Kāṇḍa 8

8.1.1

kathā dive asurāya bravāma kathā pitre haraye tveṣanṛmṇaḥ | pṛśniṃ varuṇa dakṣiṇāṃ dadāvān punarmagha tvaṃ manasācikitsīḥ ||

8.1.2

na kāmena punarmagho bhavāmi saṃpṛcya kaṃ pṛśnim etām upāje | kena mat tvam atharvan kāvyena kena jātenāsi jātavedāḥ ||

8.1.3

satyam ahaṃ gabhīraḥ kāvyena satyaṃ jātenāsmi jātavedāḥ | na me dāso nāryo mahitvaṃ vrataṃ mīmāya yad ahaṃ dhariṣye ||

8.1.4

na tvad anyaḥ kavitaro na vedhā na dhīrataro varuṇa svadhāvaḥ | tvam aṅga viśvā janimāni vettha sa cin nu tvaj jano māyī bibhāya ||

8.1.5

tvaṃ hy aṅga varuṇa svadhāvo viśvāni vettha janimā śardhanīte | kim enā rajasaḥ paro 'sti kim avareṇāvaram amura ||

8.1.6

ekam enā rajasaḥ paro 'sti para ekena durdāśaṃ cid anyat | tat te vidvān varuṇa pra bravīmy adhovacasaḥ paṇayo bhavantu nīcair dāsā upa sarpantu riprāḥ ||

8.1.7

tvaṃ hy aṅga varuṇa pra bravīṣi punarmagheṣv avadyāni bhūri | mo ṣu paṇy abhy etāvatā bhūr mā tvā vocann arādhasaṃ janāsaḥ ||

8.1.8

mā mā vocann arādhasaṃ janāsaḥ punas te pṛśniṃ jaritar dadāmi | stotraṃ me viśvam ā yāhi janeṣv antar deveṣu mānuṣeṣu vipra ||

8.1.9

ā te stotrāṇi vardhanāni yāmi dehi tan mahyaṃ yad adattam asti | yujyo naḥ saptapadaḥ sakhāsi samā nau bandhur varuṇaḥ samā jā ||

8.1.10

veda vai tad yan nau samā jā dadāmi tubhyaṃ yad adattam asti | devo devāya gṛṇate vayodhā vipro viprāya stuvate sumedhāḥ ||

8.1.11

ajījano hi varuṇa svadhāvann atharvāṇaṃ pitaraṃ viśvadevam | tasmā urv āyuṣ kṛṇuhi praśastaṃ sakhā no 'si paramaś ca bandhuḥ ||

8.2.1

vṛṣā me ravo nabhasā na tanyatur ugreṇa taṃ vacasā bādha id u te | ahaṃ tam asya grabhir agrabhaṃ rasaṃ jyotiṣeva tamasa ud eti sūryaḥ ||

8.2.2

yat te 'podakaṃ viṣaṃ tat ta āt tābhir agrabham | gṛhṇāmi madhyam uttamam utāvamaṃ bhiyasā neśad ād u te ||

8.2.3

balena te balaṃ hanmi tanvā hanmi te tanum | viṣeṇa hanmi te viṣam ahe mṛṣīṣṭhā mā jīvīḥ pratyag abhy etu tvā viṣam ||

8.2.4

asitasya taimātasya babhror apodakasya ca | sātrāsāhasya manyor jyām ugrasyeva dhanvano vi muñcāmi rathām̐ iva ||

8.2.5

kailāta pṛśna upatṛṇya babhrav ā me śṛṇutāsitā alīkāḥ | mā naḥ sakhyuḥ kāmam api ṣṭhād āśrāvayāddho vīrṣe ramadhvam ||

8.2.6

āliki ca vili pitā yas te mātā ca | vidma te viśvato bandhum arasa kiṃ kariṣyasi ||

8.2.7

urugūlāyā duhitā jātā dāsy asiknyāḥ | prataṅkaṃ dadruṣī nu sāhīn arasām̐ akaḥ ||

8.2.8

karṇā śvāvid abravīd girer avacarantikā | yāḥ kāś cemāḥ khanitrimās tāsām arasatamaṃ viṣam ||

8.2.9

tābuvaṃ na tābuvaṃ na ghed asi tvaṃ tābuvam | tābuvenārasaṃ viṣam ||

8.2.10

tastuvaṃ na tastuvaṃ na ghed asi tvaṃ tastuvam | tastuvenārasaṃ viṣam ||

8.2.11

arasaṃ te 'he viṣam iyaṃ kṛṇotv oṣadhiḥ | trāyamāṇā sahamānā sahasvatī sahātā id gor aśvāt puruṣād viṣam ||

8.3.1

yad āñjanaṃ traikakudaṃ jātaṃ himavatas pari | yātūṃś ca sarvān jambhayā sarvāś ca yātudhānyaḥ ||

8.3.2

utevāsi paripāṇaṃ yātujambhanam āñjana | utāmṛtatvasyeśiṣa utāsi pitubhojanam ||

8.3.3

paripāṇaṃ puruṣāṇāṃ paripāṇaṃ gavām asi | aśvānām arvatām it paripāṇāya tasthiṣe ||

8.3.4

pari māṃ pari ṇaḥ priyaṃ pari ṇaḥ pāhi yad dhanam | arātir in no mā tārīn mā ca naḥ kiṃ canāmamat ||

8.3.5

na taṃ prāpnoti śapatho na kṛtyā nābhiśocanam | nainaṃ viṣkandham aśnute yas tvā bibharty āñjana ||

