Prapāṭhaka 4

4.1

ima indrāya sunvire somāso dadhyāśiraḥ . tāṃ ā madāya vajrahasta pītaye haribhyāṃ yāhyoka ā

4.2

ima indra madāya te somāścikitra ukithanaḥ . madhoḥ papāna upa no giraḥ śṛṇu rāsva stotrāya girvaṇaḥ

4.3

ā tvā3dya sabardughāṃ huve gāyatravepasam . indraṃ dhenuṃ sudughāmanyāmiṣamurudhārāmaraṅkṛtam

4.4

na tvā bṛhanto adrayo varanta indra vīḍavaḥ . yacchikṣasi stuvate māvate vasu na kiṣṭadā mināti te

4.5

ka īṃ veda sute sacā pibantaṃ kadvayo dadhe . ayaṃ yaḥ puro vibhinatyojasā mandānaḥ śipryandhasaḥ

4.6

yadindra śāso avrataṃ cyāvayā sadasaspari . asmākamaṃśuṃ maghavanpuruspṛhaṃ vasavye adhi barhaya

4.7

tvaṣṭā no daivyaṃ vacaḥ parjanyo brahmaṇaspatiḥ . putrairbhrātṛbhiraditirnu pātu no duṣṭaraṃ trāmaṇaṃ vacaḥ

4.8

kadā ca na starīrasi nendra saścasi dāśuṣe . upopennu maghavanbhūya innu te dānaṃ devasya pṛcyate

4.9

yuṅkṣvā hi vṛtrahantama harī indra parāvataḥ . arvācīno maghavantsomapītaya ugra ṛṣvebhirā gahi

4.10

tvāmidā hyo naro 'pīpyanvajrinbhūrṇayaḥ . sa indra stomavāhasa iha śrudhyupa svasaramā gahi

4.11

apo mahī vṛṇute cakṣuṣā tamo jyotiṣkṛṇoti sūnari

4.12

imā u vāṃ diviṣṭaya usrā havante aśvinā . ayaṃ vāmahve 'vase śacīvasū viśaṃviśaṃ hi gacchathaḥ

4.13

ku ṣṭhaḥ ko vāmaśvinā tapāno devā martyaḥ . ghnatā vāmaśmayā kṣapāmāṇoṃśunetthamu ādunyathā

4.14

ayaṃ vāṃ madhumattamaḥ sutaḥ somo diviṣṭiṣu . tamaśvinā pibataṃ tiro ahnyaṃ dhattaṃ ratnāni dāśuṣe

4.15

ā tvā somasya galdayā sadā yācannahaṃ jyā . bhūrṇiṃ mṛgaṃ na savaneṣu cukrudhaṃ ka īśānaṃ na yāciṣat

4.16

adhvaryo drāvayā tvaṃ somamindraḥ pipāsati . upo nūnaṃ yuyuje vṛṣṇā harī ā ca jagāma vṛtrahā

4.17

abhī ṣatastadā bharendra jyāyaḥ kanīyasaḥ . purūvasurhi maghavanbabhūvitha bharebhare ca havyaḥ

4.18

yadindra yāvatastvametāvadahamīśīya . stotāramiddadhiṣe radāvaso na pāpatvāya raṃsiṣam

4.19

tvamindra pratūrtiṣvabhi viśvā asi spṛdhaḥ . aśastihā janitā vṛtratūrasi tvaṃ tūrya taruṣyataḥ

4.20

pra yo ririkṣa ojasā divaḥ sadobhyaspari . na tvā vivyāca raja indra pārthivamati viśvaṃ vavakṣitha

4.21

bodhāmasi tvā haryaśva yajñairbodhā na stomamandhaso madeṣu

4.22

yoniṣṭa indra sadane akāri tamā nṛbhiḥ purūhūta pra yāhi . aso yathā no 'vitā vṛdhaściddado vasūni mamadaśca somaiḥ

4.23

adardarutsamasṛjo vi khāni tvamarṇavānbadbadhānāṃ aramṇāḥ . mahāntamindra parvataṃ vi yadvaḥ sṛjaddhārā ava yaddānavānhan

4.24

suṣvāṇāsa indra stumasi tvā saniṣyantaścittuvinṛmṇa vājam . ā no bhara suvitaṃ yasya konā tanā tmanā sahyāmā tvotāḥ

4.25

jagṛhmā te dakṣiṇamindra hastaṃ vasūyavo vasupate vasūnām . vidmā hi tvā gopatiṃ śūra gonāmasmabhyaṃ citraṃ vṛṣaṇaṃ rayindāḥ

