Prapāṭhaka 6

6.1

upo ṣu jātamapturaṃ gobhirbhaṅgaṃ pariṣkṛtam . induṃ devā ayāsiṣuḥ

6.2

punāno akramīdabhi viśvā mṛdho vicarṣaṇiḥ . śumbhanti vipraṃ dhītibhiḥ

6.3

āviśankalaśaṃ suto viśvā arṣannabhi śriyaḥ . indurindrāya dhīyate

6.4

asarji rathyo yathā pavitre camvoḥ sutaḥ . kārṣmanvājī nyakramīt

6.5

pra yadgāvo na bhūrṇayastveṣā ayāso akramuḥ . ghnantaḥ kṛṣṇāmapa tvacam

6.6

apaghnanpavase mṛdhaḥ kratuvitsoma matsaraḥ . nudasvādevayuṃ janam

6.7

ayā pavasva dhārayā yayā sūryamarocayaḥ . hinvāno mānuṣīrapaḥ

6.8

sa pavasva ya āvithendraṃ vṛtrāya hantave . vavrivāṃsaṃ mahīrapaḥ

6.9

ayā vītī pari srava yasta indo madeṣvā . avāhannavatīrnava

6.10

pari dyukṣaṃ sanadrāyiṃ bharadvājaṃ no andhasā . svāno arṣa pavitra ā

6.11

saṃ sūryeṇa didyute

6.12

ā te dakṣaṃ mayobhuvaṃ vahnimadyā vṛṇīmahe . pāntamā puruspṛham

6.13

adhvaryo adribhiḥ sutaṃ somaṃ pavitra ā naya . punīhīndrāya pātave

6.14

taratsa mandī dhāvati dhārā sutasyāndhasaḥ . taratsa mandī dhāvati

6.15

ā pavasva sahasriṇaṃ rayiṃ soma suvīryam . asme śravāṃsi dhāraya

6.16

anu pratnāsa āyavaḥ padaṃ navīyo akramuḥ . ruce jananta sūryam

6.17

arṣā soma dyumattamo 'bhi droṇāni roruvat . sīdanyonau yoneṣvā

6.18

vṛṣā soma dyumāṃ asi vṛṣā deva vṛṣavrataḥ . vṛṣā dharmāṇi dadhriṣe

6.19

iṣe pavasva dhārayā mṛjyamāno manīṣibhiḥ . indo rucābhi gā ihi

6.20

mandrayā soma dhārayā vṛṣā pavasva devayuḥ . avyo vārebhirasmayuḥ

6.21

ayā soma sukṛtyapā mahāntsannabhyavardhathāḥ . hindāna idvṛṣāyase

6.22

ayaṃ vicarṣaṇirhitaḥ pavamānaḥ sa cetati . hinvāna āpyaṃ bṛhat

6.23

pra ṇa indo mahe tu na ūrmiṃ na bibhradarṣasi . abhi devāṃ ayāsyaḥ

6.24

apaghnanpavate mṛdho 'pa somo arāvṇaḥ . gacchannindrasya niṣkṛtam

6.25

ā ratnadhā yonimṛtasya sīdasyutso devo hiraṇyayaḥ

6.26

parīto ṣiñcatā sutaṃ somo ya uttamaṃ haviḥ . dadhanvāṃ yo naryo apsvā3ntarā suṣāva somamadribhiḥ

6.27

ā soma svāno adribhistiro vārāṇyavyayā . jano na puri camvorviśaddhariḥ sado vaneṣu dadhriṣe

6.28

pra soma devavītaye sindhurna pipye arṇasā . aṃśoḥ payasā madiro na jāgṛviracchā kośaṃ madhuścutam

6.29

soma u ṣvāṇaḥ sotṛbhiradhi ṣṇubhiravīnām . aśvayeva haritā yāti dhārayā mandrayā yāti dhārayā

6.30

tavāhaṃ soma rāraṇa sakhya indo divedive . purūṇi babhro ni caranti māmava paridhīṃrati tāṃ ihi

