Prapāṭhaka 3

3.1

uttvā mandantu somāḥ kṛṇuṣva rādho adrivaḥ . ava brahmadviṣo jahi

3.2

girvaṇaḥ pāhi naḥ sutaṃ madhordhārābhirajyase . indra tvādātamidyaśaḥ

3.3

sadā va indraścarkṛṣadā upo nu sa saparyan . na devo vṛtaḥ śūra indraḥ

3.4

ā tvā viśantvindavaḥ samudramiva sindhavaḥ . na tvāmindrāti ricyate

3.5

indramidgāthino bṛhadindramarkebhirarkiṇaḥ . indraṃ vāṇīranūṣata

3.6

indra iṣe dadātu na ṛbhukṣaṇamṛbhuṃ rayim . vājī dadātu vājinam

3.7

indro aṅga mahadbhayamabhī ṣadapa cucyavat . sa hi sthiro vicarṣaṇiḥ

3.8

imā u tvā sutesute nakṣante girvaṇo giraḥ . gāvo vatsaṃ na dhenavaḥ

3.9

indrā nu pūṣaṇā vayaṃ sakhyāya svastaye . huvema vājasātaye

3.10

na ki indra tvaduttaraṃ na jyāyo asti vṛtrahan . na kyevaṃ yathā tvam

3.11

samānamu pra śaṃsiṣam

3.12

asṛgramindra te giraḥ prati tvāmudahāsata . sajoṣā vṛṣabhaṃ patim

3.13

sunītho ghā sa martyo yaṃ maruto yamaryamā . mitrāspāntyadruhaḥ

3.14

yadvīḍāvindra yatsthire yatparśāne parābhṛtam . vasu spārhaṃ tadā bhara

3.15

śrutaṃ vo vṛtrahantamaṃ pra śardhaṃ carṣaṇīnām . āśiṣe rādhase mahe

3.16

araṃ ta indra śravase gamema śūra tvāvataḥ . araṃ śakra paremaṇi

3.17

dhānāvantaṃ karambhiṇamapūpavantamukthinam . indra prātarjuṣasva naḥ

3.18

apāṃ phenena namuceḥ śira indrodavartayaḥ . viśvā yadajaya spṛdhaḥ

3.19

ime ta indra somāḥ sutāso ye ca sotvāḥ . teṣāṃ matsva prabhūvaso

3.20

tubhyaṃ sutāsaḥ somāḥ stīrṇaṃ barhirvibhāvaso . stotṛbhya indra mṛḍaya

3.21

maṃhiṣṭhaṃ siñca indubhiḥ

3.22

ataścidindra na upā yāhi śatavājayā . iṣā sahasravājayā

3.23

ā bundaṃ vṛtrahā dade jātaḥ pṛcchadvi mātaram . ka ugrāḥ ke ha śṛṇvire

3.24

bṛbadukthaṃ havāmahe sṛprakarasnamūtaye . sādhaḥ kṛṇvantamavase

3.25

ṛjunītī no varuṇo mitro nayati vidvān . aryamā devaiḥ sajoṣāḥ

3.26

dūrādiheva yatsato 'ruṇapsuraśiśvitat . vi bhānuṃ viśvathātanat

3.27

ā no mitrāvaruṇā ghṛtairgavyūtimukṣatam . madhvā rajāṃsi sukratū

3.28

udu tye sūnavo giraḥ kāṣṭhā yajñeṣvatnata . vāśrā abhijñu yātave

3.29

idaṃ viṣṇurvi cakrame tredhā ni dadhe padam . samūḍhamasya pāṃsule

3.30

asya rātau sutaṃ piba

3.31

kadu pracetase mahe vaco devāya śasyate . tadidhyasya vardhanam

3.32

ukthaṃ ca na śasyamānaṃ nāgo rayirā ciketa . na gāyatraṃ gīyamānam

3.33

indra ukthebhirmandiṣṭho vājānāṃ ca vājapatiḥ . harivāntsutānāṃ sakhā

3.34

ā yāhyupa naḥ sutaṃ vājebhirmā hṛṇīyathāḥ . mahāṃ iva yuvajāniḥ

3.35

kadā vaso stotraṃ haryata ā ava śmaśā rudhadvāḥ . dīrghaṃ sutam vātāpyāya

3.36

brāhmaṇādindra rādhasaḥ pibā somamṛtūṃ ranu . tavedaṃ sakhyamastṛtam

3.37

vayaṃ ghā te api smasi stotāra indra girvaṇaḥ . tvaṃ no jinva somapāḥ

3.38

endra pṛkṣu kāsu cinnṛmṇaṃ tanūṣu dhehi naḥ . satrājidugra pauṃsyam

3.39

evā hyasi vīrayurevā śūra uta sthiraḥ . evā te rādhyaṃ manaḥ

3.40

īśānamasya jagataḥ svardṛśamīśānamindra tasthuṣaḥ

3.41

tvāmiddhi havāmahe sātau vājasya kārvaḥ . tvāṃ vṛtreṣvindra satpatiṃ narastvāṃ kāṣṭhāsvarvataḥ

