Kāṇḍa 11

11.1.1

vṛṣā te 'haṃ vṛṣaṇyantyai garbhaṃ dadhāmi yonyām | yadi devapariṣṭhitā prajāṃ tokaṃ na vindase ||

11.1.2

dhātā te taṃ sinīvālī varuṇānī pra yacchatu | pumāṃsaṃ putram indrāṇī śatadāyaṃ dadhātu te ||

11.1.3

saṃvṛtas te vakṣaṇāsu garbhaḥ puṃsā pumān kṛtaḥ | sarvāṅgas tanvor jāyatām agnir ivāraṇyor adhi ||

11.1.4

dhatsva vīraṃ karmaṇyaṃ prasvaṃ tvāvadhrim avaśāṃ kṛṇomi | ātmanas te lohitād garbhaḥ saṃvartatāṃ vṛṣā ||

11.1.5

tvaṣṭā piṃśatu te prajāṃ dhātā tokaṃ dadhātu te | rākā sīvyatu sūcyā bhūtasyeśānā bhuvanasya devī ||

11.1.6

sinīvālīm anumatiṃ rākāṃ guṅguṃ sarasvatīm | devānāṃ patnīr yā devīr indrāṇīm avase huve ||

11.1.7

abhinnāṇḍā vṛddhagarbhā- -ariṣṭā vīrasūr iyam | vi jāyatāṃ pra jāyatāṃ bahvī bhavatu putriṇī ||

11.1.8

pari sṛja garbhaṃ dhehi māśāḥ pra cyoṣṭa lohitam | anūnaḥ pūrṇo jāyatām aśrāmoranvo apiśācadhītaḥ ||

11.1.9

tvaṃ dadhāsi dvipade catuṣpade garbhaṃ prajām ejate viśvarūpām | kanikradad vṛṣabho vīḍuśepāḥ prajāpate tanvāṃ dhehi garbham ||

11.1.10

abhikrandaṃ stanayaṃ dhehi garbhaṃ vidyotamānaḥ pavamāno vīrudbhiḥ | parjanyemāṃ pṛthivī retasāvata- -apāṃ rasair oṣadhīnāṃ paśūnām ||

11.1.11

ā te nayāmi vṛṣaṇaṃ yaḥ prajānāṃ prajāpatiḥ | sa te dadhātv ṛtviyaṃ garbhaṃ yonyāṃ vijāṃ prajām ||

11.1.12

ye vṛṣāṇo garbhakṛta ṛtviyānāṃ samenasaḥ | tāṃs te hvayāmi tad u te sam ṛdhyatām ||

11.1.13

agneṣ ṭe tvaṣṭur varuṇād indrāt somād bṛhaspateḥ | putraṃ te putrakāmāyai devebhyo nir mame prajām ||

11.1.14

aṅgād aṅgāt saṃ sravatu tad yonau prati tiṣṭhatu | prajā te vakṣaṇāśayā tat te bījaṃ vi rohatu ||

11.2.1

atsaso yamanaṃ saso 'bhūtir yakṣmam ajījanat | imaṃ sahasrabhāg indro viśaraṃ nāśayāti te ||

11.2.2

yaḥ kāryo yaś ca kṛtaḥ svayaṃjā uta hāryaḥ | devā indrajyeṣṭhā viśaraṃ nāśayantu te ||

11.2.3

viśarasya vijṛmbhasya- -iṣur mātā dhanuṣ pitā | ādityāḥ putrā ādityā viśaraṃ naśayantu te ||

11.2.4

dhanvano jyāyā iṣvā apaskambhasya bāhvoḥ | apāṣṭhāc chṛṅgāt kurmalād viśaraṃ nāśayāmi te ||

11.2.5

alavatī ruruśīrṣṇy atho yasyāyo mukham | devyai parjanyaretasa iṣave kṛṇutā namaḥ ||

11.2.6

yām atrayo aṅgiraso gotamā vīrudhaṃ viduḥ | tayā bharadvājaḥ kaṇvo viśaraṃ nāśayāti te ||