8.3.6

āsan mantryād duṣvapnyāt kṣetriyāc chapathād uta | durhārdaś cakṣuṣo ghorāt tasmān naḥ pāhy āñjana ||

8.3.7

trayo dāsā āñjanasya takmā balāsa ād ahiḥ | varṣiṣṭhaḥ parvatānāṃ trikakun nāma te pitā ||

8.3.8

vṛtrasyāsi kanīnikā parvatasyāsy akṣyau | devebhiḥ sarvaiḥ proktaṃ paridhir nāma vā asi ||

8.3.9

vaido ha veda te nāma gandharvaḥ parivācanam | yata āñjana prajāyase tata ehy ariṣṭatātaye ||

8.3.10

yadi vāsi traikakudaṃ yadi yāmunam ucyase | ubhe te bhadre nāmnī tābhyāṃ naḥ pāhy āñjana ||

8.3.11

yasyāñjana prasarpasy aṅgamaṅgaṃ paruṣparuḥ | tasmād yakṣmaṃ vi bādhasva- -ugro madhyamaśīr iva ||

8.3.12

nainaṃ ghnanti paryāyiṇo na sannām̐ ava gacchati | jane sa na pra mīyate yas tvā bibharty āñjana ||

8.3.13

idaṃ vidvān āñjana satyaṃ vakṣyāmi nānṛtam | saneyam aśvaṃ gāṃ vāsa ātmānaṃ tava pūruṣa ||

8.4.1

ya ekavṛṣo 'si sṛjāraso 'si ||

8.4.2

yo dvivṛṣo 'si sṛjāraso 'si ||

8.4.3

yas trivṛṣo 'si sṛjāraso 'si ||

8.4.4

yaś caturvṛṣo 'si sṛjāraso 'si ||

8.4.5

yaḥ pañcavṛṣo 'si sṛjāraso 'si ||

8.4.6

yaḥ ṣaḍvṛṣo 'si sṛjāraso 'si ||

8.4.7

yaḥ saptavṛṣo 'si sṛjāraso 'si ||

8.4.8

yo 'ṣṭavṛṣo 'si sṛjāraso 'si ||

8.4.9

yo navavṛṣo 'si sṛjāraso 'si ||

8.4.10

yo daśavṛṣo 'si sṛjāraso 'si ||

8.4.11

yo 'podako 'si sṛjāraso 'si ||

8.5.1

ekā ca me daśa ca- -apavaktāra oṣadhe | ṛtajāta ṛtāvari madhu tvā madhulā karat ||

8.5.2

dve ca me viṃśatiś ca apavaktāra oṣadhe | ṛtajāta ṛtāvari madhu tvā madhulā karat ||

8.5.3

tisraś ca me triṃśac ca apavaktāra oṣadhe | ṛtajāta ṛtāvari madhu tvā madhulā karat ||

8.5.4

catasraś ca me catvāriṃśac ca apavaktāra oṣadhe | ṛtajāta ṛtāvari madhu tvā madhulā karat ||

8.5.5

pañca ca me pañcāśac ca apavaktāra oṣadhe | ṛtajāta ṛtāvari madhu tvā madhulā karat ||

8.5.6

ṣaṭ ca me ṣaṣṭiś ca apavaktāra oṣadhe | ṛtajāta ṛtāvari madhu tvā madhulā karat ||

8.5.7

sapta ca me saptatiś ca apavaktāra oṣadhe | ṛtajāta ṛtāvari madhu tvā madhulā karat ||

8.5.8

aṣṭa ca me 'śītiś ca apavaktāra oṣadhe | ṛtajāta ṛtāvari madhu tvā madhulā karat ||

8.5.9

nava ca me navatiś ca apavaktāra oṣadhe | ṛtajāta ṛtāvari madhu tvā madhulā karat ||

8.5.10

daśa ca me śataṃ ca apavaktāra oṣadhe | ṛtajāta ṛtāvari madhu tvā madhulā karat ||

8.5.11

śataṃ ca me sahasraṃ ca- -apavaktāra oṣadhe | ṛtajāta ṛtāvari madhu tvā madhulā karat ||

8.6.1

ā paśyasi prati paśyasi parā paśyasi paśyasi | dyām antarikṣam ād bhūmiṃ tat sarvaṃ devi paśyasi ||

8.6.2

tisro divas tisraḥ pṛthivīḥ ṣaṭ cemaḥ pradiśo mahīḥ | tayāhaṃ sarvān yātūn paśyāni devy oṣadhe ||

8.6.3

suparṇasya divyasya tasya hāsi kanīnikā | sā bhūmim ā rurohitha vahyaṃ śrāntā vadhūr iva ||

8.6.4

tāṃ me sahasrākṣo devo dakṣiṇe hasta ā dadhat | tayāhaṃ sarvaṃ paśyāmi yad bhūtaṃ yac ca bhāvyam ||

8.6.5

yathā śvā caturakṣo yathāśvaḥ śyāvo 'rvatām | yathāgnir viśvataḥ pratyaṅṅ evā tvam asy oṣadhe ||

8.6.6

kaśyapasya cakṣur asi śunyāś caturakṣyāḥ | vīdhre sūryam iva sarpantaṃ mā piśācaṃ tiras karaḥ ||

8.6.7

darśaya mā yātudhānān darśaya yātudhānyaḥ | āpaspṛta iva tiṣṭhantaṃ darśaya mā kimīdinam ||

