The eight prakṛtis (productive principles)

Tats_1

aṣṭau prakṛtayaḥ ||

Tats_1.c1

prakṛtirbuddhyahaṃkārau tanmātraikādaśendriyam / bhūtāni ceti sāmānyāccaturviṃśatireva te //

Tats_1.c2

eteṣveva dharmadharmyabhedena guṇakarmasāmānyānāmantarbhāvaḥ | prakṛtitvaṃ ca sākṣātparamparayākhilavikāropādānatvam | vyutpattistu prakṛṣṭā pariṇāmarūpā ākṛtirasyā iti | sā ca sāmyāvasthayopalakṣitasattvādidravyatrayarūpā |

Tats_1.c3

sāmyāvasthā ca śāntaghoramūḍhādirūpāṇāmapi asamudāyavadrūpatvepi atiśayaiḥ samudāyavadbhiravirodhena vartamānatvaṃ sāmānyātmanā guṇabhāvo 'tiśayātmanā prādhānyaṃ viśeṣātmanā vaiṣamyamityato nyūnādhikabhāvenāsaṃhatāvasthā 'kāryāvastheti yāvat |

Tats_1.c4

mahadādikaṃ tu kāryasattvādikaṃ na kadāpyakāryāvasthaṃ bhavatīti tadvyāvṛttiḥ | vaiṣamyāvasthāyāmapi prakṛtitvasiddhaye upalakṣitamityuktaṃ sattvādiguṇavatī prakṛtiḥ sattvādyanatiriktatvāt tathā ca sūtraṃ sattvādīnāmataddharmatvaṃ tadrūpatvāditi sattvādīnāṃ prakṛtisvarūpatvaṃ na tu prakṛtidharmatvam |

Tats_1.c5

guṇebhya eva sarvakāryopapattau tadanyaprakṛtikalpanāvaiyarthyāt | sūtrabhāṣyābhyāmapi tathoktatvāt |

Tats_1.c6

yattu prakṛterguṇā itivat vanasya vṛkṣā itivat vyaṣṭisamaṣṭyabhiprāyeṇeti sattvaṃ rajastama iti prakṛterabhavan guṇā iti ca na sattvādīnāṃ prakṛtikāryatvavacanaṃ guṇanityatāvākyavirodhena mahattattvakāraṇībhūtakāryasattvādiparam |

Tats_1.c7

mahadādisṛṣṭirguṇavaimyāt | tacca sajātīyasaṃvalanena guṇāntaravyāvṛttaprakāśādiphalopahitaḥ sattvādivyavahārayogyaḥ pariṇāma iti sattvādivyavahāro vaiṣamya evetyāha śrutiḥ yathā tama evedamagra āsīt tatpare syāt pareṇeritaṃ viṣamatvaṃ pratyayādvai rajaso rūpaṃ tadrajaḥ khalvīritaṃ viṣamatvaṃ pratyayādvai sattvasya rūpamiti

Tats_1.c8

sattvāditrayaṃ ca sattvādisvarūpamiti sattvāditrayaṃ ca sukhaprakāśalāghavaprasādādiguṇakatayā saṃyogavibhāgādimattayānāśritatvopādānatvādinā dravyatve 'pi puruṣopakāratvāt puruṣabandhakatvācca guṇaśabdenocyate indriyādivat

Tats_1.c9

guṇānāṃ sukhaduḥkamohātmakapravādastu dharmadharmyabhedāt manasaḥ saṅkalpātmakatvavat tatra sattvaṃ sukhaprasādaprakāśādyanekadharmakamapi pradhānatastu sukhātmakamucyate | evaṃ rajo 'pi duḥkhakāluṣyapravṛtyādyanekadharmakaṃ prādhānyatastu duḥkhātmakamucyate | evaṃ tamo 'pi mohāvaraṇastambhanādyanekadharmakaṃ prādhānyatastu mohātmakamucyate |

Tats_1.c10

sato bhāvaḥ sattvaṃ dharmaprādhānyenottamaṃ puruṣopakaraṇaṃ rāgayogādrajo madhyamam | tamodharmāvaraṇayogādadhamaṃ sattvādīnyasaṃkhyavyaktayaḥ pratikṣaṇapariṇāmitvāt laghutvādidharmairanyonyaṃ sādharmyaṃ vaidharmyaṃ ca guṇānāmasaṃkhyātamiti sūtrāt |

Tats_1.c11

ekadānekapuruṣādisṛṣṭiśravaṇācca ekaikavyaktitve vibhutvaṃ syāt tathā ca saṃyogavaicitryābhāvādanantavaicitryaṃ kāryāṇāṃ na syāt | dravyāntarasyāvacchedakībhūtasyābhāvācca |

