Prapāṭhaka 5

5.1

gṛṇe tadindra te śava upamāṃ devatātaye . yaddhaṃsi vṛtramojasā śacīpate

5.2

yasya tyacchambaraṃ made divodāsāya randhayan . ayaṃ sa soma indra te sutaḥ piba

5.3

endra no gadhi priya satrājidagohya . girirna viśvataḥ pṛthuḥ patirdivaḥ

5.4

ya indra somapātamo madaḥ śaviṣṭha cetati . yenā haṃsi nyā3triṇaṃ tamīmahe

5.5

tuce tunāya tatsu no drādhīya āyurjīvase . ādityāsaḥ samahasaḥ kṛṇotana

5.6

vetthā hi nirṛtīnāṃ vajrahasta parivṛjam . aharahaḥ śundhyuḥ paripadāmiva

5.7

apāmīvāmapa stridhamapa sedhata durmatim . ādityāso yuyotanā no aṃhasaḥ

5.8

pibā somamindra mandatu tvā yaṃ te suṣāva haryaśvādriḥ . soturbāhubhyāṃ suyato nārvā

5.9

yudhedāpitvamicchase

5.10

yo na idamidaṃ purā pra vasya ānināya tamu va stuṣe . sakhāya indramūtaye

5.11

ā gantā mā riṣaṇyata prasthāvāno māpa sthāta samanyavaḥ . dṛḍhā cidyamayiṣṇavaḥ

5.12

ā yāhyayamindave 'śvapate gopate urvarāpate . somaṃ somapate piba

5.13

tvayā ha svidyujā vayaṃ prati śvasantaṃ vṛṣabha bruvīmahi . saṃsthe janasya gomataḥ

5.14

gāvaściddhā samanyavaḥ sajātyena marutaḥ sabandhavaḥ . rihate kakubho mithaḥ

5.15

tvaṃ na indrā bhara ojo nṛmṇaṃ śatakrato vicarṣaṇe . ā vīraṃ pṛtanāsaham

5.16

adhā hīndra girvaṇa upa tvā kāma īmahe sasṛgmahe . udeva gmanta udabhiḥ

5.17

sīdantaste vayo yathā gośrīte madhau madire vivakṣaṇe . abhi tvāmindra nonumaḥ

5.18

vayamu tvāmapūrvya sthūraṃ na kaccidbharanto 'vasyavaḥ . vajriñcitraṃ havāmahe

5.19

yā indreṇa sayāvarīrvṛṣṇā madanti śobhathā vasvīranu svarājyam

5.20

itthā hi soma inmado brahma cakāra vardhanam . śaviṣṭha vajrinnojasā pṛthivyā niḥ śaśā ahimarcannanu svarājyam

5.21

indro madāya vāvṛdhe śavase vṛtrahā nṛbhiḥ . taminmahatsvājiṣūtimarbhe havāmahe sa vājeṣu pra no 'viṣat

5.22

indra tubhyamidadrivo 'nuttaṃ vajrinvīryam . yaddha tyaṃ māyinaṃ mṛgaṃ tava tyanmāyayāvadhīrarcannanu svarājyam

5.23

prehyabhīhi dhṛṣṇuhi na te vajro ni yaṃsate . indra nṛmṇaṃ hi te śavo hano vṛtraṃ jayā apo 'rcannanu svarājyam

5.24

yadudīrata ājayo dhṛṣṇave dhīyate dhanam . yuṅkṣvā madacyutā harī kaṃ hanaḥ kaṃ vasau dadho 'smāṃ indra vasau dadhaḥ

5.25

akṣannamīmadanta hyava priyā adhūṣata . astoṣata svabhānavo viprā naviṣṭhayā matī yojā nvindra te harī

5.26

upo ṣu śṛṇuhī giro maghavanmātathā iva . kadā naḥ sūnṛtāvataḥ kara idarthayāsa idyojā nvindra te harī

5.27

candramā apsvā3ntarā suparṇo dhāvate divi . na vo hiraṇyanemayaḥ padaṃ vindanti vidyuto vittaṃ me asya rodasī

5.28

prati priyatamaṃ rathaṃ vṛṣaṇaṃ vasuvāhanam . stotā vāmaśvināvṛśi stomebhirbhūṣati prati mādhvī mama śrutaṃ havam

5.29

yuddha syā te panīyasī samiddīdayati dyavīṣaṃ stotṛbhya ā bhara

5.30

āgniṃ na svavṛktibhirhotāraṃ tvā vṛṇīmahe . śīraṃ pāvakaśociṣaṃ vi vo made yajñeṣu stīrṇabarhiṣaṃ vivakṣase

