Prapāṭhaka 2

2.1

puru tvā dāśivāṃ voce 'riragne tava svidā . todasyeva śaraṇa ā mahasya

2.2

pra hotre pūrvyaṃ vaco 'gnaye bharatā bṛhat . vipāṃ jyotīṃṣi bibhrate na vedhase

2.3

agne vājasya gomata īśānaḥ sahaso yaho . asme dhehi jātavedo mahi śravaḥ

2.4

agne yajiṣṭho adhvare devāṃ devayate yaja . hotā mandro vi rājasyati sridhaḥ

2.5

jajñānaḥ sapta mātṛbhirmedhāmāśāsata śriye . ayaṃ dhruvo rayīṇāṃ ciketadā

2.6

uta syā no divā matiraditirūtyāgamat . sā śantātā mayaskaradapa sridhaḥ

2.7

īḍiṣvā hi pratīvyā3ṃ yajasva jātavedasam . cariṣṇudhūmamagṛbhītaśociṣam

2.8

na tasya māyayā ca na ripurīśīta martyaḥ . yo agnaye dadāśa havyadātaye

2.9

apa tyaṃ vṛjinaṃ ripuṃ stenamagne durādhyam . daviṣṭhamasya satpate kṛdhī sugam

2.10

śruṣṭyagne navasya me stomasya vīra viśpate . ni māyinastapasā rakṣaso daha

2.11

upastutāso agnaye

2.12

pra so agne tavotibhiḥ suvīrābhistarati vājakarmabhiḥ . yasya tvaṃ sakhyamāvitha

2.13

taṃ gūrdhayā svarṇaraṃ devāso devamaratiṃ dadhanvire . devatrā havyamūhiṣe

2.14

mā no hṛṇīthā atithiṃ vasuragniḥ purupraśasta eśaḥ . yaḥ suhotā svadhvaraḥ

2.15

bhadro no agnirāhuto bhadrā rātiḥ subhaga bhadro adhvaraḥ . bhadrā uta praśastayaḥ

