Kāṇḍa 10

10.1.1

hā amba tejane dheno lambanastani | na tad vido yad icchasi yad u vittaṃ na tad ghasaḥ ||

10.1.2

putro yas te pṛśnibāhus tam u tvaṃ sāmanaṃ kṛdhi | atho duhitaraṃ naptrīm atho tvaṃ sāmanā bhava ||

10.1.3

asāme kurame naigūrasya svasaḥ | arāte nirṛte amate snuhite ||

10.1.4

pareta kastupakaṃ vaḥ punar dadāmi | yo vo na veda taṃ hata tasyātta pariśiśnyam ||

10.1.5

tasyātta putrān bhrātṝṃś ca tasya goṣṭhaṃ vitāvata | yaś ca sato nāstivākī yaś cāsāv ahavirgṛhaḥ | durṇāmnīs tatra gacchata tatra sarvāḥ paretana ||

10.1.6

pari dhāmānīty ekā ||

10.1.7

antaścarāṃ kośecarām atho goṣṭhāvacāriṇīm | atho yāḥ svapne paśyāmas tā ito nāśayāmasi ||

10.1.8

kaṇvā yā gardabhīva nibhasat sūkarīva | tasyai pratipravartaya taptam aśmānam āsani ||

10.1.9

yo maryā abhigacchāt striyaṃ kastupastopinīm | kastupam asyā ācchidya- -athaināṃ cātayātai paramāṃ cit parāvatam ||

10.1.10

yā bhadrā yā śivā yorjā payasā saha | agniṣ ṭā asmākaṃ gṛhe gārhapatyo ni yacchatu ||

10.1.11

idaṃ vo devaḥ savitā- -idaṃ devo bṛhaspatiḥ | idaṃ vo viśve devā avasānam ayukṣata ||

10.1.12

pari prāgād devo agnī rakṣohāmīvacātanaḥ | sedhan viśvā apa dviṣo dahan rakṣāṃsi viśvahā ||

10.1.13

parīme gām aneṣata pary agnim ahṛṣata | deveṣv akrata śravaḥ ka imām̐ ā dadharṣati ||

10.2.1

tvayīndriyaṃ tvayi varcas tvaṃ dharmapatir bhava | tvam uttaro bhrātṛvyebhyas tava lakṣmīḥ payasvatī ||

10.2.2

tavaitām aśvinā havaṃ tava rāṣṭraṃ divi śritam | tvam āyuṣmān sapatnahā- -uttaro dviṣato bhava ||

10.2.3

tīkṣṇaśṛṅga ṛṣabhaḥ samudra ivākṣitodakaḥ | tvaṃ sahasravīryas tava bāhū gavāṃ patī ||

10.2.4

bhrātṛvyaś ca sapatnaś ca yas tvāmitro jighāṃsati | śriyaṃ tvaṃ sarveṣāṃ teṣām ādāyogro vi dhāraya ||

10.2.5

tvaṃ vaśī satyākūtaḥ satyadharmā gaveṣaṇaḥ | nāṣṭrās tvaṃ sarvās tīrtvā bhrātṛvyāṇāṃ śriyaṃ vṛha ||

10.2.6

tubhyaṃ saṃ yantu balayas tubhyaṃ śulkaḥ pra vīyatām | tubhyaṃ virāṭ payo duhāṃ tvāṃ vāñchantu viśo mahīḥ ||

10.2.7

vāñchatu tvā bṛhad rāṣṭraṃ tviṣis te mukha āhitā | tvaṃ devānāṃ bhava priyas tvayi gāvo adhiśritāḥ ||

10.2.8

tvayīndriyaṃ tvayi varcas tvayi yajño adhiśritaḥ | tavā yantu havaṃ devās tvaṃ priyo bṛhaspateḥ ||

10.2.9

agnīṣomā pavamānau virāḍ devī payasvatī | atandraṃ sarve rakṣantu rāṣṭraṃ te napavādyam ||

10.2.10

agnir iva tṛṇaṃ pra daha- -oghaḥ kūlam ivā ruja | śriyaṃ bhrātṛvyāṇām ā datsva- -āṇḍīkam ivādhi puṣkarāt ||

10.3.1

aśva iva ratham ā datsva siṃha iva puruṣaṃ hara | hastīva naḍvalān bhaṅdhi bhrātṛvyāṇāṃ śriyaṃ vṛha ||