Tats_1.c12

tasmādasaṃkhyātānyeva sattvādīni tritvakathanaṃ tu vibhājakopādhitrayeṇaiva vaiśeṣikāṇāṃ navadravyavacanavat sattvādīni ca yathāyogyamaṇuvibhuparimāṇakāni itarathā rajasaścalasvabhāvatvavacananirodhaḥ syāt | ākāśakāraṇasya vibhutvaucityāt sarvakāraṇadravyavibhutve kāryaparicchedāsambhava iti ||

Tats_1.c13

śabdasparśavihīnaṃ tadrūpādibhirasaṃhatam / triguṇaṃ tajjagadyoniranādiprabhavāpyayam //

Tats_1.c14

ityādyukterna paramāṇvādāvantarbhāvaḥ prakṛteriti / athaivamapi prakṛteraṇuvibhusādhāraṇasattvādyanekavyaktirūpatve aparicchinnatvaikatvākriyatvasaiddhāntakṣatiriti cenna kāraṇadravyatvasvarūpaprakṛtitvenaivāparicchinnatvavacanādgandhatvena gandhānāṃ pṛthivīvyāpakatāvat ākāśādiprakṛtīnāṃ vibhutvenaiva prakṛtivibhutvasiddhāntopapatteśca |

Tats_1.c15

tathā puruṣabhedena sargabhedena ca bhedābhāvasyaiva ekaśabdārthatvāt | ajāmekāmitiśrutestathāvagamāt | tathādhyavasāyo 'bhimānādikriyārāhityasyaivākriyaśabdārthatvādityanyathā śrutismṛtityuktasya prakṛtikṣobhasyānupapatteriti |

Tats_1.c16

tatrāyaṃ prayogaḥ sukhaduḥkhamohātmakamahadādikāryaṃ sukhaduḥkhamohātmakadravyakāryaṃ sukhaduḥkhamohātmakatvāt vastrādikāryaśayyāvaditi prakṛtau pramāṇam | bāhyavastuṣu sukhādikamuttamatvādikameva ghaṭarūpamitivaccandanasukhaṃ strīsukhamityādipratyayācceti dik |

Tats_1.c17

avyaktabuddhyahaṅkārāstanmātrāṇāṃ ca pañcakam / aṣṭau prakṛtayastvetāḥ sapta ca vyaktatāmiyāt //

Tats_1.c18

avyaktaprakṛtijanyatvāt avyaktānīti cocyate / vyajyante ca yathā loke ghaṭādyā na tathā hi tat //

Tats_1.c19

avyaktaṃ prakṛtirmāyā pradhānaṃ brahma kāraṇam / avyākṛtaṃ tamaḥpuṣpaṃ kṣetramakṣaranāmakam //

Tats_1.c20

bahudhātmakādināmāni tasyāmī te jagurbudhāḥ / vyajyate nendriyairyasmādavyaktamata ucyate / anādimadhyanidhanānniraṅgatvena tat tathā //

Tats_1.c21

tadevāha śrutiḥ | aśabdamasparśamarūpamavyayaṃ yathā ca nityaṃ rasagandhavarjitam / anādimadhyaṃ mahataḥ paraṃ dhruvam pradhānametat pravadanti sūrayaḥ // iti

Tats_1.c22

tasmādaliṅgakaṃ sūkṣmaṃ tathā prasavadharmikam / ekaṃ sādhāraṇaṃ tatra kāryaṃ kasyāpi netare //

Tats_1.c23

buddhirmahān mano brahmā matiḥ khyātirapūrvakam / prajñā bhūtirdhṛtirjñānaṃ santatiḥ smṛtirityapi //

Tats_1.c24

hairaṇyagarbhyā buddhestu mahato nāma sūcitam / guṇebhyaḥ kṣobhyamāṇebhyastrayo vedā vijajñire //

Tats_1.c25

ekā mūrttistrayo devā brahmaviṣṇumaheśvarāḥ / iti viṣṇurevādisargeṣu svayaṃbhūrbhavati prabhuḥ //

Tats_1.c26

atra sattvādyaṃśatrayeṇa mahato devatātrayopādhitvāttadavivekena tisra iti | sāttvikāṃśāt pradhānāt tu mahattattvamajāyata iti mahattvasya prādhānyena cādhyavasāyo vṛttirmahadahaṃkāramanastritayātmakasyāntaḥkaraṇavṛkṣasya mahattattvaṃ bījāvasthā taduktaṃ sāṃkhyasūtre idameva mahattattvamaṃśato rajastamaḥsaṃbhedena pariṇataṃ sat vyaṣṭijīvānāmupādhiradharmādiyuktaṃ kṣudramapi bhavati mahaduparāgādviparītamiti |