2.16

yajiṣṭhaṃ tvā vavṛmahe devaṃ devatrā hotāramamartyam . asya yajñasya sukratum

2.17

tadagne dyumnamā bhara yatsāsāhā sadane kaṃ cidatriṇam . manyuṃ janasya dūḍhyam

2.18

yadvā u viśpatiḥ śitaḥ suprīto manuṣo viśe . viśvedagniḥ prati rakṣāṃsi sedhati

2.19

tadvo gāya sute sacā puruhūtāya satvane . śaṃ yadgave na śākine

2.20

yaste nūnaṃ śatakratavindra dyumnitamo madaḥ . tena nūnaṃ made madeḥ

2.21

gāva upa vadāvaṭe mahi yajñasya rapsudā . ubhā karṇā hiraṇyayā

2.22

aramaśvāya gāyata śrutakakṣāraṃ gave . aramindrasya dhāmne

2.23

tamindraṃ vājayāmasi mahe vṛtrāya hantave . sa vṛṣā vṛṣabho bhuvat

2.24

tvamindra balādadhi sahaso jāta ojasaḥ . tvaṃ sanvṛṣanvṛṣedasi

2.25

yajña indramavardhayadyadbhūmiṃ vyavartayat . cakrāṇa opaśaṃ divi

2.26

yadindrāhaṃ tathā tvamīśīya vasva eka it . stotā me gosakhā syāt

2.27

panyaṃpanyamitsotāra ā dhāvata madyāya . somaṃ vīrāya śūrāya

2.28

idaṃ vaso sutamandhaḥ pibā supūrṇamudaram . anābhayinrarimā te

2.29

astārameṣi sūrya

2.30

yadadya kacca vṛtrahannudagā abhi sūrya . sarvaṃ tadindra te vaśe

2.31

ya ānayatparāvataḥ sunītī turvaśaṃ yadum . indraḥ sa no yuvā sakhā

2.32

mā na indrābhyā ' '3 diśaḥ sūro aktuṣvā yamata . tvā yujā vanema tat

2.33

endra sānasiṃ rayiṃ sajitvānaṃ sadāsaham . varṣiṣṭhamūtaye bhara

2.34

indraṃ vayaṃ mahādhana indramarbhe havāmahe . yujaṃ vṛtreṣu vajriṇam

2.35

apibatkadruvaḥ sutamindraḥ sahasrabāhve . tatrādadiṣṭa pauṃsyam

2.36

vayamindra tvāyavo 'bhi pra nonumo vṛṣan . viddhī tvā3sya no vaso

2.37

ā ghā ye agnimindhate stṛṇanti barhirānuṣak . yeṣāmindro yuvā sakhā

2.38

bhindhi viśvā apa dviṣaḥ pari bādho jahī mṛdhaḥ . vasu spārhaṃ tadā bhara

2.39

ni yāmaṃ citramṛñjate

2.40

ima u tvā vi cakṣate sakhāya indra sominaḥ . puṣṭāvanto yathā paśum

2.41

samasya manyave viśo viśvā namanta kṛṣṭayaḥ . samudrāyeva sindhavaḥ

2.42

devānāmidavo mahattadā vṛṇīmahe vayam . vṛṣṇāmasmabhyamūtaye

2.43

somānāṃ svaraṇaṃ kṛṇuhi brahmaṇaspate . kakṣīvantaṃ ya auśijaḥ

2.44

bodhanmanā idastu no vṛtrahā bhūryāsutiḥ . śṛṇotu śakra āśiṣam

2.45

adya no deva savitaḥ prajāvatsāvīḥ saubhagam . parā duḥṣvapnyaṃ suva

2.46

kvā3sya vṛṣabho yuvā tuvigrīvo anānataḥ . brahmā kastaṃ saparyati

2.47

upahvare girīṇāṃ saṅgame ca nadīnām . dhiyā vipro ajāyata

2.48

pra samrājaṃ carṣaṇīnāmindraṃ stotā navyaṃ gīrbhiḥ . naraṃ nṛṣāhaṃ maṃhiṣṭham

2.49

apādu śiprayandhasaḥ sudakṣasya prahoṣiṇaḥ . indrorindro yavāśiraḥ

2.50

imā u tvā puruvaso 'bhi pra nonavurgiraḥ . gāvo vatsaṃ na dhenavaḥ

2.51

atrāha goramanvata nāma tvaṣṭurapīcyam . itthā candramaso gṛhe

2.52

yadindro anayadrito mahīrapo vṛṣantamaḥ . tatra pūṣābhuvatsacā

2.53

gaurdhayati marutāṃ śravasyurmātā maghonām yuktā vahnī rathānām

2.54

upa no haribhiḥ sutaṃ yāhi madānāṃ pate . upa no haribhiḥ sutam

2.55

iṣṭā hotrā asṛkṣatendraṃ vṛdhanto adhvare . acchāvabhṛthamojasā

2.56

