūya- -anyatreto 'ghāyavaḥ ||

7.3.6

ya enasvī duṣkṛtakṛt kilbiṣakṛtasādhī yaḥ | punas tān yajñiyā devā nayantu yata āgatāḥ ||

7.3.7

ava reṇum ava rajo neneje hastyaṃ malam | dhātā no bhadrayā neṣat sa no gopāyatu prajām ||

7.3.8

kṛṇve 'haṃ rodasī varma syāma savituḥ save | mātā no bhadrayā bhūmir dyauś cāsmān pātv aṃhasaḥ ||

7.3.9

yad asurāṇām ahany asmān pāpā upethana | devānāṃ payaś ca daivyam āpaḥ śundhantu mām imāḥ ||

7.3.10

ā te pitar marutāṃ sumnam emi mā naḥ sūryasya saṃdṛśo yuvathāḥ | abhi no vīro 'rvatīḥ kṣameta pra jāyāmahai rudra prajayā ||

7.3.11

yo 'vṛddhaṃ hanti yo garbhe antar yo jātaṃ janitavyaṃ ca pūruṣam | tasmā ṛdhyāsaṃ haviṣāham adya sa naḥ prajāṃ jaradaṣṭiṃ kṛṇotu ||

7.4.1

indrasya bāhū sthavirau vṛṣāṇau citrā imā vṛṣabhau pārayiṣṇū | tau yokṣye prathamau yoga āgate yābhyāṃ jitam asurāṇāṃ svar yat ||

7.4.2

āśuḥ śiśāno vṛṣabho na bhīmo ghanāghanaḥ kṣobhaṇaś carṣaṇīnām | saṃkrandano 'nimiṣa ekavīraḥ śataṃ senā jayatu sākam indraḥ ||

7.4.3

saṃkrandanenānimiṣeṇa jiṣṇunā- -ayodhyena duścyavanena dhṛṣṇunā | tad indreṇa jayata tat sahadhvaṃ yudho nara iṣuhastena vṛṣṇā ||

7.4.4

sa iṣuhastaiḥ sa niṣaṅgibhir vaśī saṃsraṣṭā yudha indro gaṇena | saṃsṛṣṭajit somapā bāhuśardhy ūrdhvadhanvā pratihitābhir astāt ||

7.4.5

balavijñāyaḥ sthaviraḥ pravīraḥ sahasvān vājī sahamāna ugraḥ | abhivīro abhiṣatvā sahojij jaitrāyendra ratham ā tiṣṭha govidam ||

7.4.6

imaṃ vīram anu harṣadhvam ugram indraṃ satvāno anu saṃ rabhadhvam | grāmajitaṃ gojitaṃ vajrabāhuṃ jayantam ajma pramṛṇantam ojasā ||

7.4.7

abhi gotrāṇi sahasā gāhamāno adāya ugraḥ śatamanyur indraḥ | duścyavanaḥ pṛtanāṣāḍ ayodhyo asmākaṃ senā avatu pra yutsu ||

7.4.8

bṛhaspate pari dīyā rathena rakṣohāmitrām̐ apabādhamānaḥ | prabhañjañ chatrūn pramṛṇann amitrān asmākam edhy avitā tanūnām ||

7.4.9

indra āsāṃ netā bṛhaspatir dakṣiṇā yajñaḥ pura etu somaḥ | devasenānām abhibhañjatīnāṃ jayantīnāṃ maruto yantu madhye ||

7.4.10

indrasya vṛṣṇo varuṇasya rājña ādityānāṃ marutāṃ śardha ugram | mahāmanasāṃ bhuvanacyavānāṃ ghoṣo devānāṃ jayatām ud asthāt ||

7.4.11

asmākam indraḥ samṛteṣu dhvajeṣv asmākaṃ yā iṣavas tā jayantu | asmākaṃ vīrā uttare bhavantv asmān devāso 'vatā haveṣu ||

7.5.1

vaiśvānarād arocata jāto hiraṇyayo maṇiḥ | tam ābharad bṛhaspatiḥ kaśyapo vīryāya kam ||

