Kāṇḍa 9

9.1.1

ūrdhvā asya samidho bhavanty ūrdhvā śukrā śocīṃṣy agneḥ | dyumattamā supratīkasya sūnos tanūnapād asuro viśvavedāḥ ||

9.1.2

devo deveṣu devaḥ patho anakti madhvā ghṛtena | madhvā yajñaṃ nakṣati prīṇāno narāśaṃsaḥ sukṛd devaḥ savitā viśvavāraḥ ||

9.1.3

acchāyam eti śavasā ghṛtena- -īḍe vahniṃ namasāgnim | sruco adhvareṣu prayatsu ||

9.1.4

sa yakṣad asya mahimānam agneḥ sa in mandrāsu prayatsu | vasoś cetiṣṭho vasudhātamaś ca ||

9.1.5

dvāro devīr annasya viśve vratā dadante agneḥ | uruvyacaso dhāmnā patyamānāḥ ||

9.1.6

te asya vṛṣaṇo divyā nu yonā | uṣāsānaktemaṃ yajñam avatām adhvaraṃ naḥ ||

9.1.7

daivā hotāra imam adhvaraṃ no agner jihvem abhi gṛṇīta | kṛṇutā naḥ sviṣṭim ||

9.1.8

tisro devīr barhir edaṃ sadantv iḍā sarasvatī mahī | bhāratī gṛṇānā ||

9.1.9

tan nas turīpam adbhutaṃ purukṣu | tvaṣṭā suvīryaṃ rāyaspoṣaṃ vi syarta nābhim asme ||

9.1.10

vanaspate ava sṛjā rarāṇas tmanā devebhyaḥ | agnir havyaṃ śamitā sūdayāti ||

9.1.11

agne svāhā kṛṇu jātaveda indrāya bhāgam | viśve devā havir idaṃ juṣantām ||

9.2.1

yajūṃṣi yajñe samidhaḥ svāhā- -agniḥ pravidvān iha vo yunaktu | yunaktu devaḥ savitā prajānann asmin yajñe suyujaḥ svāhā ||

9.2.2

indra ukthāmadāni yajñe asmin pravidvān yunaktu suyujaḥ svāhā | chandāṃsi yajñaṃ marutaḥ svāhā māteva putraṃ pipṛteha yuktāḥ ||

9.2.3

praiṣā nivida āpriyo yajūṃṣi śiṣṭāḥ patnībhir vahateha yuktāḥ | eyam agan barhiṣā prokṣaṇībhir yajñaṃ tanvānā aditiḥ svāhā ||

9.2.4

viṣṇur yunaktu bahudhā tapāṃsy asmin yajñe suyujaḥ svāhā ||

9.2.5

tvaṣṭā yunaktu bahudhā nu rūpāṇy asmin yajñe (…) ||

9.2.6

indro yunaktu bahudhā vīryāny asmin (…) ||

9.2.7

somo yunaktu bahudhā payāṃsy asmin (…) ||

9.2.8

bhago yunaktv āśiṣo nv asmā asmin yajñe suyujaḥ svāhā ||

9.2.9

aśvinā brahmaṇetam arvāg vaṣaṭkāreṇa yajñaṃ vardhayantau svāhā ||

9.2.10

bṛhaspate brahmaṇehy arvāṅ yajño 'yaṃ svar idaṃ yajamānāya dhehi svāhā ||

9.3.1

āpaḥ punantu varuṇaḥ punātv ayaṃ ca yaḥ pavate viśvadānīm | yajño bhago adhivaktā vidhartā- -agniś ca naḥ pāvayetāṃ sūryaś ca ||

9.3.2

daśaśīrṣo daśajihva ā rabhe vīrako bhiṣak | mā te riṣaṃ khanitā yasmai ca tvā khanāmasi ||

9.3.3

daśarātre kilāsasya vīrudhā veda bheṣajam | itas tad abhriyākhanaṃ kilāsaṃ nāśayāmi te ||

9.3.4

apsv anyā vi rohati dhanvany anyādhi tiṣṭhati | kilāsam anyānīnaśad varcasānyā sam ukṣatu ||

9.3.5

ājyena ghṛtena juhomi kilāsabheṣajam | vīrudhām agneḥ saṅkāśe kilāsaṃ nānu vidyate ||

9.3.6

piśaṅgarūpo bhavati kalmāṣam uta saṃdṛśi | kilāsa naśyetaḥ paraḥ pra tvā dhakṣyāmi vīrudhā ||

9.3.7

yāni pṛthag utpatanti nakṣatrāṇīva saṃdṛśi | kilāsaṃ sarvaṃ nāśayann ogha ivābhy emi vīrudhā ||

9.3.8

yadi vā puruṣeṣitāt kilāsa paryājagan | namo namasyāmo devān pratyak kartāram ṛcchatu ||

9.3.9

śīrṣṇas te skandhebhyo lalāṭāt pari karṇayoḥ | oṣadhyā varṣajūtayā kilāsaṃ nāśayāmi te | svas tvā varṇa āyaty anarātiḥ sahauṣadhiḥ ||

9.3.10

grīvābhyas ta uṣṇihābhyaḥ kīkasābhyo anūkyāt | (…) ||

9.3.11

aṃsābhyāṃ te dorbhyāṃ bāhubhyāṃ pari hastayoḥ | (…) ||

9.3.12

pṛṣṭibhyas te pārśvābhyāṃ śroṇibhyāṃ pari bhaṃsasaḥ | (…) ||

9.3.13

ūrubhyāṃ te 'ṣṭhīvadbhyāṃ pārṣṇibhyāṃ prapadābhyām | oṣadhyā varṣajūtayā kilāsaṃ nāśayāmi te | svas tvā varṇa āyaty anarātiḥ sahauṣadhiḥ ||

9.4.1

sahaiva vo hṛdayāni saha vijñānam astu vaḥ | sahendro vṛtrahā karat saha devo bṛhaspatiḥ ||

9.4.2

samānam astu vo hṛdayaṃ samānam uto vo manaḥ | samāno agnir vo devaḥ saha rāṣṭram upādhvam ||

9.4.3

saṃ jānīdhvaṃ sahṛdayāḥ sarve saṃmanasa stha | naṣṭo vo manyur jīrṇerṣyā saha jīvātha bhadrayā ||

9.4.4

yathā putraḥ pravāvadaḥ pitṛbhyāṃ vadati priyam | evā yūyam anyo 'nyasmai jihvayā vadata priyam ||

9.4.5

sahaiva vo dhānyāni samānāḥ paśavaś ca vaḥ | saha pṛthivyāṃ vīrudhaḥ saha vaḥ santv oṣadhīḥ ||

9.4.6

saha dīkṣā saha yajño vivāho vaḥ sahāsati | saha prapharvā nṛtyantu saha va striya āsatām ||

9.4.7

sahaiva vo vīryāṇi sahānyān randhayādhvai | saha patatriṇīm iṣum anyasmai hetim asyata ||

9.4.8

saṃ vasyāmi samitiṃ madhunā vācam āñjiṣam | yuṣmākam anye śṛṇvantu- -uditaṃ saṅgate jane ||

9.4.9

yuṣmān mitrā vṛṇatāṃ yuṣmān pratijanā uta | yuṣmāt jñātitvaṃ prepsanty amṛtaṃ martyā iva ||

9.4.10

saṃsam id yaḥ sam ākaraṃ saha yūthā gavām iva | samānam astu vo mano jyeṣṭhaṃ vijñānam anv ita ||

9.4.11

idaṃ yad eṣāṃ hṛdayaṃ tad eṣāṃ hṛdaye bhavat | atho yad eṣāṃ hṛdayaṃ tad veṣāṃ hṛdi śritam | samānam astu vo manaḥ śreṣṭhaṃ vijñānam anv ita ||