10.3.2

ut te kṛṇotu kaśyapo brahma devair abhiṣṭutam | āprītam avirādhukam ||

10.3.3

etaṃ khadiram ā hara- -atho tejanam ā hara | utaitaṃ parṇam ā hara- -ā harānaḍuho balam ||

10.3.4

idhmān devaiḥ samābhṛtāṃs tāṃs te prādād bṛhaspatiḥ | tān ā dhehi samāhite 'gnau sūryābhicakṣaṇe ||

10.3.5

tebhiṣ ṭvam uttaro bhava bhrātṛvyāṇāṃ śriyaṃ vṛha | atho eṣāṃ payo hara ||

10.3.6

ādityā rudrā vasava ṛṣayo bhūtakṛtaś ca ye | śriyaṃ ca kṣatram ojaś ca tubhyaṃ devā asāviṣuḥ ||

10.3.7

vasur asīndranāmā- -āyuṣmāñ chataśāradaḥ | sa indra iva deveṣu tviṣīmān viśa ā vada ||

10.4.1

idaṃ rāṣṭraṃ prathatāṃ gobhir aśvair idaṃ rāṣṭram annenerayā rasena | asmai ṣaḍ urvīr upa saṃ namantu saptahotrā hata śatrūn sacittāḥ ||

10.4.2

ime rājāna iṣubhir ghnantu śatrūn ime rājānaḥ samityānyān vadheyuḥ | ime rājānaḥ pṛtanāḥ sahantām ahaṃ brahmā vi mṛdho hanmi sarvāḥ ||

10.4.3

idaṃ rāṣṭraṃ kratumad vīravaj jiṣṇūgram idaṃ rāṣṭraṃ gardnumac citraghoṣam | asmai rāṣṭrāya balim anye harantv ahaṃ devebhyo haviṣā vidheyam ||

10.4.4

yadi yuddhaṃ yady ṛtitaṃ vo asti devainasād yadi vā pitryeṇa | yenarttīyā dhenavo astu tasmā ahaṃ devebhyo haviṣā juhomi ||

10.4.5

yad vaḥ krūraṃ manaso yac ca vāco devainasād yadi vā pitryeṇa | āpa iva duḥṣvapnyam apa tat svapadhvam athānandinaḥ sumanasaḥ sam eta ||

10.4.6

apām iva vegaḥ pra śṛṇīta śatrūn diśodiśo rabhamāṇaḥ sam eta | ekavratā vi dhanaṃ bhajadhvaṃ purohitena vo rāṣṭraṃ prathayantu devāḥ ||

10.4.7

samyag vo rāṣṭraṃ saha vo manāṃsi samīcīnāḥ paśavo viśvarūpāḥ | samīcīnānāṃ vo aham asmi brahmā samyañco devā havam ā yantu ma imam ||

10.4.8

yathāpaḥ samudrāya samīcīr vahatha śriyam | evā rāṣṭrāya me devāḥ samyañco vahata śriyam ||

10.4.9

saṃsṛṣṭaṃ vo rāṣṭraṃ paśubhir gobhir aśvaiḥ saṃsṛṣṭam annenerayā rasena | mayā brahmaṇā prathamānāśvo vasīyāṃsaḥ sadam ugrā bhavātha ||

10.4.10

bahur yuvā pramṛṇo dhṛṣṇur astu bahuḥ kumāraḥ pratirūpaḥ pitṝṇām | satyaṃ vadantaḥ samitiṃ caranto mitraṃ gṛhṇānā jaraso yantu sakhyam ||

10.4.11

iha kṣatraṃ dyumnam uta rāṣṭraṃ samaitv ihendriyaṃ paśubhiḥ saṃvidānam | avadhunvānā apriyān yāṃś ca dviṣma idaṃ rāṣṭraṃ prathatāṃ sarvadaiva ||

10.4.12

idaṃ rāṣṭram iṣumad vīravaj jiṣṇūgram idaṃ rāṣṭraṃ paśumad brahmavṛddham | idaṃ rāṣṭraṃ hataśatru jiṣṇu ||

10.4.13

sapatnasāhaṃ pramṛṇam idaṃ rāṣṭraṃ dṛḍham ugram | sāḍhāmitram abhimātiṣāhaṃ sarvā jigāya pṛtanā abhiṣṭi ||