5.31

mahe no adya bodhayoṣo rāye divitmatī . yathā cinno abodhayaḥ satyaśravasi vāyye sujāte aśvasūnṛte

5.32

bhadraṃ no api vātaya mano dakṣamuta kratum . athā te sakhye andhaso vi vo made raṇā gāvo na yavase vivakṣase

5.33

kratvā mahāṃ anuṣvadhaṃ bhīma ā vāvṛte śavaḥ . śriya ṛṣva upākayorni śiprī harivāṃ dadhe hastayorvajramāyasam

5.34

sa ghā taṃ vṛṣaṇaṃ rathamadhi tiṣṭhāti govidam . yaḥ pātraṃ hāriyojanaṃ pūrṇamindrā ciketati yojā nvindra te harī

5.35

agniṃ taṃ manye yo vasurastaṃ yaṃ yanti dhenavaḥ . astamarvanta āśavo 'staṃ nityāso vājina iṣaṃ stotṛbhya ā bhara

5.36

na tamaṃho na duritaṃ devāso aṣṭa martyam . sajoṣaso yamaryamā mitro nayati varuṇo ati dviṣaḥ

5.37

paryū ṣu pra dhanva vājasātaye pari vṛtrāṇi sakṣaṇiḥ . dviṣastaradhyā ṛṇayā na īrase

5.38

pavasva soma mahāntsamudraḥ pitā devānāṃ viśvābhi dhāma

5.39

pavasva soma mahe dakṣāyāśvo na nikto vājī dhanāya

5.40

induḥ paviṣṭa cārurmadāyāpāmupasthe kavirbhagāya

5.41

anu hi tvā sutaṃ soma madāmasi mahe samaryarājye . vājāṃ abhi pavamāna pra gāhase

5.42

ka īṃ vyaktā naraḥ sanīḍā rudrasya maryā atha svaśvāḥ

5.43

agne tamadyāśvaṃ na stomaiḥ kratuṃ na bhadraṃ hṛdispṛśam . ṛdhyāmā ta ohaiḥ

5.44

āvirmaryā ā vājaṃ vājino agmaṃ devasya savituḥ savam . svargāṃ arvanto jayata

5.45

pavasva soma dyumnī sudhāro mahāṃ avīnāmanupūrvyaḥ

5.46

viśvatodāvanviśvato na ā bhara yaṃ tvā śaviṣṭhamīmahe

5.47

eṣa brahmā ya ṛtviya indro nāma śruto gṛṇe

5.48

brahmāṇa indraṃ mahayanto arkairavardhayannahaye hantavā u

5.49

anavaste rathamaśvāya takṣustvaṣṭā vajraṃ puruhūta dyumantam

5.50

śaṃ padaṃ maghaṃ rayīṣiṇo na kāmamavrato hinoti na spṛśadrayim

5.51

sadā gāvaḥ śucayo viśvadhāyasaḥ sadā devā arepasaḥ

5.52

ā yāhi vanasā saha gāvaḥ sacanta varttaniṃ yadūdhabhiḥ

5.53

upa prakṣe madhumati kṣiyantaḥ puṣyema rayiṃ dhīmahe ta indra

5.54

arcantyarkaṃ marutaḥ svarkkā ā stobhati śruto yuvā sa indraḥ

5.55

pra va indrāya vṛtrahantamāya viprāya gāthaṃ gāyata yaṃ jujoṣate

5.56

agne tvaṃ no antama uta trātā śivo bhuvo varūthyaḥ

5.57

bhago na citro agnirmahonāṃ dadhāti ratnam

5.58

viśvasya pra stobha puro vā sanyadi veha nūnam

5.59

uṣā apa svasuṣṭamaḥ saṃ varttayati varttaniṃ sujātatā

5.60

imā nu kaṃ bhuvanā sīṣadhemendraśca viśve ca devāḥ

5.61

vi srutayo yathā patha indra tvadyantu rātayaḥ

5.62

ayā vājaṃ devahitaṃ sanema madema śatahimāḥ suvīrāḥ

5.63

ūrjā mitro varuṇaḥ pinvateḍāḥ pīvarīmiṣaṃ kṛṇuhī na indra

5.64

indro viśvasya rājati

5.65

sa īṃ mamāda mahi karma karttave mahāmuruṃ sainaṃ saścaddevo devaṃ satya induḥ satyamindram

5.66

ayaṃ sahasramānavo dṛśaḥ kavīnāṃ matirjyotirvidharma . bradhnaḥ samīcīruṣasaḥ samairayadarepasaḥ socetasaḥ svasare manyumantaścitā goḥ

