Kāṇḍa 12

12.1.1

agnis takmānam apa bādhatām itaḥ somo grāvā marutaḥ pūtadakṣāḥ | vedir barhiḥ samidhaḥ śośucānā apa rakṣāṃsy amuyā dhamantu ||

12.1.2

ayaṃ yo ruro abhiśocayiṣṇur viśvā rūpāṇi haritā kṛṇoti | tasmai te 'ruṇāya babhrave tapur maghāya namo 'stu takmane ||

12.1.3

takman sārthinam icchasva vaśī san mṛḍayāsi naḥ | athehi yatra te gṛhā aninūrtteṣu dasyuṣu ||

12.1.4

yaḥ puruṣaḥ pāruṣeyo 'vadhvaṃsa ivāruṇaḥ | takmānaṃ viśvadhāvīrya- -adharāñcaṃ parā suva ||

12.1.5

adharāñcaṃ pra hiṇomi manas kṛtvā takmane | śakambharasya muṣṭihā punar gaccha mahāvṛṣān ||

12.1.6

mahāvṛṣān mūjavata oka edhi paretya | vratāni takmane brūmo anyakṣetrāṇi vā imāḥ ||

12.1.7

oko asya mūjavanta oko asya mahāvṛṣāḥ | yāj jātas takmaṃ tād asi balihikeṣu nyocaraḥ ||

12.1.8

takman vyāla vigada vyaṅga bhūri yāvaya | dāsīṃ niṣṭakvarīm iccha tāṃ vajreṇa sam arpaya ||

12.1.9

giriṃ gaccha girijāsi girau te māhiṣo gṛhaḥ | dāsīm iccha prapharvyaṃ tāṃ takman vīva dhūnuhi ||

12.1.10

yas tvaṃ śīto atho rūraḥ saha kāsāvīviyaḥ | bhimās te takman hetayas tābhi sma pari vṛṅdhi naḥ ||

12.2.1

takman bhrātrā balāsena svasrā kāsikayā saha | pāmnā bhrātṛvyeṇa naśyeto maraṭāṅ abhi ||

12.2.2

gandhāribhyo mūjavadbhyaḥ kāśibhyo magadhebhyaḥ | jane priyam iva śevadhiṃ takmānaṃ pari dadhmasi ||

12.2.3

nārkavindān nārvidālān nānnadīṃ vartakāvatīm | vratāni takmane brūmo anyakṣetrāṇi vā imāḥ ||

12.2.4

anyakṣetre na ramate sahasrākṣo amartyaḥ | abhūd u prārthas takmā sa gamiṣyati balihikām ||

12.2.5

ado gaccha mūjavatas tato vā gha parastaram | mā smāto abhyair naḥ punas tat tvā takmann upa bruve ||

12.2.6

parasmaiva tvaṃ cara paramasyāṃ parāvati | yathā no nāntam āyasi yathā no nābhiśocayā ||

12.3.1

yatheyam urvī pṛthivī vṛddhaiva garbham ādadhe | evā dadhāmi te garbhaṃ tasmai tvām avase huve ||

12.3.2

parvatād divo yoner gātrād gātrāt samāśṛtam | reto devasya devasya tsarau parṇam ivā dhām ||

12.3.3

viṣṇur yoniṃ kalpayatu tvaṣṭā rupāṇi piṃśatu | ā siñcatu prajāpatir dhātā garbhaṃ dadhātu te ||

12.3.4

garbhaṃ dhehi sinīvāli garbhaṃ dhehi sarasvati | garbhaṃ yuvam aśvināsyāmā dhattaṃ puṣkarasrajā ||

12.3.5

garbhaṃ te rājā varuṇo garbhaṃ devo bṛhaspatiḥ | garbhaṃ ta indraś cāgniś ca garbhaṃ dhātā dadhātu te ||

12.3.6

garbho asy oṣadhīnāṃ garbho vanaspatīnām | garbho viśvasya bhūtasya so agne garbham eha dhāḥ ||

12.3.7

yenauṣadhayo garbhinīḥ paśavo yena garbhinaḥ | teṣāṃ garbhasya yo garbhas tena tvaṃ garbhiṇī bhava ||

12.3.8

vi te granthiṃ cṛtāmasi dhātā garbhaṃ dadhātu te | ā yoniṃ putro rohatu jananaṃ prati jāyatām ||

12.3.9

janiṣṭa hi mahiyā ā yoniṃ sam ihāsarat | athā soma iva bhakṣaṇam ā garbhaḥ sīdatv ṛtviyam ||

12.3.10

dhātaḥ śreṣṭhena rūpeṇa- -asyā nāryā gavīnyoḥ | pumāṃsaṃ putram ā dhehi daśame māsi sūtave ||

12.4.4

bhagaḥ śreṣṭhena rūpeṇa- -asyā nāryā gavīnyoḥ | pumāṃsaṃ putram ā dhehi daśame māsi sūtave ||