4.26

indraṃ naro nemadhitā havanti yatpāryā yunajate dhiyastāḥ . śūro nṛṣātā śravasaśca kāma ā gomati vraje bhajā tvaṃ naḥ

4.27

vayaḥ suparṇā upa sedurindraṃ priyamedhā ṛṣayo nādhamānāḥ . apa dhvāntamūrṇuhi pūrdhi cakṣurmumugdhyā3smānnidhayeva baddhān

4.28

nāke suparṇamupa yatpatantaṃ hṛdā venanto abhyacakṣata tvā . hiraṇyapakṣaṃ varuṇasya dūtaṃ yamasya yonau śakunaṃ bhuraṇyum

4.29

brahma jajñānaṃ prathamaṃ purastādvi sīmataḥ suruco vena āvaḥ . sa budhnyā upamā asya viṣṭhāḥ sataśca yonimasataśca vivaḥ

4.30

apūrvyā purutamānyasmai mahe vīrāya tavase turāya . virapśine vajriṇe śantamāni vacāṃsyāsmai sthavirāya takṣuḥ

4.31

āvattamindraḥ śacyā dhamantamapa snīhitiṃ nṛmaṇā adhadrāḥ

4.32

vṛtrasya tvā śvasathādīṣamāṇā viśve devā ajahurye sakhāyaḥ . marudbhirindra sakhyaṃ te astvathemā viśvāḥ pṛtanā jayāsi

4.33

vidhuṃ dadrāṇaṃ samane bahūnāṃ yuvānaṃ santaṃ palito jagāra . devasya paśya kāvyaṃ mahitvādyā mamāra sa hyaḥ samāna

4.34

tvaṃ ha tyatsaptabhyo jāyamāno 'śatrubhyo abhavaḥ śatrurindra . gūḍhe dyāvāpṛthivī anvavindo vibhumadbhyo bhuvanebhyo raṇaṃ dhāḥ

4.35

meḍiṃ na tvā vajriṇaṃ bhṛṣṭimantaṃ purudhasmānaṃ vṛṣabhaṃ sthirapsnum . karoṣyaryastaruṣīrduvasyurindra dyukṣaṃ vṛtrahaṇaṃ gṛṇīṣe

4.36

pra vo mahe mahevṛdhe bharadhvaṃ pracetase pra sumatiṃ kṛṇudhvam . viśaḥ pūrvīḥ pra cara carṣaṇiprāḥ

4.37

śunaṃ huvema maghavānamindramasminbhare nṛtamaṃ vājasātau . śṛṇvantamugramūtaye samatsu dhnantaṃ vṛtrāṇi sañjitaṃ dhanāni

4.38

udu brahmāṇyairata śravasyendraṃ samarye mahayā vasiṣṭha . ā yo viśvāni śravasā tatānopaśrotā ma īvato vacāṃsi

4.39

cakraṃ yadasyāpsvā niṣattamuto tadasmai madhviccacchadyāt . pṛthivyāmatiṣitaṃ yadūdhaḥ payo goṣvadadhā oṣadhīṣu

4.40

ariṣṭanemiṃ pṛtanājamāśuṃ svastaye tārkṣyamihā huvema

4.41

trātāramindramavitāramindraṃ havehave suhavaṃ śūramindram . huve nu śakraṃ puruhūtamindramidaṃ havirmaghavā vetvindraḥ

4.42

yajāmaha indraṃ vajradakṣiṇaṃ harīṇāṃ rathya3ṃ vivratānām . pra śmaśrubhirdodhuvadūrdhvadhā bhuvadvi senābhirbhayamāno vi rādhasā

4.43

satrāhaṇaṃ dādhṛṣiṃ tumramindraṃ mahāmapāraṃ vṛśabhaṃ suvajram . hantā yo vṛtraṃ sanitota vājaṃ dātā maghāni maghavā surādhāḥ

4.44

yo no vanuṣyannabhidāti marta ugaṇā vā manyamānasturo vā . kṣidhī yudhā śavasā vā tamindrābhī ṣyāma vṛṣamaṇastvotāḥ

4.45

yaṃ vṛtreṣu kṣitaya spardhamānā yaṃ yukteṣu turayanto havante . yaṃ śūrasātau yamapāmupajmanyaṃ viprāso vājayante sa indraḥ

4.46

indrāparvatā bṛhatā rathena vāmīriṣa ā vahataṃ suvīrāḥ . vītaṃ havyānyadhvareṣu devā vardhethāṃ gīrbhīriḍayā madantā