9.4.12

idaṃ yad eṣāṃ mana eṣāṃ yāni manāṃsi ca | sadhryag indra tat kṛṇu rathe pādāv ivāhitau ||

9.5.1

sahasrabāhuḥ puruṣaḥ sahasrākṣaḥ sahasrapāt | sa bhūmiṃ viśvato vṛtvā- -aty atiṣṭhad daśāṅgulam ||

9.5.2

tribhiḥ padbhir dyām arohat pād asyehābhavat punaḥ | tathā vy akrāmad viṣvaṅṅ aśanānaśane anu ||

9.5.3

tāvanto asya mahimānas tato jyāyāṃś ca puruṣaḥ | pād asya viśvā bhūtāni tripād asyāmṛtaṃ divi ||

9.5.4

puruṣa evedaṃ sarvaṃ yad bhūtaṃ yac ca bhāvyam | utāmṛtatvasyeśvaro yad annenābhavat saha ||

9.5.5

yat puruṣaṃ vyadadhuḥ katidhā vy akalpayan | mukhaṃ kim asya kiṃ bāhū kim ūrū pādā ucyete ||

9.5.6

brāhmaṇo 'sya mukham āsīd bāhū rājanyo 'bhavat | madhyaṃ tad asya yad vaiśyaḥ padbhyāṃ śūdro ajāyata ||

9.5.7

virāḍ agre sam abhavad virājo adhi pūruṣaḥ | sa jāto aty aricyata paścād bhūmim atho puraḥ ||

9.5.8

yat puruṣeṇa haviṣā devā yajñam atanvata | vasanto asyāsīd ājyaṃ grīṣma idhmaḥ śarad dhaviḥ ||

9.5.9

taṃ yajñaṃ prāvṛṣā praukṣan puruṣaṃ jātam agraśaḥ | tena devā ayajanta sādhyā vasavaś ca ye ||

9.5.10

tasmād aśvā ajāyanta ye ca ke cobhayādataḥ | gāvo ha jajñire tasmāt tasmāj jātā ajāvayaḥ ||

9.5.11

tasmād yajñāt sarvahuta ṛcaḥ sāmāni jajñire | chando ha jajñire tasmād yajus tasmād ajāyata ||

9.5.12

tasmād yajñāt sarvahutaḥ saṃbhṛtaṃ pṛṣadājyam | paśūn tāṃś cakre vāyavyān āraṇyān grāmyāś ca ye ||

9.5.13

saptāsyāsan paridhayas triḥ sapta samidhaḥ kṛtāḥ | devā yad yajñaṃ tanvānā abadhnan puruṣaṃ paśum ||

9.5.14

mūrdhno devasya bṛhato 'ṃśavaḥ sapta saptatīḥ | rājñaḥ somasyājāyanta jātasya puruṣād adhi ||

9.5.15

candramā manaso jātaś cakṣuḥ sūryo 'jāyata | śrotrād vāyuś ca prāṇaś ca mukhād agnir ajāyata ||

9.5.16

nābhyā āsīd antarikṣaṃ śīrṣṇo dyauḥ sam avartata | padbhyāṃ bhūmir diśaḥ śrotrāṅ tathā lokām̐ akalpayan ||

9.6.1

imāṃ khanāmy oṣadhim adṛṣṭahananīm aham | aśvasyāvo dadāti tvā vairūpo vājinīvati ||

9.6.2

nādṛṣṭā vo jihvāḥ santi na dantā hanvor adhi | nāpi madhyaṃ no śiras te yūyaṃ kiṃ kariṣyatha ||

9.6.3

indrāmitrā indrahatā na va ihāsti nyañcanam | indro vaḥ sarvāsāṃ sākaṃ śakras tṛṇeḍhu vṛtrahā ||

9.6.4

aśvatarām̐ ayaḥśaphān yān indro adhitiṣṭhati | tair vo 'pi nahyeya te mukhāny udarasarpiṇaḥ ||

9.6.5

apinahyam adṛṣṭānāṃ mukhaṃ pādā dṛter iva | utaiṣāṃ jihvā niṣkartā nirdantā hanvor adhi ||

9.6.6

avadhiṣam asṛgādāṃ ni kroḍādā alipsata | abhaitsaṃ sarveṣām āṇḍāni ye adṛṣṭāḥ pṛthivīkṣitaḥ ||

9.6.7

riśyāsaḥ pauruṣāso darbhāso vairiṇā uta | mauñjā adṛṣṭāḥ sairyāḥ sarve sākaṃ ni jasyata ||

9.6.8

adṛṣṭānāṃ sapta jātā pṛthivī na śiśe mahī | tān indro bāhubhyāṃ sarvāñ chakro apāvayat ||

9.6.9

ye vaḥ santi sapta jātā adṛṣṭāḥ puruṣādinaḥ | grāvṇāṃśūn iva somasya tān sarvān pra mṛṇīmasi ||

9.6.10

ya ātmajā ye vastijā ya ruṣā ya u todinaḥ | tebhyaḥ khanāmy oṣadhiṃ yebhyo bimbīvadhaḥ kṛtaḥ ||

9.6.11

adṛṣṭebhyas taruṇebhyo yuvadbhya sthavirebhyaḥ | āhārṣam ugrām oṣadhiṃ yebhyo bimbīvadhaḥ kṛtaḥ ||

9.6.12

ye ca dṛṣṭā ye cādṛṣṭās titīlāḥ śalunāś ca ye | tān agne sarvān saṃ daha krimīn anejato jahi ||

9.7.1

śītijalā iti śītā vātā upā vāntu | himenāgnir āvṛto himenāgniḥ parīvṛtaḥ ||

9.7.2

ya(t) tvā devā apārundhann ā samudram adhāvayaḥ | himo jaghāna goajaṃ himo akṣaṃ himaś chadiḥ ||

9.7.3

himād adhi pra yāmasi hime adya vimocanam | yam avaṭaṃ śatadaram avaindha saptavadhraye ||

9.7.4

avakā tatra rohatu khade pari bilaṃ tava | arciṣ ṭe agne prathamam aṅgārām̐ aparām̐ uta ||

9.7.5

gṛbhṇāmi brahmaṇā nāma dhāmadhāma paruṣparuḥ | śītikā nāma te mātā jalāṣo nāma te pitā ||

9.7.6

iha tvam antarā bhava bāhikam astu yad rapaḥ | hime jātodake vṛddhā sindhutas pary ābhṛtā | tayā te agrabhaṃ nāma- -aśvam ivāśvābhidhānyā ||

9.7.7

āmā nāmāsy oṣadhe tasyās te nāma jagrabha | agastyasya putrāso mā vi dhāk puruṣān mama ||

9.7.8

mā no agne tanvaṃ mā vāsāṃsi rīriṣaḥ | yaṃ tvā samudraja vayam ārohāma svastaye ||

9.7.9

divas tārā avāpadran dhārāt samudriyā apaḥ | hiraṇyakumbho harito 'vakābhiḥ parivṛtas tenāgniṃ śamayāmasi ||

9.7.10

śamayāmy arcir agneḥ śivas tapatu mā vi dhāk | gṛbhīte dyāvāpṛthivī gṛbhītaṃ pārthivaṃ rajaḥ ||

9.7.11

ni muñjeṣu yad udakaṃ ni naḍeṣu yad antaram | yat samudre yat sindhau tenāgniṃ śamayāmasi ||

9.7.12

vetasasyāvakāyā naḍasya vīraṇasya ca | rohitakasya vṛkṣasya- -agniṃ śamanam ud bhare ||

9.7.13

āyatīr udahāryo vi te harantu yad rapaḥ | parāyatīḥ parāvataḥ parā harantu yad rapaḥ ||

9.7.14

himasya tvā jarāyuṇa- -agne pari vyayāmasi | śītike śītam it karo himike himam it karaḥ ||