7.5.2

bṛhaspatis tam akṛṇon maṇiṃ vaiśvānaraṃ sahaḥ | saptarṣayo balāya kaṃ saṃ dadhuṣ ṭvā vayodhasaḥ ||

7.5.3

viśve devās ta indriyaṃ saptarṣayaś ca saṃ dadhuḥ | jāto hiraṇyayo maṇir agner vaiśvānarād adhi ||

7.5.4

aśvattho jātaḥ prathamo 'gneḥ priyatamā tanūḥ | vaiśvānarasya sṛṣṭyā kṛtyādūṣiḥ kṛto maṇiḥ ||

7.5.5

kṛtyādūṣiṃ tvāvidaṃ kṛtyādūṣiṃ bharāmi tvā | kṛtyādūṣiṃ kṛṇomi tvā kṛtyādūṣiṃ vayodhasam ||

7.5.6

patatrī pakṣī balavān kṛtyādūṣiḥ sapatnahā | nitatnir viśvabheṣaja ugra āpatiko maṇiḥ ||

7.5.7

patatrī te balāya kaṃ nitatnir bheṣajāya te | jāto hiraṇyayo maṇir apa rakṣāṃsi sedhatu ||

7.5.8

devo maṇiḥ sapatnahā rakṣohāmīvacātanaḥ | hiraṇyayonir aṃśumān kaśyapenābhṛtaṃ sahaḥ ||

7.5.9

vaiśvānaraṃ tejanam ekam āhur agner yoneḥ saha candreṇa jātam | gayasphānaḥ prataraṇo vayodhāḥ kṛtyādūṣir valagahāsy ugraḥ ||

7.5.10

yasyedaṃ bhūmyām adhi nikrāntaṃ pāṃsure padam | mṛjānas tanvo yad rapas tasya snāhi tanū adhi ||

7.5.11

dūṣyās tvā vadhaṃ vayaṃ devasya savituḥ save | jīvātave bharāmasi mahyā ariṣṭatātaye ||

7.5.12

ācchedanaḥ pracchedano dviṣatas tapano maṇiḥ | śatruñjayaḥ sapatnahā dviṣantam apa bādhatām ||

7.6.1

satyasya sthūṇā pṛthivīṃ dādhāra ṛtena devā amṛtam anv avindan | dhruveṇa tvā haviṣā dhārayāmy abhi tad dyāvāpṛthivī gṛṇītām ||

7.6.2

yebhir homair viśvakarmā dādhāremāṃ pṛthivīṃ mātaraṃ naḥ | tebhiṣ ṭvā homair iha dhārayāmy ṛtaṃ satyam anu carantu homāḥ ||

7.6.3

iha dhriyadhvaṃ dharuṇe pṛthivyā uśatyā mātuḥ subhagāyā upasthe | aparāṇuttā mahasā modamānā asmin vāstau suprajaso bhavātha ||

7.6.4

suprajaso mahasā modamānā varṣman pṛthivyā upari śrayadhvam | asyai śālāyai śarma yacchantu devā dhārābhir enāṃ pṛthivī pipartu ||

7.6.5

imāṃ śālāṃ śreṣṭhatamāṃ vasūnām ariṣṭavīrā abhi saṃ carema | dṛḍhā asyā upamito bhavantu sthirā vīrā upasado bhavantu ||

7.6.6

imāṃ śālāṃ savitā vāyur indro bṛhaspatir ni minotu prajānan | ukṣantūdnā maruto ghṛtena bhago no rājā ni kṛṣiṃ dadhātu ||

7.6.7

mānasya patni haviṣo juṣasva tīvrāntasya bahulamadhyamasya | ā tvā śiśur vāśyatām ā kumāra ā vāśyantāṃ dhenavo nityavatsāḥ ||

7.6.8

dṛḍhās te sthūṇā bhavantu bhūmyām adhi dṛḍhāḥ pakṣāsas tava devi śāle | sthiravīrānamitrā na edhi śarma no yaccha dvipade catuṣpade ||

7.6.9

śālā devī gārhapatyāya cākl̥pe tṛṇaṃ vasānā jagate suśevā | sthirāṅgāṃ tvā sthirapūruṣāṃ mānasya patni sthirāṃ tvā vīrā abhi saṃ carema ||