8.6.8

ud agrabhaṃ paripāṇaṃ yātudhānāt kimīdinaḥ | tenāhaṃ sarvaṃ paśyāny uta śūdram utāryam ||

8.6.9

yathā sūryaś candramāś ca viśvā bhūtā vipaśyataḥ | evā vi paśya tān tvam aghāyur mopa gād iha ||

8.6.10

yo antarikṣeṇa patati bhūmiṃ yaś copasarpati | divaṃ yo manyate nāthaṃ taṃ piśācaṃ dṛśe kuru ||

8.6.11

āviṣ kṛṇuṣva rūpāṇi mātmānam apa gūhathāḥ | adhā sahasracakṣo tvaṃ prati paśyāsy āyataḥ ||

8.7.1

mokṣejāṃs todāṃs tumalān pathiṣṭhām̐ uta pārṣatān | ahīnāṃ sarveṣāṃ viṣam arasaṃ kṛṇv oṣadhe ||

8.7.2

aśvakrandasya vaṇḍasya pṛdākor gonaser uta | śvitrāṇāṃ sarveṣāṃ viṣam arasaṃ kṛṇv oṣadhe ||

8.7.3

dyāṃpātasya gavakasya godhāpṛṣṭher aher uta | asitānām etaj jātam ariṣṭe 'rasaṃ kṛdhi ||

8.7.4

etaj jātaṃ svajānāṃ tad babhro arasaṃ kṛdhi | sarvasya babhror bheṣajy asīha viṣadūṣaṇī ||

8.7.5

trāyamāṇā pra bravītu sarvāṅ rājño ahīnām | tiraścirājīn asitān atho upaśayāś ca ye ||

8.7.6

sahasāhaṃ yātudhānān sahasā yātudhānyaḥ | saho vaḥ sarvān sāsāha tasyāhaṃ nāma jagrabha ||

8.7.7

sahaḥ sākaṃ paidvena- -ugreṇa vacasā mama | andhāhīṃś ca sṛjayāś ca śaphakāṃś ca rathavrayaḥ | sahasā saha utpatya tān sarvām̐ arasām̐ akaḥ ||

8.7.8

asitasya vidradhasya harito yaś ca vidradhaḥ | nimaṅkṣī vidradhānāṃ yo mṛjantī tām̐ ajījabhat ||

8.7.9

yaḥ svajānāṃ nīlagrīvo yaḥ svajānāṃ harir uta | kalmāṣapuccham oṣadhe jambhayāsy arundhati ||

8.7.10

māyaṃ marad ahidaṣṭaḥ pitur asmā asad viṣam | imā hy asmā oṣadhim ā harāmy arundhatīm ||

8.7.11

etaj jātaṃ pṛdākūnām arasaṃ jīvale kṛdhi | indrasya bhadrikā vīrud asīha viṣadūṣaṇī ||

8.8.1

śatam arvāk pra syandante pra syandante śataṃ paraḥ | śataṃ vṛtrasya kāṇḍāni tebhya āpo vi dhāvatha ||

8.8.2

antarikṣe patayiṣṇavo nabhasas pari jajñire | āpo hiraṇyavarṇās tās te bhavantu śaṃ hṛde ||

8.8.3

śaṃ te santu hṛdayāya śaṃ te hṛdayyābhyaḥ | śaṃ te yakaklomabhyaḥ śam u te antaṣṭebhyaḥ ||

8.8.4

yad aṅgair apasismiṣe yac chīrṣṇā yac ca pṛṣṭibhiḥ | āpas tat sarvaṃ niṣ karan taṣṭā riṣṭam ivānasaḥ ||

8.8.5

saṃ hṛdayena hṛdayam opaśena sam opaśaḥ | adbhir muñcāpasmitaṃ pārṣṇidyotaḥ sam etu me ||

8.8.6

ācarantīḥ parvatebhyo devīr devebhyas pari | āpo yam adya prāpan na sa riṣyāti pūruṣaḥ ||

8.8.7

śaṃ ta āpo haimavatīḥ śam u te santūtsyāḥ | śaṃ te saniṣyadā āpaḥ śam u te santu varṣyāḥ ||

8.8.8

śaṃ ta āpo dhanvanyāḥ śam u te santv anūpyāḥ | śaṃ te khanitrimā āpaḥ śaṃ yāḥ kumbhebhir ābhṛtāḥ ||

8.8.9

anabhrayaḥ khanamānā viprā gambhīre 'pasaḥ | bhiṣagbhyo bhiṣaktarā āpo acchā vadāmasi ||

8.8.10

apām aha divyānām apāṃ srotasyānām | apām aha praṇejane 'śvā bhavatha vājinaḥ ||

8.8.11

tā āpaḥ śivā āpo 'yakṣmaṃkaraṇīr apaḥ | yathaiva tṛṣyate mayas tās ta ādyuttabheṣajī ||

8.9.1

brahmajyeṣṭhā saṃbhṛtā vīryāṇi brahmāgre jyeṣṭhaṃ divam ā tatāna | bhūtānāṃ brahma prathamota jajñe tenārhati brahmaṇā spardhituṃ kaḥ ||

8.9.2

brahmeme dyāvāpṛthivī brahmeme sapta sindhavaḥ | brahmeme sarva ādityā brahma devā upāsate ||

8.9.3

brahma brāhmaṇo vadati brahma rātrī ni viśate | sāvitraṃ brahmaṇo jātaṃ brahmaṇāgnir vi rocate ||