12.4.5

adhi skanda vīrayasva garbham ā dhehi yonyām | vṛṣāṇaṃ vṛṣṇyāvantaṃ prajāyai tvā nayāmasi ||

12.4.6

yad veda rājā varuṇo veda devo bṛhaspatiḥ | indro yad vṛtrahā veda taṃ garbhakaraṇaṃ piba ||

12.4.7

vi jihīṣva bārhatsāme garbhas te yonim ā śayām | dadan te putraṃ devāḥ somapām ubhayāvinam ||

12.4.8

somasya tva rtviyena- -upaimi garbhakṛtvane | tatas te putro jāyatāṃ kartavai vīryebhyaḥ ||

12.5.1

jāyasvāgne 'śvatthād asmai kṣatrāyaujase | ugra āpatikād adhi yo vṛkṣām̐ adhirohati ||

12.5.2

vibādhaṃ cit sahamānaṃ tvām agne janayāmasi | jātāṃ janiṣyamāṇāṃ sapatnān pra ṇudasva me ||

12.5.3

aśvatthasyārohasya vṛkṣasyāraṇayeḥ kṛtāḥ | tato jātāya te 'jani vīḍujambhāgnir agnaye ||

12.5.4

taṃ jātaṃ jātavedasam ā dadhāmy amartyam | pāvakam agnim ūtaye śucimantaṃ viṣāsahim ||

12.5.5

ut tanuṣva dhanuḥ prati muñcasva varma jahi śatrūn vīryā te kṛṇomi | atra radhyantu ya u te sapatnās tvam ekavṛṣo bhava ||

12.5.6

vṛṣabhaṃ tvā sajātānāṃ sapatnānāṃ viṣāsahim | hantāraṃ śatrūṇāṃ kṛṇmo virājaṃ gopatiṃ gavām ||

12.5.7

samudro 'sy apāṃ jyeṣṭha indro deveṣu vṛtrahā | vyāghraṃ siṃhaṃ tvā kṛṇmo damitāraṃ pṛtanyatām ||

12.5.8

indra iva dasyūn adharān kṛṇuṣva- -ugra iva vāto viśṛṇan sapatnān | te śuṣyantv apa dāvād iva- -agneḥ paryavīvarathā enān ||

12.5.9

saṃ vṛścaināṃs te śuṣyantu vṛścainān mopajāṃ śiṣaḥ | sapatnān sarvāṃs tṛḍhvā tvam ekavṛṣo bhava ||

12.5.10

tvam ugras tvaṃ balī tvam edhi vivācanam | tvaṃ pṛtanyataḥ pūrvaḥ sapatnām̐ ava dūnuṣva ||

12.6.1

asapatnaḥ sapatnahā- -indra ivāriṣṭo akṣitaḥ | adhaḥ sapatnās te padoḥ sarve santv abhiṣṭhitāḥ ||

12.6.2

mlāyantu te khātamūlāḥ sapatnā agnim eṣāṃ nir hvayāmi śarīrāt | haviṣaiṣām api dadhāmi prāṇāṃs tathaibhyo amuciḥ kṛtāḥ ||

12.6.3

abhivardham abhibhavaṃ sapatnakṣayaṇaṃ haviḥ | rāṣṭrāya tubhyaṃ kṛṇmaḥ sapatnebhyaḥ parābhavan ||

12.6.4

yo naḥ svo yo araṇo 'rātiyati pūruṣaḥ | idhmasyeva prakṣāyakas tasya moccheṣi kiṃ cana ||

12.6.5

asapatnam iti dve ||

12.7.1

tvayā pūrvam ātharvāṇo jaghnū rakṣāṃsy oṣadhe | tvayā jaghāna kaśyapas tvayā kṛṇvo agastyaḥ ||

12.7.2

tvayā vayam apsaraso gandharvāṃś cātayāmasi | ajaśṛṅgy aja rakṣaḥ sarvān gandhena nāśaya ||

12.7.3

nadīṃ yantv apsaraso apāntāram iva śvasan | gulgulū pīlā nalady aukṣagandhiḥ pramandinī ||

12.7.4

yatrāmartyā apsv antaḥ samudre turūr nīlī turvaśī puṇḍarīkā | tat paretā apsarasaḥ pratibuddhā abhūtana ||

12.7.5

yatra preṅkho gandharvāṇāṃ divi baddho hiraṇyayaḥ | (…) ||

12.7.6

gandharvāṇām apsarasām ānartam iti saṅgamam | (…) ||

12.7.7

yatrāśvatthā nyagrodhā mahārukmāḥ śikhaṇḍinaḥ | (…) ||

12.7.8

yatra vo 'kṣā haritā arjunā āghāṭāḥ kakaryaḥ saṃvadanti | tat paretā apsarasaḥ pratibuddhā abhūtana ||

12.7.9

iyaṃ vīrucchikhaṇḍino gandharvasyāpsarāpateḥ | bhinattu muṣkāv api yātu śephaḥ ||