11.2.7

yas tvā straiṇād apasaro yaḥ puṃso adhyāruhat | āklāntaṃ saṃklāntaṃ snāva tad u te kalpayāmasi ||

11.2.8

vāta ivābhraṃ cyāvayāmi yakṣmaṃ te tanvas pari | vācā yac cakrus te guru tad ṛcā laghu kṛṇmasi | tenāham ṛtodyena viśaraṃ nāśayāmi te ||

11.2.9

yathā na satyaṃ puruṣaḥ sadā vaditum arhati | viṣkandhaṃ tvad apaśaraṃ viśaraṃ puṣṭyāmayam | jambhaṃ hanugrābhaṃ śaṅkhaṃ tān ajenā ajāmasi ||

11.2.10

śunam id va oṣadhayo vi dadhe bheṣajāya kam | dhanāyuvaḥ sanāyuvaḥ puruṣaṃ pārayiṣṇavaḥ ||

11.2.11

ātmatrāṇi devajūtā vīrudhāyuṣyā kṛtā | tayāham indradattayā viśaraṃ nāśayāmi te ||

11.2.12

alasya vyañjanasya veṣṭanasyota parṇadheḥ | granther jyāyā iṣvā viśaraṃ nāśayāmi te ||

11.2.13

sākaṃ viṣkandha pra pata cāṣeṇa kikidīvyā | sākaṃ vātasya dhrājyā saha naśya nihākayā ||

11.3.1

jaṅgiḍo 'si jaṅgiḍo rakṣitāsi jaṅgiḍaḥ | dvipāc catuṣpād asmākaṃ sarvaṃ rakṣatu jaṅgiḍaḥ ||

11.3.2

yā gṛtsyas tripañcāśīḥ śataṃ kṛtyākṛtaś ca ye | sarvān vinaktatejaso 'rasān jaṅgiḍas karat ||

11.3.3

arasaṃ kṛtrimaṃ nāḍam arasāḥ sapta visrasaḥ | apeto jaṅgiḍāmatim iṣum asteva sādhaya ||

11.3.4

kṛtyādūṣaṇa evāyam atho arātidūṣaṇaḥ | atho sahasvāṃ jaṅgiḍaḥ pra ṇa āyūṃṣi tāriṣat ||

11.3.5

sa jaṅgiḍasya mahimā pari ṇaḥ pātu viśvataḥ | viṣkandhaṃ yena sāsāha saṃskandham oja ojasā ||

11.3.6

tṛṣṭvā devā ajanayan niṣṭhitaṃ bhūmyām adhi | tam u tvāṅgirā iti brahmāṇaḥ pūrvyā viduḥ ||

11.3.7

na tvā pūrvā oṣadhayo na tvā tarantu yā navāḥ | vibādha ugro jaṅgiḍaḥ paripāṇaḥ sumaṅgalaḥ ||

11.3.8

aśvopadān bhagavo jaṅgiḍāmitavīrya | purā ta ugrāya sata upendro vīryaṃ dadau ||

11.3.9

ugra it te vanaspata indra ojmānam ā dadhau | amīvāḥ sarvāś cātayañ jahi rakṣāṃsy oṣadhe ||

11.3.10

aśarīkaṃ viśarīkaṃ balāsaṃ puṣṭyāmayam | takmānaṃ viśvaśāradam arasaṃ jaṅgiḍas karat ||

11.4.1

indrasya nāma gṛhṇanta ṛṣayo jaṅgiḍaṃ daduḥ | devā yaṃ cakrur bheṣajam agre viṣkandhadūṣaṇam ||

11.4.2

sa no rakṣatu jaṅgiḍo dhanapālo dhaneva | devā yaṃ cakrur brāhmaṇāḥ paripāṇam arātiham ||

11.4.3

durhārdasaṃ ghoracakṣuṃ pāpakṛtvānam āgatam | tāṃs tvaṃ sahasracakṣo pratībodhena nāśaya paripāno 'si jaṅgidaḥ ||