7.6.10

vāstoṣpate prati jānīhy asmān svāveśo anamīvo na edhi | yat tvemahe prati nas taj juṣasva catuṣpado dvipada ā veśayeha ||

7.7.1

darbho agra oṣadhīnāṃ śatakāṇḍo ajāyata | sa sahasravīryaḥ pari ṇaḥ pātu viśvataḥ ||

7.7.2

yathā darbho jāyamānas tvacaṃ bhinatti bhūmyāḥ | evā sa bhidyatāṃ jano yo naḥ pāpaṃ cikitsati ||

7.7.3

apa nāḍam apa kṛtyām apa rakṣaḥ sadānvāḥ | amīvāś cātayāmasi sarvāś ca yātudhānyaḥ ||

7.7.4

asti vai nivata udvanaṃ na vai sarvam anuplavam | asi tvaṃ tasya dūṣaṇo yo naḥ pāpaṃ cikitsati ||

7.7.5

pari sāyaṃ pari prātaḥ pari madhyaṃdinaṃ pari | darbho hiraṇyahastaghnaḥ pari ṇaḥ pātu viśvataḥ ||

7.7.6

girau jātaḥ svar ahāsi sākaṃ somena babhruṇā | mā pāpakṛtvanaḥ śiṣo mā pākaḥ puruṣo riṣat ||

7.7.7

divo mūlam avatataṃ pṛthivyām ota āhitaḥ | darbhaḥ sahasravīryaḥ pari ṇaḥ pātu viśvataḥ ||

7.7.8

sahasrakāṇḍas taviṣas tīkṣṇavalśo viṣāsahiḥ | darbheṇa sarvā rakṣāṃsy amīvāś cāpa dahāmasi ||

7.7.9

apadagdhaṃ duṣvapnyam apadagdhā arātayaḥ | sarvāś ca yātudhānyaḥ ||

7.7.10

mā tvā dabhan yātudhānā mā bradhnaḥ śakuniḥ patan | darbho rājā samudriyaḥ pari ṇaḥ pātu viśvataḥ ||

7.8.1

yo naḥ pāpena vacasā- -aghoṣato duruktaṃ bruvat | ārāc chaptam aprāpyāsmān apa tad yātu sarvataḥ ||

7.8.2

yan naḥ śapād araṇo yat sapatnaḥ śvaśrūr vā yac chvaśuro vā śapāti | jyāyasaḥ śapathān vayaṃ yavena yāvayāmasi ||

7.8.3

yān samasyante śapathān vākkṣamyānṛtviyāmadhi | yavaṃ tvaṃ bibhrad bāhvoḥ pūrvaḥ prati śṛṇīhi tān ||

7.8.4

ṛjukeśo yavo babhrur maghavā no 'numādyaḥ | hiraṇyadhanvā śapathān upejatu ||

7.8.5

tvāṃ pītvendro vṛtraṃ śakro jaghāna vāsavaḥ | sa viṣāhī yatharṣabhaḥ sahasva śapathān yava ||

7.8.6

ārāc carantu śapathā yutā ito jihvā u ditā arasāḥ santu sarve | nāmagrāhād vāco heḍād īkṣitād ghoracakṣasaḥ śarma te varma kṛṇmasi ||

7.8.7

apāñco yantu śapathā janenāstā aghāyunā | yo no durasyāj jīvate svenānāgase sate ||

7.8.8

pari mā pātu śapathād anṛtād duritād uta | pari mā jyāyasaḥ śaṃsād yavo rakṣatu mā riṣam ||

7.8.9

anāstigyaṃ śapathair anativyādhyaṃ kṛtam | bṛhad varma prati muñcāmi te yavam ||

7.8.10

taṃ vayāṃsīva pakṣiṇa ā viśantu patatriṇaḥ | śaptāraṃ śapathāḥ punaḥ ||

7.9.1

ā no diśa mā pari ṣṭhā arāte mā no rakṣīr dakṣiṇāṃ yācamānām | pra ṇaḥ pradātā savitā ca yacchatāṃ namo vīrtsāyā asamṛddhyai ca kṛṇmaḥ ||