12.7.10

eyam agann oṣadhir vīrudhāṃ vīryāvatī | ajaśṛṅgy arāṭakī tīkṣṇaśṛṅgī vy ṛṣatu ||

12.8.1

apeteto apsaraso gandharvā yatra vo gṛhāḥ | tīkṣṇaśṛṅgy arāṭaky ajaśṛṅgī vy ṛṣatu ||

12.8.2

jāyā veda vo apsaraso gandharvāḥ patayo yūyam | apa krāmat puruṣād amartyā martyaṃ mā sacadhvam ||

12.8.3

bhīmā indrasya hetayaḥ śatamṛṣṭīr ayasmai | tābhir gandharvān abhaidyān avakādān vy ṛṣatu ||

12.8.4

avakādām̐ abhiśoco bhitsu dyotayamāmakān | gandharvān sarvān oṣadhe pra ṇudasva parā ṇaya ||

12.8.5

unmādayantīr abhiśocayantīr muniṃ nagnaṃ kṛṇvatīr moghahāsinam | apsaraso raghaṭo yāś caranti gandharvapatnīr ajaśṛṅgy āśaye ||

12.8.6

śvetīkṛṇvānaḥ puruṣaṃ viśvā rūpāṇi bobhuvat | śvevaikaṃ kapir ivaikaṃ kumāraḥ sarvakeśakaḥ | priyo dṛśe bhūtvā gandharvaḥ sacate striyaṃ tam ito nāśayāmasi ||

12.9.1

yo vai vaśāṃ devayate pacate vāhutāmamā | mṛtyoḥ sa badhyate pāśe devānāṃ ca yamasya ca ||

12.9.2

dakṣiṇāṃ sūryām aditiṃ vadanti vaśāṃ vācaṃ kalpayantaḥ samānīm | sapta ṛṣayo ni dadhur vācam etāṃ sarasvatī mṛḍayā kalpayantaḥ ||

12.9.3

imāṃ vaśāṃ vācam āhur vaśeti tisro vaśā atihitāḥ sadhasthe | tāsām agnau manasaikāṃ juhomi tāṃ naḥ svādvīṃ bhūtapatiḥ kṛṇotu ||

12.9.4

svadvīṃ na etāṃ savitā kṛṇotu svadvīṃ na etāṃ janitā paśūnām | juhudhy agne vayunāni vidvāṃs tāṃ naḥ svādvīṃ bhūtapatiḥ kṛṇotu ||

12.9.5

idaṃ tṛtīyaṃ vaśinī vaśāśi mahimne tvā garbho abhy ā viveśa | uśatī tvam uśato gaccha devān satyāḥ santu yajamānasya kāmāḥ ||

12.9.6

iyam ambhasā vājasutastabhe gaur yasyām indro varuṇas titviṣāte | nṛmṇam anṛmṇaṃ sacata iyam āgan dhīraḥ paśur vīryam ā viveśa ||

12.9.7

vaśā sasūva sthaviraṃ vipaścitaṃ vaśā sasūva vaṣkayaṃ divispṛśan | vaśā sasūva taruṇaṃ vibhājane vaśā sasūva saṃjitaṃ dhanānām ||

12.9.8

yat prokṣaṇam apatad barhiṣas pari dakṣiṇato vedyā indriyāvat | vaśā saṃbhūtyādhi gaur amīmet tasyāḥ pīvo abhavad varmavāsasam ||

12.9.9

namo mahimna uta cakṣuṣe vāṃ vaśarṣabho manasā tat kṛṇomi | devām̐ apītaṃ pathibhiḥ śivebhir mā no hiṃsiṣṭaṃ harasā daivyena ||

12.9.10

vaśām askandad ṛṣabhas tiṣṭhantīm adhi tantuṣu | garbhaṃ tam adya ko veda yatidhā so akalpayat ||

12.10.1

rūpam ekaḥ pary abhavad rājā nāmaika ucyate | patīrūpasyaiko rūpaṃ rūpam ekaḥ sukṛtvanām ||

12.10.2

prajāpatiḥ parameṣṭhī mṛtyur viśvānaraḥ svaḥ | sarasvānasyā yajñasya vaśāyā adhi jajñire ||

12.10.3

yasya gṛha ādāyeta vaśā devakṛtaṃ haviḥ | nidhānam asyā eṣyaṃ duhitre patyām iva ||

12.10.4

nāsyāḥ sakṛd abhi tiṣṭhen nāsya śloṇā gṛhe syāt | vaśā kanyeva durmaṅkā- -apacityā vijānatā ||

12.10.5

naināṃ rakṣed brāhmaṇebhyo nāmā vi glāpayāti ca | yatīṃ na pratyāvartayed yasya goṣu vaśā syāt ||

12.10.6

nāsyā vaśām ā rundhed devā manuṣyā uta | vaśaṃ yad anvaid brahmaṇā tasmād eṣābhavad vaśā ||

12.10.7

vaśaṃ kṛṇvānā vaśinīyam āgan padaṃ kalyāṇy avapaśyamānā | aniṣṭyeṣṭim abhijāyamānā yajñasya mātrām abhikalpamānā ||