11.4.4

pari mā divaḥ pari mā pṛthivyāḥ pary antarikṣāt pari mā vīrudbhyaḥ | pari mā bhūtāt pari mota bhavyād diśo diśo jaṅgiḍaḥ pātv asmān ||

11.4.5

ya ṛṣṇavo devakṛtā ya uco babhṛte nyāḥ | sarvāṃs tān viśvabheṣajo arasān jaṅgiḍas karat ||

11.5.1

prati gṛhāṇa pṛthivī nītam etad ājyasya mathitaṃ śarīram | imāṃ dhenum asya dātus tvaṃ rakṣa barhiṣy ā yathāsat ||

11.5.2

uta tvāhur varuṇasya patnīm atho tvāhur aditiṃ viśvarūpām | adhi jarāyum āghāre havyavāham agnāv asyā mahimānaṃ juhomi ||

11.5.3

sa sāhasraṃ tantum anv ā tatāna so agniṣṭomān daśataṃ sam āpa | adhijarāyuṃ savatsāṃ yo dadāti taṃ vai devāḥ svar ā rohayanti ||

11.5.4

adhijarāyuḥ svar ā rohayanty anena dattā sudughā vayodhāḥ | sāsmai duhāṃ śatadhāram akṣitaṃ yam asya loke parame vyoman ||

11.5.5

pūrvavatsena saha vatsinī gaur yo 'syā vatso aparo jarāyu tat | tṛtīyaṃ māṃsaṃ parinirmitaṃ yat tasmād devā adhijarāyum āhuḥ ||

11.5.6

ā dhāvaya śavasā vāvṛdhāna- -uttarāva śrava ādhehy asmai | imam indra mahatāmena rakṣa saṃ prajayā tanvā saṃ balena ||

11.5.7

durvedāvastād bahudhā parastād viśve devāḥ prati paśyanty āyatīm | yā bhadrā yā sarvataḥ samīcī sed āhutir bhavatu me tarājyā ||

11.5.8

gṛṣṭiṃ dhenum adhijarāyuṃ svadhāṃ kṛṇvānaḥ pra dadāti brahmaṇe | sāsmai duhāṃ śatadhāram akṣitam amuṣmim̐l loke yuga uttarasmin ||

11.5.9

vatsaṃ jarāyu pratidhuk pīyūṣaṃ yo no dadāti sudughāmadhenum | tasya devāḥ pra tirantv āyuḥ sa ā rohatu sukṛtām ulokam ||

11.5.10

parivālām adhijarāyuṃ yudhā jīvo adadāgra etām | syonā naḥ śagmā śivā viśeha mā no hiṃsīr harasā daivyena ||

11.5.11

bhadrakṛtaṃ sukṛtamādu śaṃbhuvam araṃ bhuvaṃ prati gṛhṇāmy āyatīm | ghṛtaśriyaṃ nabhasī saṃvasānāṃ devān manuṣyām̐ asurān utarṣīn ||

11.5.12

pañca devāḥ pra pibanta etām indras tvaṣṭā varuṇo mitro agniḥ | te sarve sam adur mahyam etāṃ tayeha jīvan pra tirasvāyuḥ ||

11.5.13

kaśyapo 'yaṃ jamadagnir vasiṣṭha ṛṣayo naḥ sasanur agra etām | bharadvājo gotamo atrir naḥ syonāṃ viśvāmitro daduṣaḥ pra tirāty āyuḥ ||

11.5.14

ūrjaṃ devebhyaḥ subhaga ūrjaṃ manuṣyebhyaḥ | ūrjaṃ pitṛbhyo aghnya ūrjā dadata mā viśa ||

11.6.1

yā jātā oṣadhayo devebhyas triyugaṃ purā | manye nu babhrūṇām ahaṃ śataṃ dhāmāni sapta ca ||

11.6.2

śataṃ vo amba dhāmāni sahasram uta vo ruhaḥ | adhā śatakṛtvo yūyam imaṃ me agadaṃ kṛta ||

