Prapāṭhaka 9

9.1

pavasva vṛṣṭimā su no 'pāmūrmiṃ divaspari . ayakṣmā bṛhatīriṣaḥ

9.2

tayā pavasva dhārayā yayā gāva ihāgaman . janyāsa upa no gṛham

9.3

ghṛtaṃ pavasva dhārayā yajñeṣu devavītamaḥ . asmabhyaṃ vṛṣṭimā pava

9.4

sa na ūrje vyā3vyayaṃ pavitraṃ dhāva dhārayā . devāsaḥ śṛṇavanhi kam

9.5

pavamāno asiṣyadadrakṣāṃsyapajaṅghanat . pratnavadrocayanrucaḥ

9.6

araṅgamāya jagmaye 'paścādadhvane naraḥ

9.7

emenaṃ pratyetana somebhiḥ somapātamam . amatrebhirṛjīṣiṇamindraṃ sutebhirindubhiḥ

9.8

yadī sutebhirindubhiḥ somebhiḥ pratibhūṣatha . vedā viśvasya medhiro dhṛṣattantamideṣate

9.9

asmāasmā idandhaso 'dhvaryo pra bharā sutam . kuvitsamasya jenyasya śardhato 'bhiśasteravasvarat

9.10

apa śvānamarādhasaṃ hatā makhaṃ na bhṛgavaḥ somāya gāthamarcata

9.11

ā jāmiratke avyata bhuje na putra oṇyoḥ . sarajjāro na yoṣaṇāṃ varo na yonimāsadam hastacyutebhiradribhiḥ sutaṃ somaṃ punītana . madhāvā dhāvatā madhu

9.12

sa vīro dakṣasādhano vi yastastambha rodasī . hariḥ pavitre avyata vedhā na yonimāsadam namasedupa sīdata dadhnedabhi śrīṇītana . indumindre dadhātana

9.13

amitrahā vicarṣaṇiḥ pavasva soma śaṃ gave . devebhyo anukāmakṛt

9.14

indrāya soma pātave madāya pari ṣicyase . manaścinmanasaspatiḥ

9.15

pavamāna suvīryaṃ rayiṃ soma rirīhi naḥ . indavindreṇa no yujā

9.16

yudhedāpitvamicchase astārameṣi sūrya

9.17

na kī revantaṃ sakhyāya vindase pīyanti te surāśvaḥ . yadā kṛṇoṣi nadanuṃ samūhasyāditpiteva hūyase nava yo navatiṃ puro bibheda bāhvojasā . ahiṃ ca vṛtrahāvadhīt

9.18

sa na indraḥ śivaḥ sakhāśvāvadgomadyavamat . urudhāreva dohate

9.19

brahmayujo haraya indra keśino vahantu somapītaye vātajūto yo abhirakṣati tmanā prajāḥ piparti bahudhā vi rājati

9.20

ā tvā rathe hiraṇyaye harī mayūraśepyā . śitipṛṣṭhā vahatāṃ madhvo andhaso vivakṣaṇasya pītaye vibhrāḍ bṛhatsubhṛtaṃ vājasātamaṃ dharmaṃ divo dharuṇe satyamarpitam . amitrahā vṛtrahā dasyuhantamaṃ jyotirjajñe asurahā sapatnahā

9.21

pibā tvā3sya girvaṇaḥ sutasya pūrvapā iva . pariṣkṛtasya rasina iyamāsutiścārurmadāya patyate idaṃ śreṣṭhaṃ jyotiṣāṃ jyotiruttamaṃ viśvajiddhanajiducyate bṛhat . viśvabhrāḍ bhrājo mahi sūryo dṛśa uru paprathe saha ojo acyutam

9.22

vanaprakṣamudaprutam śikṣā ṇo asminpuruhūta yāmani jīva jyotiraśīmahi

9.23

sahasradhāraṃ vṛṣabhaṃ payoduhaṃ priyaṃ devāya janmane . ṛtena ya ṛtajāto vivāvṛdhe rājā deva ṛtaṃ bṛhat mā no ajñātā vṛjanā durādhyo3 māśivāso 'va kramuḥ . tvayā vayaṃ pravataḥ śaśvatīrapo 'ti śūra tarāmasi

9.24

samiddhaḥ śukra āhutaḥ viśvā ca no jaritR^īntsatpate ahā divā naktaṃ ca rakṣiṣaḥ

9.25

garbhe mātuḥ pituṣpitā vididyutāno akṣare . sīdannṛtasya yonimā prabhaṅgī śūro maghavā tuvīmaghaḥ sammiślo viryāya kam . ubhā te bāhū vṛṣaṇā śatakrato ni yā vajraṃ mimikṣatuḥ