7.9.2

yam arāte purodhatse puruṣaṃ parirāpiṇam | namas te tasmai kṛṇmo mā vaniṃ mama vivyathaḥ ||

7.9.3

yam adyābhiprayuñjmahe manasā hṛdayena ca | arāte taṃ no mā vīrtsīr ditsantaṃ parirāpiṇi ||

7.9.4

pra ṇo vanir devakṛtā divā naktaṃ ca sidhyatu | arātim anupremo vayaṃ namo 'stv arātaye ||

7.9.5

uta nagnā bobhuvatī svapnayā sacase janam | arāte cittaṃ vīrtsanty ākūtiṃ puruṣasya ca ||

7.9.6

paro 'pehy asamṛddhe vi te hetiṃ nayāmasi | yaṃ dviṣmas taṃ sacasva kanyā bhūtvā sragviṇī rukmiṇī dṛśe ||

7.9.7

namas te 'stv asamṛddhe mā māṃ purodhiṃ kṛṇuthāḥ | veda tvāhaṃ nimīvantīṃ nitudantīm arāte martyān martyebhyo adhi nirvadantīm ||

7.9.8

mā no vaniṃ mā vācaṃ mā vīrtsīr ugrāv indrāgnī na ā bhajatāṃ vasūni | sarve no 'dya ditsanto arātiṃ prati haryata ||

7.9.9

savitāram anumatiṃ bhagaṃ yanto havāmahe | vācaṃ juṣṭāṃ madhumatīṃ vadāni devānāṃ devahūtiṣu ||

7.9.10

yaṃ yācāmi nakulyā jihvayoṣṭhāpidhānayā | śraddhā tam adya vindatu dattā somena babhruṇā ||

7.10.1

aitu devas trāyamāṇaḥ kuṣṭho himavatas pari | takmānaṃ sarvaṃ nāśayan sarvāś ca yātudhānyaḥ ||

7.10.2

trīṇi te kuṣṭha nāmāni naghamāro naghāriṣo naghāyuṣo na ghāyaṃ puruṣo riṣat | yasmai paribravīmi tvā sāyaṃprātar atho divā ||

7.10.3

jīvalā nāma te mātā jīvanto nāma te pitā māriṣā nāma te svasā na (…) ||

7.10.4

uttamo 'sy oṣadhīnām anaḍvāñ jagatām iva vyāghraḥ śvapadām iva na ghāyaṃ puruṣo riṣat | yasmai paribravīmi tvā sāyaṃprātar atho divā ||

7.10.5

triḥ śāmbubhyo gireyebhyas trir ādityebhyas pari | trir jāto viśvadevebhyaḥ sa kuṣṭho viśvabheṣajaḥ sākaṃ somena tiṣṭhati | takmānaṃ sarvaṃ nāśayan sarvāś ca yātudhānyaḥ ||

7.10.6

aśvattho devasadanas tṛtīyasyām ito divi | tatrāmṛtasya cakṣaṇaṃ tataḥ kuṣṭho 'jāyata | saḥ (…) ||

7.10.7

hiraṇyayī naur acarad dhiraṇyabandhanā divi (…) ||

7.10.8

yatra nāvaḥ prabhraṃśanaṃ yatra himavataḥ śiraḥ | tatrāmṛtasya cakṣaṇaṃ tataḥ kuṣṭho ajāyata | sa kuṣṭho viśvabheṣajaḥ sākaṃ somena tiṣṭhati | takmānaṃ sarvaṃ nāśayan sarvāś ca yātudhānyaḥ ||

7.10.9

yaṃ tvā veda pūrva aikṣvāko yaṃ vā tvā kuṣṭha kāśyaḥ | yaṃ śāvaso yaṃ mātsyas tenāsi viśvabheṣajaḥ ||

7.10.10

śīrṣālākaṃ tṛtīyakaṃ sadandir yaś ca hāyanaḥ | takmānaṃ viśvadhāvīrya- -adharāñcaṃ parā suva ||

7.11.1

ye parvatāḥ somapṛṣṭhā āpa uttānaśīvarīḥ | vātaḥ parjanya ād agnis te kravyādam aśīśaman ||