4.47

indrāya giro aniśitasargā apaḥ prairayatsagarasya budhnāt . yo akṣeṇeva cakriyau śacībhirviṣvaktastambha pṛthivīmuta dyām

4.48

ā tvā sakhāyaḥ sakhyā vavṛtyustiraḥ purū cidarṇavāṃ jagamyāḥ . piturnapātamā dadhita vedhā asminkṣaye pratarāṃ dīdyānaḥ

4.49

ko adya yuṅkte dhuri gā ṛtasya śimīvato bhāmino durhṛṇāyūn . āsanneṣāmapsuvāho mayobhūnya eṣāṃ bhṛtyāmṛṇadhatsa jīvāt

4.50

gāyanti tvā gāyatriṇo 'rcantyarkamarkiṇaḥ . brahmāṇastvā śatakrata udvaṃśamiva yemire

4.51

indraṃ viśvā avīvṛdhantsamudravyacasaṃ giraḥ . rathītamaṃ rathīnāṃ vājānāṃ satpatiṃ patim

4.52

imamindra sutaṃ piba jyeṣṭhamamartyaṃ madam . śukrasya tvābhyakṣarandhārā ṛtasya sādane

4.53

yadindra citra ma iha nāsti tvādātamadrivaḥ . rādhastanno vidadvasa ubhayāhastyā bhara

4.54

śrudī havaṃ tiraścyā indra yastvā saparyati . suvīryasya gomato rāyaspūrdhi mahāṃ asi

4.55

asāvi soma indra te śaviṣṭha dhṛṣṇavā gahi . ā tvā pṛṇaktvindriyaṃ rajaḥ sūryo na raśmibhiḥ

4.56

endra yāhi haribhirupa kaṇvasya suṣṭutim . divo amuṣya śāsato divaṃ yaya divāvaso

4.57

ā tvā giro rathīrivāsthuḥ suteṣu girvaṇaḥ . abhi tvā samanūṣata gāvo vatsaṃ na dhenavaḥ

4.58

eto nvindraṃ stavāma śuddhaṃ śuddhena sāmnā . śuddhairukthairvāvṛdhvāṃsaṃ śuddhairāśīrvānmamattu

4.59

yo rayiṃ vo rayintamo yo dyumnairdyumnavattamaḥ . somaḥ sutaḥ sa indra te 'sti svadhāpate madaḥ

4.60

araṅgamāya jagmaye 'paścādadhvane naraḥ

4.61

ā no vayovayaḥśayaṃ mahāntaṃ gahvareṣṭhāṃ mahāntaṃ pūrvineṣṭhām . ugraṃ vaco apāvadhīḥ

4.62

ā tvā rathaṃ yathotaye sumnāya vartayāmasi . tuvikūrmimṛtīṣahamindraṃ śaviṣṭha satpatim

4.63

sa pūrvyo mahonāṃ venaḥ kratubhirānaje . yasya dvārā manuḥ pitā deveṣu dhiya ānaje

4.64

yadī vahantyāśavo bhrājamānā ratheṣvā . pibanto madiraṃ madhu tatra śravāṃsi kṛṇvate

4.65

tyamu vo aprahaṇaṃ gṛṇīṣe śavasaspatim . indraṃ viśvāsāhaṃ naraṃ śaciṣṭhaṃ viśvavedasam

4.66

dadhikrāvṇo akāriṣaṃ jiṣṇoraśvasya vājinaḥ . surabhi no mukhā karatpra na āyūṃṣi tāriṣat

4.67

purāṃ bhinduryuvā kaviramitaujā ajāyata . indro viśvasya karmaṇo dharttā vajrī puruṣṭutaḥ

4.68

dhiyā vo medhasātaye purandhyā vivāsati

4.69

kaśyapasya svarvido yāvāhuḥ sayujāviti . yayorviśvamapi vrataṃ yajñaṃ dhīrā nicāyya

4.70

arcata prārcatā naraḥ priyamedhāso arcata . arcantu putrakā uta puramiddhṛṣṇvarcata

4.71

ukthamindrāya śaṃsyaṃ vardhanaṃ puruniḥṣidhe . śakro yathā suteṣu no rāraṇatsakhyeṣu ca

4.72

viśvānarasya vaspatimanānatasya śavasaḥ . evaiśca carṣaṇīnāmūtī huve rathānām

4.73

sa ghā yaste divo naro dhiyā martasya śamataḥ . ūtī sa bṛhato divo dviṣo aṃho na tarati