5.67

endra yāhyupa naḥ parāvato nāyamacchā vidathānīva satpatirastā rājeva satpatiḥ . havāmahe tvā prayasvantaḥ suteṣvā putrāso na pitaraṃ vājasātaye maṃhiṣṭhaṃ vājasātaye

5.68

tamindraṃ johavīmi maghavānamugraṃ satrā dadhānamapratiṣkutaṃ śravāṃsi bhūriḥ . maṃhiṣṭho gīrbhirā ca yajñiyo vavartta rāye no viśvā supathā kṛṇotu vajrī

5.69

astu śrauṣṭpuro agniṃ dhiyā dadha ā nu tyacchardho divyaṃ vṛṇīmaha indravāyū vṛṇīmahe . yaddha krāṇā vivasvate nābhā sandāya navyase . adha pra nūnamupa yanti dhītayo devāṃacchā na dhītayaḥ

5.70

pra vo mahe matayo yantu viṣṇave marutvate girijā evayāmarut . pra śardhāya pra yajyave sukhādaye tavase bhandadiṣṭaye dhunivratāya śavase

5.71

ayā rucā hariṇyā punāno viśvā dveṣāṃsi tarati sayugvabhiḥ sūro na sayugvabhiḥ . dhārā pṛṣṭhasya rocate punāno aruṣo hariḥ . viśvā yadrūpā pariyāsyṛkvabhiḥ saptāsyebhirṛkvabhiḥ

5.72

abhi tyaṃ devaṃ savitāramoṇyoḥ kavikratumarcāmi satyasavaṃ ratnadhāmabhi priyaṃ matim ūrdhvā yasyāmatirbhā adidyutatsavīmani hiraṇyapāṇiramimīta sukratuḥ kṛpā svaḥ

5.73

agniṃ hotāraṃ manye dāsvantaṃ vasoḥ sūnuṃ sahaso jātavedasaṃ vipraṃ na jātavedasam . ya ūrdhvayā svadhvaro devo devācyā kṛpā . ghṛtasya vibhrāṣṭimanu śukraśociṣa ājuhvānasya sarpiṣaḥ

5.74

tava tyannaryaṃ nṛto 'pa indra prathamaṃ pūrvyaṃ divi pravācyaṃ kṛtam . yo devasya śavasā prāriṇā asu riṇannapaḥ . bhuvo viśvamabhyadevamojasā videdūrjaṃ śatakraturvidediṣam

5.75

uccā te jātamandhaso divi sadbhūmyā dade . ugraṃ śarma mahi śravaḥ

5.76

svādiṣṭhayā madiṣṭhayā pavasva soma dhārayā . indrāya pātave sutaḥ

5.77

vṛṣā pavasva dhārayā marutvate ca matsaraḥ . viśvā dadhāna ojasā

5.78

yaste mado vareṇyastenā pavasvāndhasā . devāvīraghaśaṃsahā

5.79

tisro vāca udīrate gāvo mimanti dhenavaḥ . harireti kanikradat

5.80

indrāyendo marutvate pavasva madhumattamaḥ . arkasya yonimāsadam

5.81

asāvyaṃśurmadāyāpsu dakṣo giriṣṭhāḥ . śyeno na yonimāsadat

5.82

pavasva dakṣasādhano devebhyaḥ pītaye hare . marudbhyo vāyave madaḥ

5.83

pari svāno giriṣṭhāḥ pavitre somo akṣarat . madeṣu sarvadhā asi

5.84

pari priyā divaḥ kavirvayāṃsi naptyorhitaḥ . svānairyāti kavikratuḥ

5.85

sutā vidathe akramuḥ

5.86

pra somāso vipaścito 'po nayanta ūrmayaḥ . vanāni mahiṣā iva

5.87

pavasvendo vṛṣā sutaḥ kṛdhī no yaśaso jane . viśvā apa dviṣo jahi

5.88

vṛṣā hyasi bhānunā dyumantaṃ tvā havāmahe . pavamāna svardṛśam

5.89

induḥ paviṣṭa cetanaḥ priyaḥ kavīnāṃ matiḥ . sṛjadaśvaṃ rathīriva

5.90

asṛkṣata pra vājino gavyā somāso aśvayā . śukrāso vīrayāśavaḥ

5.91

pavasva deva āyuṣagindraṃ gacchatu te madaḥ . vāyumā roha dharmaṇā

5.92

pavamāno ajījanaddivaścitraṃ na tanyatum . jyotirvaiśvānaraṃ bṛhat

5.93

pari svānāsa indavo madāya barhaṇā girā . madho arṣanti dhārayā

5.94

pari prāsiṣyadatkaviḥ sindhorūrmāvadhi śritaḥ . kāruṃ bibhratpuruspṛham