8.9.4

brahmauṣadhayo ni tiṣṭhanti brahma varṣanti vṛṣṭayaḥ | brahmedaṃ sarvam ātmanvad yāvat sūryo vipaśyati ||

8.9.5

brahma hotā brahma yajño brahmaṇā svaravo mitāḥ | adhvaryur brahmaṇo jāto brahmaṇot tirate haviḥ ||

8.9.6

brahma sruco ghṛtavatīr brahmaṇā vedir udyatā | brahma yajñasya tantava ṛtvijo ye haviṣkṛtaḥ ||

8.9.7

brahma ṛṣabho bhadraretā brahma gāvo haviṣkṛtaḥ | brahma rathasya devasya yaj jayāti svaraṅkṛtaḥ ||

8.9.8

brahmaṇā śīraṃ vahati brahmaṇā yujyate rathaḥ | brahmaṇā puruṣo dvipān na vyathate caran ||

8.9.9

brahmaṇo jātā ṛṣayo brahmaṇo rājanyā uta | brahmedaṃ brahmaṇo jātaṃ brahmaṇo +'viṣyā annam ||

8.9.10

brahma śūdrā rājanyānāṃ brahmaiṣām uta vikṣadaḥ | brahmaiṣāṃ bhadraṃ sādanaṃ brahmaṇaiṣāṃ sabhāsadaḥ ||

8.9.11

brahma dāśā brahma dāsā brahmeme kitavā uta | strīpuṃsau brahmaṇo jātau striyo brahma uta vāvana ||

8.9.12

brahmodvato nivato brahma saṃvato vānaspatyāḥ parvatā brahma vīrudhaḥ | brahmedaṃ sarvam anv ā tatāna- -antarā dyāvāpṛthivī ubhe ||

8.9.13

brahmaivābhūd uttaraṃ jātavedo radvajro yātudhānaṃ mahālam | bhavāśarvau tapuṣīṃ hetim asmai mayeṣitau vi sṛjatāṃ vadhāya ||

8.10.1

yad aśvinā oṣadhīṣv āsiktaṃ puṣkarasrajā vīrudho madhu bibhrati | tenāham asyā mūrdhānam abhi ṣiñcāmi nāryāḥ ||

8.10.2

yad aśvinā puṣpād adhi mākṣikaṃ madhu saṃbhṛtam | anne lavaṇe yan madhu tenā(…) ||

8.10.3

yad aśvinā gulgunyā- -āñjane madhu saṃbhṛtaṃ yad asmin madhughe madhu | (…) ||

8.10.4

yad aśvinākṣa madhu goṣv aśveṣu yan madhu | surāyāṃ sicyamānāyāṃ kīlāle 'dhi yan madhu | tenā(…) ||

8.10.5

yad aśvinā govarcasaṃ hiraṇyavarcasaṃ hastivarcasam aśvinā | tenāham asyā mūrdhānam abhi ṣiñcāmi nāryāḥ ||

8.10.6

abhi nandam abhi modam abhi darpaṃ kṛṇomi te | ā te bhagaṃ vartayatām aśvinā puṣkarasrajā ||

8.10.7

datsu te varcaḥ subhage jihvāyāṃ te madhūlakam | akṣyau nikaraṇī tava pratīkaṃ madhumattaram ||

8.10.8

ā sacasva talāśeva vṛkṣa ivāpatikaḥ patim | tvaṃ sam agrabhīḥ puṃsaḥ śyena ivānyān patatriṇaḥ ||

8.10.9

ā hi te hārṣam udakam apo bhagābhiṣecanīḥ | yat te varco 'pakrāntaṃ mukhasya praticakṣaṇāt | punas tad aśvinā tvayy ā dhattāṃ puṣkarasrajā ||

8.10.10

abhi tvā varcasāsicaṃ divyena payasā saha | yathā pativatny aso devṛgbhyo madhumattarā ||

8.10.11

bhagaṃ te mitrāvaruṇā bhagaṃ devī sarasvatī | bhagaṃ te aśvinobhā- -ā dhattāṃ puṣkarasrajā ||

8.10.12

patiṃ te rājā varuṇaḥ patiṃ devo bṛhaspatiḥ | patiṃ ta indraś cāgniś ca patiṃ dhātā dadhātu te ||

8.11.1

catasras te khala sraktīr atho madhyam ahaṃ khala | dhārāś catasra stoṣyāmi vediṃ manuṣyavardhanīm ||

8.11.2

ūrjasvantam ā rabhadhvaṃ sphātimantaṃ punītana | indro bījasyābhyāvoḍhā bhaga aitu purogavaḥ ||

8.11.3

bhagasya hy anaḍvāhau yuñjāthāṃ rāśivāhanau | adhā pṛthivyāḥ kīlālam ihā vahatam aśvinā ||

8.11.4

abhivṛtaḥ parihito dhānyena vibhuḥ prabhuḥ | bhartā manuṣyāṇāṃ jajñe devānām ājyaṃ khalaḥ ||

8.11.5

sruca āsan pavanīḥ sṛṇīkāḥ paridhiṣkṛtaḥ | kīnāśā āsan hotāro bījadā āsīd dhaviṣpatiḥ ||

8.11.6

ihendra muṣṭī vi sṛjasva pūrṇāv iha saumanasaḥ sam ṛdhyatām | hutādo ye ca gandharvās ta iha sphātiṃ sam ā vahān ||