12.10.8

indravantas te marutas turīyaṃ bhejire vaśe | turīyam ādityā rudrās turīyaṃ vasavo vaśe ||

12.10.9

turīya bhāja ādityān vaśāyāḥ kavayo viduḥ | athāsyāḥ pathyaikā tanuś catasraś cakl̥pe diśaḥ ||

12.10.10

vaśā panthām anv apaśyan nākapṛṣṭhaṃ svarvidām | ādityā enām anv āyann ṛṣayaś ca tapasvinaḥ ||

12.11.1

padepade kalpayanta ādityāṅgiraso yajuḥ | īḍānā anv āyan vaśān tadaiḍaṃ sāmocyate ||

12.11.2

vaśeḍā vaśānumatir vaśām āhuḥ sarasvatīm | virājaṃ manyante vaśāṃ vāg vaśā pṛthivī vaśā ||

12.11.3

vaśā deṣṭrī sinīvālī vaśoṣā nirṛtir vaśā | vaśāyāṃ mṛtyum aviśad ā mṛtyum aviśad vaśā ||

12.11.4

agnir vāg udakaṃ cakṣur mano vāto vaśī vaśā | tanvaṃ ko asyās taṃ veda yayodakrāmad ekayā ||

12.11.5

yāṃ cakṣuṣā manasā saṃvidānā hṛdā paśyanti kavayo manīṣinaḥ | tasyāḥ prajādhipatiḥ paśūnāṃ vaśā rājñā nāṃtaveṣā sṛṣṭiḥ ||

12.11.6

ko vaśāyā ūdho veda ka ulbaṃ ca jarāyu ca | stanān asyāḥ ko veda ka i tad veda yad duhe ||

12.11.7

aham asyā ūdho veda- -aham ulbaṃ ca jarāyu ca | stanān asyā ahaṃ veda- -atho tad veda yad duhe ||

12.11.8

nainām̐ ahaṃ rakṣeyaṃ dadyām eva syāc ca me | stanā hy asyā ahaṃ veda kṣīram ulbaṃ ca jarāyu ca ||

12.11.9

kṛttir yonir adhivāso jarāyu pāṇḍam ulbaṃ nābhir uṣṇīṣam asyāḥ | ā jarasaṃ dhayatu mātaraṃ vaśī brahmabhiḥ kl̥ptaḥ sa hy asya bandhuḥ ||

12.12.1

indrasya nu vīryāṇi pra vocaṃ yāni cakāra prathamāni vajrī | ahann ahim anv apas tatarda pra vakṣaṇā abhinat parvatānām ||

12.12.2

ahann ahiṃ parvate śiśriyāṇaṃ tvaṣṭāsmai vajraṃ svaryaṃ tatakṣa | vāśrā iva dhenavaḥ syandamānā añjaḥ samudram ava jagmur āpaḥ ||

12.12.3

vṛṣāyamāṇo 'vṛṇīta somaṃ trikadrukeṣv apibat sutasya | ā sāyakaṃ maghavādatta vajram ahann enaṃ prathamajām ahīnam ||

12.12.4

yad indrāhan prathamajām ahīnām ān māyinām amināḥ prota māyāḥ | āt sūryaṃ janayan dyām uṣāsaṃ tādītnā śatruṃ na kilā vivitse ||

12.12.5

ahan vṛtraṃ vṛtrataraṃ vyaṃsam indro vajreṇa mahatā vadhena | skadhāṃsīva kuliśenā vivṛkṇā- -ahiḥ śayad upapṛk pṛthivyāḥ ||

12.12.6

ayoddheva durmada ā hi juhve mahāvīraṃ tu vibādham ṛjīṣam | nātārīd asya samṛtiṃ vadhānāṃ saṃ rujānāḥ pipiṣa indraśatruḥ ||

12.12.7

apād ahasto apṛtanyad indram āsya vajram adhi sānau jaghāna | vṛṣṇo vadhriḥ pratimānaṃ babhūṣan purutrā vṛtro aśayad vyastaḥ ||

12.12.8

nadaṃ na bhinnam amuyā śayānaṃ mano ruhāṇā ati yanty āpaḥ | yāś cid vṛtro mahinā paryatiṣṭhat tāsām ahiḥ patsutaḥśīr babhūva ||

12.12.9

nicāvayā abhavad vṛtraputra- -indro asyā ava vadhar jabhāra | uttarā sūr adharaḥ putra āsīd dānuḥ śaye sahavatsā na dhenuḥ ||

12.12.10

atiṣṭhantīnām aniveśanānāṃ kāṣṭhānāṃ madhye nihitaṃ śarīram | vṛkasya niṇyaṃ vi caranty āpo dīrghaṃ tama āśayad indraśatruḥ ||

12.13.1

dāsapatnīr ahigopā atiṣṭhan niruddhā āpaḥ paṇineva gāvaḥ | apāṃ bilam apihitaṃ yad āsīd vṛtraṃ jaghanvām̐ apa tad vavāra ||