4.74

vibhoṣṭa indra rādhaso vibhvī rātiḥ śatakrato . athā no viśvacarṣaṇe dyumnaṃ sudatra maṃhaya

4.75

vayaścitte patatriṇo dvipāccatuṣpādarjuni . uṣaḥ prārannṛtūṃranu divo antebhyaspari

4.76

amī ye devā sthana madhya ā rocane divaḥ . kadva ṛtaṃ kadamṛtaṃ kā pratnā va āhutiḥ

4.77

ṛcaṃ sāma yajāmahe yābhyāṃ karmāṇi kṛṇvate . vi te sadasi rājato yajñaṃ deveṣu vakṣataḥ

4.78

kratve vare sthemanyāmurīmutogramojiṣṭhaṃ tarasaṃ tarasvinam

4.79

śratte dadhāmi prathamāya manyave 'hanyaddasyuṃ naryaṃ viverapaḥ . ubhe yatvā rodasī dhāvatāmanu bhyasātte śuṣmātpṛthivī cidadrivaḥ

4.80

sameta viśvā ojasā patiṃ divo ya eka idbhūratithirjanānām sa pūrvyo nūtanamājigīṣaṃ taṃ varttanīranu vāvṛta eka it

4.81

ime ta indra te vayaṃ puruṣṭuta ye tvārabhya carāmasi prabhūvaso . na hi tvadanyo girvaṇo giraḥ saghatkṣoṇīriva prati taddharya no vacaḥ

4.82

carṣaṇīdhṛtaṃ maghavānamukthyā3mindraṃ giro bṛhatīrabhyanūṣata . vāvṛdhānaṃ puruhūtaṃ suvṛktibhiramartyaṃ jaramāṇaṃ divedive

4.83

acchā va indraṃ matayaḥ svaryuvaḥ sadhrīcīrviśvā uśatīranūṣata . pari ṣvajanta janayo yathā patiṃ maryaṃ na śundhyuṃ maghavānamūtaye

4.84

abhi tyaṃ meṣaṃ puruhūtamṛgmiyamindraṃ gīrbhirmadatā vasvo arṇavam . yasya dyāvo na vicaranti mānuṣaṃ bhuje maṃhiṣṭhamabhi vipramarcata

4.85

tyaṃ su meṣaṃ mahayā svarvidaṃ śataṃ yasya subhuvaḥ sākamīrate . atyaṃ na vājaṃ havanasyadaṃ rathamendraṃ vavṛtyāmavase suvṛktibhiḥ

4.86

ghṛtavatī bhuvanānāmabhiśriyorvī pṛthvī madhudughe supeśasā . dyāvāpṛthivī varuṇasya dharmaṇā viṣkabhite ajare bhūriretasā

4.87

ubhe yadindra rodasī āpaprāthoṣā iva . mahāntaṃ tvā mahīnāṃ samrājaṃ carṣaṇīnām . devī janitryajījanadbhadrā janitryajījanat

4.88

pra mandine pitumadarcatā vaco yaḥ kṛṣṇagarbhā nirahannṛjiśvanā . avasyavo vṛṣaṇaṃ vajradakṣiṇaṃ marutvantaṃ sakhyāya huvemahi

4.89

vide vṛdhasya dakṣasya mahāṃ hi ṣaḥ

4.90

tamu abhi pra gāyata puruhūtaṃ puruṣṭutam . indraṃ gīrbhistaviṣamā vivāsata

4.91

taṃ te madaṃ gṛṇīmasi vṛṣaṇaṃ pṛkṣu sāsahim . u lokakṛtnumadrivo hariśriyam

4.92

yatsomamindra viṣṇavi yadvā gha trita āptye . yadvā marutsu mandase samindubhiḥ

4.93

edu madhormadintaraṃ siñcādhvaryo andhasaḥ . evā hi vīrastavate sadāvṛdhaḥ

4.94

endumindrāya siñcata pibāti somyaṃ madhu . pra rādhāṃsi codayate mahitvanā

4.95

eto nvindraṃ stavāma sakhāyaḥ stomyaṃ naram . kṛṣṭīryo viśvā abhyastyeka it

4.96

indrāya sāma gāyata viprāya bṛhate bṛhat . brahmakṛte vipaścite panasyave

4.97

ya eka idvidayate vasu martāya dāśuṣe . īśāno apratiṣkuta indro aṅga

4.98

sakhāya ā śiṣāmahe brahmendrāya vajriṇe . stuṣa ū ṣu vo nṛtamāya dhṛṣṇave