8.11.7

atipaśyo nicāyaka iḍukaḥ pakvam ā bhara | īśānā gandharvā bhuvanasya sarva ā vahantu khale spātim iha sūnṛtāṃ ca ||

8.11.8

ā paścād ā purastād ottarād adharād uta | indreha vasor īśānaḥ khale sphātiṃ sam ā vaha ||

8.11.9

sphātim indraḥ khale bahvīm ihot prāṇa ut pṛṇat | sphātiṃ me viśve devāḥ sphātiṃ somo atho bhagaḥ ||

8.11.10

sphātir me astu hastayoḥ sphātir yatra parārabhe | śatahastedam ut pṛṇa samudrasyeva madhyataḥ ||

8.11.11

iha me bhūya ā bhara yathāhaṃ kāmaye tathā | yathedam ud iva sphāyātai traya iva hastinaḥ saha ||

8.12.1

svādvīṃ tvā mitrāvaruṇā svādvīṃ devī sarasvatī | svādvīṃ tvā aśvinā sure kṛṇutāṃ puṣkarasrajā ||

8.12.2

yām asiñcan saudhanvanā viśve devā marudgaṇāḥ | yām aśvināsiñcatāṃ sā surā bahu dhāvatu ||

8.12.3

svādoḥ svādīyasī bhava madhor madhutarā bhava | yatha rśyasyeyam āriśy evā tvaṃ subhage bhava ||

8.12.4

abhrāj jātaṃ varṣāj jātam atho jātaṃ divas pari | atho samudrāj jātaṃ tat surādaraṇaṃ bhava ||

8.12.5

nāḍī nāmāsi januṣā sā surādaraṇī bhava | sakhā hi bhadras ta āsīd vṛkṣaḥ svāduvikaṅkataḥ ||

8.12.6

asuras tv aurdhvanabhasaś cakāra prathamaḥ sure | sure dāsasya tvā gṛhe śiraś cāndhaś ca cakratuḥ ||

8.12.7

niṣ puṣpakaṃ kaśīkāyā nir dhārāyāḥ surām uta | ud ehi vājinīvati kim aṅkatiṣv icchasi ||

8.12.8

ime te janyā āsate gambhīrā abhidhṛṣṇavaḥ | sure devi pari prehi mādayantī janaṃjanam ||

8.12.9

yasyā gṛhṇanti sthālena gām aśvaṃ dhānyaṃ vasu | sā surā bahu dhāvatu ||

8.12.10

ācarantīḥ parvatebhyaḥ khanamānā anabhrayaḥ | yāsāṃ samudre saṃsthānaṃ yāsāṃ nāsti niveśanaṃ tās te dadatu budbudam ||

8.12.11

udaṅkodacemāṃ surāṃ yāṃ hṛdā kāmayāmahe | tāṃ me bhagas tām aśvinā tāṃ ma āvāṭ sarasvatī ||

8.12.12

ayaṃ devo mayūlaśaḥ sā surādaraṇaṃ dadat | saṃsravaṇāt prasravaṇād giribhyas pary ābhṛtaḥ | madhye śatasya maṣṭiṣko 'naḍvān iva mehatu ||

8.13.1

samudrād ūrmir madhumām̐ ud ārad upāṃśunā sam amṛtatvam ānaṭ | ghṛtasya nāma guhyaṃ yad asti jihvā devānām amṛtasya nābhiḥ ||

8.13.2

vayaṃ nāma pra bravāmā ghṛtasya- -asmin yajñe dhārayāmā namobhiḥ | upa brahmā śṛṇavac chasyamānaṃ catuḥśṛṅgo 'vamīd gaura etat ||

8.13.3

catvāri śṛṅgā trayo asya pādā dve śīrṣe sapta hastāso asya | tridhā baddho vṛṣabho roravīti maho devo martyām̐ ā viveśa ||

8.13.4

tridhā hitaṃ paṇibhir guhyamānaṃ gavi devāso ghṛtam anv avindan | indra ekaṃ sūrya ekaṃ jajāna venād ekaṃ svadhayā niṣ ṭatakṣuḥ ||

8.13.5

etā arṣanti hṛdyāt samudrāc chatavrajā ripuṇā nāvacakṣe | ghṛtasya dhārā abhi cākaśīmi hiraṇyayo vetaso madhya āsām ||

8.13.6

samyak sravanti sarito na dhenā antar hṛdā manasā pūyamānāḥ | ete arṣanty ūrmayo ghṛtasya mṛgā iva kṣipaṇor īṣamāṇāḥ ||

8.13.7

sindhor iva prādhvane śūghanāso vātaḥ pramīyaḥ patayanti yahvāḥ | ghṛtasya dhārā aruṣo na vājī kāṣṭhā bhindann ūrmibhiḥ pinvamānaḥ ||

8.13.8

abhi pravanta samaneva yoṣāḥ kalyāṇyaḥ smayamānāso agnim | ghṛtasya dhārāḥ samidho nasanta tā juṣāṇo haryati jātavedāḥ ||

8.13.9

kanyā iva vahatum etavā u añjy añjānā abhi cākaśīmi | yatra somaḥ sūyate yatra yajño ghṛtasya dhārā abhi tat pavante ||

8.13.10

abhy arṣata suṣṭutiṃ gavyam ājīm asmāsu bhadrā draviṇāni dhatta | imaṃ yajñaṃ nayata devatā no ghṛtasya dhārā madhumat pavante ||