3.42

abhi pra vaḥ surādhasamindramarca yathā vide . yo jaritṛbhyo maghavā purūvasuḥ sahasreṇeva śikṣati

3.43

taṃ vo dasmamṛtīṣahaṃ vasormandānamandhasaḥ . abhi vatsaṃ na svasareṣu dhenava indraṃ gīrbhirnavāmahe

3.44

tarobhirvo vidadvasumindraṃ sabādha ūtaye . bṛhadgāyantaḥ sutasome adhvare huve bharaṃ na kāriṇam

3.45

taraṇiritsiṣāsati vājaṃ purandhyā yujā . ā va indraṃ puruhūtaṃ name girā nemiṃ taṣṭeva sudruvam

3.46

pibā sutasya rasino matsvā na indra gomataḥ . āpirno bodhi sadhamādye vṛdhe3 'smāṃ avantu te dhiyaḥ

3.47

tvaṃ hyehi cerave vidā bhagaṃ vasuttaye . udvāvṛṣasva maghavangaviṣṭaya udindrāśvamiṣṭaye

3.48

na hi vaścaramaṃ ca na vasiṣṭhaḥ parimaṃste . asmākamadya marutaḥ sute sacā viśve pibantu kāminaḥ

3.49

mā cidanyadvi śaṃsata sakhāyo mā riṣaṇyata . indramitstotā vṛṣaṇaṃ sacā sute muhurukthā ca śaṃsata

3.50

na kiṣṭaṃ karmaṇā naśadyaścakāra sadāvṛdham . indraṃ na yajñairviśvagūrtamṛbhvasamadhṛṣṭaṃ dhṛṣṇumojasā

3.51

ya ṛte cidabhiśriṣaḥ purā jatrubhya ātṛdaḥ . sandhātā sandhiṃ maghavā purūvasurniṣkartā vihrutaṃ punaḥ

3.52

ā tvā sahasramā śataṃ yuktā rathe hiraṇyaye . brahmayujo haraya indra keśino vahantu somapītaye

3.53

ā mandrairindra haribhiryāhi mayūraromabhiḥ . mā tvā ke cinni yemurinna pāśino 'ti dhanveva tāṃ ihi

3.54

tvamaṅga pra śaṃsiṣo devaḥ śaviṣṭha martyam . na tvadanyo maghavannasti marḍitendra bravīmi te vacaḥ

3.55

tvamindra yaśā asyṛjīṣī śavasaspatiḥ . tvaṃ vṛtrāṇi haṃsyapratīnyeka itpurvanuttaścarṣaṇīdhṛtiḥ

3.56

indramiddevatātaya indraṃ prayatyadhvare . indraṃ samīke vanino havāmaha indraṃ dhanasya sātaye

3.57

imā u tvā purūvaso giro vardhantu yā mama . pāvakavarṇāḥ śucayo vipaścito 'bhi stomairanūṣata

3.58

udu tye madhumattamā gira stomāsa īrate . satrājito dhanasā akṣitotayo vājayanto rathā iva

3.59

yathā gauro apā kṛtaṃ tṛṣyannetyaveriṇam . āpitve naḥ prapitve tūyamā gahi kaṇveṣu su sacā piba

3.60

bhagaṃ na hi tvā yaśasaṃ vasuvidamanu śūra carāmasi

3.61

yā indra bhuja ābharaḥ svarvāṃ asurebhyaḥ . stotāraminmaghavannasya vardhaya ye ca tve vṛktabarhiṣaḥ

3.62

pra mitrāya prāryamṇe sacathyamṛtāvaso . varūthye3 varuṇe chandyaṃ vacaḥ stotraṃ rājasu gāyata

3.63

abhi tvā pūrvapītaya indra stomebhirāyavaḥ . samīcīnāsa ṛbhavaḥ samasvaranrudrā gṛṇanta pūrvyam

3.64

pra va indrāya bṛhate maruto brahmārcata . vṛtraṃ hanati vṛtrahā śatakraturvajreṇa śataparvaṇā

3.65

bṛhadindrāya gāyata maruto vṛtrahantamam . yena jyotirajanayannṛtāvṛdho devaṃ devāya jāgṛvi

3.66

indra kratuṃ na ā bhara pitā putrebhyo yathā . śikṣā ṇo asminpuruhūta yāmani jīvā jyotiraśīmahi

3.67

mā na indra parā vṛṇagbhavā naḥ sadhamādye . tvaṃ na ūtī tvaminna āpyam mā na indra parā vṛṇak

3.68

vayaṃ gha tvā sutāvanta āpo na vṛktabarhiṣaḥ . pavitrasya prasravaṇeṣu vṛtrahanpari stotāra āsate

3.69

yadindra nāhuṣīṣvā ojo nṛmṇaṃ ca kṛṣṭiṣu . yadvā pañca kṣitīnāṃ dyumnamā bhara satrā viśvāni pauṃsyā