ahamiddhi pituṣpari medhāmṛtasya jagraha . ahaṃ sūrya ivājani

2.57

revatīrnaḥ sadhamāda indre santu tuvivājāḥ . kṣumanto yābhirmadema

2.58

somaḥ pūṣā ca cetaturviśvāsāṃ sukṣitīnām . devatrā rathyorhitā

2.59

viśvāsāhaṃ śatakratuṃ maṃhiṣṭhaṃ carṣaṇīnām

2.60

pra va indrāya mādanaṃ haryaśvāya gāyata . sakhāyaḥ somapāvne

2.61

vayamu tvā tadidarthā indra tvāyantaḥ sakhāyaḥ . kaṇvā ukthebhirjarante

2.62

indrāya madvane sutaṃ pari ṣṭobhantu no giraḥ . arkamarcantu kāravaḥ

2.63

ayaṃ ta indra somo nipūto adhi barhiṣi . ehīmasya dravā piba

2.64

surūpakṛtnumūtaye sudughāmiva goduhe . juhūmasi dyavidyavi

2.65

abhi tvā vṛṣabhā sute sutaṃ sṛjāmi pītaye . tṛmpā vyaśnuhī madam

2.66

ya indra camaseṣvā somaścamūṣu te sutaḥ . pibedasya tvamīśiṣe

2.67

yogeyoge tavastaraṃ vājevāje havāmahe . sakhāya indramūtaye

2.68

ā tvetā ni ṣīdatendramabhi pra gāyata . sakhāyaḥ stomavāhasaḥ

2.69

pibā tvā3sya girvaṇaḥ

2.70

mahāṃ indraḥ puraśca no mahitvamastu vajriṇe . dyaurna prathinā śavaḥ

2.71

ā tū na indra kṣumantaṃ citraṃ grābhaṃ saṃ gṛbhāya . mahāhastī dakṣiṇena

2.72

abhi pra gopatiṃ girendramarca yathā vide . sūnuṃ satyasya satpatim

2.73

kayā naścitra ā bhuvadūtī sadāvṛdhaḥ sakhā . kayā śaciṣṭhayā vṛtā

2.74

tyamu vaḥ satrāsāhaṃ viśvāsu gīrṣvāyatam . ā cyāvayasyūtaye

2.75

sadasaspatimadbhutaṃ priyamindrasya kāmyam . saniṃ medhāmayāsiṣam

2.76

ye te panthā adho divo yebhirvyaśvamairayaḥ . uta śroṣantu no bhuvaḥ

2.77

bhadraṃbhadraṃ na ā bhareṣamūrjaṃ śatakrato . yadindra mṛḍayāsi naḥ

2.78

asti somo ayaṃ sutaḥ pibantyasya marutaḥ . uta svarājo aśvinā

2.79

vanvānāsaḥ suvīryam

2.80

na ki devā inīmasi na kyā yopayāmasi . mantraśrutyaṃ carāmasi

2.81

doṣo āgādbṛhadgāya dyumadgāmannātharvaṇa . stuhi devaṃ savitāram

2.82

eṣo uṣā apūrvyā vyucchati priyā divaḥ . stuṣe vāmaśvinā bṛhat

2.83

indro dadhīco asthabhirvṛtrāṇyapratiṣkutaḥ . jaghāna navatīrnava

2.84

indrehi matsyandhaso viśvebhiḥ somaparvabhiḥ . mahāṃ abhiṣṭirojasā

2.85

ā tū na indra vṛtrahannasmākamardhamā gahi . mahānmahībhirūtibhiḥ

2.86

ojastadasya titviṣa ubhe yatsamavartayat . indraścarmeva rodasī

2.87

ayamu te samatasi kapota iva garbhadhim . vacastaccinna ohase

2.88

vāta ā vātu beṣajaṃ śambhu mayobhu no hṛde . pra na ayūṃṣi tāriṣat

2.89

na kiḥ sa dabhyate janaḥ

2.90

gavyo ṣu ṇo yathā purāśvayota rathayā . varivasyā mahonām

2.91

imāsta indra pṛśnayo ghṛtaṃ duhata āśiram . enāmṛtasya pipyuṣīḥ

2.92

ayā dhiyā ca gavyayā puruṇāmanpuruṣṭuta . yatsomesoma ābhuvaḥ

2.93

pāvakā naḥ sarasvatī vājebhirvājinīvatī . yajñaṃ vaṣṭu dhiyāvasuḥ

2.94

ka imaṃ nāhuṣīṣvā indraṃ somasya tarpayāt . sa no vasūnyā bharāt

2.95

ā yāhi suṣumā hi ta indra somaṃ pibā imam . edaṃ barhiḥ sado mama

2.96

mahi trīṇāmavarastu dyukṣaṃ mitrasyāryamṇaḥ . durādharṣaṃ varuṇasya

2.97

tvāvataḥ purūvaso vayamindra praṇetaḥ . smasi sthātarharīṇām