11.6.3

puṣpavatīḥ prasūmatīḥ phalinīr aphalā uta | aśvā iva stha jitvarīr vīrudhaḥ pārayiṣṇavaḥ ||

11.6.4

oṣadhīr iti mātaro yad vo devīr upabruve | rapāṃsi vighnatīr ita rakṣaś cātayamānāḥ ||

11.6.5

niṣkṛtir nāma vo mātā niṣkṛtir nāma vaḥ pitā | sarāḥ patatriṇī stha yad āmayati niṣkṛtiḥ ||

11.6.6

aśvatthe vo niṣadanaṃ parṇe vo vasatiṣ kṛtā | gobhāja it kilāsatha yat sanavatha puruṣam ||

11.6.7

yad ahaṃ vājayann imā oṣadhīr hasta ādadhe | ātma yakṣmasya naśyatu purā jīvagṛbho yathā ||

11.6.8

uc chuṣmā oṣadhīnāṃ gāvo goṣṭhād iverate | dhanaṃ saniṣyantīnām ātmānaṃ tava pūruṣaḥ ||

11.6.9

yad oṣadhayaḥ samagmata rājānaḥ samitāv iva | vipraḥ sa ucyate bhiṣag rakṣohāmīvacātanaḥ ||

11.6.10

aśvāvatīṃ somāvatīm ūrjayantīm udojasam | āvitsi sarvā oṣadhīr ito mā pārayān iti ||

11.7.1

ati viśvāḥ pariṣṭhā stena iva vrajam akramīt | oṣadhayaḥ pracucyavur yat kiṃ ca tanvo rapaḥ ||

11.7.2

yasyauṣadhayaḥ prasarpatha- -aṅgam aṅgaṃ paruṣ paruḥ | tasmād yakṣmaṃ vi bādhadhvam ugro madhyamaśīr iva ||

11.7.3

anyā vo anyām avatv anyānyasyā upāvata | oṣadhayaḥ saṃvidānā idaṃ me prāvatā vacaḥ ||

11.7.4

avapatantīr apadaṃ diva oṣadhayas pari | yaṃ jīvam aśnavāmahai na sa riṣyāti pūruṣaḥ ||

11.7.5

yā oṣadhayaḥ somarājñīr bahvīḥ śatavicakṣaṇāḥ | bṛhaspatiprasūtās tā no muñcantv aṃhasaḥ ||

11.7.6

yāḥ phalinīr yā aphalā akośā yāś ca keśinīḥ | bṛhaspatiprasūtās tā no muñcantv aṃhasaḥ ||

11.7.7

jīvalāṃ naghāriṣām ā te badhnāmy oṣadhim | yā ta āyur upāharād apa rakṣāṃsi cātayāt ||

11.8.1

kālo aśvo vahati saptaraśmiḥ sahasrākṣo ajaro bhūriretāḥ | tām ā rohanti kavayo vipaścitas tasya cakrā bhuvanāni viśvā ||

11.8.2

sapta cakrān vahati kāla eṣa saptāsya nābhīr amṛtaṃ nv akṣaḥ | sa imā viśvā bhuvanāny añjan kālaḥ sa īyate prathamo nu devaḥ ||

11.8.3

pūrṇaḥ kumbho adhi kāla āhitas taṃ vai paśyāmo bahudhā nu santam | sa imā viśvā bhuvanāni pratyaṅ kālaṃ tam āhuḥ parame vyoman ||

11.8.4

sa eva san bhuvanāny ābharat sa eva san bhuvanāni pary ait | pitā sann abhavat putra eṣāṃ tasmād vai nānyat param asti tejaḥ ||

11.8.5

kālo 'mūṃ divam ajanayat kala imāṃ pṛthivīm uta | kālena bhūtaṃ bhavyaṃ ca- -iṣitaṃ ha vi tiṣṭhate ||

11.8.6

kālo bhūtim asṛjat kale tapati sūryaḥ | kālo ha viśvā bhūtāni kāle cakṣur vi paśyati ||