9.26

brahma prajāvadā bhara jātavedo vicarṣaṇe . agne yaddīdayaddivi

9.27

sutaḥ pavitraṃ paryeti rebhanmiteva sadma paśumanti hotā sarasvantaṃ havāmahe

9.28

bhadrā vastrā samanyā ' '3 vasāno mahānkavirnivacanāni śaṃsan . ā vacyasva camvoḥ pūyamāno vicakṣaṇo jāgṛvirdevavītau

9.29

samu priyo mṛjyate sāno avye yaśastaro yaśasāṃ kṣaito asme . abhi svara dhanvā pūyamāno yūyaṃ pāta svastibhiḥ sadā naḥ

9.30

śuddhairukthairvāvṛdhvāṃsaṃ śuddhairāśīrvānmamattu sarasvatī stomyā bhūt

9.31

indra śuddho na ā gahi śuddhaḥ śuddhābhirūtibhiḥ . śuddho rayiṃ ni dhāraya śuddho mamaddhi somya

9.32

indra śuddho hi no rayiṃ śuddho ratnāni dāśuṣe . śuddho vṛtrāṇi jighnase śuddho vājaṃ siṣāsasi

9.33

devasya draviṇasyavaḥ dhiyo yo naḥ pracodayāt

9.34

agnirjuṣata no giro hotā yo mānuṣeṣvā . sa yakṣaddaivyaṃ janam somānāṃ svaraṇaṃ kṛṇuhi brahmaṇaspate . kakṣīvantaṃ ya auśijaḥ

9.35

tvamagne saprathā asi juṣṭo hotā vareṇyaḥ . tvayā yajñaṃ vi tanvate agna āyūṃṣi pavase ā suvorjaṃ iṣaṃ ca naḥ . āre bādhasva ducchunām

9.36

vanā vasāno varuṇo na sindhūrvi ratnadhā dayate vāryāṇi mahi vā kṣatraṃ deveṣu

9.37

śūragrāmaḥ sarvavīraḥ sahāvānjetā pavasva sanitā dhanāni . tigmāyudhaḥ kṣipradhanvā samatsvaṣāḍhaḥ sāhvānpṛtanāsu śatrūn ṛtamṛtena sapanteṣiraṃ dakṣamāśāte . adruhā devau vardhete

9.38

urugavyūtirabhayāni kṛṇvantsamīcīne ā pavasvā purandhī . apaḥ siṣāsannuṣasaḥ svā3rgāḥ saṃ cikrado maho asmabhyaṃ vājān vṛṣṭidyāvā rītyāpeṣaspatī dānumatyāḥ . bṛhantaṃ garttamāśāte

9.39

tvaṃ vṛtrāṇi haṃsyapratīnyeka itpurvanuttaścarṣaṇīdhṛtiḥ rocante rocanā divi

9.40

tamu tvā nūnamasura pracetasaṃ rādho bhāgamivemahe . mahīva kṛttiḥ śaraṇā ta indra pra te sumnā no aśnavan yuñjantyasya kāmyā harī vipakṣasā rathe . śoṇā dhṛṣṇū nṛvāhasā

9.41

ketuṃ kṛṇvannaketave peśo maryā apeśase . samuṣadbhirajāyathāḥ

9.42

asya yajñasya sukratum tvaṃ ha yaṃ cakṛṣe tvaṃ vavṛṣa induṃ madāya yujyāya somam

9.43

apāṃ napātaṃ subhagaṃ sudīditimagnimu śreṣṭhaśociṣam . sa no mitrasya varuṇasya so apāmā sumnaṃ yakṣate divi sa īṃ ratho na bhuriṣāḍayoji mahaḥ purūṇi sātaye vasūni . ādīṃ viśvā nahuṣyāṇi jātā svarṣātā vana ūrdhvā navanta

9.44

śuṣmī śardho na mārutaṃ pavasvānabhiśastā divyā yathā viṭ . āpo na makṣū sumatirbhavā naḥ sahasrāpsāḥ pṛtanāṣāṇna yajñaḥ

9.45

sa yantā śaśvatīriṣaḥ devebhirmānuṣe jane

9.46

na kirasya sahantya paryetā kayasya cit . vājo asti śravāyyaḥ sa no mandrābhiradhvare jihvābhiryajā mahaḥ . ā devānvakṣi yakṣi ca

9.47

sa vājaṃ viśvacarṣaṇirarvadbhirastu tarutā . viprebhirastu sanitā vetthā hi vedho adhvanaḥ pathaśca devāñjasā . agne yajñeṣu sukrato