6.31

mṛjyamānaḥ suhastyā samudre vācaminvasi . rayiṃ piśaṅgaṃ bahulaṃ puruspṛhaṃ pavamānābhyarṣasi

6.32

abhi somāsa āyavaḥ pavante madyaṃ madam . samudrasyādhi viṣṭape manīṣiṇo matsarāso madacyutaḥ

6.33

punānaḥ soma jāgṛviravyā vāraiḥ pari priyaḥ . tvaṃ vipro abhavo 'ṅgirastama madhvā yajñaṃ mimikṣa ṇaḥ

6.34

indrāya pavate madaḥ somo marutvate sutaḥ . sahasradhāro atyavyamarṣati tamī mṛjantyāyavaḥ

6.35

pavasva vājasātamo 'bhi viśvāni vāryā . tvaṃ samudraḥ prathame vidharmaṃ devebhyaṃ soma matsaraḥ

6.36

pavamānā asṛkṣata pavitramati dhārayā . marutvanto matsarā indriyā hayā medhāmabhi prayāṃsi ca

6.37

aśvaṃ na tvā vājinaṃ marjayanto 'cchā barhī raśanābhirnayanti

6.38

pra kāvyamuśaneva bruvāṇo devo devānāṃ janimā vivakti . mahivrataḥ śucibandhuḥ pāvakaḥ padā varāho abhyeti rebhan

6.39

tisro vāca īrayati pra vahnirṛtasya dhītiṃ brahmaṇo manīṣām . gāvo yanti gopatiṃ pṛcchamānāḥ somaṃ yanti matayo vāvaśānāḥ

6.40

asya preṣā hemanā pūyamāno devo devebhiḥ samapṛkta rasam . sutaḥ pavitraṃ paryeti rebhanmiteva sadma paśumanti hotā

6.41

somaḥ pavate janitā matīnāṃ janitā divo janitā pṛthivyāḥ . janitāgnerjanitā sūryasya janitendrasya janitota viṣṇoḥ

6.42

abhi tripṛṣṭhaṃ vṛṣaṇaṃ vayodhāmāṅgoṣiṇamavāvaśanta vāṇīḥ . vanā vasāno varuṇo na sindhūrvi ratnadhā dayate vāryāṇi

6.43

akrāntsamudraḥ prathame vidharmaṃ janayanprajā bhuvanasya gopāḥ . vṛṣā pavitre adhi sāno avye bṛhatsomo vāvṛdhe svāno adriḥ

6.44

kanikranti harirā sṛjyamānaḥ sīdanvanasya jaṭhare punānaḥ . nṛbhiryataḥ kṛṇute nirṇijaṃ gāmato matiṃ janayata svadhābhiḥ

6.45

eṣa sya te madhumāṃ indra somo vṛṣā vṛṣṇaḥ pari pavitre akṣāḥ

6.46

pavasva soma madhumāṃ ṛtāvāpo vasāno adhi sāno avye . ava droṇāni ghṛtavanti roha madintamo matsara indrapānaḥ

6.47

bhadrānkṛṇvannindrahavāntsakhibhya ā somo vastrā rabhasāni datte

6.48

pra te dhārā madhumatīrasṛgranvāraṃ yatpūto atyeṣyavyam . pavamāna pavase dhāma gonāṃ janayantsūryamapinvo arkaiḥ

6.49

pra gāyatābhyarcāma devāntsomaṃ hinota mahate dhanāya . svāduḥ pavatāmati vāramavyamā sīdatu kalaśaṃ deva induḥ

6.50

pra hinvāno janitā rodasyo ratho na vājaṃ saniṣannayāsīt . indraṃ gacchannāyudhā saṃśiśāno viśvā vasu hastayorādadhānaḥ

6.51

takṣadyadī manaso venato vāgjyeṣṭhasya dharmaṃ dyukṣoranīke . ādīmāyanvaramā vāvaśānā juṣṭaṃ patiṃ kalaśe gāva indum

6.52

sākamukṣo marjayanta svasāro daśa dhīrasya dhītayo dhanutrīḥ . hariḥ paryadravajjāḥ sūryasya droṇaṃ nanakṣe atyo na vājī