12.13.2

aśvyo vāro abhavas tad indra sṛke yat tvā pratyahan deva ekaḥ | ajayo gā ajayaḥ śūra somam avāsṛjaḥ sartave sapta sindhūn ||

12.13.3

nāsmai vidyun na tanyatuḥ śiṣedha na yāmyaham akirad dhrāduniṃ ca indraś ca yad yuyudhāte ahiś ca- -utāparībhyo maghavā vi jigye ||

12.13.4

aher yātāraṃ kam apaśya indra hṛdi yat te jaghnuṣo bhīr agacchat | nava ca yan navatiṃ ca sravantīḥ śyeno na bhīto ataro rajāṃsi ||

12.13.5

indro yāto 'vasitasya rājā śamasya ca śṛṅgiṇo vajrabāhuḥ | sed u rājā kṣayati carṣaṇīṇām arān na nemiḥ pari tā babhūva ||

12.14.1

yo jāta eva prathamo manasvān devo devān kratunā paryabhūṣat | yasya śuṣmād rodasī abhyasetāṃ nṛmṇasya mahnā sa janāsa indraḥ ||

12.14.2

yaḥ pṛthivīṃ vyadhamānām adṛṃhad yaḥ parvatān prakupitām̐ aramṇāt | yo antarikṣaṃ vimame varīyo yo dyām astabhnāt sa (janāsa indraḥ) ||

12.14.3

yo hatvāhim ariṇāt sapta sindhūn yo gā udājad apadhā valasya | yo aśmanor antar agniṃ jajāna saṃvṛk samatsu sa (janāsa indraḥ) ||

12.14.4

yenemā viśvā cyavanā kṛtāni yo dāsaṃ varṇam adharaṃ guhākaḥ | śvaghnīva yo jigīvām̐l lakṣam ādad aryaḥ puṣṭāni sa (janāsa indraḥ) ||

12.14.5

yaṃ smā pṛcchanti kuha seti ghoram utem āhur naiṣo astīty enam | so aryaḥ puṣṭīr vija ivā mināti śrad asmai dhatta sa (janāsa indraḥ) ||

12.14.6

yo radhrasya coditā yaḥ kṛśasya yo brahmaṇo nādhamānasya kīreḥ | yuktagrāvṇo yo 'vitā suśipraḥ sutasomasya sa (janāsa indraḥ) ||

12.14.7

yasyāśvāsaḥ pradiśi yasya gāvo yasya grāmā yasya viśve rathāsaḥ | yaḥ sūryaṃ ya uṣasaṃ jajāna yo apāṃ netā sa (janāsa indraḥ) ||

12.14.8

yaṃ krandasī saṃyatī vihvayete pare 'vara ubhayā amitrāḥ | samānaṃ cid ratham ātasthivāṃsā nānā havete sa (janāsa indraḥ) ||

12.14.9

yasmān na rte vijayante janāso yaṃ yudhyamānā avase havante | yo viśvasya pratimānaṃ babhūva yo acyutacyut sa (janāsa indraḥ) ||

12.14.10

yaḥ śaśvato mahy eno dadhānān abudhyamānān sarvā jaghāna | yaḥ śardhate nānudadāti śṛdhyāṃ yo dasyor hantā sa (janāsa indraḥ) ||

12.15.1

yaḥ śambaraṃ parvateṣu kṣiyantaṃ catvāriṃśyāṃ śarady anvavindat | ojāyamānaṃ yo ahiṃ jaghāna dānuṃ śayānaṃ sa (janāsa indraḥ) ||

12.15.2

yaḥ śambaraṃ paryacarac chaśībir yo vā vṛkasya nāpibat sutam | antar girau yajamānaṃ bahuṃ janaṃ yas taṃ nāsūrukṣu sa (janāsa indraḥ) ||

12.15.3

yaḥ saptaraśmir vṛṣabhas tuviṣmān avāsṛjat sartave sapta sindhūn | yo rauhiṇam asphurad vajrabāhur dyām ārohantaṃ sa (janāsa indraḥ) ||

12.15.4

dyāvā cid asmai pṛthivī namete śuṣmāc cid asya parvatā bhayante | yaḥ somapā nicito vajrabāhur yo vajrahastaḥ sa (janāsa indraḥ) ||

12.15.5

yaḥ sunvantam avati yaḥ pacantaṃ yaḥ śaṃsantaṃ yaḥ śaśamānam ūtī | yasya brahma vardhanaṃ yasya somo yasyedaṃ rādhaḥ sa janāsa indraḥ ||

12.15.6

yaḥ sunvate pacate dudhra ā cid vājaṃ dadarṣi sa kilāsi satyaḥ | vayaṃ ta indra viśvaha priyāsaḥ suvīrāso vidatham ā vadema ||

12.15.7

jāto vyakhyat pitror upasthe bhuvo na veda janituḥ parasya | taviṣyamāṇo nv ojo akhyad vratā devānāṃ sa janāsa indraḥ ||