Tats_1.c27

mahatastriguṇasvarūpatvāddehasya dehinā kālarūpaviṣṇunā kṣobhyadaśāyāṃ guṇarūpopādhiprādhānyādaviveke brahmaviṣṇuśivatvaṃ tatra mahān suṣuptyabhimānī śivastadupādhistamaḥkāryarūpī tatra svapnābhimānī viṣṇustadupādhiḥ kāryasattvaṃ tatra jāgradabhimānī brahmā tadupādhiḥ kāryarajaḥ tatra samudāyasamunnayananyāyena samaṣṭervyaṣṭyananyatvānmaśakādirapi viṣṇureveti bhāvaḥ |

Tats_1.c28

sṛṣṭistu mahadādikrameṇaiva na tu bhūtādikrameṇeti || sā ca kaurme bhūtādistu vikurvāṇaḥ śabdamātraṃ sasarja ha / ākāśasuṣiraṃ tasmādutpannaṃ śabdalakṣaṇam //

Tats_1.c29

ākāśaṃ tu vikurvāṇaḥ sparśamātraṃ sasarja ha / vāyurutpadyate tasmāttasya sparśo guṇo mataḥ // ityādi

Tats_1.c30

nanvevaṃ cedākāśādīnāṃ kevalaṃ vikṛtitvaṃ kathaṃ tatra ākāśādīnāṃ sparśāditanmātreṣu ahaṃkāropaṣṭambhamātreṇa kāraṇatvasya purāṇādiṣūktatvāt |

Tats_1.c31

na pumān sthāṇurevāyaṃ buddhiradhyavasāyinī / puruṣādhiṣṭhitāt sarvagatājjātā pradhānatā //

Tats_1.c32

cicchaktiryādṛśī tādṛg vṛttiḥ sattvavimiśritā / rajoguṇasvarūpā yat trivṛtkaraṇataḥ śruteḥ //

Tats_1.c33

jñānaṃ dharmaśca vairāgyamaiśvaryaṃ sattvato hyamī / anaiśvaryamavairāgyamadharmo 'jñānameva tu //

Tats_1.c34

tamasaścāpi te jñeyā buddherbhedā itīritāḥ / jñānaṃ tattvāvabodho 'yaṃ dharmaḥ śrutyuktapālanam //

Tats_1.c35

vairāgyamarthānāsaktiraiśvaryamaṇimādikam / tattadviparyayeṇaiva tāmasaṃ taccatuṣṭayam //

Tats_1.c36

jñānena mokṣo dharmeṇa gatirūrdhvā bhavediti / vairāgyenākṣaralaya aiśvaryeṇāhatā gatiḥ //

Tats_1.c37

evameṣāṣṭadhā śaktirvyākhyātā buddhisañjñitā / pradhānavikṛtistveṣāhaṃkāraprakṛtiśca sā //

Tats_1.c38

mūlaprakṛtirityādi kavibhiśca nirūpitam / eko 'haṃkāra ityetajjijñāsā cedvibhāvaya //

Tats_1.c39

yo 'haṃśabdaṃ karotyeṣa abhimāna iti smṛtaḥ / spṛśe 'haṃ rasaye vāhaṃ svāmī cāhaṃ mayā hṛtaḥ //

Tats_1.c40

ityādi nāma yasyāsīttasya bhedā amī śṛṇu / vaikārikastaijasopi bhūtādiḥ sānumānakaḥ //

Tats_1.c41

niranumānaśca pañcaite bhedāstasya prakīrttitāḥ / vaikārikaḥ sāttviko 'yaṃ bhūtādistāmasaḥ smṛtaḥ //

Tats_1.c42

taijaso rājaso jñeyastasmāt tanmātrapañcakam / ekādaśendriyagaṇaḥ sāttvikādabhijāyate //

Tats_1.c43

devatāstvabhimāninyastaijasādapi cocyate / tadeva kathamevaṃ cet trivṛtkaraṇahetutaḥ //

Tats_1.c44

śabdatanmātramityetat śabda evopalabhyate / na tūdāttaniṣādādibhedastasyopalabhyate //

Tats_1.c45

sparśatanmātramevaitat sparśa evopalabhyate / na tu śītamṛdutvādiviśeṣastasya labhyate //

Tats_1.c46

rūpatanmātramevaṃ vai rasatanmātramapyatha / gandhatanmātrameteṣu viśeṣo nopalabhyate //

Tats_1.c47

tanmātrāṇyaviśeṣāṇi sūkṣmabhūtāni cocyate / bhogyāni śāntaghorāni prakṛtyā 'ṇava eva ca //

Tats_1.c48

kurvadrūpāt prakṛtayaḥ saṃkhyayā 'ṣṭau prakīrttitāḥ //