8.13.11

dhāman te viśvaṃ bhuvanam adhi śritam antaḥ samudre hṛdy antar āyuṣi | apām anīkāt samithād ya ābhṛtas tam aśyāma madhumantaṃ ta ūrmim ||

8.14.1

dve virūpe carataḥ svarthe anyānyā vatsam upa dhāpayete | harir anyasyāṃ bhavati svadhāvāñ chukro anyasyāṃ dadṛśe suvarcāḥ ||

8.14.2

daśemaṃ tvaṣṭur janayanta garbham atandrāso yuvatayo vibhṛtram | tigmānīkaṃ svayaśasaṃ janeṣu virocamānaṃ pari ṣīṃ nayanti ||

8.14.3

trīṇī jānāt prati bhūṣanty asya samudra ekaṃ divy ekam apsu | pūrvām anu pra diśaṃ pārthivānām ṛtūn praśāsad vi dadhāv anuṣṭhu ||

8.14.4

ka imaṃ vo niṇyam ā ciketa vatso mātṝr janayata svadhābhiḥ | bahvīnāṃ garbho apasām upasthān mahān kavir niś carati svadhāvān ||

8.14.5

āviṣṭyo vardhate cārur āsu jihmānām ūrdhvaḥ svayasām upasthe | ubhe tvaṣṭur bibhyatur jāyamānāt pratīcī siṃhaṃ prati joṣayete ||

8.14.6

ubhe bhadre joṣayete na mene gāvo na vāśrā upa tasthur evaiḥ | sa dakṣāṇāṃ dakṣapatir babhūva- -añjanti yaṃ dakṣiṇato havirbhiḥ ||

8.14.7

ud yaṃyamīti saviteva bāhū ubhe sicau yatate bhīma ṛñjan | uc chukram atkam ajate simasmān navā mātṛbhyo vasanā jahāti ||

8.14.8

tveṣaṃ rūpaṃ kṛṇuta uttaraṃ yat saṃpṛñcānaḥ sadanaṃ gobhir adbhiḥ | kavir budhnaṃ pari marmṛjyate dhīḥ sā devatātā samitir babhūva ||

8.14.9

uru te jrayaḥ pary eti budhnaṃ virocamānaṃ mahiṣasya dhāma | viśvebhir agne svayaśobhir iddho 'dabdhebhiḥ pāyubhiḥ pāhy asmān ||

8.14.10

dhanvaṃ srotaḥ kṛṇute gātum ūrmiṃ śukrair ūrmibhir abhi nakṣati kṣām | viśvā sanāni jaṭhareṣu dhatte 'ntar navāsu carati prasūṣu ||

8.14.11

evā no agne samidhā vṛdhāno revat pāvaka śravasā vi bhāhi | tan no mitro varuṇo māmahantām aditiḥ sindhuḥ pṛthivī uta dyauḥ ||

8.15.1

yo jāmadagnya iha kauśiko ya ātreya uta kāśyapo yaḥ | bharadvājā gotamā ye vasiṣṭhās tebhyaḥ pra brūma iha kilbiṣāṇi ||

8.15.2

agastyayaḥ kaṇvāḥ kutsāḥ prasravaṇā virūpā gargā mudgalā yaskāḥ śūnakāḥ | saṃkṛtayo brāhmaṇā ye na drugdhās tebhyaḥ pra brūma iha kilbiṣāṇi ||

8.15.3

yo nottiṣṭhād brāhmaṇe nādhamāne māndyena dṛpta uta dhairyeṇa | viśve devā upadraṣṭāro 'sya tasmin viṣaṃ saṃ nayān kilbiṣyam ||

8.15.4

yā ropayaḥ kilbiṣe brāhmaṇasya yāni caināṃsi bahudhā duṣkṛtāni | anutiṣṭhan prokta ātmani taṃ ni dhatte tathā tad devā uta veśayanti ||

8.15.5

nāśnīyān na piben na śayīta na niṃsīta jāyāṃ nota putram | brahmakilbiṣe prokta ud eva tiṣṭhet sa ṛtasya panthāḥ ||

8.15.6

śatarcino mādhyamā ye maharṣayaḥ kṣudrasūktānām uta yā prajeha | ṛṣīṇāṃ yāni janimāni vidmas tebhyaḥ pra brūma iha kilbiṣāṇi ||

8.15.7

sodaryāṇāṃ pañcadaśānāṃ śatānāṃ trayastriṃśad ud aśiṣyanta devāḥ | ekasmin viddhe sarve 'rupyaṃ tad brāhmaṇe kilbiṣam anv avindan ||

8.15.8

tasmai sa druhyād ya idaṃ nāyad yo nottiṣṭhād yo na vadātā asmin | brāhmaṇasya kilbiṣe nāthitasya sodaryatām icchato brāhmaṇeṣu ||

8.15.9

uttiṣṭhad brāhmaṇāḥ saṃ vadadhvaṃ jītaṃ yācāma punar aitu sarvam | indrāgnī viśve devās te me jītaṃ punar ā vartayantu ||

8.15.10

sa dīrgham āyuṣ kṛṇute sa prajāyai cikitsati | yo brāhmaṇasya brāhmaṇo hūto anveti kilbiṣe ||

8.15.11

nāsya prajāṃ śarvo hanti na rudro hanti nāśaniḥ | yo brāhmaṇasya brāhmaṇaḥ satye vadati kilbiṣe ||

8.15.12

taṃ somapītho juṣate nṛcakṣā grāvabhiḥ saha | yo brāhmaṇasyāstāṃ hṛdaḥ sūrya ivāpālupat tamaḥ ||