12.15.8

yaḥ somakāmo haryaśva āsu yasmād rejante bhuvanāni viśvā | yo jaghāna śambaraṃ yaś ca śuṣṇaṃ ya ekavīraḥ sa janāsa indraḥ ||

12.16.1

śaṃ na indrāgnī bhavatām avobhiḥ śaṃ na indrāvaruṇā rātahavyā | śam indrāsomā sa vitāya śaṃ yoḥ śaṃ na indrāpūṣaṇā vājasātau ||

12.16.2

śaṃ no bhagaḥ śam u naḥ śaṃso astu śaṃ naḥ purundhiḥ śam u santu rāyaḥ | śaṃ naḥ satyasya sūyamasya śaṃsaḥ śaṃ no aryamā purujāto astu ||

12.16.3

śaṃ no dhātā śam u dhartā no astu śaṃ na urūcī bhavatu svadhābhiḥ | śaṃ rodasī bṛhatī śaṃ no adriḥ śaṃ no devānāṃ suhavāni santu ||

12.16.4

śaṃ no agnir jyotiranīko astu śaṃ mitrāvaruṇāv aśvinā śam | śaṃ naḥ sukṛtāṃ sukṛtāni santu śaṃ na iṣiro abhi vātu vātaḥ ||

12.16.5

śaṃ no dyāvāpṛthivī pūrvahūtau śam antarikṣaṃ dṛśaye no astu | śaṃ na oṣadhīr vanino bhavantu śaṃ no rajasaḥ patir astu jiṣṇuḥ ||

12.16.6

śaṃ na indro vasubhir devo astu śam ādityebhir varuṇaḥ suśaṃsaḥ | śaṃ no rudro rudrebhir jalāṣaḥ śaṃ nas tvaṣṭā gnābhir iha śṛṇotu ||

12.16.7

śaṃ naḥ somo bhavatu brahma śaṃ naḥ śaṃ no grāvāṇaḥ śam u santu yajñāḥ | śaṃ naḥ svarūṇāṃ mitayo bhavantu śaṃ naḥ prasvaḥ śam v astu vediḥ ||

12.16.8

śaṃ naḥ sūrya urucakṣā ud etu śaṃ no bhavantu pradiśaś catasraḥ | śaṃ naḥ parvatā dhruvayo bhavantu śaṃ naḥ sindhavaḥ śam u santv āpaḥ ||

12.16.9

śaṃ no aditir bhavatu vratebhiḥ śaṃ no bhavantu marutaḥ svarkāḥ | śaṃ no viṣṇuḥ śam u pūṣā no astu śaṃ no bhavitraṃ śam v astu vāyuḥ ||

12.16.10

śaṃ no devaḥ savitā trāyamānaḥ śaṃ no bhavantūṣaso vibhātīḥ | śaṃ naḥ parjanyo bhavatu prajābhyaḥ śaṃ naḥ kṣetrasya patir astu śambhuḥ ||

12.17.1

śaṃ naḥ satyasya patayo bhavantu śaṃ no arvantaḥ śam u santu gāvaḥ | śaṃ na ṛbhavaḥ sukṛtaḥ suhastāḥ śaṃ no bhavantu pitaro haveṣu ||

12.17.2

śaṃ no devā viśvadevā bhavantu śaṃ sarasvatī saha dhībhir astu | śam abhiṣācaḥ śam u rātiṣācaḥ śaṃ no divyāḥ pārthivāḥ śaṃ no apyāḥ ||

12.17.3

śaṃ no aja ekapād devo astu śam ahir budhnyaḥ śaṃ samudraḥ | śaṃ no apāṃ nāpat perur astu śaṃ naḥ pṛśnir bhavatu devagopāḥ ||

12.17.4

ādityā rudrā vasavo juṣantām idaṃ brahma kriyamāṇaṃ navīyaḥ | śṛṇvantu no divyāḥ pārthivāso gojātā uta ye yajñiyāsaḥ ||

12.17.5

ye devānām ṛtvijo yajñiyāso manor yajatrā amṛtā ṛtajñāḥ | te no rāsantām urugāyam adya yūyaṃ pāta svastibhiḥ sadā naḥ ||

12.17.6

tad astu mitrāvaruṇā tad agne śaṃ yor asmabhyam idam astu śastam | aśīmahi gātum uta pratiṣṭhāṃ namo dive bṛhate sādanāya ||

12.18.1

agnāv agniś carati praviṣṭa ṛṣīṇāṃ putro adhirāja eṣaḥ | tasmai juhomi haviṣā ghṛtena mā devānāṃ yūyavad bhāgadheyam ||

12.18.2

yukto vaha jātavedaḥ purastād agne viddhi kriyamāṇaṃ yathedam | tvaṃ bhiṣag bheṣajasyāpi kartā tvayā gām aśvaṃ puruṣaṃ sanema ||

12.18.3

tathā tvam agne kṛṇu jātavedo 'nena vidvān haviṣā yaviṣṭha | piśāco asya yatamo jaghāsa yathā so asya paridhiṣ patāti ||