7.11.2

yas te hanti carācaram utthāsyantaṃ sarīsṛpam | garbhaṃ yo daśamāsyaṃ tam ito nāśayāmasi ||

7.11.3

yadi ghnanty apsaraso gandharvā gehyā uta | kravyādo mūradevinas tān ito nāśayāmasi ||

7.11.4

yas ta ūrū ārohaty asṛk te rehaṇāya kam | āmādaḥ kravyādo ripūṃs tān ito nāśayāmasi ||

7.11.5

yas te śroṇī cyāvayaty antarā dampatī śaye | yoniṃ yo antar āreḍhi tam ito nāśayāmasi ||

7.11.6

yas tvā svapnena tamasā mohayitvā nipadyate | prajāṃ yas te jighatsati tam (…) ||

7.11.7

yas tvā patyuḥ pratirūpo jāro bhūtvā nipadyate | arāyaṃ kaṇvaṃ pāpmānaṃ tam ito nāśayāmasi ||

7.11.8

hā hai kharva khalate naigūrakarṇa tuṇḍila | indrasya tigmam āyudhaṃ tena tvā nāśayāmasi ||

7.11.9

namas taṇḍāya namaḥ kusumāya namaḥ pratipāvne namaḥ kaḥsvadheye | namas tubhyaṃ nirṛte viśvavāre jaremaṃ dhāpayatāṃ viśvarūpā ||

7.11.10

yāvad dyaur yāvat pṛthivī yāvat paryeti sūryaḥ | tāvat tvam ugra gulgulo parīmāṃ pāhi viśvataḥ ||

7.12.1

ekarājñīm ekavratām ekasthām ekalāmikām | pāṭāṃ sapatnacātanīṃ jaitrāyācchā vadāmasi ||

7.12.2

ekarājñy ekavrata ekastha ekalāmike | na tvā sapatnī sāsāha gaireyī ca na bāhyā ||

7.12.3

uttarāham uttarābhya uttared adharābhyaḥ | adhaḥ sapatnī māmaky adhared adharābhyaḥ ||

7.12.4

na saindhavasya puṣpasya sūryo mlāpayati tvacam | pāṭe 'mlātayā tvayā sapatnyā varca ā dade ||

7.12.5

na vai pāṭe pāṭevāsi subhāgaṃkaraṇīd asi | pāṭe bhagasya no dhehy atho mā mahiṣīṃ kṛṇu ||

7.12.6

yat pāṭe adhi vṛkṣe vātaplavā mahīyase | jayantī pratyātiṣṭhantī saṃjayā nāma vā asi ||

7.12.7

uttānaparṇāṃ subhagāṃ sahamānāṃ sahasvatīm | acchā bṛhadvadāṃ vada pāṭāṃ sapatnacātanīm ||

7.12.8

pāṭām indro vy āśnād dhantavā asurebhyaḥ | tayāhaṃ sapatnīṃ sākṣīya mahendro dānavān iva ||

7.12.9

pāṭā bibharty aṅkuśaṃ hiraṇyavantam aṅkinam | tena sapatnyā varca ā lumpāmi mamed asat ||

7.12.10

imāṃ khanāmy oṣadhiṃ vīrudhāṃ balavattamām | yayā sapatnīṃ bādhate kṛṇute kevalaṃ patim ||

7.13.1

yāsām ārād āghoṣāmo vātasyeva pṛthag yataḥ | tāsāṃ śvanvatīnām indro api kṛtac chiraḥ ||