11.8.7

kāle manaḥ kāle prāṇaḥ kāle nāma samāhitam | kālena sarvā nandanty āgatena prajā imāḥ ||

11.8.8

kāle tapaḥ kāle jyeṣṭhaṃ kāle brahma samāhitam | kālo ha sarvasyeśvaro yaḥ pitāsīt prajāpateḥ ||

11.8.9

teneṣitaṃ tena jātaṃ tad u tasmin pratiṣṭhitam | kālo ha brahma bhūtvā bibharti parameṣṭhinam ||

11.8.10

kālaḥ prajām asṛjata kālo agre prajāpatim | svayambhūḥ kaśyapaḥ kālāt tapaḥ kālād ajāyata ||

11.9.1

kālād āpaḥ sam abhavan kālād brahma tapo diśaḥ | kālenod eti sūryaḥ kāle ni viśate punaḥ ||

11.9.2

kālena vātaḥ pavate kālena pṛthivī mahī dyaur mahī kāla āhitā | kālo ha bhūtaṃ bhavyaṃ ca putro ajanayat puraḥ ||

11.9.3

kālād ṛcaḥ sam abhavan yajuṣ kālād ajāyata | kālo yajñaṃ sam airayad devebhyo bhāgam akṣitam ||

11.9.4

kāle gandharvāpsarasaḥ kāle lokāḥ samāhitāḥ | kāle 'yam aṅgirā devo atharvā cādhi tiṣṭhataḥ ||

11.9.5

imaṃ ca lokaṃ paramaṃ ca lokaṃ puṇyāṃś ca lokān vidhṛtīś ca puṇyāḥ | sarvām̐l lokān abhijitya brahmaṇā kālaḥ sa īyate paramo nu devaḥ ||

11.10.1

saptaitaṃ sapta ṛṣayaḥ śalyakartā dvādaśa | āviddhaṃ śalyaṃ cākratur indrarāśiṃ mahodaram ||

11.10.2

indrarāśiṃ mitrāvaruṇāv āviddhaṃ nir akṛntatam | prasūtam indreṇogreṇa brāhmaṇānām asat pituḥ ||

11.10.3

nainam aśnīyād abrāhmaṇo na gṛhān pra haret svān | tṛṣṭaṃ viṣam iva taimātam indrarāśiḥ khale śaye ||

11.10.4

ayaṃ śaye tanvaṃ rakṣamāṇo yo aśnāty avicakṣāṇa etam | madhye khalasya nirmita indrarāśir mahodaraḥ ||

11.10.5

utaiṣa yakṣmaṃ bhavati- -indrarāśir mahodaraḥ | bhīmo annasya saṃkāśe aśva ivātti śinī naḍam ||

11.10.6

ya indrarāśiṃ nirvapād vardhayāt khalamānyāḥ | sphātiṃ ca khalyāṃ gṛhṇātu gavāṃ ca bahu puṣyatu ||

11.10.7

yam uvāha śunaḥśepo yam indro brahmaṇaspatiḥ | taṃ cakruḥ śivam asmabhyaṃ ṛṣayo jīvanāya kam ||

11.10.8

tṛḍhaṃ śākaṃ tam aśayad dattam āsīc chvāpadam | pandrā sma rupyantaḥ śere ya ādanvahutaṃ haviḥ ||

11.10.9

anaḍuhāṃ pṛśniśaphānāṃ vahatāṃ vaharāpiṇām | kīnāśasya śramāt svedād indrarāśir ajāyata ||

11.10.10

yat kināśasya sveda eti saṃtaptas tanvas pari | apāṃ gāva iva tṛṣyantīr indrarāśiṃ so aśnute ||

11.11.1

yat kīnāśaṃ sīrapatir daṇḍena hanti manyutaḥ | yat kiṃ ca khalyaṃ sādānvavam indrarāśau tad āhitam ||

11.11.2

ulūkhalamusalaṃ tāni codaya sūrpaṃ nāry apavice kṛṇuṣva | vāhāya putrāya gotama indrarāśiṃ madhumantaṃ kṛṇotu ||