12.18.4

yo 'sya dideva yatamo jaghāsa yathā so asya paridhiṣ patāti | tathā tvam agne kṛṇu jātavedo viśvebhir devaiḥ saha saṃvidānaḥ ||

12.18.5

akṣyau ni vidhya hṛdayaṃ ni vidhya jihvāṃ ni tṛndhi pra dataḥ śṛṇīhi | piśāco asya yatamo jaghāsa- -agne yaviṣṭha prati taṃ śṛṇīhi ||

12.18.6

yad asya hṛtaṃ vihṛtaṃ yat parābhṛtam ātmano jagdham uta yat piśācaiḥ | tad agne vidvān punar ā bhara tvaṃ śarīre prāṇam asum erayāsya ||

12.18.7

apāṃ tvā pāne yatamo dadambha- -odane manthe yadi vota lehe | tad ātmanā prajayā piśācā vi yātayantām agado 'yam astu ||

12.18.8

kṣīre tvā māṃse yatamo dadambha- -akṛṣṭapacye aśane dhānye yaḥ | tad ātmanā prajayā piśācā vi yātayantām agado 'yam astu ||

12.18.9

āme supakve śabale vipakve ya imaṃ piśāco aśane dadambha | tam indro vājī vajreṇa hantu bhinattu somaḥ śiro asya dhṛṣṇuḥ ||

12.18.10

divā tvā naktaṃ yatamo dadambha kravyād yātuḥ śayane piśācaḥ | tad agne vidvān pra daha kṣiṇīhy apy enaṃ dhehi nirṛter upasthe ||

12.19.1

somasyendrasya varuṇasya rājño viṣṇor balena savituḥ savena | agner hotreṇa pra ṇude piśācān yaviṣṭhasya brahmaṇā jātavedasaḥ ||

12.19.2

kravyādam agne rudhiraṃ piśācaṃ manohanaṃ jahi jātavedaḥ sahobhiḥ | śraddhemaṃ brahma juṣatāṃ dakṣiṇāyur yathā jīvāty agado bhavāti ||

12.19.3

punas tvā prāṇaḥ punar aitv āyuḥ punaś cakṣuḥ punar aitu śrotram | apaghnā no duritāni viśvā śataṃ himāḥ sarvavīrā madema ||

12.19.4

punar asmai mano dhehi punar āyuḥ punar balam | apānām asya prāṇaṃ ca- -agne vardhaya jīvase ||

12.19.5

cakṣuḥ sūrya punar dehi vāta prāṇaṃ sam īraya | śarīram asya māṃsāny agne saṃ bhārayā tvam ||

12.19.6

sam ā bhara jātavedo yaj jagdhaṃ yat parābhṛtam | gātrāṇy asya kalpaya punar ā pyāyatām ayam ||

12.19.7

somasyeva jātavedo aṃśur ā pyāyatām ayam | agne virapsinaṃ medhyam ayakṣmaṃ kṛṇu jīvase ||

12.19.8

saṃ mā siñcantu maruta ity ekā ||

12.19.9

vi muñcāmi brahmaṇā jātavedasam agniṃ hotāram ajaraṃ rathaspṛtam | sarvā devānāṃ janimāni vidvān yathābhāgaṃ vahatu havyam agniḥ ||

12.19.10

ye pumāṃso yātudhāna yā striyo yātudhānyaḥ | balavad indrasya vajreṇa- -avācīnān ava hanmi tān ||

12.20.1

yaṃ śapāmo ya u naḥ śapāti yaṃ dviṣmo ya u dveṣat piśācaḥ | kravyādam agne mahatā vadhena tam atrāpi pra daha jātavedaḥ ||

12.20.2

ya ārebhe yasya vā ghāsy apsarā yaḥ kṛṇvena saṃvido yātumāvān | ulūkayātuṃ bhṛmalo yasya yātus tam (…) ||

12.20.3

ya ādade yasya vā ghāsi pitryā stena śvayātur uta saṃbhidhehibhiḥ | yaḥ patād rodhanasyādhidevanaṃ kravyāt piśācaḥ kraviṣas titṛpsan ulūkayātuṃ bhṛmalo yasya yātus tam (…) ||

12.20.4

yaḥ puruṣeṇeyate rathena kravyād yātuḥ piśunaḥ piśācaḥ | vaiśvānareṇa sayujā sūryeṇa tam (…) ||

12.20.5

yo no valiṃ mṛgayāṃ yaś ca naḥ kṛṣiṃ paritiṣṭhād yātubhir yaś ca naḥ śapāt | astā rudraḥ śrathatv āyur asya tam (…) ||

12.20.6

mā yātumān vidata mṛḍitāram alokā asmai pradiśo bhavantu | sam enaṃ tapatāṃ rodasī ubhe tam atrāpi pra daha jatavedaḥ ||

12.20.7

jyotiṣmatīs tapanā yāś ca rocanā pratyoṣantīs tanvo yās te agne | tābhir me marmāṇy abhito dadasva mā tvā dabhan yātudhānā nṛcakṣaḥ ||

