Prapāṭhaka 7

7.1

indra jyeṣṭhaṃ na ā bhara ojiṣṭhaṃ pupuri śravaḥ . yaddidhṛkṣema vajrahasta rodasī obhe suśipra paprāḥ

7.2

indro rājā jagataścarṣaṇīnāmadhikṣamā viśvarūpaṃ yadasya . tato dadāti dāśuṣe vasūni codadrādha upastutaṃ cidarvāk

7.3

yasyedamā rajoyujastuje jane vanaṃ svaḥ . indrasya rantyaṃ bṛhat

7.4

uduttamaṃ varuṇa pāśamasmadavādhamaṃ vi madhyamaṃ śrathāya . athāditya vrate vayaṃ tavānāgaso aditaye syāma

7.5

tvayā vayaṃ pavamānena soma bhare kṛtaṃ vi cinuyāma śaśvat . tanno mitro varuṇo māmahantāmaditiḥ sindhuḥ pṛthivī uta dyauḥ

7.6

imaṃ vṛṣaṇaṃ kṛṇutaikaminmām

7.7

sa na indrāya yajyave varuṇāya marudbhyaḥ . varivovitparisrava

7.8

enā viśvānyarya ā dyumnāni mānuṣāṇām . siṣāsanto vanāmahe

7.9

ahamasmi prathamajā ṛtasya pūrvaṃ devebhyo amṛtasya nāma . yo mā dadāti sa idevamāvadahamannamannamadantamadmi

7.10

paruṣṇīṣu ruśatpayaḥ

7.11

arūrucaduṣasaḥ pṛśniragriya ukṣā mimeti bhuvaneṣu vājayuḥ . māyāvino mamire asya māyayā nṛcakṣasaḥ pitaro garbhamādadhuḥ

7.12

indra iddharyoḥ sacā sammiśla ā vacoyujā . indro vajrī hiraṇyayaḥ

7.13

indra vājeṣu no 'va sahasrapradhaneṣu ca . ugra ugrābhirūtibhiḥ

7.14

prathaśca yasya saprathaśca nāmānuṣṭubhasya haviṣo haviryat . dhāturdyutānātsavituśca viṣṇo rathantaramā jabhārā vasiṣṭhaḥ

7.15

niyutvānvāyavā gahyayaṃ śukro ayāmi te . gantāsi sunvato gṛham

7.16

yajjāyathā apūrvya maghavanvṛtrahatyāya . tatpṛthivīmaprathayastadastabhnā uto divam

7.17

parameṣṭhī prajāpatirdivi dyāmiva dṛṃhatu

7.18

saṃ te payāṃsi samu yantu vājāḥ saṃ vṛṣṇyānyabhimātiṣāhaḥ . āpyāyamāno amṛtāya soma divi śravāṃsyuttamāni dhiṣva

7.19

tvamimā oṣadhīḥ soma viśvāstvamapo ajanayastvaṃ gāḥ . tvamātanorurvā3ntarikṣaṃ tvaṃ jyotiṣā vi tamo vavartha

7.20

agnimīḍe purohitaṃ yajñasya devamṛtvijam . hotāraṃ ratnadhātamam

7.21

te manvata prathamaṃ nāma gonāṃ triḥ sapta paramaṃ nāma janān . tā jānatīrabhyanūṣata kṣā āvirbhuvannaruṇīryaśasā gāvaḥ

7.22

samanyā yantyupayantyanyāḥ samānamūrvaṃ nadyaspṛṇanti . tamū śuciṃ śucayo dīdivāṃsamapānnapātamupa yantyāpaḥ

7.23

ā prāgādbhadrā yuvatirahnaḥ ketūntsamīrtsati . abhūdbhadrā niveśanī viśvasya jagato rātrī

7.24

prakṣasya vṛṣṇo aruṣasya nū mahaḥ pra no vaco vidathā jātavedase . vaiśvānarāya matirnavyase śuciḥ soma iva pavate cāruragnaye

7.25

viśve devā mama śṛṇvantu yajñamubhe rodasī apāṃ napācca manma . mā vo vacāṃsi paricakṣyāṇi vocaṃ sumneṣvidvo antamā madema

7.26

yaśo mā dyāvāpṛthivī yaśo mendrabṛhaspatī . yaśo bhagasya vindatu yaśo mā pratimucyatām . yaśasvyā3syāḥ saṃ sado 'haṃ pravaditā syām

7.27

indrasya nu vīryāṇi pravocaṃ yāni cakāra prathamāni vajrī . ahannahimanvapastatarda pra vakṣaṇā abhinatparvatānām