9.8.1

akṣaṇvatā lāṅgalena padvatā patayiṣṇunā | lāṅgūlagṛhya carkṛṣur vṛkeṇa yavam aśvinā ||

9.8.2

devā etaṃ madhunā saṃyutaṃ yavaṃ sarasvatyām adhi vaṇāv acarkṛṣuḥ | indra āsīt sīrapatiḥ śatakratuḥ kināśā āsan marutaḥ sudānavaḥ ||

9.8.3

hiraṇyayaṃ kalaśaṃ sudānavo divyayā saraghayā kṛtam | ava bhṛtam aśvinā yavaṃ tad yuvaṃ madhu cakrathuḥ ||

9.8.4

kṛśāv etad ajayatam aśvinā sāraghaṃ madhu | tato yavo vy arohat so 'bhavad viṣadūṣaṇaḥ ||

9.8.5

yuvārvān saraghāyāḥ prakhidya madhv ābharat | (…) ||

9.8.6

yad vṛkaṃ madhupāvānam avāmayatam aśvinā | (…) ||

9.8.7

kairaṇḍā nāma saraso vṛkasya vamyā adhi | tato yavo vy arohat so 'bhavad viṣadūṣaṇaḥ ||

9.8.8

yad asya bharatho madhu saraghā sathv acchinat | sadyas tad arvato yuvaṃ punar ā dattam aśvinā ||

9.8.9

yo yavaṃ digdhaviddho ahidaṣṭa upāsarat | tīrthe radhram iva majjantam ut taṃ bharatam aśvinā ||

9.8.10

yaṃ vahanty aṣṭāyogāḥ ṣaḍyogā yaṃ caturgavāḥ | sa te viṣaṃ vi bādhatām ugro madhyamaśīr iva ||

9.9.1

yasya yava prasarpasy aṅgamaṅgaṃ paruṣparuḥ | tasmād yakṣaṃ vi bādhasva- -ugro madhyamaśīr iva ||

9.9.2

śakalaṃ ca na te yava- -anyā ruhanty oṣadhīḥ | yava id yāvayād gor aśvāt puruṣād viṣam ||

9.9.3

yavo rājā yavo bhiṣag yavasya mahimā mahān | yavasya manthaṃ papivān indraś cakāra vīryam ||

9.9.4

ā bharāmṛtaṃ ghṛtasya puṣpam ā bhara | anabhrikhāta oṣadha idaṃ dūṣaya yad viṣam ||

9.9.5

ya āyanti digdhaviddhāḥ śūdrā rājanyā uta | cakṣur me sarva ādṛśya te yanty agadāḥ punaḥ ||

9.10.1

jīvātave na martave śiras ta ā rabhāmahe | rasaṃ viṣasya nāvidam udnaḥ phenam adann iva ||

9.10.2

bhūmyā madhyād divo madhyād bhūmyā antād atho divaḥ | madhye pṛthivyā yad viṣaṃ tad vācā dūṣayāmasi ||

9.10.3

aśvatthe nihitaṃ viṣaṃ kapāle nihitaṃ viṣam | śilāyā jajñe taimātaḥ prathamo viṣadūṣaṇī ||

9.10.4

viṣasyāhaṃ vaindakasya viṣasya dārvyasya ca | atho viṣasya svaitnasya samānīṃ vācam agrabham ||

9.10.5

tad id vadanty arthina uta śūdrā utāryāḥ | viṣāṇāṃ viṣvagarthānāṃ sarvathaivārasaṃ viṣam ||

9.10.6

paruṣas tvāmṛtakarṇo viṣa prathamam āvayat | yathā ha taṃ nāropayas tathāsy arasaṃ viṣam ||

9.10.7

yad vo devā upajīkā uddehaṃ śuṣiraṃ daduḥ | tatrāmṛtasyāsiktaṃ tac cakārārasaṃ viṣam ||

9.10.8

śakuntikā me abravīd viṣapuṣpaṃ dhayantikā | na ropayati na mādayaty arasaṃ śārvīyaṃ viṣam ||

9.10.9

aty apaptāma durgāṇi śārīḥ śakunayo yathā | ihendrāṇīṃ varuṇānīṃ sinīvālīṃ krakoḍhyām | grāhāṃ śūraputrāṃ devīṃ yācāmo viṣadūṣaṇam ||

9.10.10

ālakaṃ vyālakaṃ vy āvaṃ jālma jīgīmahe | jaradviṣaṃ yuvābhiṣag vayam it sāsahāmahai ||

9.10.11

asthād dyaur asthāt pṛthivy asthād viśvam idaṃ jagat | asthur viṣasyāropayo 'naḍvāhaḥ kriśā iva ||

9.10.12

yāvat sūryo vitapati yāvac cābhivipaśyati | tenāham indradattena kṛṇomy arasaṃ viṣam | tad viṣam arasaṃ viṣam adhobhāg arasaṃ viṣam ||

9.11.1

mātariśvā sam abharad dhātā sam adadhāt paruḥ | indrāgnī abhy arakṣatāṃ tvaṣṭā nābhim akalpayat ||

9.11.2

bhavas tvā abhy arukṣad rudras te aṃsum ābharat | rātrī tvābhy agopāyat sā tvaṃ bhūte ajāyathāḥ ||

9.11.3

dyauṣ ṭa āyur gopāyad antarikṣam asuṃ tava | mātā bhūtasya bhavyasya pṛthivī tvābhi rakṣatu ||

9.11.4

yāṃ tvā devāḥ samadadhuḥ sahasrapuruṣaṃ satīm | sā devī tvam asyedam apāja vy ajā viṣam ||

9.11.5

yāḥ purastāt prasyandante divā naktaṃ ca yoṣitaḥ | āpaḥ puru sravantīs tā u te viṣadūṣaṇīḥ ||

9.11.6

ātapas te varṣam āsīd agniś chāyābhavat tapaḥ | ulbaṃ te abhram āsīt sā tvaṃ bhūte ajāyathāḥ ||

9.11.7

gandharvas te mūlam āsīc chākhā apsarasas tava | marīcīr āsan parṇāni sinīvālī kulaṃ tava ||

9.11.8

ajarā devā adadhur amṛtaṃ martyeṣv ā | tasyai tad agram ā dade tad u te viṣadūṣaṇam ||

9.11.9

anabhrau khanamānaṃ vipraṃ gambhīre apasam | bhiṣak cakṣur bhiṣak khane tad u te viṣadūṣaṇam ||

9.11.10

yāḥ purastād vitiṣṭhante gāvaḥ pravrājinīr iva | amṛtasyeva vā asy atho hāsy arundhatī ||

9.11.11

yo mayaḥ saraghāyāḥ prakhāya madhv ābharat | tato yavaḥ prājāyata so 'bhavad viṣadūṣaṇaḥ ||

9.11.12

yavasyaitat palālino godhūmasya tilasya ca | vrīher yavasya daivyena kṛṇomy arasaṃ viṣam ||

9.11.13

mahīṃ yoniṃ samudrasya- -anv avindann ṛtāyavaḥ | tāṃ devā guhyām āsīnāṃ samudrāc cid ud ābharan ||

9.11.14

samudrāc cid udābhṛtya tām u puṣkara ā dadhuḥ | asyāḥ pṛthivyā devyāś cakṣur ākāśyam asi viṣadūṣaṇam ||

9.12.1

samānam arthaṃ paryanti devā rūpaṃrūpaṃ tapasā vardhamānāḥ | yad ādityam abhisaṃviśanti tad ekaṃ rūpam amṛtatvam eṣām ||

9.12.2

devo devebhir ā gaman mahān no atithiṣ pitā | sa praiti jātavedasam ekarūpo guhā bhavan ||