8.15.13

ya utthāya kilbiṣe brāhmaṇasyānnasīcchann avāyati | ubhe enaṃ dyāvāpṛthivī saṃ tapatām athaitv agatasya panthām ||

8.16.1

nava ca yā navatiś cārūḍhā vakṣaṇā anu | itas tāḥ sarvā naśyantu nuttāḥ putthajño mayā ||

8.16.2

sapta ca yāḥ saptatiś cārūḍhā vakṣaṇā anu | itas tāḥ sarvā naśyantu nuttāḥ putthajño mayā ||

8.16.3

pañca ca yāḥ pañcāśac cārūḍhā vakṣaṇā anu | itas tāḥ sarvā naśyantu nuttāḥ putthajño mayā ||

8.16.4

ūrubhyāṃ te 'ṣṭhīvadbhyāṃ pārṣṇibhyāṃ bhaṃsasaḥ | striyā jāra iva putthajñīṃ pra mṛṇīmasi ||

8.16.5

anusṛptāṃ gahaneṣu dhrūkṣṇāṃ pāpīṃ śimidvatīm | tām etāṃ dasyūnāṃ dāsīṃ pra dahātaś cukākaṇi ||

8.16.6

yā strīṇāṃ putrasadanaṃ kevaṭān upasarpati | tām etāṃ dasyūnāṃ dāsīṃ pra dahātaś cukākaṇi ||

8.16.7

pra patātaḥ sukaṭanāḍi suṣeḥ kuṣītako yathā | srakve te tipraṃ dhakṣyāmi sā naśiṣyasi putthagi ||

8.16.8

yadāsyāḥ srakve dahed yadā mūrdhānam agninā | athaiṣā dasyūnāṃ dāsī putthagi ni layiṣyate ||

8.16.9

saṃvatsaram acaro asurebhyaḥ prataṅkinī | yatra kṣetrasya durgandhi tat ta etan nyañcanam ||

8.16.10

naitat tava mātaraṃ sthā na ta etan nyañcanam | asmākam etad vīrebhyo devaiḥ prajananaṃ kṛtam ||

8.16.11

girau te 'śma putram udakaṃ himavatsu | tatropapraskadya nṛty ajāmi yūtheṣu putthagi ||

8.16.12

sa tvaṃ gobhir aśvaiḥ prajayā prataraṃ bhava | yo mā tatra prāhaiṣīr yatra jīvanti bhadrayā ||

8.17.1

mitraḥ pṛthivyod akrāmat tāṃ puraṃ pra ṇayāmi vaḥ | tām ā viśata tāṃ pra viśata sā vaḥ śarma ca varma ca yacchatu ||

8.17.2

vāyur antarikṣeṇod akrāmat tāṃ puraṃ pra ṇayāmi vaḥ | tām ā viśata tāṃ pra viśata sā vaḥ śarma ca varma ca yacchatu ||

8.17.3

sūryo divod akrāmat tāṃ puraṃ pra ṇayāmi vaḥ | tām ā viśata tāṃ pra viśata sā vaḥ śarma ca varma ca yacchatu ||

8.17.4

candramā nakṣatrair ud akrāmat tāṃ puraṃ pra ṇayāmi vaḥ | tām ā viśata tāṃ pra viśata sā vaḥ śarma ca varma ca yacchatu ||

8.17.5

soma oṣadhībhir ud akrāmat tāṃ puraṃ pra ṇayāmi vaḥ | tām ā viśata tāṃ pra viśata sā vaḥ śarma ca varma ca yacchatu ||

8.17.6

yajño dakṣiṇābhir ud akrāmat tāṃ puraṃ pra ṇayāmi vaḥ | tām ā viśata tāṃ pra viśata sā vaḥ śarma ca varma ca yacchatu ||

8.17.7

samudro nadībhir ud akrāmat tāṃ puraṃ pra ṇayāmi vaḥ | tām ā viśata tāṃ pra viśata sā vaḥ śarma ca varma ca yacchatu ||

8.17.8

brahma brahmacāribhir ud akrāmat tāṃ puraṃ pra ṇayāmi vaḥ | tām ā viśata tāṃ pra viśata sā vaḥ śarma ca varma ca yacchatu ||

8.17.9

indro vīryeṇod akrāmat tāṃ puraṃ pra ṇayāmi vaḥ | tām ā viśata tāṃ pra viśata sā vaḥ śarma ca varma ca yacchatu ||

8.17.10

devā amṛtenod akrāman tāṃ puraṃ pra ṇayāmi vaḥ | tām ā viśata tāṃ pra viśata sā vaḥ śarma ca varma ca yacchatu ||

8.17.11

prajāpatiḥ prajābhir ud akrāmat tāṃ puraṃ pra ṇayāmi vaḥ | tām ā viśata tāṃ pra viśata sā vaḥ śarma ca varma ca yacchatu ||

8.18.1

saṃyujyantaḥ prakṛṣanto yad vo devā upocire | tām ebhyaḥ satyām āśiṣam indra khalvāṃ sam ardhaya ||

8.18.2

anaḍvāhaḥ satyāvānaḥ sīraṃ kṛṇotu me vacaḥ | yatrāhaitad dhitāya te tat parjanyo 'bhi vo vṛṣat ||

8.18.3

divyā āpo vaḥ śakvarīr anu vi yantu gahvare | ūrjasvatīr ghṛtavatīḥ payasvatīr dṛśe bhavata mā guhā ||