6.53

adhi yadasminvājinīva śubhaḥ spardhante dhiyaḥ sūre na viśaḥ . apo vṛṇānaḥ pavate kavīyanvrajaṃ na paśuvardhanāya manma

6.54

indurvājī pavate gonyoghā indre somaḥ saha invanmadāya . hanti rakṣo bādhate paryarātiṃ varivaskṛṇvanvṛjanasya rājā

6.55

ayā pavā pavasvainā vasūni māṃścatva indro sarasi pra dhanva . braghnaścidyasya vāto na jūtiṃ purumedhāścittakave naraṃ dhāt

6.56

mahattatsomo mahiṣaścakārāpāṃ yadgarbho 'vṛṇīta devān . adadhādindre pavamāna ojo 'janayatsūrye jyotirinduḥ

6.57

asarji vakvā rathyo yathājau dhiyā manotā prathamā manīṣa . daśa svasāro adhi sāno avye mṛjanti vahniṃ sadaneṣvaccha

6.58

apāmivedūrmayastartturāṇāḥ pra manīṣā īrate somamaccha . namasyantīrupa ca yanti saṃ cāca viśantyuśatīruśantam

6.59

purojitī vo andhasaḥ sutāya mādayitnave . apa śvānaṃ śnathiṣṭana sakhāyo dīrghajihvyam

6.60

ayaṃ pūṣā rayirbhagaḥ somaḥ punāno arṣati . patirviśvasya bhūmano vyakhyadrodasī ubhe

6.61

sutāso madhumattamāḥ somā indrāya mandinaḥ . pavitravanto akṣarandevāngacchantu vo madāḥ

6.62

somāḥ pavanta indavo 'smabhyaṃ gātuvittamāḥ . mitrāḥ svānā arepasaḥ svādhyaḥ svarvidaḥ

6.63

abhī no vājasātamaṃ rayimarṣa śataspṛham . indo sahasrabharṇasaṃ tuvidyumnaṃ vibhāsaham

6.64

abhī navante adruhaḥ priyamindrasya kāmyam . vatsaṃ na pūrva āyuni jātaṃ rihanti mātaraḥ

6.65

ā haryatāya dhṛṣṇave dhanuṣṭanvanti pauṃsyam . śukrā vi yantyasurāya nirṇije vipāmagre mahīyuvaḥ

6.66

pari tyaṃ haryataṃ hariṃ babhruṃ punanti vāreṇa . yo devānviśvāṃ itpari madena saha gacchati

6.67

pra sunvānāsyāndhaso marto na vaṣṭa tadvacaḥ . apa śvānamarādhasaṃ hatā makhaṃ na bhṛgavaḥ

6.68

ā sūryasya bṛhato bṛhannadhi rathaṃ viṣvañcamaruhadvicakṣaṇaḥ

6.69

acodaso no dhanvantvindavaḥ pra svānāso bṛhaddeveṣu harayaḥ . vi cidaśnānā iṣayo arātayo 'ryo naḥ santu saniṣantu no dhiyaḥ

6.70

eṣa pra kośe madhumāṃ acikradadindrasya vajro vapuṣo vapuṣṭamaḥ . abhyR^ī3tasya sudughā ghṛtaścuto vāśrā arṣanti payasā ca ghenavaḥ

6.71

pro ayāsīdindurindrasya niṣkṛtaṃ sakhā sakhyurna pra mināti saṅgiram . marya iva yuvatibhiḥ samarṣati somaḥ kalaśe śatayāmanā pathā

6.72

dhartā divaḥ pavate kṛtvyo raso dakṣo devānāmanumādyo nṛbhiḥ . hariḥ sṛjāno atyo na satvabhirvṛthā pājāṃsi kṛṇuṣe nadīṣvā

6.73

vṛṣā matīnāṃ pavate vicakṣaṇaḥ somo ahnāṃ pratarītoṣasāṃ divaḥ . prāṇā sindhūnāṃ kalaśāṃ acikradadindrasya hārdyāviśanmanīṣibhiḥ