3.70

vṛṣā hyugra śṛṇviṣe parāvati vṛṣo arvāvati śrutaḥ

3.71

yacchakrāsi parāvati yadarvāvati vṛtrahan . atastvā gīrbhirdyugadindra keśibhiḥ sutāvāṃ ā vivāsati

3.72

abhi vo vīramandhaso madeṣu gāya girā mahā vicetasam . indraṃ nāma śrutyaṃ śākinaṃ vaco yathā

3.73

indra tridhātu śaraṇaṃ trivarūthaṃ svastaye . chardiryaccha maghavadbhyaśca mahyaṃ ca yāvayā didyumebhyaḥ

3.74

śrāyanta iva sūryaṃ viśvedindrasya bhakṣata . vasūni jāto janimānyojasā prati bhāgaṃ na dīdhimaḥ

3.75

na sīmadeva āpa tadiṣaṃ dīrghāyo martyaḥ . etagvā cidyā etaśo yuyojata indro harī yuyojate

3.76

ā no viśvāsu havyamindraṃ samatsu bhūṣata . upa brahmāṇi savanāni vṛtrahanparamajyā ṛcīṣama

3.77

tavedindrāvamaṃ vasu tvaṃ puṣyasi madhyamam . satrā viśvasya paramasya rājasi na kiṣṭvā goṣu vṛṇvate

3.78

kveyatha kvedasi purutrā ciddhi te manaḥ . alarṣi yudhma khajakṛtpurandara pra gāyatrā agāsiṣuḥ

3.79

vayamenamidā hyopīpemeha vajriṇam . tasmā u adya savane sutaṃ bharā nūnaṃ bhūṣata śrute

3.80

viśvāsāṃ tarutā pṛtanānāṃ jyeṣṭhaṃ yo vṛtrahā gṛṇe

3.81

yata indra bhayāmahe tato no abhayaṃ kṛdhi . maghavañchagdhi tava tanna ūtaye vi dviṣo vi mṛdho jahi

3.82

vāstoṣpate dhruvā sthūṇāṃ satraṃ somyānām . drapsaḥ purāṃ bhettā śaśvatīnāmindro munīnāṃ sakhā

3.83

baṇmahāṃ asi sūrya baḍāditya mahāṃ asi . mahaste sato mahimā paniṣṭama mahnā deva mahāṃ asi

3.84

aśvī rathī surūpa idgomāṃ yadindra te sakhā . śvātrabhājā vayasā sacate sadā candrairyāti sabhāmupa

3.85

yaddyāva indra te śataṃ śataṃ bhūmīruta syuḥ . na tvā vajrintsahasraṃ sūryā anu na jātamaṣṭa rodasī

3.86

yadindra prāgapāgudagnyagvā hūyase nṛbhiḥ . simā purū nṛṣūto asyānave 'si praśardha turvaśe

3.87

kastamindra tvā vasavā martyo dadharṣati . śraddhā hi te maghavanpārye divi vājī vājaṃ siṣāsati

3.88

indrāgnī apādiyaṃ pūrvāgātpadvatībhyaḥ . hitvā śiro jihvayā rārapaccarattriṃśatpadā nyakramīt

3.89

indra nedīya edihi mitamedhābhirūtibhiḥ . ā śaṃ tama śaṃ tamābhirabhiṣṭibhirā svāpe svāpibhiḥ

3.90

āśuṃ jetāraṃ hetāraṃ rathītamamatūrtaṃ tugriyāvṛdham

3.91

mo ṣu tvā vāghataśca nāre asmanni rīraman . ārāttādvā sadhamādaṃ na ā gahīha vā sannupa śrudhi

3.92

sunota somapāvne somamindrāya vajriṇe . pacatā paktīravase kṛṇudhvamitpṛṇannitpṛṇate mayaḥ

3.93

yaḥ satrāhā vicarṣaṇirindraṃ taṃ hūmahe vayam . sahasramanyo tuvinṛmṇa satpate bhavā samatsu no vṛdhe

3.94

śacībhirnaḥ śacīvasū divānaktaṃ diśasyatam . mā vāṃ rātirupa dasatkadā ca nāsmadrātiḥ kadā ca na

3.95

yadā kadā ca mīḍhuṣe stotā jareta martyaḥ . ādidvandeta varuṇaṃ vipā girā dharttāraṃ vivratānām

3.96

pāhi gā andhaso mada indrāya medhyātithe . yaḥ sammiślo haryoryo hiraṇyaya indro vajrī hiraṇyayaḥ

3.97

ubhayaṃ śṛṇavacca na indro arvāgidaṃ vacaḥ . satrācyā maghavāntsomapītaye dhiyā śaviṣṭha ā gamat

3.98

mahe ca na tvādrivaḥ parā śulkāya dīyase . na sahasrāya nāyutāye vajrivo na śatāya śatāmagha

3.99

vasyāṃ indrāsi me pituruta bhrāturabhuñjataḥ . mātā ca me chadayathaḥ samā vaso vasutvanāya rādhase