9.48

hariḥ paryadravajjāḥ sūryasya droṇaḥ nanakṣe atyo na vājī vidathāni pracodayan

9.49

saṃ mātṛbhirna śiśurvāvaśāno vṛṣā dadhanve puruvāro adbhiḥ . maryo na yoṣāmabhi niṣkṛtaṃ yantsaṃ gacchate kalaśa usriyābhiḥ vājī vājeṣu dhīyate 'dhvareṣu pra ṇīyate . vipro yajñasya sādhanaḥ

9.50

uta pra pipya ūdharaghnyāyā indurdhārābhiḥ sacate sumedhāḥ . mūrdhānaṃ gāvaḥ payasā camūṣvabhi śrīṇanti vasubhirna niktaiḥ dhiyā cakre vareṇyo bhūtānāṃ garbhamā dadhe . dakṣasya pitaraṃ tanā

9.51

āpirno bodhi sadhamādye vṛdhe3 'smāṃ avantu te dhiyaḥ bhūyāma te sumatau vājino vayaṃ mā na starabhimātaye . asmāṃ citrābhiravatādabhiṣṭibhirā naḥ sumneṣu yāmaya

9.52

rasā dadhīta vṛṣabham

9.53

te jānata svamokyā3ṃ saṃ vatsāso na mātṛbhiḥ . mitho nasanta jāmibhiḥ

9.54

upa srakveṣu bapsataḥ kṛṇvate dharuṇaṃ divi . indre agnā namaḥ svaḥ

9.55

catvāryanyā bhuvanāni nirṇije cārūṇi cakre yadṛtairavardhata sadyo jajñāno ni riṇāti śatrūnanu yaṃ viśve madantyūmāḥ

9.56

sa bhakṣamāṇo amṛtasya cāruṇa ubhe dyāvā kāvyenā vi śaśrathe . tejiṣṭhā apo maṃhanā pari vyata yadī devasya śravasā sado viduḥ vāvṛdhānaḥ śavasā bhūryojāḥ śatrurdāsāya bhiyasaṃ dadhāti . avyanacca vyanacca sasni saṃ te navanta prabhṛtā madeṣu

9.57

te asya santu ketavo 'mṛtyavo 'dābhyāso januṣī ubhe anu . yebhirnṛmṇā ca devyā ca punata ādidrājānaṃ mananā agṛbhṇata tve kratumapi vṛñjanti viśve dviryadete trirbhavantyūmāḥ . svādoḥ svādīyaḥ svādunā sṛjā samadaḥ su madhu madhunābhi yodhīḥ

9.58

abhī naraṃ dhījavanaṃ ratheṣṭhāmabhīndraṃ vṛṣaṇaṃ vajrabāhum sa īṃ mamāda mahi karma kartave mahāmuruṃ sainaṃ saścaddevo devaṃ satya induḥ satyamindram

9.59

abhi vastrā suvasanānyarṣābhi dhenūḥ sudughāḥ pūyamānaḥ . abhi candrā bharttave no hiraṇyābhyaśvānrathino deva soma sākaṃ jātaḥ kratunā sākamojasā vavakṣitha sākaṃ vṛddho vīryaiḥ sāsahirmṛdho vicarṣaṇiḥ . dātā rādha stuvate kāmyaṃ vasu pracetana sainaṃ saścaddevo devaṃ satya induḥ satyamindram

9.60

abhī no arṣa divyā vasūnyabhi viśvā pārthivā pūyamānaḥ . abhi yena draviṇamaśnavāmābhyārṣeyaṃ jamadagnivannaḥ adha tviṣīmāṃ abhyojasā kṛviṃ yudhābhavadā rodasī apṛṇadasya majmanā pra vāvṛdhe . adhattānyaṃ jaṭhare premaricyata pra cetaya sainaṃ saścaddevo devaṃ satya induḥ satyamindram

9.61

tatpṛthivīmaprathayastadastabhnā uto divam

9.62

tatte yajño ajāyata tadarka uta haskṛtiḥ . tadviśvamabhibhūrasi yajjātaṃ yacca jantvam

9.63

āmāsu pakvamairaya ā sūryaṃ rohayo divi . gharmaṃ na sāmaṃ tapatā suvṛktibhirjuṣṭaṃ girvaṇase bṛhat

9.64

vṛṣā te vṛṣṇa indurvājī sahasrasātamaḥ

9.65

ā naste gantu matsaro vṛṣā mado vareṇyaḥ . sahāvāṃ indra sānasiḥ pṛtanaṣāḍamartyaḥ

9.66

tvaṃ hi śūraḥ sanitā codayo manuṣo ratham . sahāvāndasyumavratamoṣaḥ pātraṃ na śociṣā