11.11.3

etat sūrpaṃ jaritar ā hara- -ulūkhalamusalaṃ kumbhy ā gahi | putrā no adya sudinatve ahni pittam aśnanta madhumantam aṃśum ||

11.11.4

agnir no dūtaḥ prahito 'yam āgan sa naḥ sarvam annam aviṣaṃ kṛṇotu | nirāviddham akṛtaṃ brahmaṇeto 'domadhaṃ pittam atta prasūtāḥ ||

11.11.5

svādo pito madho pita upa naḥ pitav ā gahi | śivaḥ śivābhir ūtibhiḥ ||

11.11.6

siṃho bhūtvā gā mṛṇāty agnir bhūtvā dhānyam | indrarāśir anirmito mayāraṃ cāva gacchati ||

11.12.1

śatakāṇḍo duścyavanaḥ sahasraparṇa uttiraḥ | darbho ya ugra oṣadhis taṃ te badhnāmy āyuṣe ||

11.12.2

nāsya keśān pra vapanti norasi tāḍam ā ghnate | yasmā acchinnaparṇena darbheṇa śarma yacchati ||

11.12.3

divi te tūlam oṣadhe pṛthivyām asi niṣṭhitaḥ | tvayā sahasrakāṇḍena āyuṣ pra vardhayāmahe ||

11.12.4

tisro divo aty atṛṇas tisra imāḥ pṛthivīr uta | tayāhaṃ sarvān durhārdo jihvāṃ ni tṛṇadmi vacāṃsi ca ||

11.12.5

tvam asi sahamāno aham asmi sahasvān | ubhau sahasvantau bhūtvā sapatnān sahiṣīvahi ||

11.12.6

sahasva no abhimātiṃ sahasva pṛtanāyataḥ | sahasva sarvān durhārdaḥ suhārdo me bahūn kṛdhi ||

11.12.7

darbheṇa devajātena diviṣṭambhena śaśvad it | tenāhaṃ sasvato janām̐ asanaṃ sanavāni ca ||

11.12.8

priyaṃ mā darbhaṃ kṛṇu brahmarājanyābhyāṃ śūdrāya cāryāya ca | yasmai ca kāmayāmahe sarvasmai ca vipaśyate ||

11.12.9

yo jāyamānaḥ pṛthivīm adṛṃhad yo astabhnād antarikṣaṃ divaṃ ca | yaṃ bibhrataṃ nanu pāpmā viveda sa no 'yaṃ darbho dharuṇo divā kaḥ ||

11.12.10

sapatnahā śatakāṇḍaḥ sahasvān oṣadhīnāṃ prathamaḥ saṃ babhūva | sa no 'yaṃ darbhaḥ pari pātu viśvatas tena sākṣīya pṛtanāḥ pṛtanyataḥ ||

11.13.1

sahasrārghaḥ śatakāṇḍaḥ payasvān apām agnir vīrudhāṃ rājasūyam | sa no 'yaṃ darbhaḥ pari pātu viśvato daivo maṇir āyuṣā saṃ sṛjāti naḥ ||

11.13.2

ghṛtād ullupto madhumān payasvān bhūmidṛṃho acyutaś cāvayiṣṇuḥ | nudan sapatnān adharāṃś ca kṛṇvan darbhāroha mahatā mahendriyeṇa ||

11.13.3

tvaṃ bhūmim aty eṣy ojasā tvaṃ vedyāṃ sīdasi cārur adhvare | tvāṃ pavitram ṛṣayo 'bharanta tvaṃ punīhi duritāny asmat ||

11.13.4

tīkṣṇo rājā viṣāsahī rakṣohā viśvacarṣaṇiḥ | tejo devānāṃ balam ugram etat taṃ te badhnāmi jarase svastaye ||

11.13.5

darbheṇa tvaṃ kṛṇu vīryāṇi darbhaṃ bibhrad ātmanā mā vyathiṣṭhāḥ | atiṣṭhāyo varcasaidhvanyān sūrya ivā bhāhi pradiśaś catasraḥ ||