10.5.1

audumbareṇa maṇiṇā puṣṭikāmāya vedhasā | paśūnāṃ sarveṣāṃ sphātiṃ goṣṭhe me savitā karat ||

10.5.2

yo no agnir gārhapatyaḥ paśūnām adhipā asat | audumbaro vṛṣā maṇiḥ saṃ mā sṛjatu puṣṭyā ||

10.5.3

karīṣiṇīṃ phalavatīṃ svadhām irāṃ ca no gṛhe | audumbarasya tejasā dhātā puṣṭiṃ dadhātu me ||

10.5.4

yad dvipāc ca catuṣpāc ca yāny annāni ye rasāḥ | gṛhṇe 'haṃ teṣāṃ bhūmānaṃ bibhrad audumbaraṃ maṇim ||

10.5.5

puṣṭiṃ paśūnāṃ pari jagrabhāhaṃ catuṣpadāṃ dvipadāṃ yac ca dhānyam | payaḥ paśūnāṃ rasam oṣadhīnāṃ bṛhaspatiḥ savitā me ni yacchāt ||

10.5.6

ahaṃ paśūnām adhipā asāni mayi puṣṭaṃ puṣṭapatir dadhātu | mahyam audumbaro maṇir draviṇāni ni yacchatu ||

10.5.7

upa maudumbaro maṇiḥ prajayā ca dhanena ca | indreṇa jinvato maṇir ā māgan saha varcasā ||

10.5.8

devo maṇiḥ sapatnahā dhanasā dhanasātaye | paśor annasya bhūmānāṃ gavāṃ sphātiṃ ni yacchatu ||

10.5.9

yathāgre tvaṃ vanaspate puṣṭyā saha jajñiṣe | evā dhanasya me sphātim ā dadhātu sarasvatī ||

10.5.10

ā me dhanaṃ sarasvatī payasphātiṃ ca dhānyam | sinīvāly utā vahād ayaṃ caudumbaro maṇiḥ ||

10.5.11

tvaṃ maṇīnām adhipā vṛṣāsi tvayi puṣṭaṃ puṣṭapatir jajāna | tvayīme vājā draviṇāni sarvā- -udumbara sa tvam asmat sahasva- -ārād arātim amatiṃ kṣudhaṃ ca ||

10.5.12

grāmaṇīr asi grāmaṇīthyāyā abhiṣikto abhi mā siñca varcasā | tejo 'si tejo mayi dhārayādhi rayir asi rayiṃ mayi dhehi ||

10.5.13

puṣṭir asi puṣṭyā mā sam aṅdhi gṛhamedhī gṛhapatiṃ mā kṛṇu | audumbara sa tvam asmāsu rayiṃ sarvavīraṃ ni yaccha rāyaspoṣāya prati muñce ahaṃ tvām ||

10.5.14

ayam audumbaro maṇir vīro vīrāya badhyate | sa naḥ sanīṃ madhumatīṃ kṛṇotu rayiṃ ca naḥ sarvavīraṃ ni yacchāt ||

10.6.1

bhagasya rājñaḥ sumatiṃ gamema yaṃ havante bahudhā mānuṣāsaḥ | karma kṛṇvāno bhagam ā vṛṇīte sa no janeṣu subhagāṃ kṛṇotu ||

10.6.2

bhagaṃ purastāt pratibudhyamānāḥ paśyema devīm uṣasaṃ vibhātīm | pratīcī śubhrā draviṇena sākaṃ bhagaṃ vahanty aditir na aitu ||

10.6.3

bhago no adya svite dadhātu devānāṃ panthām abhi no nayeha | arvācī bhadrā sumatir na aitv adhā bhagena samidho no astu ||

10.6.4

bhagena vācam iṣitāṃ vadāni sarasvatīṃ madhumatīṃ suvarcāḥ | bhagena dattam upa medam āgan yathā varcasvān samitim āvadāni ||

10.6.5

bhago mā goṣv avatu bhago māvatu dhānye | akṣeṣu strīṣu mā bhago bhago māvatu varcasā ||

10.6.6

bhago mā sāyam avatu bhago māvatu rātryā | bhago nipadyamāneṣu prātar mā bhaga ā gamat ||