9.12.3

ātithyam agniṃ nir apaptad eva ubhayebhiḥ pitṛbhiḥ saṃvidānaḥ | mahān nu marya upa bhakṣam āgan saṃgṛbhyādityā(n) ny aviṣṭa vahniḥ ||

9.12.4

ta ā viśanti puruṣaṃ śayānaṃ prāṇā niviṣṭā na śasanty enam | te no rātryā sumanasyamānā ahnā rakṣanty ahṛṇīyamānāḥ ||

9.12.5

paśubhyo naḥ paśupate mṛḍa sarva saṃ vṛha āyatām | mā naḥ prāṇeṣu rīriṣaḥ ||

9.12.6

vāyuḥ satye adhiśritaḥ prāṇāpānāv abhirakṣan | saṃ prajā airayad imāḥ ||

9.12.7

devā yattāḥ prajāpatāv ādityāś ca yemire | pūṣā raśmiṣv āyata ādityo viṣṇur ākrame sa rohaṃ divi rohati ||

9.12.8

prajāddevāḥ savituḥ save tvaṣṭā rūpāṇi piṃśatu | añjantau madhunā payo atandraṃ yātam aśvinā ||

9.12.9

viśve devāḥ pra yātana- -ādityāsaḥ sajoṣasaḥ | puraḥ paścāt svastaye ||

9.12.10

brahma varma bṛhaspatiḥ saṃgavo no 'bhi rakṣatu | devo devaiḥ purohitaḥ ||

9.12.11

maruto vṛṣṭyā na ā gata satyadharmāṇa ūtaye | aparāhneṣu jinvata ||

9.12.12

indro rājā divas patir ahar vimāya tiṣṭhati | sa na imāḥ kalpayād diśaḥ ||

9.13.1

āvatas te parāvataḥ parāvatas ta āvataḥ | ihaiva bhava mā nu gā mā pūrvān anu gā gatān asuṃ badhnāmi te dṛḍham ||

9.13.2

yat tvābhiceruḥ puruṣaḥ so yad aruṇo janaḥ | unmocana pramocane ubhe vācā vadāmi te ||

9.13.3

yad dudrohitha śepiṣe striyai puṃse acittyā | (…) ||

9.13.4

yad enaso mātṛkṛtāc cheṣe pitṛkṛtād uta | unmocana pramocane ubhe vācā vadāmi te ||

9.13.5

yat te mātā yat te pitā jāmir bhrātā ca sarjataḥ | pratyak sevasya bheṣajaṃ jaradaṣṭiṃ kṛṇomi tvā ||

9.13.6

ehy ehi punar ehi sarveṇa manasā saha | dūtau yamasya mānu gā adhi jīvapurā ihi ||

9.13.7

anuhūtaḥ punar ehi vidvān udayanaṃ pathaḥ | ārohaṇam ākramaṇaṃ jīvatojīvato 'yanam ||

9.13.8

mā bibher na mariṣyasi jaradaṣṭir bhaviṣyasi | nir avocam ahaṃ yakṣmam aṅgebhyo aṅgajvaraṃ tava ||

9.13.9

śīrṣarogo aṅgarogo yaś ca te hṛdayāmayaḥ | yakṣmaḥ śyena iva prāpaptad vācā nuttaḥ parastaram ||

9.13.10

ṛṣī bodhapratībodhāv asvapno yaś ca jāgṛviḥ | te te prāṇasya goptāro divā naktaṃ ca jāgratu ||

9.14.1

ayam agnir upasadya iha sūrya ud etu te | ud ehi mṛtyor gambhīrāt kṛcchrāc cit tamasas pari ||

9.14.2

namo yamāya namo 'stu mṛtyave namaḥ pitṛbhya uta ye nayante | utpāraṇasya yo veda tam agniṃ tat puro dadhe ||

9.14.3

aitu prāṇa aitu mana aitu cakṣur atho balam | śarīram asya saṃ vidāṃ tat padbhyāṃ prati tiṣṭhatu ||

9.14.4

prāṇenāgne cakṣuṣā saṃ sṛjemaṃ sam īraya tanvā saṃ balena | vetthāmṛtasya mā mṛta mo ṣu bhūmigṛho bhuvat ||

9.14.5

mā te prāṇa upa dasan māpāno api dhāyi te | sūryas tvādhipatir mṛtyor udāyacchāti raśmibhiḥ ||

9.14.6

iyam antar vadaty ugrā jihvā paniṣpadā | tayā rogān vi nayāmaḥ śataṃ ropīś ca takmanaḥ ||

9.14.7

ayaṃ lokaḥ priyatamo devānām aparājitaḥ | yasmai tvam iha jajñiṣe diṣṭaḥ puruṣa mṛtyave | tasmai tvānu hvayāmasi mā purā jaraso mṛthāḥ ||

9.15.1

te 'vadan prathamā brahmakilbiṣe 'kūpāraḥ salilo mātariśvā | vīḍuharas tapa ugraṃ mayobhuva āpo devīḥ prathamajā ṛtasya ||

9.15.2

somo rājā prathamo brahmajāyāṃ punaḥ prāyacchad ahṛṇīyamānaḥ | anvartitā varuṇo mitra āsīd agnir hotā hastagṛhyā nināya ||

9.15.3

hasteneva grāhya ādhir asyā brahmajāyeti ced avocat | na dūtāya prahye tastha eṣā tathā rāṣṭraṃ gupitaṃ kṣatriyasya ||

9.15.4

yām āhus tārakāṃ vikeśīṃ ducchunāṃ grāmam avapadyamānām | sā brahmajāyā pra dunoti rāṣṭraṃ yatra prāpādi śaśaḥ kalkuṣīmān ||

9.15.5

brahmacārī carati veviṣad viṣaḥ sa devānāṃ bhavaty ekam aṅgam | tena jāyām anv avindad bṛhaspatiḥ somena nītāṃ juhvaṃ na devāḥ ||

9.15.6

devā etasyām avadanta pūrve saptarṣayas tapase ye niṣeduḥ | bhīmā jāyā brāhmaṇasyāpanītā durdhāṃ dadhāti parame vyoman ||

9.15.7

ye garbhā avapadyante jagad yac cāpalupyate | vīrā ye hanyante mitho brahmajāyā hinasti tān ||

9.15.8

sarve garbhāḥ pra vyathante kumārā daśamāsyāḥ | yasmin rāṣṭre nirudhyate brahmajāyā acittyā ||

9.15.9

punar vai devā adaduḥ punar manuṣyā uta | rājānaḥ satyaṃ kṛṇvanto brahmajāyāṃ punar daduḥ ||

9.15.10

punardāya brahmajāyāṃ kṛtvī devair nikilbiṣam | ūrjaṃ pṛthivyā bhaktvā- -urugāyam upāsate ||

9.16.1

na tatra dhenur duhe nānaḍvān sahate dhuram | vijānir yatra brāhmaṇo rātriṃ vasati pāpayā ||

9.16.2

na varṣaṃ maitrāvaruṇaṃ brahmajyam abhi varṣati | nāsmai samitiḥ kalpate na mitraṃ nayate vaśam ||

9.16.3

asṛṅmatī carati brahmajāyā āśā limpantī pradiśaś catasraḥ | yaḥ kṣatriyaḥ punar enāṃ dadāti sa divo dhārāṃ dhayati prapīnām ||

9.16.4

yo 'punardāya brahmajāyāṃ rājā talpe nipadyate | duryoṇā asmā oṣadhīr yāḥ kāś cābhi vipaśyati ||

9.16.5

viṣam aśnāty apāṃ viṣam aśnāti vīrudhām | yo brahmajāyāṃ na punar dadāti tasmai devāḥ sudihaṃ digdham asyām ||

9.16.6

udyat patayo daśa striyāḥ pūrve abrāhmaṇāḥ | brahmā ced dhastam agrahīt sa eva patir ekadhā ||