8.18.4

ud ehi vājinīvatī pūrṇapātrā tviṣīmatī | duhānā pūṣarakṣitā kāmam eṣāṃ sam ā pṛṇa ||

8.18.5

iyaṃ sītā phalavatī śatavalśā vi rohatu | iyaṃ sahasrabhogā asyā indra upāvatu ||

8.18.6

aśvinā phālaṃ kalpayatām upāvatu bṛhaspatiḥ | yathāsad bahudhānyam ayakṣmaṃ bahupūruṣam ||

8.18.7

yad vo devā upocira iha bhūyaḥ syād iti | iha tām utpṛṇāṃ vayaṃ devīm upa hvayāmahe ||

8.18.8

idaṃ ma ut pṛṇād iti sphātiṃ ma ut pṛṇād iti | rāśiṃ me vardhayād iti ||

8.18.9

sphātikāro bahukāraḥ sphirasphoṣṭhāyam akṣitaḥ | khalo jyeṣṭho vibhuḥ prabhuḥ ||

8.18.10

tasmin dhānyaṃ ny upyate yavo vrīhir atho tilaḥ | tasya gṛhṇīta yat kṛtaṃ parikṣāya catuḥśatam ||

8.18.11

śarkārivan mayāravac cakrīvat kiṃ ca yad vṛṣe | tad vai sphātir upāyatī sarvam evāti ricyate ||

8.18.12

mahāñjane parā jahi sahasrāpoṣam ardaya | bahvī na oṣadhe bhava samudrasyeva saṃsravaḥ ||

8.19.1

ājyād ajaḥ sam abhavad deśebhya odanā ime | tān apaśyad bṛhaspatiḥ sa vai pañcaudano 'bhavat ||

8.19.2

caturdhaitāṃ sam abhara odanāṃs tvaṃ bṛhaspate | aja ājyāj jātaḥ sa eṣāṃ pañcamo 'bhavat ||

8.19.3

dhūmena divam āpnoty antarikṣam utoṣmaṇā | diśa āpnoti cakṣuṣā ajaḥ pañcaudanaḥ savaḥ ||

8.19.4

yā te mātā yas te pitā bhrātaro ye ca te svāḥ | ajaṃ pañcaudanaṃ paktvā sarve tam upa jīvata ||

8.19.5

ye te pūrve parāgatā apare pitaraś ca ye | tebhyo ghṛtasya kulyaitu śatadhārā vyundatī ||

8.19.6

ye sarvadā dadati ye vā pacanty odanam | te vai yamasya rājyād uttare loka āsate ||

8.19.7

nātirātra āpnoti nainam āpnoty ukthyaḥ | nāgniṣṭoma āpnoty ajaṃ pañcaudanaṃ savam ||

8.19.8

daśarātreṇa saṃmito dvādaśāhena kalpate | dīrghasattreṇa saṃmito 'jaḥ pañcaudanaḥ savaḥ ||

8.19.9

teṣāṃ barhiṣyaṃ sarvaṃ yan naṣṭaṃ yac ca mriyate | yac ca steno 'pājati yeṣāṃ pañcaudanaḥ savaḥ ||

8.19.10

yā pūrvapatiṃ vittvā- -athānyaṃ vindate 'param | pañcaudanaṃ ca tāv ajaṃ pacato na vi yoṣataḥ ||

8.19.11

samānaloko bhavati punarbhuvāparaḥ patiḥ | ajaṃ pañcaudanaṃ dakṣiṇājyotiṣaṃ dadat ||

8.20.1

sūryo mā varcasokṣatu- -ukṣatām aśvinobhā | āditya ūrdhva uccaran sa u mā varcasokṣatu ||

8.20.2

varcasā māṃ pitur agnir varcasā mā bṛhaspatiḥ | surāyāḥ sicyamānāyāḥ kīlālavarcasena mā | tena mām aśvinobhā ukṣatāṃ puṣkarasrajā ||

8.20.3

varcasvan me mukham astu rocamānaṃ viṣāsahi | tan mā hiraṇyavarcasaṃ kṛṇomi paśyatāṃ priyam ||

8.20.4

madhor ahaṃ madhutaro madhughān madhumattaraḥ | mām anu pra viśatu varca ṛṣabho vāśitām iva ||

8.20.5

idam āñjanam ānaje varcasyam ā kanikradam | yathā kanikradac carāṇi varcasā ca bhagena ca ||

8.20.6

varcasāgnim ā dadhati varcasod eti sūryaḥ | yāvad varco gohiraṇyasya tāvan me varco bhūyāt ||

8.20.7

yāvat tvaṃ deva sūrya udyann abhi vipaśyasi | tāvan mā varcasābhi vi paśya ||

8.20.8

pūrṇo bhagasyāhaṃ bhūtvā- -arukṣaṃ varcaso ratham | sa mā vahatu sarvadā- -āyuṣmantaṃ suvarcasam ||

8.20.9

bhagenāhaṃ parihito varcasā draviṇena ca | yathā carāṇi sarvadā rocamānaṃ vibhāvasu ||

8.20.10

evā mā bhaga āgamad evā mā varca āgamat | evā mā teja āgamad evā mā yaśa āgamat ||

8.20.11

hiraṇyayena cakreṇa bhagasyāpihito gṛhaḥ | taṃ vy ubjāmi brahmaṇā tasya me dattam aśvinā dattaṃ me puṣkarasrajā ||