6.74

trirasmai sapta dhenavo duduhrire satyāmāśiraṃ parame vyomani . catvāryanyā bhuvanāni nirṇije cārūṇi cakre yadṛtairavardhata

6.75

indrāya soma suṣutaḥ pari sravāpāmīvā bhavatu rakṣasā saha . mā te rasasya matsata dvayāvino draviṇasvanta iha santvindavaḥ

6.76

asāvi somo aruṣo vṛṣā harī rājeva dasmo abhi gā acikradat . punāno vāramatyeṣyavyayaṃ śyeno na yoniṃ ghṛtavantamāsadat

6.77

pra devamacchā madhumanta indavo 'siṣyadanta gāva ā na dhenavaḥ . barhiṣado vacanāvanta ūdhabhiḥ parisrutamusriyā nirṇijaṃ dhire

6.78

añjate vyañjate samañjate kratuṃ rihanti maghvābhyañjate . sindhoru 'cchvāse patayantamukṣaṇaṃ hiraṇyapāvāḥ paśumapsu gṛbhṇate

6.79

pavitraṃ te vitataṃ brahmaṇaspate prabhurgātrāṇi paryeṣi viśvataḥ . ataptatanūrna tadāmo aśnute śṛtāsa idvahantaḥ saṃ tadāśata

6.80

śruṣṭe jātāsa indavaḥ svarvidaḥ

6.81

pra dhanvā soma jāgṛvirindrāyendo pari srava . dyumantaṃ śuṣmamā bhara svarvidam

6.82

sakhāya ā ni ṣīdata punānāya pra gāyata . śiśuṃ na yajñaiḥ pari bhūṣata śriye

6.83

taṃ vaḥ sakhāyo madāya punānamabhi gāyata . śiśuṃ na havyaiḥ svadayanta gūrtibhiḥ

6.84

prāṇā śiśurmahīnāṃ hinvannṛtasya dīdhitim . viśvā pari priyā bhuvadadha dvitā

6.85

pavasva devavītaya indo dhārābhirojasā . ā kalaśaṃ madhumāntsoma naḥ sadaḥ

6.86

somaḥ punāna ūrmiṇāvyaṃ vāraṃ vi dhāvati . agre vācaḥ pavamānaḥ kanikradat

6.87

pra punānāya vedhase somāya vaca ucyate . bhṛtiṃ na bharā matibhirjujoṣate

6.88

gomanna indo aśvavatsutaḥ sudakṣa dhaniva . śuciṃ ca varṇamadhi goṣu dhārya

6.89

asmabhyaṃ tvā vasuvidamabhi vāṇīranūṣata . gobhiṣṭe varṇamabhi vāsayāmasi

6.90

pavate haryato harirati hvarāṃsi raṃhyā . abhyarṣa stotṛbhyo vīravadyaśaḥ

6.91

pari kośaṃ madhuścutaṃ somaḥ punāno arṣati . abhi vāṇīrṛṣīṇāṃ saptā nūṣata

6.92

mahi dyukṣatamo madaḥ

6.93

abhi dyumnaṃ bṛhadyaśa iṣaspate didīhi deva devayum . vi kośaṃ madhyamaṃ yuva

6.94

ā sotā pari ṣiñcatāśvaṃ na stomamapturaṃ rajasturam . vanaprakṣamudaprutam

6.95

etamu tyaṃ madacyutaṃ sahasradhāraṃ vṛṣabhaṃ divoduham . viśvā vasūni bibhratam

6.96

sa sunve yo vasūnāṃ yo rāyāmānetā ya iḍānām . somo yaḥ sukṣitīnām

6.97

tvaṃ hyā3ṅga daivyā pavamāna janimāni dyumattamaḥ . amṛtatvāya ghoṣayan

6.98

eṣa sya dhārayā suto 'vyo vārebhiḥ pavate madintamaḥ . krīḍannūrmirapāmiva

6.99

ya usriyā api yā antaraśmani nirgā akṛntadojasā . abhi vrajaṃ tatniṣe gavyamaśvyaṃ varmīva dhṛṣṇavā ruja . Oṃ varmīva dhṛṣṇavā ruja