7.13.2

yāḥ purastād ācaranti sākaṃ sūryasya raśmibhiḥ (…) ||

7.13.3

yā vātam anusaṃyanty antarikṣe adho divaḥ (…) ||

7.13.4

yāsāṃ preṅkho divi baddho antarikṣe hiraṇyayaḥ (…) ||

7.13.5

yās talpān anunṛtyanty antarikṣe hiraṇyayān (…) ||

7.13.6

yāḥ patanti vātarathā uttānāḥ pādaghātinīḥ (…) ||

7.13.7

yā vṛkṣaṃ parisarpanti sācy akṣī karikratīḥ (…) ||

7.13.8

yāś catvare saṃgacchante vikumbāś celavāsinīḥ (…) ||

7.13.9

yāsāṃ sikatavāpiṣu gṛho mito hiraṇyayaḥ (…) ||

7.13.10

yā ārokaiḥ prapadyante puṣkarair iva jāmayaḥ (…) ||

7.13.11

yā nadīḥ pratigāhante saṃrabhya kanyā iva (…) ||

7.13.12

yās tīrthāni vigāhante 'ghnyāḥ śvasatīr iva (…) ||

7.13.13

yāḥ samudrād uccaranty uccair ghoṣān karikratīḥ (…) ||

7.13.14

yā gacchanti janaṃjanam icchantīḥ prayutaṃ bahu | tāsāṃ śvanvatīnām indro api kṛtac chiraḥ ||

7.14.1

agnir āyuṣmān sa vanaspatibhir āyuṣmān | sa māyuṣmān āyuṣmantaṃ kṛṇotu ||

7.14.2

vāyur āyuṣmān so 'ntarikṣeṇāyuṣmān (…) ||

7.14.3

sūrya āyuṣmān sa divāyuṣmān (…) ||

7.14.4

candra āyuṣmān sa nakṣatrair āyuṣmān (…) ||

7.14.5

soma āyuṣmān sa oṣadhībhir āyuṣmān (…) ||

7.14.6

yajña āyuṣmān sa dakṣiṇābhir āyuṣmān (…) ||

7.14.7

samudra āyuṣmān sa nadībhir āyuṣmān | sa māyuṣmān āyuṣmantaṃ kṛṇotu ||

7.14.8

brahmāyuṣmat tad brahmacāribhir āyuṣmat | tan māyuṣmad āyuṣmantaṃ kṛṇotu ||

7.14.9

indra āyuṣmān sa vīryeṇāyuṣmān | sa māyuṣmān āyuṣmantaṃ kṛṇotu ||

7.14.10

devā āyuṣmantas te 'mṛtenāyuṣmantaḥ | te māyuṣmanta āyuṣmantaṃ kṛṇvantu ||

7.14.11

prajāpatir āyuṣmān sa prajābhir āyuṣmān | sa māyuṣmān āyuṣmantaṃ kṛṇotu ||

7.15.1

dakṣiṇā mā dakṣiṇato dakṣiṇā pātu savyataḥ | paścād anuvyādhāt pātu sarvasyā bhavahetyāḥ ||

7.15.2

paśunā tvaṃ paśupate dvipād dattvā catuṣpadā | ātmanvatīṃ dakṣiṇāṃ prāṇaṃ dattvā prāṇihi ||

7.15.3

yāṃ dadāsi śraddadhāno dakṣiṇāṃ brāhmaṇakṛte | sā tvā yakṣmāt pārayatv agneḥ saṃtāpād divyasya śokāt ||

7.15.4

dadāsīmāṃ dakṣiṇāṃ mā ta āmamac chalyān yakṣmān vi vṛhāmo vayaṃ te | karṇaśūlam upahatyā arātīḥ sarve yakṣmā apa tiṣṭhantu sākam ||

7.15.5

annena prāṇaṃ vanute tiro dhatte paridhānena yakṣmam | hiraṇyam aśvaṃ gāṃ dadat kṛṇute varma dakṣiṇām ||

7.15.6

uṣṇīṣaṃ tvā śīrṣaktyā vāsas tvā tanvāmayāt | candraṃ hiraṇyam andhyāt karṇād dattaṃ śukraṃ bhrājad bādhiryāt pātu dakṣiṇā ||

7.15.7

upabarhaṇaṃ tvā grīvāmayān maṇayo yakṣmād datkravyāt | aṅgarogād abhyañjanam annaṃ tvāntaṣṭyāmayāt ||

7.15.8

adhaspadād āmayataḥ pado rogād upānahau | daṇḍas tvā dattaḥ pari pātu sarpād dakṣiṇataḥ prayato dakṣiṇena ||

7.15.9

saumanasaṃ dakṣiṇāṃ dakṣamāṇā iṣam ūrjaṃ dakṣiṇāṃ saṃvasānāḥ | bhagasya dhārām avase pratīmaḥ ||