12.20.8

āpo devīḥ piśācānām apa nahyantv āsyam | yathemaṃ mamātmānaṃ anādhṛṣya punaḥ patān ||

12.20.9

sadaṃ puṣpe sadaṃ phale sadam indrābhirakṣite | sadā piśācā mriyantāṃ maiṣām uc cheṣi kaś cana

12.20.10

ye patanto yātudhānā divānaktam upācarān | rātrī mā tebhyo rakṣatv ahna ātmānaṃ pari dade ||

12.21.1

imaṃ badhnāmi te maṇiṃ dīrghāyutvāya tejase | darbhaṃ sapatnajambhanaṃ dviṣatas tapanaṃ hṛdaḥ ||

12.21.2

dviṣatas tāpayan hṛdaḥ śatrūṇāṃ tāpayan manaḥ | durhārdaḥ sarvāṃs tvaṃ darbha gharma ivābhīt sutāpayan ||

12.21.3

gharma ivābhitapan darbha dviṣato nitapan maṇe | hṛdaḥ sapatnānāṃ bhindhi- -indra iva virujaṃ valam ||

12.21.4

bhindhi darbha sapatnānāṃ hṛdayaṃ dviṣatāṃ maṇe | udyaṃ tvacam iva bhūmyāḥ śira eṣāṃ vi pātaya ||

12.21.5

bhindhi darbha sapatnān me bhindhi me pṛtanāyataḥ | bhindhi me sarvān durhārdo bhindhi me dviṣato maṇe ||

12.21.6

chindhi darbha sapatnān me chindhi me pṛtanāyataḥ | chindhi me sarvān durhārdaś chindhi me dviṣato maṇe ||

12.21.7

vṛśca darbha sapatnān me vṛśca me pṛtanāyataḥ | vṛśca me sarvān durhārdo vṛśca me (dviṣato maṇe) ||

12.21.8

kṛnta darbha sapatnān me kṛnta me pṛtanāyataḥ | kṛnta me sarvān durhārdaḥ kṛnta me dviṣato maṇe ||

12.21.9

piṃśa darbha sapatnān me piṃśa me pṛtanāyataḥ | piṃśa me sarvān durhārdaḥ piṃśa me dviṣato maṇe ||

12.21.10

vidhya darbha sapatnān me vidhya me pṛtanāyataḥ | vidhya me sarvān durhārdo vidhya me dviṣato maṇe ||

12.22.1

nikṣa darbha sapatnān me nikṣa me pṛtanāyataḥ | nikṣa me sarvān durhārdo nikṣa me dviṣato maṇe ||

12.22.2

tṛndhi darbha sapatnān me tṛndhi me pṛtanāyataḥ | tṛndhi me sarvān durhārdas tṛndhi me dviṣato maṇe ||

12.22.3

bhaṅdhi darbha sapatnān me bhaṅdhi me pṛtanāyataḥ | bhaṅdhi me sarvān durhārdo bhaṅdhi me dviṣato maṇe ||

12.22.4

mṛṇa darbha sapatnān me mṛṇa me pṛtanāyataḥ | mṛṇa me sarvān durhārdo mṛṇa me dviṣato maṇe ||

12.22.5

mantha darbha sapatnān me mantha me pṛtanāyataḥ | mantha me sarvān durhārdo mantha me dviṣato maṇe ||

12.22.6

piṇḍhi darbha sapatnān me piṇḍhi me pṛtanāyataḥ | piṇḍhi me sarvān durhārdaḥ piṇḍhi me dviṣato maṇe ||

12.22.7

oṣa darbha sapatnān me oṣa me pṛtanāyataḥ | oṣa me sarvān durhārda oṣa me dviṣato maṇe ||

12.22.8

daha darbha sapatnān me daha me pṛtanāyataḥ | daha me sarvān durhārdo daha me dviṣato maṇe ||

12.22.9

jahi darbha sapatnān me jahi me pṛtanāyataḥ | jahi me sarvān durhārdo jahi me dviṣato maṇe ||

12.22.10

yat te darbha jarāmṛtyū sa te marmasu varma te | tenemaṃ varmiṇaṃ kṛtvā sapatnān jahi vīryaiḥ ||

12.22.11

śataṃ te darbha varmāṇi sahasraṃ vīryāṇi te | tam asmai viśve tvāṃ devā jarase bhartavā aduḥ ||

12.22.12

tvām āhur devavarma tvāṃ darbha brahmaṇaspatim | tvām indrasyāhur varma tvaṃ rāṣṭrāṇi rakṣasi ||

12.22.13

sapatnakṣayaṇaṃ darbhaṃ dviṣatas tapanaṃ hṛdaḥ | maṇiṃ kṣatrasya vardhanaṃ tanūpānaṃ kṛṇomi te ||

12.22.14

yat samudro abhyakrandat parjanyo vidyutā saha | tato hiraṇyayo bindus tato darbho ajāyata ||