9.16.7

brāhmaṇa eva patir na rājā nota vaiśyaḥ | tat sūryaḥ prabruvann eti pañcabhyo mānavebhyaḥ ||

9.17.1

naitāṃ te devā adadus tubhyaṃ nṛpate attave | mā brāhmaṇasya rājanya gāṃ jighatso anādyām ||

9.17.2

akṣadrugdho rājanyaḥ pāpa ātmaparājitaḥ | sa brāhmaṇasya gām adyād adya jīvāni mā śvaḥ ||

9.17.3

nir vai kṣatraṃ nayati hanti varco 'gnir ivārabdhaḥ pra dunoti rāṣṭram | yo brāhmaṇaṃ devabandhuṃ hinasti na sa pitṝṇām apy eti lokam ||

9.17.4

devapīyuś carati martyeṣu garagīrṇo bhavaty asthibhūyān | yo brāhmaṇaṃ manyate annam eva sa viṣasya pibati taimātasya ||

9.17.5

viṣaṃ sa pibati taimātaṃ paśyann agniṃ pra sīdati | yo brāhmaṇasya sad dhanam abhi nārada manyate ||

9.17.6

śatāpāṣṭhāṃ ni girati tāṃ na śaknoti niṣkhidam | annaṃ yo brahmaṇāṃ malvaḥ svādv admīti manyate ||

9.17.7

ya enāṃ hanti mṛdu manyamāno devapīyur dhanakāmo na cittāt | saṃ tasyendro hṛdaye agnim indha ubhe enaṃ dyuṣṭo nabhasī carantam ||

9.17.8

na brāhmaṇo hiṃsitavā agneḥ priyatamā tanūḥ | somo hy asya dāyāda indro asyābhiśastipāḥ ||

9.17.9

agnir vai naḥ padavāyaḥ somo dāyāda ucyate | jetā abhiśastendras tat satyaṃ devasaṃhitam ||

9.17.10

āviṣṭitāghaviṣā pṛdākūr iva carmaṇā | sā brāhmaṇasya rājanya tṛṣṭaiṣā gaur anādyā ||

9.18.1

iṣur iva digdhā nṛpate pṛdākūr iva gopate | sā brāhmaṇasyeṣur digdhā tayā vidhyati pīyakaḥ ||

9.18.2

tīkṣṇeṣavo brāhmaṇā hetimanto yām asyanti śaravyāṃ na sā mṛṣā | anuhāya tapasā manyunā cota dūrād ava bhindanti te tayā ||

9.18.3

jihvā jyā bhavati kulmalaṃ vāṅ nāḍīkā dantās tapasā sudigdhāḥ | tebhir brahmā vidhyati devapīyūn hṛdbalair dhanurbhir devajūtaiḥ ||

9.18.4

ye brāhmaṇaṃ hiṃsitāras tapasvinaṃ manīṣiṇaṃ brahmacaryeṇa śrāntam | avartimad bhavitā rāṣṭram eṣāṃ tamasīva nihitaṃ nānu vettāḥ ||

9.18.5

ye sahasram arājann āsan daśaśatā uta | te brāhmaṇasya gāṃ jagdhvā vaitahavyāḥ parābhavan ||

9.18.6

gaur eva tān hanyamānā vaitahavyām̐ avātirat | ye keśara prābandhāyāś caramājām apeciran ||

9.18.7

atimātrā ajāyanta nod iva divam aspṛśan | bhṛguṃ hiṃsitvā māhīnā asaṃbhavyaṃ parābhavan ||

9.18.8

ye bṛhatsāmānam āṅgirasam ārpayan brāhmaṇaṃ janāḥ | yetvas teṣām ubhayādann avis tokāny āvayat ||

9.18.9

ye brāhmaṇaṃ pratyaṣṭhīvan ye cāsmic chuklam īṣire | asnas te madhye kulyāyāḥ keśān khādanta āsate ||

9.18.10

aṣṭāpadī caturakṣī catuḥśrotrā caturhanuḥ | dvijihvā dviprāṇā bhūtvā sā rāṣṭram ava dhūnute ||

9.19.1

brahmagavī pacyamānā yāvat sābhi vijaṅgahe | tejo rāṣṭrasya nir hanti na vīro jāyate pumān ||

9.19.2

ākramaṇena vai devā dviṣanto ghnanti pūruṣam | steyādaṃ brahmajyaṃ kṣetre cānṛtavādinam ||

9.19.3

viṣam etad devakṛtaṃ rājā varuṇo abravīt | na brāhmaṇasya gāṃ jagdhvā rāṣṭre jāgāra kaś cana ||

9.19.4

tad vai rāṣṭram ā sravati bhinnāṃ nāvam ivodakam | brāhmaṇo yatra jīyate tad rāṣṭraṃ hanti ducchunā ||

9.19.5

ekaśataṃ vai janatā bhūmir yā vyadhūnuta | prajāṃ hiṃsitvā brāhmaṇīm asaṃbhavyaṃ parābhavan ||

9.19.6

yām udājann ṛṣayo manīṣiṇaḥ śramasātāṃ bṛhatīṃ devajūtām | sā brahmajyaṃ pacati pacyamānā rāṣṭram asya bṛhatī yac ca varcaḥ ||

9.19.7

vācā brāhmaṇam ṛcchati jāmi hanty acittyā | mitrāya satye druhyati yaṃ devā ghnanti pūruṣam ||

9.20.1

ekapāc chanda ekakāmaṃ ca | tad āpnoti cāva ca rundhe prathamayā rātryā prathamayā samidhā ||

9.20.2

dvipāc chando dvipadaś ca paśūn | tad āpnoti cāva ca rundhe dvitīyayā rātryā dvitīyayā samidhā ||

9.20.3

trīṃl lokāṃs trīṃl lokapatīn | tad āpnoti cāva ca rundhe tṛtiyayā rātryā tṛtīyayā samidhā ||

9.20.4

catuṣpāc chandaś catuṣpadaś ca paśūn | tad āpnoti cāva ca rundhe caturthyā rātryā caturthyā samidhā ||

9.20.5

pañca diśaḥ pañca pradiśaḥ | tad āpnoti cāva ca rundhe pañcamyā rātryā pañcamyā samidhā ||

9.20.6

traiṣṭubhaṃ chando virājaṃ svarājaṃ samrājam | tad āpnoti cāva ca rundhe saṣṭhyā rātryā ṣaṣṭhyā samidhā ||

9.20.7

sapta prāṇān saptāpānān sapta ṛṣīṃś ca | tad āpnoti cāva ca rundhe saptamyā rātryā saptamyā samidhā ||

9.20.8

ojaś ca tejaś ca sahaś ca balaṃ ca | tad āpnoti cāva ca rundhe aṣṭamyā rātryā aṣṭamyā samidhā ||

9.20.9

ambhaś ca mahaś cānnaṃ cānnādyaṃ ca | tad āpnoti cāva ca rundhe navamyā rātryā navamyā samidhā ||

9.20.10

brahma ca kṣatraṃ cendriyaṃ ca brāhmaṇavarcasaṃ ca | tad āpnoti cāva ca rundhe daśamyā rātryā daśamyā samidhā ||

9.20.11

viśvāvasū ca sarvavasū ca | tad āpnoti cāva ca rundhe ekādaśyā rātryā ekādaśyā samidhā ||

9.20.12

pāṅktaṃ chandaḥ prajāpatiṃ saṃvatsaram | tad āpnoti cāva ca rundhe dvādaśyā rātryā dvādaśyā samidhā ||