7.28

agnirasmi janmanā jātavedā ghṛtaṃ me cakṣuramṛtaṃ ma āsan . tridhāturarko rajaso vimāno 'jasraṃ jyotirhavirasmi sarvam

7.29

pātyagnirvipo agraṃ padaṃ veḥ pāti yahvaścaraṇaṃ sūryasya . pāti nābhā saptaśīrṣāṇamagniḥ

7.30

sa tvaṃ no agne payasā vasuvidrayiṃ varco dṛśe 'dāḥ

7.31

vasanta innu rantyo grīṣma innu rantyaḥ . varṣāṇyanu śarado hemantaḥ śiśira innu rantyaḥ

7.32

sahasraśīrṣā puruṣaḥ sahasrākṣaḥ sahasrapāt . sa bhūmiṃ sarvato vṛtvātyatiṣṭhaddaśāṅgulam

7.33

tripādūrdhva udaitpuruṣaḥ pado 'syehābhavatpunaḥ . tathā viṣvaṅ vyakrāmadaśanānaśane abhi

7.34

puruṣa evedaṃ sarvaṃ yadbhūtaṃ yacca bhāvyam . pādo 'sya sarvā bhūtāni tripādasyāmṛtaṃ divi

7.35

tāvānasya mahimā tato jyāyāṃśca pūruṣaḥ . utāmṛtatvasyeśāno yadannenātirohati

7.36

tato virāḍajāyata virājo adhi pūruṣaḥ . sa jāto atyaricyata paścādbhūmimatho puraḥ

7.37

manye vāṃ dyāvāpṛthivī subhojasau ye aprathethāmamitamabhi yojanam . dyāvāpṛthivī bhavataṃ syone te no muñcatamaṃhasaḥ

7.38

harī ta indra śmaśrūṇyuto te haritau hari . taṃ tvā stuvanti kavayaḥ puruṣāso vanargavaḥ

7.39

yadvarco hiraṇyasya yadvā varco gavāmuta . satyasya brahmaṇo varcastena mā saṃ sṛjāmasi

7.40

sahastanna indra daddhyoja īśe hyasya mahato virapśin . kratuṃ na nṛmṇaṃ sthaviraṃ ca vājaṃ vṛtreṣu śatrūntsuhanā kṛdhī naḥ

7.41

saharṣabhāḥ sahavatsā udeta viśvā rūpāṇī bibhratīrdvyūdnīḥ . uruḥ pṛthurayaṃ vo astu loka imā āpaḥ suprapāṇā iha sta

7.42

āre bādhasva ducchunām

7.43

vibhrāṅbṛhatpibatu somyaṃ madhvāyurdadhadyajñapatāvavihrutam . vātajūto yo abhirakṣati tmanā prajāḥ piparti bahudhā vi rājati

7.44

citraṃ devānāmudagādanīkaṃ cakṣurmitrasya varuṇasyāgneḥ . āprā dyāvāpṛthivī antarikṣaṃ sūrya ātmā jagatastasthuṣaśca

7.45

āyaṃ gauḥ pṛśnirakramīdasadanmātaraṃ puraḥ . pitaraṃ ca prayantsvaḥ

7.46

antaścarati rocanāsya prāṇādapānatī . vyakhyanmahiṣo divam

7.47

triṃṣaddhāma vi rājati vākpataṅgāya dhīyate . prati vastoraha dyubhiḥ

7.48

apa tye tāyavo yathā nakṣatrā yantyaktubhiḥ . sūrāya viśvacakṣase

7.49

adṛśrannasya ketavo vi raśmayo janāṃ anu . bhrājanto agnayo yathā

7.50

taraṇirviśvadarśato jyotiṣkṛdasi sūrya . viśvamābhāsi rocanam

7.51

pratyaṅ devānāṃ viśaḥ pratyaṅṅudeṣi mānuṣān . pratyaṅ viśvaṃ svardṛśe

7.52

yenā pāvaka cakṣasā bhuraṇyantaṃ janāṃ anu . tvaṃ varuṇa paśyasi

7.53

uddyāmeṣi rajaḥ pṛthvahā mimāno aktubhiḥ . paśyañjanmāni sūrya

7.54

ayukta sapta śundhyuvaḥ sūro rathasya naptryaḥ . tābhiryāti svayuktibhiḥ

7.55

sapta tvā harito rathe vahanti deva sūrya . śociṣkeśaṃ vicakṣaṇa