11.14.1

ud īratāṃ pṛthivī jīradānuḥ śīta enām antarvān anu vātu vātaḥ | ṛtviyāvatī pṛthivī prati gṛhṇātu bījaṃ sahasravalliśaṃ suruhārohayantī ||

11.14.2

indra enāṃ haryaśvo agnir vā rohitāśvaḥ | aśvinā rāsabhāśvā kṛṣiṃ devīm ayūyujan ||

11.14.3

śunaṃ varatrām ā yaccha śunam aṣṭrām ud iṅgaya | śunaṃ totapyatāṃ phālaḥ śunaṃ vahatu lāṅgalam ||

11.14.4

yunaktu vāhān vi yugā tanota kṛte kṣetre vapateha bījam | tathā dhātā tathā bhagas tathā kṛṇutām aśvinā tathā devī sarasvatī ||

11.14.5

supippalā oṣadhayo nāhīnā apakṣata | tad indro varuṇo vāyur aśvinedaṃ me pra tiratā vacaḥ ||

11.14.6

dhātā pūṣā bṛhaspatir bhūtyāḥ sam ajīgaman | kṛṣiṃ devāḥ svarvidaḥ ||

11.14.7

kalyāṇī subhageva yā saṃsthāyāṃ vapuṣeṇyā | sā nas tirāti madhumantam aṃśum ||

11.14.8

annasya bhūmā puruṣasya bhūmā bhūmā paśūnāṃ ta iha śrayantām | tīvrā varṣantu vṛṣṭayo bhūtaye mahase vṛdhe ||

11.14.9

pinvānaḥ parjanyas tiṣṭhatu saha pṛṣṭhayod eti sūryaḥ | ānandaṃ janayan yavaḥ sarvā arātīr apabādhamānaḥ ||

11.14.10

vi jihīṣva pṛthivīm ahyur vi pakṣam ṛdvī bhava | bhadraṃ rohatu dhānyam ||

11.15.1

utsedha sedha gā ajan vindeherāṃ mahas kṛdhi | mā vo riṣat kūṭagrāho mā va ā śāri lāṅgalam ||

11.15.2

mo asmākam ugrāḥ saṃrabdhās tanvaḥ kiṃ canāmamat | rāyaspoṣaṃ śunāsīrā atho sītābhagaś ca yaḥ ||

11.15.3

deṣṭrī samudraḥ sinīvālī kṛṣiṃ no abhi hinvata | imā yāḥ pañca pradiśas tā vāto abhi hinvata | valīke satvatām iva tīvrā varṣantu vṛṣṭayaḥ ||

11.15.4

śunaṃ kīnāśo anv etu vāhāñ chunaṃ phālo vinudann etu bhūmim | śunāsīrā haviṣā vāvṛdhānā śunaṃ dhānyāni kṛṇutāṃ yuvaṃ naḥ ||

11.15.5

yā naḥ pīparad aśvinā jyotiṣmatī tamas tiraḥ | tām asme rāsetām iṣam ||

11.16.1

ūrdhvaśrito vai nāmaitā āpo yad oṣadhayaś ca vanaspatayaś ca tāsām agnir adhipatiḥ | yo vā etā ūrdhvaśrita āpo vedāgnim adhipatim | yathaitam etā ūrdhvā upatiṣṭhanty evainam ūrdhvā upa tiṣṭhanty adhipatir bhavati svānāṃ cānyeṣāṃ ca ya evaṃ veda ||

11.16.2

praskadvarīr vai nāmaitā āpo yat pṛṣvās tāsām ādityo 'dhipatiḥ | yo vā etāḥ praskadvarīr āpo vedādityam adhipatim | yathaitā etasminn udyati praskandanty evāsminn ā yati praskandanty adhipatiḥ (…) ||

11.16.3

takvarīr vai nāmaitā āpo yāḥ sūdaya tāsāṃ pṛthivy adhipatnī | yo vā etās takvarīr āpo veda pṛthivīm adhipatnīm | yathaitā etasyāṃ praṇutās takantīr yanty evainena dviṣantaḥ praṇutā yanty adhipatiḥ (…) ||