9.21.1

yo vā ekaśarāvaṃ nirvaped ekarṣim evānu nir vapet | eṣa vā ekarṣir yad agniḥ | ekarṣiṃ caiva lokaṃ cāva rundhe ekarṣir iva tapaty ekarṣir iva dīdāyaikarṣir ivānnādo bhavati ya evaṃ veda | sa ya evaṃ vidvān prāśnīyād etām eva devatāṃ manasā dhyāyed ekarṣes tvā cakṣuṣā paśyāmy ekarṣes tvā hastābhyām ā rabha ekarṣes tvāsyena prāśnāmy ekarṣes tvā jaṭhare sādayāmīti | sa yathā hutam iṣṭaṃ prāśnīyād evainaṃ prāśnāti ||

9.21.2

yo vai dviśarāvaṃ nirvapet prāṇāpānāv evānu nir vapet | etau vai prāṇāpānau yan mātariśvā cāgniś ca | prāṇāpānau caiva lokaṃ cāva rundhe jyog jīvati sarvam āyur eti na purā jarasaḥ pramīyate yaḥ (…) | sa ya evaṃ vidvān) praśnīyād etām eva devate manasā dhyāyet prāṇāpānayos tvā cakṣuṣā paśyāmi prāṇāpānayos tvā hastābhyām ā rabhe prāṇāpānayos tvāsyena prāśnāmi prāṇāpānayos tvā jaṭhare (…) | (…) ||

9.21.3

yo vai triśarāvaṃ nirvapet trīṇy eva trikadrukāṇy anu nir vapet | etāni vai trīṇi trikadrukāṇi yad ṛcaḥ sāmāni yajūṃṣi brāhmaṇam | brahma caiva lokaṃ cāva rundhe brāhmaṇavarcasī bhavati yaḥ (…) (…) prāśnīyād etām eva devatāṃ manasā dhyāyed brahmaṇas tvā cakṣuṣā paśyāmi brahmaṇas tvā hastābhyām ā rabhe brahmaṇas tvāsyena prāśnāmi brahmaṇas tvā (…) | (…) ||

9.21.4

yo vai catuḥśarāvaṃ nirvapec catasra evorvīr anu nir vapet | etā vai catasra urvīr yad diśaḥ | diśaś caiva lokaṃ cāva rundhe kalpante asmai diśo diśāṃ priyo bhavati yaḥ (…) | (…) prāśnīyād etām eva devatāṃ manasā dhyāyed diśāṃ tvā cakṣuṣā paśyāmi diśāṃ tvā hastābhyām ā rabhe diśāṃ tvāsyena prāśnāmi diśāṃ tvā (…) | (…) ||

9.21.5

yo vai pañcaśarāvaṃ nirvaped vaiśvānaram eva pañcamūrdhānam anu nir vapet | eṣa vai vaiśvānaraḥ pañcamūrdhā yad dyauś ca pṛthivī ca mātariśvā cāgniś cājasrā cātapan | vaiśvānaraṃ caiva lokaṃ cāva rundhe vaiśvānara iva tapati vaiśvānara iva dīdāya vaiśvānara ivānnādo bhavati yaḥ (…) | (…) prāśniyād etām eva devatāṃ manasā dhyāyed vaiśvānarasya tvā cakṣuṣā paśyāmi vaiśvānarasya tvā hastābhyām ā rabhe vaiśvānarasya tvāsyena prāśnāmi vaiśvānarasya tvā (…) | (…) ||

9.21.6

yo vai ṣaṭśarāvaṃ nirvapet ṣaḍ yāvna eva devān anu nir vapet | ete vai ṣaḍ yāvāno devā yad ṛtavaḥ | ṛtūṃś caiva lokaṃ cāva rundhe kalpante asmā ṛtavo na ṛtuṣv āvṛścata ṛtūnāṃ priyo bhavati yaḥ (…) | (…) prāśnīyād etā eva devatā manasā dhyāyed ṛtūnāṃ tvā cakṣuṣā paśyāmy ṛtūnāṃ tvā hastābhyām ā rabha ṛtūnāṃ tvāsyena prāśnāmy ṛtūnāṃ tvā (…) | (…) ||

9.21.7

yo vai saptaśarāvaṃ nirvapet sapta ṛṣīn evānu nir vapet | ete vai sapta ṛṣayo yat prāṇāpānavyānāḥ | saptarṣīṃś caiva lokaṃ cāva rundhe jyog jīvati sarvam āyur eti na purā jarasaḥ pramīyate yaḥ (…) | (…) prāśnīyād etā eva devatā manasā dhyāyet saptarṣīṇāṃ tvā cakṣuṣā paśyāmi saptarṣīṇāṃ tvā hastābhyām ā rabhe saptarṣīṇāṃ tvāsyena prāśnāmi saptarṣīṇāṃ tvā (…) | (…) ||

9.21.8

yo vā aṣṭaśarāvaṃ nirvaped virājam evavāṣṭāpadīm anu nir vapet | eṣā vai virāḍ aṣṭāpadī yad dyauś ca pṛthivī cāpaś cauṣadhayaś ca vāyuś cāntarikṣaṃ ca sūryaś ca candramāś ca | virājaṃ caiva lokaṃ cāva rundhe vi rājaty asmiṃś ca loke amuṣmiṃś ca vairāja rṣabha ity enam āhur yaḥ (…) | (…) prāśnīyād etām eva devatāṃ manasā dhyāyed virājas tvā cakṣuṣā paśyāmi virājas tvā hastābhyām ā rabhe virājas tvāsyena prāśnāmi virājas tvā (…) | (…) ||

9.21.9

yo vai navaśarāvaṃ nirvapen nava yāvna eva devān anu nirvapet | ete vai navayāvāno devā yan māsāḥ | māsaś caiva lokaṃ cava rundhe kalpante asmai māsā māsāṃ priyo bhavati yaḥ (…) | (…) prāśnīyād etā eva devatā manasā dhyāyen māsāṃ tvā cakṣuṣā paśyāmi māsāṃ tvā hastābhyām ā rabhe māsāṃ tvāsyena prāśnāmi māsāṃ tvā (…) | (…) ||

9.21.10

yo vai daśaśarāvaṃ nirvaped iḍām eva dhenum anu nirvapet | esā vā iḍā dhenur yad yajñaḥ paśavaḥ | iḍāṃ caiva dhenuṃ yajñaṃ ca lokaṃ ca paśūṃś cāva rundhe kalpante asmā iḍa iḍāṃ priyo bhavati yaḥ (…) | (…) prāśnīyad etām eva devatāṃ manasā dhyāyed iḍāyās tvā cakṣuṣā paśyāmi- -iḍāyās tvā hastābhyām ā rabha iḍāyās tvāsyena prāśnāmi- -iḍāyās tvā (…) | (…) ||

9.21.11

yo vā ekādaśaśarāvaṃ nirvaped rohitam evānu nir vapet | eṣa vai rohito yad indraḥ | indraṃ caiva lokaṃ cāva rundhe indriyāvī priya indrasya bhavati yaḥ (…) | (…) prāśnīyād etām eva devatāṃ manasā dhyāyed indrasya tvā cakṣuṣā paśyāmi- -indrasya tvā hastābhyām ā rabha indrasya tvāsyena prāśnāmi- -indrasya tvā (…) | (…) ||

9.21.12

yo vai dvādaśaśarāvaṃ nirvaped viśvām eva devān anu nir vapet | ete vai viśve devā yad idaṃ sarvam | viśvāṃś caiva devām̐l lokaṃ cāva rundhe kalpante asmai viśve devāḥ priyo viśveṣāṃ devānāṃ bhavati ya evaṃ veda | sa ya evaṃ vidvān prāśnīyād etā eva devatā manasā dhyāyed viśveṣāṃ tvā devānāṃ cakṣuṣā paśyāmi viśveṣāṃ tvā devānāṃ hastābhyām ā rabhe viśveṣāṃ tvā devānām āsyena prāśnāmi viśveṣāṃ tvā devānāṃ jaṭhare sādayāmīti | sa yathā hutam iṣṭaṃ prāśnīyād evainaṃ prāśnāti ||