10.6.7

bhago mā prātar avatu bhago madhyandinaṃ pari | aparāhṇe vayaṃ bhagaṃ vāsa iva pari dadhmahe ||

10.6.8

bhagaṃ devebhyas pari bhagaṃ manuṣyebhyaḥ | divas pṛthivyā aham antarikṣād bhagaṃ vṛṇe | so agne ramatā mayi sa mā prāvatu varcasā ||

10.6.9

bhagaṃ vṛṇānā vadhvaṃ vahanti vaniṃ prayanto bhagam id dhavante | bhagena dattam upa medam āgan viśvaṃ subhūtaṃ draviṇāni bhadrā ||

10.6.10

bhagena devāḥ samaganmahi ya imā viśvā bhuvanābhivaste | prayacchann eti bahudhā vasūni sa no dadhātu yatamad vasiṣṭham ||

10.6.11

vāto bhago varuṇo vāyur agniḥ kṣetrasya patnī suhavā no astu | hiraṇyākṣo atipaśyo nṛcakṣāḥ sarvaiḥ sākaṃ sacamāno na ehi ||

10.6.12

ud ehi deva sūrya saha saubhāgyena | saharṣabhasya vājena sahāvataṃkaraṇena ||

10.6.13

hiraṇyayenety ekā ||

10.7.1

gobhiṣ ṭvā pātv ṛṣabho vṛṣā tvā pātu vājibhiḥ | vāyuṣ ṭvā brahmaṇā pātv indras tvā pātv indriyaiḥ ||

10.7.2

somas tvā pātv oṣadhībhir nakṣatraiḥ pātu sūryaḥ | mādbhiṣ ṭvā candro vṛtrahā vātaḥ prāṇena rakṣatu ||

10.7.3

tisro divas tisraḥ pṛthivīs trīṇy antarikṣāṇi caturaḥ samudrān | trivṛtaṃ stomaṃ trivṛta āpa āhus tās tvā rakṣantu trivṛtā trivṛdbhiḥ ||

10.7.4

trīn nākāṃs trīn samudrāṃs trīn bradhnāṃs trīn vaiṣṭapān | trīn mātariśvanas trīn sūryān goptṝn kalpayāmi te ||

10.7.5

ghṛtena tvā sam ukṣāmy agna ājyena vardhayan | agneś candrasya sūryasya mā prāṇaṃ māyino dabhan ||

10.7.6

mā vaḥ prāṇaṃ mā vo 'pānaṃ mā haro māyino dabhan | bhrājanto viśvavedaso devā daivyena māvata ||

10.7.7

prāṇenāgniṃ saṃ dadhati vātaḥ prāṇena saṃhitaḥ | prāṇena viśvatomukhaṃ sūryaṃ devā ajanayan ||

10.7.8

āyuṣāyuṣkṛtāṃ jīva- -āyuṣmāṃ jīva mā mṛthāḥ | prāṇenātmanvatāṃ jīva mā mṛtyor upa gā vaśam ||

10.7.9

devānāṃ nihitaṃ nidhiṃ yam indrānvavindan pathibhir devayānaiḥ | āpo hiraṇyaṃ jugupus trivṛdbhis tās tvā rakṣantu trivṛtā trivṛdbhiḥ ||

10.7.10

trayastriṃśad devatās trīṇi ca vīryāṇi priyāyamāṇā jugupur apsv antaḥ | asmiṃś candre adhi yad dhiraṇyaṃ tenāyaṃ kṛṇavad vīryāṇi ||

10.8.1

ye devā divy ekādaśa stha te devāso havir idaṃ juṣadhvam ||

10.8.2

ye devā antarikṣa ekādaśa stha (…) ||

10.8.3

ye devāḥ pṛthivyām ekādaśa stha te devāso havir idaṃ juṣadhvam ||

10.8.4

asapatnaṃ purastāt paścān no 'bhayaṃ kṛtam | savitā mā dakṣiṇata uttarān mā śacīpatiḥ ||

10.8.5

divo mādityā rakṣantu bhūmyā rakṣantv agnayaḥ | indrāgnī rakṣatāṃ mā purastād aśvināv abhitaḥ śarma yacchatām | tiraścīn aghnyā rakṣatu jātavedā bhūtakṛto me sarvataḥ santu varma ||