11.16.4

vaśinīr vai nāmaitā āpo yāḥ syandante tāsāṃ varuṇo 'dhipatiḥ | yo vā etā vaśinīr āpo veda varuṇam adhipatim | yathaitam etāsāṃ syandamānānāṃ vaśam ādatta evā dviṣatāṃ vaśam ā datte 'dhipatiḥ (…) ||

11.16.5

ūrjo vai nāmaitā āpo yad gāvas tāsāṃ tvaṣṭādhipatiḥ | yo vā etā ūrja āpo veda tvaṣṭāram adhipatim | ūrjasvī tejasvī bhavati pra sāhasrān paśūn āpnoty adhipatiḥ (…) ||

11.16.6

varco vai nāmaitā āpo yad ghṛtaṃ tāsāṃ pūṣā adhipatiḥ | yo vā etā varca āpo veda pūṣaṇam adhipatim | varcasvī tejasvī bhavaty utāsyānabhyaktasya mukhaṃ rocate 'dhipatiḥ (…) ||

11.16.7

ojo vai nāmaitā āpo yan madhu tāsām indro 'dhipatiḥ | yo vā etā oja āpo vedendram adhipatim | ojasvī vīryāvān indriyāvī bhavati pra rājasabhāyāṃ madhuparkam āpnoty adhipatiḥ (…) ||

11.16.8

ugrā vai nāmaitā āpo yad dhrādunayas tāsāṃ maruto adhipatayaḥ | yo vā etā ugrā āpo veda maruto 'dhipatīn | ugro balavāna bhavati mārutaṃ śardha ity enam āhur adhipatiḥ (…) ||

11.16.9

maho vai nāmaitā āpo yad varṣaṃ tāsāṃ parjanyo 'dhipatiḥ | yo vā etā maha āpo veda parjanyam adhipatim | mahasvī mitrabāho bhavaty utainena svā nandanty asmākam ayam iti tasmāt sarvo vṛṣṭe mahīyate 'dhipatiḥ (…) ||

11.16.10

atimanyā vai nāmaitā āpo yat surā tasām aśvinādhipatī | yo vā etā atimanyā āpo vedāśvinādhipatī | ati manyate bhrātṛvyān nainaṃ bhrātṛvyā ati manyante tasmān matto mattam ati manyate 'dhipatiḥ (…) ||

11.16.11

paricito vai nāmaitā āpo yāḥ karṣvāṃ tāsāṃ yamo 'dhipatiḥ | yo vā etāḥ paricita āpo veda yamam adhipatim | pary enaṃ svāś ca viśyāś ca avaśyanty adhipatiḥ (…) ||

11.16.12

rantayo vai nāmaitā āpo ya striyas tāsāṃ kāmo 'dhipatiḥ | yo vā etā rantīr āpo veda kāmam adhipatim | ramante asmin ramaṇīyo bhavati kāma iva strīṇām adhipatiḥ (…) ||

11.16.13

viśvabhṛto vai nāmaitā āpo yat puruṣas tāsāṃ mṛtyur adhipatiḥ | yo vā etā viśvabhṛta āpo veda mṛtyum adhipatim | viśvasya bhartā bhavati viśvam enaṃ bibharty āsya trayo 'gnayo gṛhe dhīyante dakṣiṇāgnir gārhapatya āhavanīyaḥ | ainaṃ catvāri vāmāni gacchanti niṣkaḥ kaṃso 'śvataro hasty adhipatiḥ (…) ||

11.16.14

tāsāṃ vā etāsām apāṃ himavān ūdhaḥ somo vatsaḥ parameṣṭhy adhipatiḥ | yo vā etāsām apāṃ himavantam ūdhaḥ somaṃ vatsaṃ parameṣṭhinam adhipatiṃ veda | parameṣṭhī bhavati gacchati parameṣṭhitām adhipatiḥ bhavati svānāṃ cānyeṣāṃ ca ya evaṃ veda ||