9.22.1

imāṃ mātrāṃ nir vapa odanasya tasya paktā mucyatāṃ kilbiṣebhyaḥ | abhidrohād enaso duṣkṛtāc ca punātu mā pavanaiḥ pavitraḥ ||

9.22.2

bhadrau hastau bhadrā jihvā bhadraṃ bhavatu me vacaḥ | mahyaṃ pavitram odanaṃ brahmaṇā nir vapāmasi hastābhyāṃ nir vapāmasi ||

9.22.3

yan mayi garbhe sati mātā cakāra duṣkṛtam | ayaṃ mā tasmād odanaḥ pavitraḥ pātv aṃhasaḥ ||

9.22.4

yad arvācīnam ekahāyanād anṛtaṃ kiṃ codima | ayaṃ mā tasmād odanaḥ pavitraḥ pātv aṃhasaḥ ||

9.22.5

yad duṣkṛtaṃ yac chamalaṃ yad enaś cakṛmā vayam | ayaṃ mā tasmād odanaḥ pavitraḥ pātv aṃhasaḥ ||

9.22.6

yan mātaraṃ yat pitaraṃ yad vā jāmiṃ jihiṃsima | ayaṃ mā tasmād odanaḥ pavitraḥ pātv aṃhasaḥ ||

9.22.7

yan mātṛghnā yat pitṛghnā bhrūṇaghnā yat sahāsima | ayaṃ mā tasmād odanaḥ pavitraḥ pātv aṃhasaḥ ||

9.22.8

śyāvadatā kunakhinā stenena yat sahāsima | ayaṃ mā tasmād odanaḥ pavitraḥ pātv aṃhasaḥ ||

9.22.9

śiśundhānāṃ pūṃścalānāṃ takṣṇāṃ yad annam āśima | ayaṃ mā tasmād odanaḥ pavitraḥ pātv aṃhasaḥ ||

9.22.10

yad apām apajahrima nimajya papimodakam | ayaṃ mā tasmād odanaḥ pavitraḥ pātv aṃhasaḥ ||

9.23.1

yat kruddhā manyuto vayaṃ brāhmaṇasya nijagmima padā vā gām upārima | ayaṃ mā tasmād odanaḥ pavitraḥ pātv aṃhasaḥ ||

9.23.2

yad brahmacarye yat snātacarye anṛtaṃ kiṃ codima | ayaṃ mā tasmād odanaḥ pavitraḥ pātv aṃhasaḥ ||

9.23.3

kilāsena duścarmaṇā vaṇḍena yat sahāśima ādhārābhigatena vā | ayaṃ mā tasmād odanaḥ pavitraḥ pātv aṃhasaḥ ||

9.23.4

yat kṣetram abhitiṣṭhātha aśvaṃ vā yaṃ niremiṣe | ayaṃ mā tasmād odanaḥ pavitraḥ pātv aṃhasaḥ ||

9.23.5

yad akṣeṣu hiraṇye goṣv aśveṣu yad dhane anṛtaṃ kiṃ codima | ayaṃ mā tasmād odanaḥ pavitraḥ pātv aṃhasaḥ ||

9.23.6

sakhyur jāyāṃ svāṃ dāsīṃ sūtikāṃ lohitāvatīm aśuddhāṃ yad upeyima | ayaṃ mā tasmād odanaḥ pavitraḥ pātv aṃhasaḥ ||

9.23.7

parivittena parivividānena abhyavasnātena paribhakṣitena didhiṣūpatyā yat sahāśima | ayaṃ mā tasmād odanaḥ pavitraḥ pātv aṃhasaḥ ||

9.23.8

yat kusīdaṃ vibhejima dvimeyaṃ dhanakāmyā | ayaṃ mā tasmād odanaḥ pavitraḥ pātv aṃhasaḥ ||

9.23.9

yad dvyekaṃ yat tryekam upaikam iti yad dadau | ayaṃ mā tasmād odanaḥ pavitraḥ pātv aṃhasaḥ ||

9.23.10

yat tvaramāṇāḥ śabalam apakvaṃ māṃsam āśima | ayaṃ mā tasmād odanaḥ pavitraḥ pātv aṃhasaḥ ||

9.24.1

yad annam āśimā vayam anannam annakāmyā udarasyābhiśācyā | ayaṃ mā tasmād odanaḥ pavitraḥ pātv aṃhasaḥ ||

9.24.2

yad vidvāṃso yad avidvāṃso anṛtaṃ kiṃ codima | ayaṃ mā tasmād odanaḥ pavitraḥ pātv aṃhasaḥ ||

9.24.3

yad devasya savituḥ pavitraṃ sahasradhāraṃ vitataṃ hiraṇyam | yenendram apunanamārtamartyās tenāyaṃ māṃ sarvapaśuṃ punātu ||

9.24.4

yenāpunāt savitā revatīr apo yenāpunīta varuṇaḥ savāya | yenemā viśvā bhuvanāni pūtās tenāyaṃ māṃ sarvapaśuṃ punātu ||

9.24.5

ati krāmāmi duritaṃ yad eno jahāmi ripraṃ parame sadhasthe | yena yanti sukṛto nāpi duṣkṛtas tam ā ruhema sukṛtām ulokam ||

9.24.6

mā yakṣmam iha hāsiṣṭa mā riphanto vi gātana | amaiva puṇyam astu no attṝn anv eti kilbiṣam ||

9.24.7

imaṃ pacāmy odanaṃ pavitraṃ pavanāya kam | sa mā muñcatu duṣkṛtād viśvasmāc cainasas pari ||

9.25.1

sahasrākṣaṃ śatadhāram ṛṣibhiḥ pavanaṃ kṛtam | tenā sahasradhāreṇa pavamānaḥ punātu mā ||

9.25.2

yena pūtam antarikṣaṃ yasmin vāyur adhi śritaḥ | tenā sahasradhāreṇa pavamānaḥ punātu mā ||

9.25.3

yena pūte dyāvāpṛthivī āpaḥ pūtā atho svaḥ | tenā sahasradhāreṇa pavamānaḥ punātu mā ||

9.25.4

yena pūte ahorātre diśaḥ pūtā uta yena pradeśāḥ | tenā sahasradhāreṇa pavamānaḥ punātu mā ||

9.25.5

yena pūtau sūryācandramasau nakṣatrāṇi bhūtakṛtaḥ saha yena pūtāḥ | tenā sahasradhāreṇa pavamānaḥ punātu mā ||

9.25.6

yena pūtā vedir agniḥ paridhayaḥ saha yena pūtāḥ | tenā sahasradhāreṇa pavamānaḥ punātu mā ||

9.25.7

yena pūtaṃ barhir ājyam atho haviḥ | tenā sahasradhāreṇa pavamānaḥ punātu mā ||

9.25.8

yena pūto yajño vaṣaṭkāra utāhutiḥ | tenā sahasradhāreṇa pavamānaḥ punātu mā ||

9.25.9

yena pūtau vrīhiyavau yābhyāṃ yajño adhinirmitaḥ | tenā sahasradhāreṇa pavamānaḥ punātu mā ||

9.25.10

yena pūtā aśvā gāvo atho pūtā ajāvayaḥ | tenā sahasradhāreṇa pavamānaḥ punātu mā ||

9.26.1

yena pūtā ṛcaḥ sāmāni yajur brahmaṇā saha yena pūtam | tenā sahasradhāreṇa pavamānaḥ punātu mā ||

9.26.2

yena pūtā atharvāṇa ātharvaṇā aṅgiraso devatāḥ saha yena pūtāḥ | tenā sahasradhāreṇa pavamānaḥ punātu mā ||