7.15.10

sahasrāṅgā śataṃ jyotīṃṣy asyā yajñasya paprir amṛtā svargā | ā na etu dakṣiṇā viśvarūpā- -ahiṃsantīṃ prati gṛhṇīma enām ||

7.16.1

agnir mā pātu vasubhiḥ purastāt tasmin krame tasmiṃ śraye tāṃ puraṃ praimi | sa mā rakṣatu sa mā gopāyatu tasmā ātmānaṃ pari dade svāhā ||

7.16.2

vāyur māntarikṣeṇa etasyā diśaḥ pātu tasmin krame tasmiṃ śraye tāṃ puraṃ praimi | sa mā rakṣatu sa mā gopāyatu tasmā ātmānaṃ pari dade svāhā ||

7.16.3

somo mā rudrair dakṣiṇāyā diśaḥ pātu tasmin krame tasmiṃ śraye tāṃ puraṃ praimi | sa mā rakṣatu sa mā gopāyatu tasmā ātmānaṃ pari dade svāhā ||

7.16.4

varuṇo mā ādityair etasyā diśaḥ pātu tasmin krame tasmiṃ śraye tāṃ puraṃ praimi | sa mā rakṣatu sa mā gopāyatu tasmā ātmānaṃ pari dade svāhā ||

7.16.5

sūryo mā dyāvāpṛthivībhyāṃ pratīcyā diśaḥ pātu tasmin krame tasmiṃ śraye tāṃ puraṃ praimi | sa mā rakṣatu sa mā gopāyatu tasmā ātmānaṃ pari dade svāhā ||

7.16.6

apo mauṣadhīmatīr etasyā diśaḥ pāntu tāsu krame tāsu śraye tāṃ puraṃ praimi | tā mā rakṣantu tā mā gopāyantu tābhya ātmānaṃ pari dade svāhā ||

7.16.7

viśvakarmā mā saptarṣibhir udīcyā diśaḥ pātu tasmin krame tasmiṃ śraye tāṃ puraṃ praimi | sa mā rakṣatu sa mā gopāyatu tasmā ātmānaṃ pari dade svāhā ||

7.16.8

indro mā marutvān etasyā diśaḥ pātu tasmin krame tasmiṃ śraye tāṃ puraṃ praimi | sa mā rakṣatu sa mā gopāyatu tasmā ātmānaṃ pari dade svāhā ||

7.16.9

prajāpatir mā prajananavān saha pratiṣṭhayā dhruvāyā diśaḥ pātu tasmin krame tasmiṃ śraye tāṃ puraṃ praimi | sa mā rakṣatu sa mā gopāyatu tasmā ātmānaṃ pari dade svāhā ||

7.16.10

bṛhaspatir mā viśvair devair ūrdhvāyā diśaḥ pātu tasmin krame tasmiṃ śraye tāṃ puraṃ praimi | sa mā rakṣatu sa mā gopāyatu tasmā ātmānaṃ pari dade svāhā ||

7.17.1

agniṃ te vasumantam ṛcchantu ye māghāyavaḥ prācyā diśo +'bhidāsān ||

7.17.2

vāyuṃ te 'ntarikṣavantam ṛcchantu ye māghāyava etasyā diśo +'bhidāsān ||

7.17.3

somaṃ te rudravantam ṛcchantu ye māghāyavo dakṣiṇāyā diśo +'bhidāsān ||

7.17.4

varuṇaṃ ta ādityavantam ṛcchantu ye māghāyava etasyā diśo +'bhidāsān ||

7.17.5

sūryaṃ te dyāvāpṛthivīvantam ṛcchantu ye māghāyavaḥ pratīcyā diśo +'bhidāsān ||

7.17.6

apas ta oṣadhīmatīr ṛcchantu ye māghāyava etasyā diśo +'bhidāsān ||

7.17.7

viśvakarmāṇaṃ te saptarṣivantam ṛcchantu ye māghāyava udīcyā diśo +'bhidāsān ||

7.17.8

indraṃ te marutvantam ṛcchantu ye māghāyava etasyā diśo +'bhidāsān ||

7.17.9

prajāpatiṃ te prajananavantam ṛcchantu ye māghāyavo dhruvāyā diśo +'bhidāsān ||

7.17.10

bṛhaspatiṃ te viśvadevavantam ṛcchantu ye māghāyava ūrdhvāyā diśo +'bhidāsān ||

7.18.1

vaikaṅkatenedhmena devebhya ājyaṃ vaha | agne tān iha mādaya sarva ā yantu me havam ||