10.9.1

ye 'psv antar agnayaḥ praviṣṭā mroko manohā khano nirdāha ātmadūṣis tanadūṣiḥ | idaṃ tān ati sṛjāmi nir eno nir anṛtaṃ sṛjāmi ||

10.9.2

abhūtyā satvāya nir duṣvapnyaṃ sṛjāmi | vasiṣṭhārundhatī mā pātāṃ prajāpateḥ prastaro bṛhaspateḥ keśāḥ ||

10.9.3

adabdhaṃ cakṣuḥ suśrutau karṇāv akṣitau me prāṇāpānau | hṛdayā jarasaṃ mā mā hāsīr madhya mā riṣam ||

10.9.4

āpo mā śundhantu duṣkṛtād duritā yāni cakṛma | ayāma śuddhā uditas tanūbhiḥ ||

10.9.5

vaiśvānaro raśmibhir naḥ punātu vātaḥ prāṇeneṣiro namobhiḥ | dyāvāpṛthivī payasā payasvatī ṛtāvarī yajñiye mā punītām ||

10.9.6

punantu māgnayo gārhapatyāḥ punantu mā dhṛṣṇyā devahūtāḥ | punantu mā śakvarīḥ somapṛṣṭhāḥ pavamānāso ajriṇaḥ ||

10.9.7

yaḥ potā sa punātu mā bṛhadbhir deva savitaḥ | varṣiṣṭhair dyām ivopari ||

10.9.8

brahmasavaiḥ punātu mā rājasavaiḥ punātu mā | śataṃ pavitrā vitatā tiraścā tebhir mā devaḥ savitā punātu ||

10.9.9

śataṃ ca mā pavitāraḥ punantu sahasraṃ ca prasravaṇeṣv āpaḥ | āpa iva pūto 'smy agnir iva suvarcāḥ sūrya iva sucakṣāḥ ||

10.9.10

urūṇasāv asutṛpā udumbalau yamasya dūtau carato janām̐ anu | tāv asmabhyaṃ dṛśaye sūryāya punar dātām asum adyeha bhadram ||

10.10.1

aganma devāḥ svaḥ svar aganma- -aganma jyotir jyotir aganma | mahendro 'si parameṣṭhī sumitra viśvatomukha mā te yuyoma saṃdṛśaḥ ||

10.10.2

udyann adya citramahaḥ sapatnān me 'va jahi | divainān raśmibhir jahi rātryenāṃs tamasā vadhīs te yantv adhamaṃ tamaḥ ||

10.10.3

sūryasyāvṛtam anvāvarte dakṣiṇām anvāvṛtam | agnes tejasā tejasvī bhūyāsam indrasyendriyeṇendriyāvān bhūyāsam ||

10.10.4

idam aham agnes tejasā- -indrasyendriyeṇa somasya dyumnena viśveṣāṃ devānāṃ kratūnām | amuṣyāmuṣyāyaṇasya- -amuṣyāḥ putrasya varcas teja indriyaṃ prāṇam āyur ni veṣṭayāmi ||

10.10.5

(…) āyur ni yacchet ||

10.10.6

idam aham agnes tejasā- -indrasyendriyeṇa somasya dyumnena viśveṣāṃ devānāṃ kratūnām | amuṣyāmuṣyāyaṇasya- -amuṣyāḥ putrasya varcas teja indriyaṃ prāṇam āyur ā dāya ||

10.10.7

abhūtyā enaṃ pāśe sitvā duṣvapnyena saṃsṛjya mṛtyor vyātta āsann api dadhāmi ||

10.11.1

yo naḥ svo yo araṇo bhrātṛvyaś ca jighāṃsati | indraś ca tasyāgniś ca marma skandheṣu vindatām ||

10.11.2

yo mā śayānaṃ jāgrataṃ yaś ca suptaṃ jighāṃsati | indraś ca tasyāgniś ca bāhū marmaṇi vṛścatām ||

10.11.3

yo mā carantaṃ tiṣṭhantam āsīnaṃ ca jighāṃsati | indraś ca tasminn agniś ca duritaṃ prati muñcatām ||

10.11.4

yo mā cakṣuṣā manasā yaś ca vācā jighāṃsati | indraś ca tasmā agniś ca- -enāṃsi vahatām itaḥ ||

10.11.5

yaḥ piśāco yātudhānaḥ kravyād yo mā jighāṃsati | indraś ca tasyāgniś ca mūrdhānaṃ prati vidhyatām ||