9.26.3

yena pūtā ṛtavo yenārtavā yebhyaḥ saṃvatsaro adhinirmitaḥ | tenā sahasradhāreṇa pavamānaḥ punātu mā ||

9.26.4

yena pūtā vanaspatayo vānaspatyā oṣadhayo vīrudhaḥ saha yena pūtāḥ | tenā sahasradhāreṇa pavamānaḥ punātu mā ||

9.26.5

yena pūtā gandharvāpsarasāḥ sarpapuṇyajanāḥ saha yena pūtāḥ | tenā sahasradhāreṇa pavamānaḥ punātu mā ||

9.26.6

yena pūtā nadyaḥ sindhavaḥ samudraḥ saha yena pūtaḥ | tenā sahasradhāreṇa pavamānaḥ punātu mā ||

9.26.7

yena pūtāḥ parvatā himavanto vaiśvānaraḥ paribhūḥ saha yena pūtaḥ | tenā sahasradhāreṇa pavamānaḥ punātu mā ||

9.26.8

yena pūtā viśve devāḥ parameṣṭhī prajāpatiḥ | tenā sahasradhāreṇa pavamānaḥ punātu mā ||

9.26.9

yena pūta stanayitnur apāṃ vatsaḥ prajāpatiḥ | tenā sahasradhāreṇa pavamānaḥ punātu mā ||

9.26.10

yena pūtaḥ prajāpatir lokān viśvaṃ bhūtaṃ svar ājabhāra | tenā sahasradhāreṇa pavamānaḥ punātu mā ||

9.26.11

yena pūtam ṛtaṃ satyaṃ tapo dīkṣā ca pūyate | tenā sahasradhāreṇa pavamānaḥ punātu mā ||

9.26.12

yena pūtam idaṃ sarvaṃ yad bhūtaṃ yac ca bhāvyam | tenā sahasradhāreṇa pavamānaḥ punātu mā ||

9.27.1

uccair ghoṣo dundubhiḥ satvanāyaṃ vānaspatyaḥ saṃbhṛta usriyābhiḥ | vācaṃ kṣaṇuvāno damayan sapatnān siṃha iva jyeṣyann abhi taṃstanībhiḥ ||

9.27.2

siṃha ivāstānīd druvayo vibaddho 'bhikrandann ṛṣabho vāśitām iva | vṛṣā tvaṃ vadhrayas te sapatnā aindras te śuṣmo abhimātiṣāhaḥ ||

9.27.3

saṃjayan pṛtanā ūrdhvamāyur gṛhyā gṛhṇāno bahudhā vi cakṣva | daivīṃ vācam ā hura gurasva vedhāḥ śatrūṇām upa bharasva vedaḥ ||

9.27.4

vṛṣeva yūthaṃ sahaso vidāno gavyann abhi ruva saṃdhanājit | śucā vidhya hṛdayaṃ pareṣāṃ hitvā grāmān pracyutā yantu śatravaḥ ||

9.27.5

dundubher vācaṃ prayatāṃ vadantīm āśṛṇvatī nāthitā ghoṣabuddhā | nārī putrān dhāvatu hastagṛhya- -amitrī bhītā samare vadhānā ||

9.27.6

dhībhiḥ kṛtaḥ pra bharasva vācam ud dharṣaya satvanām āyudhāni | amitrasenām abhijañjabhāno dyumad vada dundubhe sūnṛtāvat ||

9.27.7

pūrvo dundubhe vi ṣahasva śatrūn bhūmyāḥ pṛṣṭhe vada bahu rocamānaḥ | indramedī satvanaḥ saṃ hvayasva mitrair amitrān ava jaṅghanīhi ||

9.27.8

antareme nabhasī ghoṣo astu pṛthak te dhvanayo yantu śībham | abhi kranda stanayotpipānāṃ ślokakṛn mitratūryāya svardhi ||

9.27.9

saṃkrandanaḥ pravedo dhṛṣṇuṣeṇaḥ pravedakṛd bahudhā grāmaghoṣī | śreyo vanvāno vayunāni vidvān kīrtiṃ bahubhyo vi bhaja dvirāje ||

9.27.10

śreyaḥketo vasujit sahīyān mitraṃ dadhānas tviṣito vipaścit | aṃśūn iva grāvādhiṣavaṇe adrir gavyaṃ dundubhe adhi nṛtya vedaḥ ||

9.27.11

śatrūṣāṇ nīṣāḍ abhimātiṣāho gaveṣaṇaḥ sahamāna udbhit | vāgvī mantraṃ pra janayasva vājin sāṅgrāmajityāyeṣam ud vadeha ||

9.27.12

acyutacyut samado gamiṣṭho mṛdho jetā pṛtanāṣāḍ ayodhyaḥ ||

9.28.1

imās tapantu tvauṣadhīr oṣadhīnām ayaṃ rasaḥ | aśvatthas te 'yaṃ hṛdy agnir bhūto vy oṣatu pra patāto mamādhyā ||

9.28.2

yathā sūtraṃ lākṣāraktam ājyenānuṣicyate | evā te kāmaḥ sarpatv antar asthasu majjasu pra (…) ||

9.28.3

yathā kuṣṭhaḥ prayasyati yathā dahyate arciṣā | evā te dahyatāṃ manaḥ pra (…) ||

9.28.4

puṃsaḥ kuṣṭhāt pra kṣarati stoka ādhībhir ābhṛtaḥ | sa te hṛdaye vi vartatāṃ pra (…) ||

9.28.5

eṣa te stoko hṛdayaṃ digdheveṣuḥ pra padyatām | astrākhaṇaṃ yatheṣvā kāmo vidhyatu tvā mama pra (…) ||

9.28.6

harita edhi śuṣkākṣaḥ sarvadā hṛdayāmayi | striyas te anyā mā chāntsur atho tvāśābhi śocatu pra (…) ||

9.28.7

śocīmad astu te śayanaṃ śocīmad upaveśanam | śocīmad astu te mano yathātra na ramāsā arvācī na manāsa pra (…) ||

9.28.8

na ramāsai saṅgateṣu śayānaṃ tvābhi śocatu | stokas tvottuda ut tudāt pra (…) ||

9.28.9

antar dahati carmaṇo asthimāṃsebhir ābhṛtaḥ | sarvān yajñaḥ pra yāśayād aiḍa ādhībhis tava pra (…) ||

9.28.10

hṛdaye 'dhi sam idhyatāṃ svair māṃsebhir eṣa te | agniḥ kāmasya yo mahān sa mahyaṃ randhayāti tvā pra (…) ||

9.29.1

aśvattham agnim ājyaṃ dūtān kṛṇve manojavān | agniś carum ivārciṣā kāmo vidhyatu tvā mama pra (…) ||

9.29.2

śayānam agna āsīnam aśvatthaś ca savāsinau | carantam upatiṣṭhantaṃ mamādhibhir vi vidhyataṃ pra (…) ||

9.29.3

carantaṃ tvā tiṣṭhantam āsīnam api saṃsadi | reṣmā tṛṇam iva mathnātu dahan kāmaratho mama pra (…) ||

9.29.4

yathendrāyāsurān arandhayad bṛhaspatiḥ | evā tvam agne aśvatthān amūn mahyam ihānaya pra (…) ||

9.29.5

ahaṃ te mana ā dada aiḍena saha medinā | devā manuṣyā gandharvās te mahyaṃ randhayantu tvā pra (…) ||

9.29.6

yathā aśvatthasya parṇāni nelayanti kadā cana | evāsau mama kāmena māva svāpsīt kadā cana pra patāto mamādhyā ||

9.29.7

kuṣṭhaṃ tapanti marutaḥ svādhyaṃ dūra-ājānaṃ svarayanto arciṣā | yathā na svapāt katamac canāhar aiva gacchān mamādhyā ||