7.18.2

indra ā yāhi me havam idaṃ kariṣyāmi tac chṛṇu | ima aindrā atisarā ākūtīḥ saṃ namantu me | tebhiḥ śakema vīryaṃ jātavedas tanūvaśin ||

7.18.3

yad asāv amuto devā adevaḥ saṃścikīrṣati | mā tasyāgnir havyaṃ vākṣīd dhavaṃ devāś ca mopa gur mamaiva havam etana ||

7.18.4

ati dhāvatātisarā viśvasyeśānā ojasaḥ | vṛścatāmuṣya jīvitam indreṇa saha medinā ||

7.18.5

atisṛtyātisarā indrasyaujasā hata | aviṃ vṛka iva mathnīta tato vo jīvan mā moci prāṇam asyāpi nahyata ||

7.18.6

yān asau pratisarān akaś cakāra kṛṇavac ca yān | tvaṃ tān indra vṛtrahan pratīcaḥ punar ā kṛdhi yathāmuṃ tṛṇahañ janam ||

7.18.7

yam amī purodadhire brahmāṇam upabhūtaye | indrasya te adhaspadaṃ taṃ pra yacchāmi mṛtyave kravyād enaṃ śamayatu ||

7.18.8

yadi preyur devapurā brahma varmāṇi cakrire | tanūpānaṃ paripāṇāni cakrire sarvaṃ tad arasaṃ kṛdhi ||

7.18.9

atrainam indra vṛtrahann ugro marmaṇi vidhya | atraivainam abhi tiṣṭha śakra medy ahaṃ tava | anu tvendrā rabhāmahe syāma sumatau tava ||

7.18.10

yathendra udvācanaṃ labdhvā cakre adhaspadam | kṛṇve 'mum adharaṃ tathā śaśvatībhyaḥ samābhyaḥ ||

7.19.1

āṅgiraso janmanāsi tam u tvāhur vanaspate | sa pīlo rakṣo bādhasva sākam indreṇa medinā ||

7.19.2

apa rakṣāṃsi bādhasva bādhasva parirāpiṇaḥ | piśācān pīlo kravyādo bādhasva mūradevinaḥ ||

7.19.3

yayāhus tṛṣṭaṃ kaṭukam apagūḍhaṃ phale kulam | tasyai hiraṇyakeśyai namaḥ kṛṇmo arātaye ||

7.19.4

yā mahatī mahonmānā sarvā āśā vyānaśe | tasyai hiraṇyakeśyai namaḥ kṛṇmo arātaye ||

7.19.5

yas te yoniṃ pratireḍhy āṇḍādo garbhadūṣaṇaḥ | arāyaṃ putraṃ prāpī yas taṃ pīluḥ sahatām itaḥ ||

7.19.6

yadā pīlav āṅgirasa pakvo 'tiṣṭho vanaspate | athāhur indraṃ jajñānaṃ śakraṃ barjahye prati ||

7.19.7

yathā sedim abādhathāḥ pacyamāno vanaspate | evā pīlo rakṣo bādhasva sākam indreṇa medinā ||

7.19.8

yat piśācaiḥ puruṣasya jagdhaṃ bhavaty ātmanaḥ | ā pīlo pyāyate punas tava cāśnāti pippalam ||

7.19.9

pīluṃ tvāhuḥ pīvaṃ tvāhur atho tvāhur vanaspatim | sarvā te bhadrā nāmāni tebhir naḥ pāhy aṃhasaḥ ||

7.19.10

rakṣohaṇaṃ vṛtrahaṇaṃ pīluṃ piśācajambhanam | jajñānam agre vṛkṣāṇāṃ taṃ te badhnāmy āyuṣe ||