10.11.6

yo mā brahmaṇā tapasā yaś ca yajñair jighāṃsati | indraś ca tasyāgniś ca hṛdaye 'dhi ni vidhyatām ||

10.11.7

yo me brahma yo me tapo balaṃ śreṣṭhaṃ jighāṃsati | indraś ca tasmā agniś ca kruddhau digdhābhir asyatām ||

10.11.8

yo me annaṃ yo me rasaṃ vācaṃ śreṣṭhāṃ jighāṃsati | indraś ca tasmā agniś ca- -ācchambaṭkāram asyatām ||

10.11.9

yo me tantuṃ yo me prajāṃ cakṣuḥ śrotraṃ jighāṃsati | indraś ca tasmā agniś ca hetiṃ deveṣu vindatām ||

10.11.10

yo me gobhya irasyaty aśvebhyaḥ puruṣebhyaḥ | indraś ca tasmā agniś ca jyāniṃ deveṣu vindatām ||

10.12.1

yo me bhūtim anāmayad vittam āyur jighāṃsati | indraś ca tasmā agniś ca divo aśmānam asyatām ||

10.12.2

yo me veśma yo me sabhāṃ śriyaṃ śreṣṭhāṃ jighāṃsati | indraś ca tasyāgniś ca kṛtyāṃ vi tanutāṃ gṛhe ||

10.12.3

yo me mṛtyum asamṛddhim ahnā rātryā cecchati | indraś ca tasyāgniś ca- -arciṣā dahatāṃ svam ||

10.12.4

yo me prāṇaṃ yo me 'pānaṃ vyānaṃ śreṣṭhaṃ jighāṃsati | indraś ca tasyāgniś ca prāṇaṃ prāṇahanau hatām ||

10.12.5

yo mā devajanaiḥ sarpair vidyutā brahmaṇābhyamāt | agastyena medinā- -indraś cāgniś ca taṃ hatām ||

10.12.6

taṃ satyaujāḥ pra dahatv agnir vaiśvānaro vṛṣā | yo mā durasyann īkṣātai yaś ca dipsati vidvalaḥ ||

10.12.7

yo mā dipsād adipsantaṃ yaś ca dipsati dipsa tam | vaiśvānarasya daṃṣṭrayor agner api dadhāmi tam ||

10.12.8

abhi taṃ dyāvāpṛthivī saṃtapatāṃ tapte gharme nyucyatām | nirṛtyā vadhyatāṃ pāśe yo naḥ pāpaṃ cikitsati ||

10.12.9

pratyagvadhena pracyutān bhrātṛvyān ghoracakṣasaḥ | indrāgnī enān vṛścatāṃ maiṣām uc cheṣi kaś cana ||

10.12.10

pratyagvadha pratyag jahi bhrātṛvyān dviṣato mama | apānān prāṇāṃ saṃchidya dviṣatas pātayādharān ||

10.12.11

agne ye mā jighāṃsanty agne ye ca dviṣanti mā | agne ye mopatapyante teṣāṃ priyatamaṃ jahi ||

10.12.12

etaṃ dviṣantam avadhiṣam andhena tamasāvṛtam | etaṃ mṛtyo 'bhi padyasva mā te moci mahodaraḥ ||

10.13.1

dyāvāpṛthivī saṃ nahyethāṃ mama rāṣṭrāya jayantī amitrebhyo hetim asyantī ||

10.13.2

vātā pavamānau saṃ nahyethāṃ mama rāṣṭrāya jayantāv amitrebhyo hetim asyantau ||

10.13.3

indrāgnī saṃ nahyethāṃ (…) ||

10.13.4

mitrāvaruṇā saṃ (…) (…) ||

10.13.5

bhavāśarvā saṃ (…) (…) ||

10.13.6

aśvinā saṃ nahyethāṃ mama rāṣṭrāya jayantāv amitrebhyo hetim asyantau ||

10.13.7

marutaḥ saṃ nahyadhvaṃ mama rāṣṭrāya jayanto 'mitrebhyo hetim asyantaḥ ||

10.13.8

pitaraḥ saṃ nahyadhvaṃ mama rāṣṭrāya jayanto 'mitrebhyo hetim asyantaḥ ||

10.13.9

sūryācandramasau saṃ nahyethāṃ mama rāṣṭrāya jayantāv amitrebhyo hetim asyantau ||

10.13.10

ahorātre san nahyethāṃ mama rāṣṭrāya jayantī amitrebhyo hetim asyantī ||

10.14.1

gandharvāpsarasaḥ saṃ nahyadhvaṃ mama rāṣṭrāya jayanto 'mitrebhyo hetim asyantaḥ ||

10.14.2

sarpapuṇyajanāḥ saṃ (…) ||

10.14.3

vanaspatayaḥ saṃ (…) ||

10.14.4

vānaspatyāḥ saṃ nahyadhvaṃ mama rāṣṭrāya jayanto 'mitrebhyo hetim asyantaḥ ||

10.14.5

oṣadhayaḥ saṃ nahyadhvaṃ mama rāṣṭrāya jayantyo 'mitrebhyo hetim asyantyaḥ ||

10.14.6

vīrudhaḥ saṃ nahyadhvaṃ mama rāṣṭrāya jayantyo 'mitrebhyo hetim asyantyaḥ ||

10.14.7

bṛhaspate saṃ nahyasva mama rāṣṭrāya jayann amitrebhyo hetim asyan ||

10.14.8

prajāpate saṃ (…) ||

10.14.9

parameṣṭhin saṃ nahyasva mama rāṣṭrāya jayann amitrebhyo hetim asyan ||

10.14.10

udārā ud īrdhvaṃ viśvāni bhūtāni saṃ nahyadhvaṃ mama rāṣṭrāya jayanty amitrebhyo hetim asyanti ||

10.15.1

agnī rakṣitā sa imāṃ senāṃ rakṣatu | anuṣṭhātar anu tiṣṭha sarve vīrā bhavantu me ||

10.15.2

indro rakṣitā (…) ||

10.15.3

somo rakṣitā (…) ||

10.15.4

varuṇo rakṣitā (…) ||

10.15.5

vāyū rakṣitā (…) ||

10.15.6

tvaṣṭā rakṣitā (…) ||

10.15.7

dhātā rakṣitā (…) ||

10.15.8

savitā rakṣitā (…) ||

10.15.9

sūryo rakṣitā (…) ||

10.15.10

candramā rakṣitā sa imaṃ senāṃ rakṣatu | anuṣṭhātar anu (…) ||

10.16.1

ahā rakṣitṛ tad imāṃ senāṃ rakṣatu | anuṣṭhātar anu tiṣṭha sarve vīrā bhavantu me ||

10.16.2

rātrī rakṣitrī sā imāṃ senāṃ rakṣatu | anuṣṭhātry anu tiṣṭha sarve vīrā bhavantu me ||

10.16.3

indrāṇī rakṣitrī sā imāṃ senāṃ rakṣatu | anuṣṭhātry anu tiṣṭha sarve vīrā bhavantu me ||

10.16.4

varuṇānī rakṣitrī sā imāṃ senāṃ rakṣatu | anuṣṭhātry anu tiṣṭha sarve vīrā bhavantu me ||

10.16.5

sinīvālī rakṣitrī sā imāṃ senāṃ rakṣatu | anuṣṭhātry anu tiṣṭha sarve vīrā bhavantu me ||

10.16.6

samudro rakṣitā sa imāṃ senāṃ rakṣatu | anuṣṭhātar anu tiṣṭha sarve vīrā bhavantu me ||

10.16.7

parjanyo rakṣitā sa imāṃ senāṃ rakṣatu | anuṣṭhātar anu tiṣṭha sarve vīrā bhavantu me ||

10.16.8

bṛhaspatī rakṣitā sa imāṃ senāṃ rakṣatu | anuṣṭhātar anu tiṣṭha sarve vīrā bhavantu me ||

10.16.9

prajāpatī rakṣitā sa imāṃ senāṃ rakṣatu | anuṣṭhātar anu tiṣṭha sarve vīrā bhavantu me ||

10.16.10

parameṣṭhī rakṣitā sa imāṃ senāṃ rakṣatu | anuṣṭhātar anu tiṣṭha sarve vīrā bhavantu me ||

10.16.11

viśve devā rakṣitāras ta imāṃ senāṃ rakṣantu | anuṣṭhātāro anu tiṣṭhata sarve vīrā bhavantu me ||